Wasiwasi waingia kuhusu nyumba nafuu kuwa bila hatimiliki
SERIKALI imeharakisha mchakato wa kupata hatimiliki za ardhi inayotumiwa kujenga nyumba za gharama nafuu, baada ya kubainika kuwa zaidi ya asilimia 90 ya ardhi iliyotengewa mpango huo haina stakabadhi za umiliki.
Afisa Mkuu Mtendaji wa Bodi ya Nyumba za Gharama Nafuu Joe Mutugu, aliambia Kamati ya Bunge kuhusu Hesabu za Hazina Maalumu kuwa Baraza la Mawaziri limeidhinisha kuhamishwa kwa vipande 275 vya ardhi vinavyomilikiwa na serikali kuu kwa mpango huo.
Aidha, magavana katika kaunti ambako miradi inatekelezwa kwenye ardhi ya serikali za kaunti wametia saini makubaliano ya kuwezesha kutolewa kwa hatimiliki.
Serikali inatarajia barua nyingi kukamilika kufikia Disemba 2026.
“Serikali inafanya juhudi za kushughulikia hatimiliki ili kuhakikisha miradi yote inakuwa na umiliki salama wa ardhi,” akasema Bw Mutugu.
Mnamo Novemba 2025, Baraza la Magavana (COG) lilifichua kuwa ekari 486 kati ya 540 zilizokabidhiwa serikali kwa ajili ya miradi hiyo hazikuwa na hatimiliki.
Ripoti maalumu ya Mkaguzi Mkuu pia ilibaini kuwa miradi 269 kati ya iliyokaguliwa haikuwa na barua zozote za umiliki wa ardhi, hali iliyozua wasiwasi kuhusu usalama wa miradi hiyo kisheria.
Serikali inalenga kujenga nyumba 250,000 kila mwaka, huku zaidi ya nyumba 277,000 zikiwa katika hatua mbalimbali za ujenzi na 11,400 zikiwa zimekamilika.
Mpango huo unalenga makundi mbalimbali ya mapato, huku bei za nyumba zikiwa kati ya Sh840,000 na Sh5.76 milioni.
Hatua ya kupata hatimiliki inalenga pia kuhakikisha nyumba zinaweza kukabidhiwa kwa wanunuzi bila migogoro ya umiliki wa ardhi.