Wasimamizi wa hospitali za umma na kibinafsi watatozwa faini ya hadi Sh2 milioni kwa kuwazuilia wagonjwa wanaopaswa kuruhusiwa kuondoka au miili ya marehemu kwa sababu ya madeni ya matibabu.

Hatua hiyo imependekezwa katika Mswada wa Marekebisho ya Sheria ya Afya wa 2024, ambao umepitishwa kwa kauli moja na wabunge na sasa unasubiri kutiwa saini na Rais William Ruto ili kuwa sheria.

Mswada huo uliodhaminiwa na Mwakilishi wa Wanawake wa Kirinyaga, Njeri Maina, unamulika hospitali zinazokataa kumhudumia mgonjwa au kumzuia kuondoka kwa sababu hajalipa bili au ameshindwa kutoa amana ya matibabu.

Pia unakataza hospitali kuzuilia miili ili kulazimisha familia kulipa gharama za matibabu.

Mwenyekiti wa Kamati ya Afya ya Bunge, James Nyikal, alisema sheria hiyo itasaidia familia maskini ambazo zimekuwa zikiteseka baada ya wapendwa wao kuzuiliwa hospitalini kutokana na madeni.

Mbunge wa Mwingi Magharibi Charles Ngunya alihoji sababu za hospitali kuzuilia miili ya marehemu, akisema kitendo hicho si cha kiafya.

Hata hivyo, mswada huo unaruhusu hospitali kuwataka wagonjwa au jamaa zao kutia saini hati ya ahadi ya kulipa deni kabla ya mgonjwa au mwili kuruhusiwa kuondoka.

Hati hiyo itaeleza muda na utaratibu wa kulipa deni na itakuwa na nguvu ya kisheria, hivyo hospitali zinaweza kuishtaki familia isipotimiza ahadi.