LISHE: Jinsi ya kuandaa 'pilipili ya kupikwa'
Na DIANA MUTHEU
Muda wa kuandaa: Dakika 10
PILIPILI ni kiungo muhimu sana katika chakula kwa sababu huwa inaongeza ladha.
Hata hivyo, watu wengi hushindwa kula pilipili kwa hofu kuwa watawashwa sana. Hata hivyo, kuna mbinu kadhaa za kupunguza muwasho huo pasi na kutoa ladha kamili ya pilipili.
Vinavyohitajika
- Nyanya 3 kubwa
- Pilipili 12
- Kitunguu 1 kubwa
- Tangawizi kipande kikubwa
- Kitunguu saumu vipande 3 vikubwa
- Chumvi kijiko (kidogo) 1
- Mafuta ya kupika vijiko (vikubwa) 3
- Sufuria
- Siki (Vinegar)
Jinsi ya kuandaa
Katakata nyanya (waeza toa maganda), pilipili na kitunguu. Saga tangawizi yako na kitunguu saumu.
Katika sufuria, weka mafuta na uiache ipate moto. Kisha ongeza viungo vyako vyote ndani ya sufuria, ifunike na uwache mchanganyoo huo uive kwa moto wa wastani.
Ongeza chumvi, koroga kisha uiache itokote kwa sekunde 30.
Epua kisha ufurahie pilipili yako na chakula chochote kile ukipendacho.
Ikibaki, tia katika mkebe, ongeza vinegar kisha uiweke ndani ya friji.
Vinegar husaidia kuhifadhi ladha ya pilipili na kusaidia pia mchanganyo huo usiharibike haraka.
Kama una uwezo wa kupika pilipili yako kila wakati unapoandaa chakula, basi unaweza kupunguza idadi ya kila kiungo.