MATINEJA hufanya maamuzi mabaya bila kujali matokeo yake ya muda mrefu.

Wataalamu wanasema tineja yeyote ambaye anaweza kuishi katika ulimwengu wa kisasa bila kuathiriwa na dijitali anapaswa kushinda medali ya Olimpiki.

Utafiti mmoja uliochapishwa katika Jarida la Abnormal Psychology unaonyesha kuwa mfadhaiko miongoni mwa matineja uliongezeka kwa zaidi ya asilimia 60 kati ya 2009 na 2017.

Kwa watoto wenye umri wa miaka 12 hadi 13, viwango vya mfadhaiko viliongezeka kwa asilimia 47. Watafiti walibaini mwelekeo ule ule wa kuongezeka kwa watu kujiua, kujaribu kujiua, na dhiki ya kisaikolojia miongoni mwa vijana pia.

Sababu ya dhiki kwa kijana

Ingawa hawakuweza kubainisha kwa uwazi sababu ya dhiki hii kwa kijana, katika muhtasari wao, watafiti wanasema kuna haja ya utafiti zaidi kuelewa jukumu la teknolojia na matumizi ya mitandao ya kijamii kwa hali hii.

Hata hivyo, wanakubaliana kwamba kutokana na hali hii, matineja wanahitaji huruma katika kukabiliana na changamoto za dijitali. Hii inahusisha wazazi na walezi kujiweka katika hali ambayo wanaweza kuhisi kile matineja wanahisi,

Mwanasaikolojia Michele Borba, mwandishi wa kitabu UnSelfie: Why Empathetic Kids Succeed in Our All-About-Me World, anasema huruma ndiyo “msingi wa kuwa mtu mzima mwenye furaha, aliyerekebishwa vizuri na kufanikiwa. Huwafanya watoto wetu wapendwe na kujipenda zaidi, waweze kuajiriwa zaidi, wastahimilivu zaidi, viongozi bora zaidi, wanaoongozwa na dhamiri, na kuongeza muda wao wa kuishi.”

Kushinikizwa kupita kiasi

Kulingana na mtaalamu wa usalama wa Intaneti Richard Guerry, matineja hawafai kushinikizwa kupita kiasi wasiweze kutalii dijitali mbali wanafaa kuepushwa na wasiwasi.

Guerry, ambaye ni mwanzilishi wa Taasisi ya Responsible Online and Cellphone Communication (IROC2), anasema watoto wanahitaji kuhurumiwa wanapotumia teknolojia kwa sababu wanashikilia mamlaka juu ya sifa zao wenyewe na pia sifa za marafiki zao—na kwa muda mrefu — matokeo ya muda mrefu ya sifa mbaya mtandaoni yanaweza kuwa mabaya.

Huruma pia ni dawa ya unyanyasaji wa mtandaoni kwa sababu inaweza kuudhibiti kabla haujaanza.