MAASKOFU wa Kanisa Katoliki wamewakosoa wagombeaji wa urais katika uchaguzi mkuu wa 2027 kwa kutumia matamshi ya kikabila, matusi na uchochezi, wakionya kuwa lugha hiyo inaweza kuzua machafuko nchini.

Viongozi hao wa kanisa walisema wanasiasa wanapaswa kuzingatia athari za kauli zao kwa taifa, hasa wakati huu ambapo joto la kisiasa linaanza kupanda kuelekea uchaguzi mkuu.Katika taarifa iliyotolewa jana katika Kituo cha John Cardinal Njue Pastoral Centre, Embu, waliwataka wagombeaji na wafuasi wao kuwa waangalifu wanapozungumza hadharani na kuepuka lugha inayodhalilisha wapinzani.

Taarifa hiyo ilisomwa na Mwenyekiti wa Baraza la Maaskofu Katoliki nchini (KCCB), Askofu Mkuu Maurice Muhatia Makumba, akiwa pamoja na naibu wake, Askofu Mkuu Anthony Muheria.“Tunawakumbusha wanasiasa kuwa kampeni kali hazipaswi kuwa kisingizio cha kutumia lugha inayogawanya wananchi. Maneno ya chuki yanaweza kuharibu amani tuliyo nayo,” walisema.

Katika siku za hivi majuzi, Rais William Ruto, aliyekuwa naibu wake Rigathi Gachagua na Rais mstaafu Uhuru Kenyatta wamekuwa wakirushiana vijembe, huku baadhi ya kauli zao zikionekana kulenga watu binafsi badala ya kujadili sera na masuala yanayowakabili Wakenya.

Maaskofu walisema matumizi ya matusi na lugha ya kudhalilisha yanatoa mfano mbaya kwa watoto na vijana wanaotazama viongozi kama vielelezo vya tabia njema.

Walisema pia kuwa ingawa kipindi rasmi cha kampeni bado hakijaanza, wanaotafuta nyadhifa za kisiasa wanapaswa kuonyesha ustaarabu katika maneno na mienendo yao.Walitoa wito kwa wagombeaji wote wa urais kutoa ahadi hadharani ya kudumisha amani na kuheshimu wapinzani wao wakati wa kampeni.

Maaskofu hao pia walilaani visa vya utekaji nyara, watu kutoroshwa kwa lazima na vitisho dhidi ya Wakenya, wakieleza wasiwasi kuwa baadhi ya matukio hayo yanahusisha watu wenye silaha wanaoshirikiana na maafisa wa polisi.

Walisema katika baadhi ya visa, polisi wamekuwa wakitazama wahuni wakivuruga watu wanaotumia haki yao ya kujieleza. Walisisitiza kuwa asasi za kiraia, vyombo vya habari na watetezi wa haki za binadamu wana haki ya kuibua masuala ya kitaifa na kutoa maoni yao bila kutishwa au kunyanyaswa.

“Tunalaani ukiukaji wa uhuru wa kujieleza na kujumuika. Watu wanapaswa kufurahia haki zao kama sehemu muhimu ya kujenga demokrasia imara,” walisema.Kuhusu uchaguzi wa 2027, walitaka Tume Huru ya Uchaguzi na Mipaka (IEBC) kuhakikisha mchakato wa uchaguzi ni huru, wa haki na wa kuaminika.

Walisema tume hiyo inapaswa kujenga imani ya wananchi na kujilinda dhidi ya shinikizo kutoka kwa wanasiasa na watu wenye ushawishi wanaoweza kutaka kuingilia kazi yake.Pia walionya dhidi ya miswada inayoweza kuzua mashaka kuhusu uwazi wa uchaguzi, hasa pendekezo la kupiga marufuku matangazo ya moja kwa moja ya kujumlisha kura za urais.

Walisema makosa yaliyotokea katika chaguzi zilizopita, yaliyosababisha mizozo, vifo na uharibifu wa mali, hayapaswi kurudiwa.Katika hatua nyingine, maaskofu hao wamepiga marufuku wanasiasa kutoa hotuba za kisiasa katika makanisa yote ya Katoliki nchini.Askofu Mkuu Muheria alisema makanisa yanapaswa kuwa maeneo ya ibada, upendo na umoja, bila kujali misimamo ya kisiasa ya waumini.

Alisema wanasiasa wana majukwaa mengine ya kutafuta kura, yakiwemo mikutano ya hadhara, mikutano ya kijamii na vyombo vya habari.“Tunawaagiza mapadre wote kuhakikisha kuwa makanisa hayatumiki kama majukwaa ya kampeni za kisiasa,” alisema.

Maaskofu hao pia waliwahimiza Wakenya kutathmini rekodi ya viongozi, kusikiliza sera zao na kufanya maamuzi ya busara badala ya kushawishiwa na kelele za kampeni.