Katika wakati ambapo migogoro kati ya binadamu na wanyamapori inaongezeka, Kenya imeandaa mkutano mkubwa wa kubadilishana uzoefu wa uhifadhi wa bioanuwai kati ya China na Afrika, ukiwa na lengo la kuimarisha juhudi za kulinda wanyamapori, mazingira na jamii zinazotegemea maliasili.

Mkutano huo wa China-Africa Biodiversity Conservation Exchange and Training, uliofanyika Nairobi sambamba na maonyesho ya kimataifa ya “Eagle City”, uliwaleta pamoja wataalamu wa uhifadhi, maafisa wa serikali, watafiti na mashirika ya kijamii kutoka China, Kenya na Tanzania.

Kenya na Tanzania zinashirikiana katika maeneo kadhaa ya uhifadhi wa bioanuwai, jambo linaloruhusu wanyamapori kuhama kwa uhuru kupitia njia zao za asili katika kaunti za Kajiado na Narok.

Washiriki wa mkutano huo walijadili mbinu mbalimbali za kukabiliana na vitisho vinavyoongezeka dhidi ya bioanuwai. Miongoni mwa masuala yaliyopewa kipaumbele ni uhifadhi unaoshirikisha jamii, matumizi ya teknolojia kulinda wanyamapori na elimu ya mazingira kwa vijana.

Mwenyekiti wa Adept Conservation Network, Eston Murithim, alisema jamii za wenyeji zina mchango mkubwa katika kulinda misitu, mito na maeneo tengefu.

Alisema shirika hilo hushirikiana na jamii kupitia mafunzo ya ujuzi, doria za mazingira, uzalishaji wa miche ya miti na programu za uhamasishaji wa mazingira.

“Mbinu hii inasaidia kupunguza migogoro kati ya binadamu na wanyamapori huku ikikuza kuishi kwa amani kati ya jamii na wanyama hao,” alisema Murithim.

Mwanzilishi wa Joy and Hope for Rural Community Foundation nchini Tanzania, Zakayo Lairumbe Kipuyo, alieleza kuwa taasisi yake imekuwa ikihusika katika urejeshaji wa misitu, ulinzi wa njia za kupita wanyamapori na vyanzo vya maji katika eneo la Arusha.

Alisema jamii pia zinasaidiwa kupata njia mbadala za kujipatia riziki zisizoathiri mazingira.

Kwa upande wake, mtafiti mwandamizi wa Huduma ya Wanyamapori Kenya (KWS), Dkt Duncan Aminga, aliwasilisha mfumo wa uhifadhi wa simba unaotumika Maasai Mara ambapo simba huvalishwa vifaa vya GPS kufuatilia mienendo yao.

Teknolojia hiyo husaidia kutoa tahadhari mapema kwa jamii wanapokaribia makazi ya watu, hivyo kupunguza mashambulizi dhidi ya mifugo na mauaji ya kulipiza kisasi dhidi ya simba.

Mtaalamu wa faru na duma katika Hifadhi ya Taifa ya Mara, Stephen Kenta, alisema vifaa vya kisasa kama kamera za miale ya joto, vitambulisho vya kielektroniki na kituo cha kisasa cha usimamizi vinatumika kulinda faru.

Naibu Mkurugenzi Mkuu wa Idara ya Mazingira ya Chongqing nchini China, Liu Ming, alisema China imepiga hatua kubwa katika uhifadhi wa bioanuwai kupitia ufuatiliaji wa viumbe, urejeshaji wa makazi yao na ushiriki wa umma.

Alitoa wito wa kuimarishwa kwa ushirikiano kati ya China na Afrika kupitia kubadilishana utaalamu, teknolojia na mafunzo ya wataalamu wa uhifadhi.

Katika mkutano huo, vifaa vya kisasa vya kufuatilia wanyamapori, vikiwemo kamera za infrared na vifaa vya kutambua sauti za ndege, vilitolewa kwa Hifadhi ya Taifa ya Maasai Mara na Adept Conservation Network.

Mkutano huo umefanyika wakati mamlaka nchini Kenya zikichunguza vifo vya tembo 18 katika mfumo ikolojia wa Amboseli kati ya Juni na Julai mwaka huu. Wakulima wanne wamekamatwa kuhusiana na madai ya kuhusika katika sumu iliyosababisha vifo hivyo.