KISA cha wizi katika nyumba iliyo Likoni, kiligeuka ghafla baada ya polisi kumkamata mwathiriwa kwa madai ya kuhusika katika ujambazi.

Polisi walikuwa wamewasili katika eneo la tukio ambapo mwanamume alishambuliwa na majambazi nyumbani kwake.

Walipoenda hapo, hawakutarajia kupata bidhaa zilizoibwa na silaha butu zenye madoa ya damu zilizofichwa kwenye dari.

Mshukiwa huyo mwenye umri wa miaka 33, ambaye ni mfanyabiashara anayeendesha huduma mbalimbali za boda boda katika eneo hilo, alikamatwa baada ya polisi kugundua rundo la vifaa vya elektroniki vinavyoaminika kuwa vya wizi nyumbani kwake katika eneo la Timbwani mnamo Jumamosi.

Kwa mujibu wa Kamanda wa Polisi wa Kaunti ya Mombasa Peter Kimani, mshukiwa huyo alikuwa ameficha simu 61 zilizoibwa, runinga mbili, mapanga manne na vitu vingine vilivyoibiwa kwenye dari ya nyumba yake.

“Haya ni mafanikio makubwa katika juhudi zetu za kupambana na uhalifu Likoni. Mshukiwa atakabiliwa na mashtaka mengi, ikiwa ni pamoja na wizi na vurugu. Tuna mashtaka 61 tofauti dhidi yake yanayohusiana na simu na vifaa vya elektroniki vilivyoibiwa,” alisema Bw Kimani.

Maafisa wanashuku kuwa mtu huyo alishambuliwa na wenzake wa genge la wizi kwa sababu ya kutoelewana.

Inasemekana genge hilo lilivamia nyumba yake mapema na kumwacha akiwa amejeruhiwa vibaya.

Licha ya majeraha yake, mshukiwa alitafuta matibabu, na polisi waliweza kumkamata wakati akipokea matibabu.

Bw Kimani alimtaka yeyote aliyepoteza simu au vifaa vyake vya elektroniki katika wizi wa hivi majuzi kutembelea Kituo cha Polisi cha Inuka ili kubaini na kudai mali zao zilizoibwa.

“Hii ni hatua muhimu katika kuvunja mitandao ya uhalifu inayofanya kazi katika eneo hili. Tunawasihi wakaazi kuripoti shughuli yoyote ya kutiliwa shaka ili kusaidia katika uchunguzi wetu,” alisema.

Aidha, moja ya mapanga yaliyotapakaa damu yaliyopatikana wakati wa uvamizi huo yatafanyiwa uchunguzi wa DNA huku wachunguzi wakiendelea kuwasaka washukiwa zaidi wanaohusishwa na kundi hilo.

Kuongezeka kwa wimbi la uhalifu unaolenga simu za rununu kumeshuhudiwa katika sehemu za Kaunti ya Mombasa katika miezi ya hivi karibuni.

Katika baadhi ya matukio, waathiriwa wameripoti kuwa simu zao zilizoibwa zilidukuliwa na kisha watu wakahadaiwa kutuma pesa ambazo zilitolewa na wahalifu.

Kwingineko, mwanamke aliyejeruhiwa vibaya katika tukio la kupigwa risasi eneo la Vyemani, Likoni, wiki mbili zilizopita alifariki kutokana na majeraha yake katika Hospitali Kuu ya Mafunzo na Rufaa ya Pwani.

Mary Trizer, ambaye alipigwa na risasi bila kukusudiwa wakati wa ugomvi kati ya afisa wa kijeshi na mhudumu wa bodaboda, alifariki Jumamosi asubuhi.

Kisa hicho cha Januari 3, ilishtua jamii ya eneo hilo. Kwa mujibu wa mashahidi, ugomvi kati ya watu hao wawili uliongezeka haraka, huku afisa huyo wa kijeshi akidaiwa kuchomoa bunduki na kufyatua risasi.

Mbunge wa Likoni, Bi Mishi Mboko, alidai haki kwa Mercy. Alihoji jinsi afisa wa kijeshi alimiliki bunduki aina ya AK47, ambayo inadaiwa ilitumika katika ufyatuaji risasi huo.