Hata baada ya kuhukumiwa kifungo cha miaka 200 gerezani pasta Paul Mackenzie bado anaandamwa na kivuli cha maafa ya Shakahola,

Licha ya kuandika historia nchini Kenya kwa kuhukumiwa kifungo kirefu kiasi hicho, hukumu hiyo haijamaliza masaibu yake mahakamani.

Bado anakabiliwa na kesi nyingine zinazotokana na vifo vya zaidi ya wafuasi 450 wa kanisa lake la Good News International Ministries (GNI).

Mackenzie alihukumiwa kifungo cha miaka 200 gerezani Novemba 6 baada ya kupatikana na hatia ya mauaji ya watu 191, wakiwemo watoto 190.

Hata hivyo, anakabiliwa na hukumu nyingine tatu katika kesi tofauti zinazohusiana na mkasa wa Shakahola.

Hukumu ya kwanza inatarajiwa kutolewa Novemba 24 katika Mahakama ya Hakimu Mkazi Mombasa, katika kesi ya kuua bila kukusudia inayomkabili Mackenzie na washtakiwa wenzake 95, kuhusiana na vifo vya watu 238.

Upande wa mashtaka unadai kuwa washtakiwa hao walishirikiana kutekeleza makubaliano ya pamoja ya kujiua, yaliyosababisha vifo vya watu hao katika msitu wa Shakahola kati ya Januari 2021 na Septemba 2023.

Novemba 25, Mahakama ya Watoto ya Tononoka inatarajiwa kutoa uamuzi katika kesi ya kuwatesa watoto, ambapo Mackenzie na washirika wake 34 wanakabiliwa na mashtaka yanayohusiana na ukatili, mateso na kuwanyima watoto haki ya kupata elimu.

Upande wa mashtaka unadai kuwa watoto waliondolewa shuleni, wakalazimishwa kufunga na kunyimwa mahitaji ya kimsingi. Baadhi yao walipigwa walipopinga mafundisho hayo au kujaribu kutoroka.

Katika kesi hiyo, upande wa mashtaka uliwasilisha mashahidi 76, wakiwemo watoto 13 waliosikilizwa kwa utaratibu maalumu wa kuwalinda.

Walionusurika walisimulia jinsi familia zao zilivyouza mali na kuhamia Shakahola baada ya kushawishiwa kuwa elimu ya kawaida ilikuwa dhambi. Waokoaji waliwapata watoto 27 wenye umri wa kati ya mwaka mmoja na nusu na miaka 17 msituni.

Baadhi yao walikuwa wamekonda kutokana na utapiamlo na walikuwa wameathirika kisaikolojia.

Upande wa mashtaka pia uliwasilisha matokeo ya uchunguzi wa miili ya marehemu yaliyoashiria kuwa wengi walikufa kutokana na njaa ya muda mrefu. Ripoti ya uchunguzi wa kidijitali yenye kurasa 74,658, iliyotokana na simu za Mackenzie, ilijumuisha mawasiliano kuhusu kufunga, unabii, Mpinga Kristo, Chapa ya Mnyama, Mpango Mpya wa Dunia na nambari 666.

Hukumu ya mwisho inatarajiwa kutolewa Novemba 26 katika Mahakama ya Shanzu, katika kesi inayohusu itikadi kali za kidini na uhalifu unaohusiana na ugaidi.

Mackenzie, mkewe Rhoda Mumbua Maweu na washtakiwa wengine 94 wanakabiliwa na mashtaka yakiwemo ya kueneza itikadi kali, kushiriki katika shughuli za uhalifu wa kupangwa, kuwezesha kitendo cha kigaidi na kumiliki machapisho yanayodaiwa kuchochea ugaidi.

Upande wa mashtaka unadai kuwa Mackenzie, Maweu, Mary Kadzo Kahindi na wengine 28 walijihusisha na shughuli za uhalifu wa kupangwa zilizohatarisha maisha ya watu na kusababisha vifo vya wafuasi 429.

Mackenzie na Smart Deri Mwakalama wanatuhumiwa kuwezesha kitendo cha kigaidi kwa kuwasafirisha wafuasi wa GNI kati ya msitu wa Shakahola na Malindi, hatua inayodaiwa kuwaweka katika hatari.

Mackenzie na mkewe pia wanakabiliwa na mashtaka ya kumiliki CD, DVD, vitabu na vipeperushi vinavyodaiwa kuchochea vitendo vya kigaidi.

Katika kesi hiyo, upande wa mashtaka uliwasilisha mashahidi 96 na vielelezo karibu 500. Ulieleza jinsi GNI ilivyotumika kueneza mafundisho yenye misimamo mikali kupitia televisheni, YouTube, WhatsApp na majukwaa mengine ya mawasiliano.

Wafuasi walihimizwa kuacha shule, kukataa matibabu, kujitenga na jamii na kuhamia Shakahola.

Wachunguzi walisema Mackenzie alinunua ekari 480 za ardhi Shakahola na kuzigawa katika makazi yaliyopewa majina ya kibiblia, yaliyokuwa yakisimamiwa na walinzi na wasimamizi.

Ushahidi uliwasilishwa kuwa miili 426 ilikuwa imefukuliwa katika eneo hilo, huku njaa ikitajwa kuwa chanzo kikuu cha vifo.

Upande wa mashtaka pia uliwasilisha ushahidi wa manusura na matokeo ya vipimo vya vinasaba vya DNA vilivyowaunganisha baadhi ya washtakiwa na watoto waliofariki.

Hukumu za Novemba 24, 25 na 26 zitaamua iwapo Mackenzie na wenzake wana hatia au hawana hatia ya mashtaka yanayowakabili.

Watakaopatikana na hatia watapewa nafasi ya kujitetea kabla ya kutolewa kwa adhabu, huku watakaopatikana hawana hatia wakiachiliwa.