MTU anapofariki huzuni kwa familia huwa kubwa sana. Hata hivyo, kwa wajane nchini Kenya, kipindi cha maombolezo kinaweza kuongezewa ugumu na changamoto za urithi. Ni muhimu kwa mjane kuelewa haki zake chini ya Sheria ya Urithi ya Kenya ili kuhakikisha anapata ulinzi wa kisheria anaostahili.

Leo katika makala haya, tunaangazia haki za wajane chini ya sheria hii, na jinsi wanavyoweza kulinda maslahi yao.

Sheria ya Urithi ya Kenya, inasimamia ugavi wa mali ya marehemu. Sheria hii inaweka kanuni na taratibu za kusimamia mali hiyo, ikiwemo haki za warithi kama vile wajane.

Chini ya sheria hii, mjane ana haki ya kupata sehemu ya mali ya mumewe aliyefariki. Sheria inamtambua mjane kama mtu anayemtegemea marehemu, na hivyo anastahili mgao wa mali hiyo. Sehemu anayopata mjane inategemea idadi ya watu wengine waliotegemea marehemu mumewe (kama watoto) na thamani ya mali iliyopo.

Mbali na haki ya mgao wa mali, mjane pia ana haki ya kusimamia mali ya marehemu kama msimamizi au msimamizi aliyeteuliwa,kupokea mgao wa mali kwa mahitaji yake ya kila siku (matunzo), kupinga au kuhoji ugavi wa mali endapo anahisi kutotendewa haki.

Licha ya ulinzi wa kisheria uliowekwa kwa wajane, wengi bado wanakumbana na matatizo makubwa katika kupata haki zao. Baadhi ya changamoto wanazopitia wajane ni kukosa uelewa wa haki zao chini ya sheria, kutishwa au kudhulumiwa na wanafamilia au watu wengine wenye maslahi, na ugumu wa kupata usaidizi au uwakilishi wa kisheria.

Kwa kuelewa haki zao na kutafuta msaada inapohitajika, wajane nchini Kenya wanaweza kulinda maslahi yao na kujihakikishia maisha bora wao na familia zao.

Kuelewa haki hizi ni hatua muhimu ya kuhakikisha maslahi yao yanalindwa.

Mjane ana haki ya kurithi mali ya marehemu mumewe ikiwemo ardhi, pesa, na mali nyingine, haki ya kupata sehemu ya mali ya marehemu, ambayo mara nyingi huwa ni theluthi moja au nusu ya mali, kulingana na hali kwa matunzo, ulinzi dhidi ya kufukuzwa kwa nguvu kutoka nyumba au mali aliyoishi na marehemu, haki ya kusaidiwa na wanafamilia wa marehemu, kama watoto na ndugu na haki ya kupata stakabadhi za mali, kama hatimiliki na stakabadhi nyingine muhimu.

Ukiwa mjane nchini Kenya, ni muhimu kufahamu haki zako chini ya sheria ya urithi. Haki hizi, zinalenga kulinda na kuhakikisha mjane anapata kile anachostahili. Hata hivyo, kutekeleza haki hizi si rahisi kila wakati, hasa unapoandamwa na upinzani kutoka kwa wanafamilia.

Ikiwa unakumbana na changamoto za kutekeleza haki zako kama mjane, tafuta usaidizi kutoka kwa wakili mwenye uzoefu atakayekusaidia kufuata utaratibu wa kisheria na kuhakikisha haki zako zinalindwa ipasavyo.