‘Mke wangu mtamu ila tamaa itaniua…’

NA PAULINE ONGAJI

Wanaume wengi siku hizi watakuambia kwamba japo wanawake ni wengi, kumpata mke ni sawa na kutafuta maziwa ya kuku. “Mara nyingi ukimpata binti mrembo, kuna uwezekano mkubwa kwamba tabia yake imeoza,” kaka mmoja akasema.

Lakini Herbert ni mmojawapo wa wanaume wachache waliobahatika, angaa kulingana na wanaomfahamu.Kaka huyu ana mke wa kipekee.

Mbali na kuwa mrembo, kitabia binti huyu ni malaika huku heshima yake ikimtambulisha hadi mbali. Pia, ana kisomo kwani ana shahada ya uzamifu kutoka chuo kikuu kimoja nchini Uingereza.

Aidha, mkewe Herbert ana kazi nzuri ambapo yeye ni mkurugenzi katika shirika moja la kimataifa. Licha ya kuelimika na kutaalumika, bibi huyu hajatelekeza majukumu yake kama mke na mama.

Kwa mfano kila siku lazima amuandalie mumewe chakula; iwe staftahi, chamcha au chajio.Vilevile, licha ya kuwa na mjakazi, yeye mwenyewe ndiye humfulia na kumpasia mumewe nguo na kumhakikishia usafi.

Kando na hayo, chumbani bibi huyu ni shujaa kwani Herbert amesikika akisifia weledi wake, na jinsi hufanya kila awezalo kumridhisha kimahaba.

Wanaume wengi watakwambia kwamba, endapo watakutana na mwanamke wa aina hii, basi watatulia kwani hawatakuwa na sababu ya kuramba vya nje.

Lakini kwa Herbert, utulivu haupo na hautawahi mjia mawazoni, kama anavyoeleza.

“Nimeshindwa kabisa kutulia na mwanamke mmoja kwani licha ya kuwa nimeoa na napata kila kitu mwanamume anahitaji katika uhusiano, bado najipata nikiwa na msukumo wa kurambaramba vya kando.

“Mke wangu ananifanyia kila kitu, na kusema kweli sipangi kumuacha hata siku moja, kumaanisha kwamba nafanya kila niwezalo kulinda penzi letu. Hata hivyo, nimeshindwa kupunguza kiu ya kuwaonja wanawake wengine huko nje.

“Starehe zangu hizi, mimi huzifanya siku na masaa rasmi ya kazi ili mke wangu asije akanishuku.

“Kwa hivyo, japo nina pesa nyingi, vituko vyangu hivi mimi huviendesha jijini Nairobi, na hasa katika maeneo ya haiba ya chini; sehemu ambazo hakuna anayeweza kunishuku.

“Mbali na hayo, kila ninapoagana na binti kukutana mahali fulani, siwezi enda na gari langu, na badala yake mimi hutumia teksi na kuhakikisha kwamba naacha afisini kila kitu kinachonitambulisha.

“Japo nina wapenzi wa kando, naheshimu nyumba na ndoa yangu ambapo sijawahi kumpa mke wangu nafasi ya kutoniamini.

“Na sio kwamba nataka kuridhishwa na yeyote ninayemuonja. Nia yangu ni kutaka kujua tu iwapo nitampata mwanamke mwingine mwenye uzuri sawa na wa mke wangu; kimaumbile, kitabia na hata kimahaba.

“Lakini katika miaka yangu hii yote ya shughuli hii, sijampata hata anayekaribia robo ya wema na uzuri wa mke wangu.

Kwa hivyo nitazidi kutafuta, na hata nikimpata, sio kwamba nitamuoa au kuwa na uhusiano naye. Nia yangu itakuwa kuwaridhisha marafiki zangu wanaoogopa kuoa wakidai wanawake wema hawapo.”