Wanafunzi watatu wa Thika School for the Blind ni wajawazito

Na LAWRENCE ONGARO

KUNA haja ya kuwalinda wanafunzi walemavu hasa wasioona ili kuwaepusha na changamoto wanazopitia.

Afisa mkuu wa idara ya watoto kaunti ndogo ya Thika, Bi Dinnah Mwangi, amesikitika kuwa tayari kuna kesi tatu za wasichana wa shule ya upili ya Thika School for the blind, ambao ni wajawazito huku wakitarajia kujifungua hivi karibuni.

Kulingana na afisa huyo, wanafunzi hao wenye ulemavu wa kuona walibakwa na watu wasiowajua walipokuwa likizoni.

Alieleza kuwa wanafunzi wengi walemavu wanapitia masaibu mengi jambo ambalo linastahili kuchunguzwa na serikali.

Alitoa wito kwa serikali kuwaadhibu watu wanaovizia walemavu ili kuwadhulumu kimapenzi.

Aliyasema hayo akiwa katika shule ya Thika School for the blind Jumatano wakati wa kuadhimisha siku ya watoto nchini.

Aliiomba serikali kuingilia kati kuona ya kwamba wanafunzi walemavu wanashughulikiwa kwa njia ifaayo.

Alitoa wito kwa serikali kusambaza vifaa vya kisasa vya masomo katika shule za wanafunzi walemavu ili wawe na nafasi bora kama wale wa kawaida.

Hafla hiyo ilihudhuriwa na wanafunzi wapatao 400 ambao wengi wao walitoa wito kwa serikali kuwapa vifaa bora vya masomo.

Mwalimu mkuu wa shule hiyo Bi Margaret Karera alikiri kuwa kuna changamoto tele kwa walimu hasa wakati huu wa homa ya Covid-19.

“Wanafunzi walemavu wanapobaki peke yao katika mabweni huwa ni vigumu sana kuwafuatilia iwapo wanaweka nafasi miongoni mwao. Ni muhimu kuwafuatilia kwa karibu kila mara,” alisema Bi Karera.

Aliitaka serikali kusambaza vifaa bora vya kisasa ambavyo vitaambatana na masomo yao kwa wakati huu.

Aliitaka serikali kuwapa nafasi sawa wanafunzi walemavu na wale wa kawaida ili wote wasajili matokeo bora bila vizingiti.

Kilichomng’oa Sheffie Weru kazini chapata shahidi mpya, asema ni upuuzi tu

Na MWANGI MUIRURI

Kisa cha wapenzi wawili ambacho kimeishia kumng’oa kazini mtangazaji mwenye uzooefu mkubwa Shaffie Weru kutoka ajira ya Radio Africa Group kimechukua mwelekeo mpya baada ya shahidi kujitokeza akidai kiliripotiwa kwa njia isiyotilia maanani ukweli.

Katika kisa hicho, Bi Eunice Wangari anasemwa kuwa alikutana na Bw Moses Gatama katika mtandao wa Facebook na wakaamua kukutana ili wafahamiane zaidi.

Ripoti zinasema kuwa wawili hao walikutana katika nyumba ya Bw Gatama na ambapo kulizuka ufisi fulani kutoka kwa mwanamume huyo wa kutaka kuonja asali siku iyo hiyo, mrembo akikataa.

“Ndipo mvutano ulizuka na ulioishia mrembo huyo kurushwa nje ya gorofa la 12 la nyumba ya mwanamume huyo na ambapo alipata majeraha mabaya na kuishia kukamatwa kwa Bw Gatama,” ripoti hizo zikasema.

Sasa, Bw Paul Mugenda (pichani), akiwa ni Mkurugenzi wa Paris Group of Companies anasema kuwa Bw Gatama ni mwaajiriwa wake.

Bw Mugenda anaelezea kuwa kisa hicho kilitokea katika mojawapo ya afisi zilizoko katikati mwa Jiji la Nairobi.

Anasema kuwa ni kisa cha Jumapili iliyopita masaa ya jioni ambapo vipenzi hao wawili walinunua chakula na mivinyo na wakaamua kuingia afisini kujivinjari.

Anasema kuwa kama mwaajiri wa Bw Gatama, ni sera kuwa afisi hizo hazifai kuwa na wafanyakazi siku ya Jumapili, akilaumu walinzi kwa kukubali ukiukaji dhidi ya sera hiyo utekelezwe.

Anasema kuwa wawili hao walikunywa na wakalewa vibaya na ndipo kukazuka kisa kilichoishia Gatama kukamatwa na maafisa wa polisi wa Central, Nairobi.

Bw Mugenda anasema kitu cha kwanza alifanya baada ya kupokea habari hizo ni kumfuta kazi Bw Gatama kwa kukiuka sera za kampuni.

Bw Mugenda anasema kuwa Bw Gatama na Bi Wangari ni wapenzi wanaofahamiana vyema na kisa hicho chote ni cha kifamilia.

Bw Mugenda anasema kuwa wawili hao baada ya kulewa walianza kubishana na ndipo mwanamke huyo aliruka kutoka gorofa la 12 na akaangukia paa la gorofa la Tisa—hali ambayo pia inazua maswali kuhusu urefu huo na unusurike ukiwa mwanamke na ambaye ni mlevi, ikizingatiwa kuwa nyumba za gorofa hazijaezekwa kwa mabati au magondoro bali paa ni sawa na baranbara ya lami!

Katika hali hiyo, Bw Mugenda anashauri wanaoandika kuhusu suala hili wajiepushe na ukora wa kimawazo na ambao unapindua hali na kugeuza kisa kama hichi kuwa cha kushambulia wanaume kuwa ni wanyama.

“Wanaoandika hata hawajui kisa kilifanyika wapi na hakuna aliyekuwa ndani ya usiri huo wa wawili hao ndani ya afisi yangu ndio ajue mrembo alirushwa na hatimaye mbona hakuna nukuu za taarifa ya mlalamishi,” asema.

Ni habari hizo ambazo zilichambuliwa na Bw Shaffie na akaishia kufutwa kazi.

Shaffie akiwa na wenzake Studioni Neville Muasya na DJ Mfalme walianza kuchambua kisa hicho na ikawa moto.

Shaffie alisisitiza msimamo wake kwamba ikiwa wanawake wanataka kupata afueni ndani ya dunia ya mafisi, ni lazima wajiwekee vigezo vya kutangamana na kukumbatia uchumba.

Alisema kuwa ni lazima wanawake wajiangazie kama wasiopatikana kwa urahisi na ikiwa ni lazima wakutane kabla ya kuzoeana, iwe ni katika maeneo yasiyo pembeni na usiri hatari.

Hapo ndipo wasimamizi wa mitambo ya Homeboyz Radio baada ya Shaffie kukemewa katika mitandao ya kijamii waliamua kuwafuta wote watatu kazi.

Hii ilikuwa ni baada ya serikali kutoza kituo hicho faini ya Shilingi Moja Milioni na kupiga marufuku Shoo ya Shaffie ya Lift-Off kwa kipindi cha nusu mwaka na ikamwamrisha mtangazaji huyo aombe msamaha kwa mitambo na pia kwa vyombo vya habari.

Tayari Shaffie ako mahakamani akisaka fidia ya Sh21 Milioni kwa madai ya kufutwa kazi kwa njia haramu ambapo anadai alitumiwa ujumbe wa WhatsApp mwendo was aa 11 usiku hivyo basi kukosa urasmi unaofaa kuzingatiwa.

Kisa chote kikiangazia jinsi kutegemea habari zisizotimiza vigezo vya uadilifu wa maandalizi, ukosefu wa uchunguzi wa kina na wakubwa serikalini na katika makampuni ya kibinafsi kukimbia kutekeleza adhabu ili kujipa umaarufu…huishia kuvuruga kila safu ya mkondo wa haki.

mwangilink@gmail.com

DHULUMA ZA KIMAPENZI: Serikali yaitia adabu Homeboyz Radio

Na MARY WANGARI

MAMLAKA ya Mawasiliano ya Kenya (CAK) imechukua hatua za kinidhamu dhidi ya kampuni inayomiliki kituo cha Homeboyz Radio kutokana na matamshi yaliyotolewa na watangazaji wake yaliyovutia hisia kali nchini.

Akihutubia wanahabari jijini Nairobi, Mkurugenzi Mkuu wa CAK, Mercy Wanjau alisema kampuni hiyo imetozwa Sh1 milioni kama faini, baada ya watangazaji wake kumkejeli mhasiriwa wa dhuluma za kingono Jumatano.

“Mnamo Machi 26, 2021, Mamlaka ilipokuwa ikifanya kazi yake kama kawaida ya ukaguzi, iligundua kuwa Homeboyz Radio ilikuwa imetoa matamshi ya kudhalilisha dhidi ya wanawake katika kipindi chake cha asubuhi, Machi 25, 2021.”

“Matamshi hayo yalikuwa kinyume na kanuni kuhusu Sheria za Vipindi inayohitaji watangazaji kupeperusha vipindi vinavyozingatia maadili ya kijamii na kifamilia wakati wa saa zenye wasikilizaji wengi,”alisema Bi Wanjau.

Kando na faini, CAK imeamrisha shirika hilo kusitisha kipindi hicho mara moja kwa muda wa miezi sita hadi kituo hicho kitakapothibitisha kutimiza matakwa yote ya kisheria na kanuni za Mamlaka hiyo.

Aidha, kituo hicho kimeagizwa kupeperusha ombi la msamaha kwa mhasiriwa katika saa ambazo watu wengi husikiza kwa siku tano kuanzia jana, pamoja na kuchapisha tangazo la kuomba msamaha katika magazeti mawili maarufu nchini.

Kuhusu wafanyakazi wake, Mamlaka hiyo iliagiza wapatiwe mafunzo na kuhamasishwa kuhusu masuala ya kijinsia ambapo mafunzo hayo yatahitajika kuidhinishwa na Tume ya Kitaifa kuhusu Usawa wa Kijinsia na nakala yake kutumwa kwa CAK.

Wametakiwa pia kuhudhuria masomo kuhusu Kanuni za Vipindi yatakayoendeshwa na Mamlaka hiyo.Kituo hicho kimeagizwa kuhakikisha watangazaji wake wameidhinishwa na Baraza linalosimamia Vyombo vya Habari Nchini (MCK) na kutuma ushahidi wa kufuata masharti hayo kwa CAK.

Isitoshe, Homeboyz Radio imeamrishwa kufanyia marekebisho sera yake ya uhariri ili iambatane na matakwa ya sheria kuhusu jinsia.

Mkurugenzi huyo aliwaonya watangazaji dhidi ya kutoa matamshi ya ubaguzi kuhusu jinsia akisistiza kuwa suala hilo halikuwa kuhusu jinsia na kwamba hatua sawa na hizo za kinidhamu bado zingechukuliwa endapo mhasiriwa angekuwa mwanamume.

“Mamlaka inatilia maanani kanuni ya kujumuisha jinsia na kuheshimu tofauti katika maumbile. Watangazaji wanahimizwa kuzingatia uwajibikaji wa kiwango cha juu wanapofanya kazi yao na kujiepusha na ubaguzi wa kijinsia, kupigia debe visa vya wanaume kuwatendea ukatili wanawake na kueneza kasumba potovu dhidi ya wanawake na wanaume.”

“Mamlaka itaendelea kufuatilia kwa makini vipindi vinavyopeperushwa na vituo vya habari ili kuhakikisha vinazingatia sheria za sekta ya ICT pamoja na Sheria kuhusu Habari na Mawasiliano Kenya. Miongoni mwa hatua zilizochukuliwa na Homeboyz Radio ni pamoja na kuwaachisha kazi watangazaji hao watatu kwa kukosa nidhamu kazini,” ilisema taarifa kutoka kwa CAK.

Mwanaume akata mkewe miguu kwa kumtoroka

Na WYCLIFFE NYABERI

MWANAMKE katika Kaunti ya Kisii anauguza majeraha mabaya ya upanga hospitalini baada ya mumewe kumkata miguu akidai mke huyo alimwacha nyumbani kisha akaenda kuolewa kwingine.

Kisa hicho kilitokea katika kijiji cha Bomware, eneobunge la Mugirango Kusini.Kulingana na naibu chifu Robert Juma wa eneo husika, Bi Naomi Bosibori, 22, aliondoka nyumbani kwa mumewe James Oroko wiki tatu zilizopita kumtembelea shangaziye katika eneo la Etago.

Baada ya kukaa na shangazi kwa wiki moja, ilisemekana mwanamke huyo alienda kuishi na mwanamume mwingine hapo kijijini waliyejuana kwa kipindi hicho kifupi.

Haukupita muda mrefu kabla uvumi kuenea kwamba Bi Bosibori alikuwa amemwacha mumewe na kuolewa kwingine, kisha mumewe akapokea habari hizo.

Akiwa amebeba upanga mkali mnamo Ijumaa alasiri, mwanaume huyo alifunga safari hadi kwa boma ambapo Bi Naomi alikuwa ametorokea, na kumfuata chumbani kisha akaanza kumkatakata mwili mzima.

Alimdhuru sana miguuni kwa upanga kiasi cha kwamba miguu yake ilibaki imeshikiliwa na ngozi pekee. Mwathiriwa alikatwa vibaya pia mikononi.“Alipoona anamalizwa, alipiga ukemi mkali uliowavutia wanakijiji waliofika kumwokoa.”

Kwa huzuni waliyoona, raia walimgeukia mwanaume huyo na kuanza kumpiga kwa mawe na upanga waliompokonya. Kwa bahati nzuri nilifika mapema na kumwokoa jamaa huyo kutokana na hasira za wenyeji japo pia alipata majeraha kiasi,” akasema chifu.

Kwa ushirikiano wa chifu na maafisa wa polisi kutoka kituo cha Nyamaiya, wawili hao walikimbizwa hospitali ya kimisheni ya Tabaka kupata matibabu.Taifa Jumapili ilipofika hospitalini humo jana mchana, mwathiriwa alikuwa amehamishiwa hospitali nyingine kupokea matibabu maalumu.

“Hatungeweza kuyamudu majeraha yake kwa hivyo tuliwaelekeza waliokuja naye wakampeleke kwingine haraka iwezekanavyo,” akasema muuguzi aliyeomba jina lake libanwe kwa kuwa hana ruhusa ya kuongea na wanahabari.Kamanda wa polisi katika Kaunti ya Kisii, Bw Jebel Munene alisema kwa njia ya simu kuwa mwanaume huyo alikamatwa na atafunguliwa mashtaka pindi tu atakapoondoka hospitalini.

Polisi walihifadhi upanga uliotumika katika uovu huo na silaha nyingine zitakazotumika kama ushahidi dhidi yake atakapofikishwa mahakamani.

Siombi radhi, Wambua ni dume katili, Nzilani sasa asema

NA PIUS MAUNDU

Kwa mtu aliyejipata katikati ya zogo la kifamilia lililosambaa kote nchini, Jackline Nzilani anaonekana mwenye utulivu mwingi na mwenye roho ya kuwakaribisha watu.

Anaonekana mwenye upole na nafsi yake, hata ingawa ametuhumiwa kumsingizia aliyekuwa mume wake, Julius Wambua huku akimsababishia kufungwa gerezani nusura mwongo mzima.

Akiwa amevalia jaketi nyekundu, blauzi nyeupe na kufunga kitambaa chekundu kichwani, mama huyu mwenye watoto watano anatuongoza kule anakoishi Nairobi kwa ujasiri.

“Siogopi chochote na sijutii kile kilimfanyikia Wambua. Niko tayari kukabili korti na kutoa ushahidi na kuapa kuwa sikumshauri Mwende, mtoto wake adanganye,” asema Bi Nzilani mwenye umri wa miaka 46 anapoketi ili tumhoji.

Mara kwa mara anakatizwa na mwanawe mwenye umri wa miaka mitatu ambaye alimpata na mume aliye naye sasa. Mtoto huyu wa kijana anataka kuwekewa chai na hajui vile maisha ya kale ya mamake yalivyovutia vyombo vya habari.

Bi Nzilani ameshtakiwa kwa kumshauri mwanawe kudanganya kortini kuwa aliyekuwa mumewe alimdhulumu kimapenzi. Bi Nzilani anayejieleza kwa lugha ya Kiswahili iliyo na lafudhi ya lugha ya Kikamba, anasema yaliyo moyoni wake bila kujali huku akiwa haonyeshi hisia zozote za kujuta. Kwake maisha yanaendelea kama kawaida.

Alisimulia Taifa Leo Dijitali kuhusu kadhia za ndoa yake na mumewe Wambua na dhuluma ya kingono kwa bintiye ambayo anasimulia kwa urahisi mwingi kana kwamba yalifanyika jana.

Alisema hajutii hata kidogo kuhusu kufungwa kwa Wambua lakini anajutia hisia ya ‘kusalitiwa’ na watoto wake wawili wa kike; Mwikali na Mwende.

Bi Nzilani ambaye kwa sasa anafanya kazi kama kijakazi, anakumbuka alivyopigiwa simu na mwanawe wa pili, Musyoki ambaye alimweleza kuhusu alivyokiri Mwende.

Musyoki angemletea gazeti, ambalo bado analo, ya alichokiri Mwende huku akisema kuwa, alichokubali Mwende kilitokana na kumkataza kuacha shule ili aolewe.

“Tulikuwa tunaishi karibu. Mwikali na Mwende walikuwa wanaishi pamoja baada ya kumtaliki mume wake wa kwanza. Hapo ndipo mpango ukapangwa na nikagundua wakati ambapo nilianza kupata simu kutoka runinga ya Citizen,” anakumbuka.

Hata hivyo, Nzilani anasema kuwa hata ingawa Bw Wambua ameachiliwa, hataki kumuona tena kwani hakuna mapenzi kati yao.

“Siombi msamaha na hakuna radhi nitaomba kwani ushuhuda niliotoa bado ni wa kweli na alimbaka Mwende. Sikuwahi kumtembelea akiwa gerezani na siko tayari kurekebisha uhusiano baina yetu. Nishaendelea na maisha yangu,” akasema.

Kipande cha uchungu wake kinatokana na uhakika kuwa ndoa yao ilikuwa imegubikwa na mikasa mingi ambako alipigwa mara kwa mara na aliyekuwa mume wake wakati huyo.

Anakumbuka kuwa kile kilichoanza kama mapenzi matamu ya asali ya mwaka wa 1992 kiligeuka ghafla na kuwa shubiri huku vita vikichukua usukani kwa miaka 16 kabla ya kuivunja ndoa hiyo mwaka wa 2008.

Bi Nzilani anaonyesha kuwa Bw Wambua ni mwanamume mwenye matusi mengi, mwenye kutaka kudhibiti watu kwani angeangaza mienendo yake na alipokuwa na tashwishi alimgeukia na kumpiga.

Isitoshe, Nzilani haafikiani na uamuzi wa mahakama kuu ya kumuachilia Wambua kutoka gereza ya Kamiti kule ambako alipaswa kutumikia kifungo cha maisha.

“Korti haingemwachilia bila ya kushauriana nami. Niko tayari kurudi kwenye korti za sheria za Kithimani ili wasimame na ushuhuda wangu wa hapo awali. Sijifichi kutoka mtu yeyote,” akasema.

Kwake, ndoa yake haikuwa kitu angetamani kwa mtu yeyote kwani alikuwa anachapwa bila ya kutenda kosa lolote na hangeruhusiwa kutangamana na watu wowote kwa raha zake hata majirani.

Kwenda kanisa kulikuwa baada ya kuomba ruhusa. Anakanusha madai ya kuuza shamba la familia huku akisema kuwa ni bwana Wambua aliyeuza shamba hilo baada ya kumuoa mwanamke mwingine.

“Tulianza bila kitu hii ni baada yake kufukuzwa kutoka kwa nyumba ya mjomba wake. Tungelala kwa nyumba za majirani kwa kuwa hatukuwa na pahali pa kwenda. Ningevumilia kuchapwa lakini kile kilivunja ndoa yetu ni siku ambayo alinitishia mara kwa mara kuwa angeniua kwa panga. Hiyo ilikuwa mwisho. Niliondoka na sikuangalia nyuma.”

Baada ya kufika Nairobi,  Nzilani alijiunga na kanisa ya Wakorino baada ya kuwacha kwenda kanisa ya New Apostolic alipokuwa akishiriki akiwa mashambani.

Wakati Mwende alitoa ushuhuda wake, alimshtaki mamake kwa kumshauri kumsingizia babake. Bi. Nzilani hata hivyo anakanusha lawama hizo akisema hazina msingi.

“Sikumshauri Mwende kumsingizia babake. Tuliifuata ripoti ya daktari ambayo ilitoka katika hospitali moja ya kibinafsi jijini Nairobi,” akasema  Nzilani. Korti ilisikia kuwa Nzilani alibuni kesi hii ili kulipishia kile alipitia mikononi mwa bwana Wambua alipokuwa ameolewa naye.

Jaji George Odunga wa Mahakama ya Juu alisema kuwa alishawishiwa na ushahidi upya. Alihukumu kuwa kesi ya Wambua haikuhukumiwa vizuri na kuamuru kuwa kesi hiyo kusikizwa upya. Hata hivyo, Mkurugenzi wa Mashtaka ya Umma (DPP) amesema kuwa hajaamua kama Wambua atahukumiwa upya kama alivyoagiza hakimu Odunga.

“DPP anapaswa kupitia kesi hiyo yote toka mwanzo na uamuzi uliotolewa kisha kuamua kama kesi hiyo itahukumiwa upya ama la kama alivyoagiza hakimu,” wakili wa DPP aliyejulikana kama Felista Njeru alieleza korti ya Kithimani, Jumatatu 21, 2020.

Jaji alimpa DPP mwezi kufanya uamuzi. Alikubali bwana Wambua kuachiliwa kwa dhamana iliyotolewa na mahakama kuu huku uamuzi wa DPP ukisubiriwa.

Kesi itatajwa Januari 25, 2021.

IMETAFSIRIWA NA WANGU KANURI

Ripoti: Wanaume walipigwa zaidi na wanawake kipindi cha corona

Na WANDERI KAMAU

WANAUME wengi walipigwa ama kutukanwa na wapenzi wao walipokuwa wakikaa nyumbani kutokana na kanuni za kukabili virusi vya corona kati ya Machi na Septemba.

Utafiti uliofanywa na kampuni ya Trends and Insights for Africa (TIFA), unaonyesha kuwa idadi kubwa ya wanaume walitandikwa, kutukanwa ama kupitia yote mawili kipindi hicho maarufu kama ‘lockdown’.

Ripoti hiyo inasema idadi ya wanaume waliodhulumiwa ilikuwa ya juu ikilinganishwa na ya wanawake waliopigwa ama kutukanwa.

“Hili linaonyesha kuwa kinyume na dhana nyingi, wanaume wengi walipitia dhuluma mikononi mwa wapenzi wao. Hili lilisababishwa pakubwa na changamoto za kiuchumi, ikizingatiwa kuwa wengi ndio wanaotegemewa na familia zao,” akasema Bi Ireri

Akitoa matokeo hayo jana, Afisa Mkuu Mtendaji wa TIFA, Maggie Ireri, alisema kando na wanawake na wanaume kudhulumiwa, watoto pia walijipata katika hali hiyo.

Tangu janga la corona liliporipotiwa nchini mnamo Machi, kumekuwa na ongezeko kubwa la dhuluma za kinyumbani kati ya jinsia zote mbili katika sehemu mbalimbali nchini.?Utafiti huo unaeleza kuwa licha ya wanafunzi kurejelea masomo yao Jumatatu, wazazi wengi wana hofu kuwa huenda wanao wakaambukizwa virusi vya corona wakiwa shuleni.

Utafiti ulionyesha kuwa karibu robo tatu yao wana hofu hiyo, huku wanawake wakiwa wengi ikilinganishwa na wanaume.

Tangu Jumatatu, baadhi ya wanafunzi waliripotiwa kurudi shuleni mwao bila barakoa, hali inayoongeza wasiwasi kuhusu usalama wao.

Baadhi ya wazazi walieleza tashwishi kuwaruhusu wanao kurejea shuleni, wakisema bado hawajapewa hakikisho kuhusu usalama wao.

Hata hivyo, Waziri wa Elimu George Magoha alipuuza baadhi ya hofu hizo, akisisitiza serikali imefanya kila juhudi kuhakikisha wanafunzi hawaambikizwi virusi.

Vile vile, imebainika kwamba ni robo mbili pekee ya wakazi katika mitaa duni ambao watoto wao walikuwa wakipata masomo kwa njia ya mtandao wakati shule zilipokuwa zimefungwa.

Hili ni licha ya serikali kusisitiza kuwa ni idadi ndogo tu ya wanafunzi nchini ambao walikuwa hawapati masomo hayo.

Utafiti ulionyesha kuwa zaidi ya thuluthi moja ya watoto walitegemea televisheni na simu huku idadi ndogo sana ikitegemea redio.

Achoshwa na dhuluma za kimapenzi, awatilia wazazi sumu

Na Stephen Oduor

Mwanamke mmoja na mumewe walihepa kifo Jumamosi baada ya  mwana wao wa kike kuwakwekea sumu kwenye maji ya kunywa nyumbani kwao Bura, Tana River. 

Mshukiwa huyo alichukua sheria mkononi baada ya kugundua kwamba mama yake alishirikiana na babayake wa kambo kwenye kesi aliyowasillisha kwa wazee ya kudhulumiwa kimapenzi.

Kulingana na mjomba wa msichana huyo  msichana huyo alimlaumu baba yake wa kambo kwa kumdhulumu kimapenzi kuanzia akiwa miaka 13 na kumtishia kumuua akidhubutu akisema yaliyotokea.

Mjomba huyo aliambia Taifa Leo kwamba kuna wakati msichana huyo alitoroka na kwenda kuishi na yeye lakini hakumwambia kwanini alikuwa ametoroka kwao.

“Alikuwa anaokenaka myamavu na alikuwa anapenda kujitenga yake wakati mwingine .Hakuwa anataka kuzungumza  wala kuzungumza na binamu wake,”alisema.

Baada ya kuishi na mjombake kwa miezi sita ,mamayake alimuomba arudi nyumbani .

Msichana huyo alisema mama yake alimsaidia kutoa mimba kwenye hospitali ndogo ya Madogo alipogundua kwamba mimba hiyo ilikuwa ya babayake.

Alisema kwamba mama yake alikosana na mwanamume huyo na kuamua kuondoka lakini akarudi tena 2019.

TAFSIRI: FAUSTINE NGILA

UNFPA yataka dhuluma dhidi ya wanawake katika jamii zikome

Na Pauline Ongaji

MMOJA kati ya wanawake watatu duniani hushuhudia dhuluma za kijinsia kutoka kwa wapenzi au waume zao.

Mkurugenzi Mtendaji wa Shirika la Umoja wa Mataifa kuhusu Idadi ya Watu (UNFPA), Dkt Natalia Kanem, aliambia kongamano la Kimataifa kuhusu Idadi ya watu na Maendeleo (ICPD), alisema unyama huo unachukuliwa kuwa jambo la kawaida.

Kwenye kongamno hilo linalotarajiwa kumalizika leo katika Jumba la Mikutano ya Kimataifa KICC, wajumbe walichukua muda kuwakumbuka wahanga wa dhuluma za kijinsia. Ilifichuliwa zaidi kwamba kila siku, wanawake na wasichana 137 huuawa na jamaa zao.

Kuhusiana na takwimu hizo, Dkt Kanem alisema kwamba haitakuwa haki ikiwa jamii ya kimataifa itaendelea kukaa kimya huku wanawake wakiendelea kudhulumiwa.

“Ndiposa tunashirikiana na mradi wa Spotlight Initiative ili kukabiliana na aina zote za dhuluma dhidi ya wanawake na wasichana,” aliongeza.

Pia akizungumza kwenye kikao hicho, Bi Gita Sen, profesa wa hazina ya afya ya umma nchini India, alisema kwamba 58% ya dhuluma dhidi ya wanawake hutekelezwa na wapenzi, waume, au jamaa zao.

“Hii ni kumaanisha kwamba nyumbani ndio sehemu hatari zaidi kwa mwanamke.”

Bi Phumzile Mlambo- Ngucka, Mkuregenzi Mtendaji wa UN Women alisema kwamba kunyimwa uwezo wa kiuchumi kumewafanya wanawake kuwategemea sana wanaume, suala linalowaweka katika hatari zaidi ya kukumbana na dhuluma.

Kuligana na Bi Mlambo, serikali zinapaswa kuhakikisha kuwepo kwa taasisi za kuwapigania na kuwalinda wanawake dhidi ya dhuluma za kijinsia.

“Kuna haja ya kuwepo kwa mifumo thabiti ya kufanya hiyo katika mataifa yote. Mifumo hii inahusisha ushirikiano wa polisi, idara ya mahakama na jamii kwa ujumla,” alisema.

Ni hoja iliyoungwa mkono na Bw Rasmus Prehn,Waziri wa ushirika wa ustawi wa Denmark, aliyesema kwamba kunapaswa kuwa na sera za kukabiliana na dhuluma za kijinsia.

“Ikiwa mataifa yatafanya bidii kupunguza viwango vya umaskini na kuimarisha ufikiaji wa elimu, huenda hii ikapunguza kabisa visa vya dhuluma za kijinsia,” alisema Kwa upande mwingine, Waziri Prehn alisisitiza kwamba kuna haja ya wanaume pia kuhusishwa katika vita dhidi ya dhuluma za kijinsia.

“Hii ni muhimu hasa katika mazingira kama nchini mwangu ambapo licha ya kwamba viwango vya umaskini viko chini, bado visa vya dhuluma za kijinsia vinaendelea kuripotiwa,” aliongeza.

Dhuluma za kimapenzi dhidi ya watoto zikomeshwe – Wabunge wanawake

Na CHARLES WASONGA

WABUNGE wanawake Jumatano wameshtumu kuongezeka kwa visa vya dhuluma za kimapenzi dhidi watoto wakiapa kuandamana katika kaunti ya Nandi .

Kwenye kikao na wanahabari katika majengo ya bunge Jumatano, wabunge hao watatu wakiongozwa na Mbunge Mwakilishi wa kaunti ya Nandi Dkt Tecla Tum wameshtumu kitendo ambapo naibu mmoja wa chifu katika kaunti hiyo alimdhulumu kimapenzi mtoto, na kuitaka serikali kumwadhibu afisa huyo wa utawala

“Ili kuonyesha ghadhabu yetu kama viongozi kina mama, nitaongoza maandamano Ijumaa kupinga kitendo hicho cha kikatili dhidi ya wasichana,” akasema Dkt Tum.

Alikuwa ameandama na wenzake; Gladys Shollei (Uasin Gishu) na Florence Bore Tapnyole (Kericho).

Dkt Tum alisema mtoto wa kike aliyedhulumiwa anapokea matibabu katika Hospitali ya Rufaa ya Nandi, mjini Kapsabet.

Kufikia sasa, idadi ya watoto wa kike ambao wamedhulumiwa katika kaunti hiyo ni 10 huku ikihofiwa kuwa huenda idadi ikawa juu kwa sababu kuna visa vingi ambavyo huwa haviripotiwi.

Dkt Tum amewataka wazazi wa wahasiriwa kukoma kusuluhisha visa hivyo nje ya mahakama akishauri kuwa sheria inapasa kufuata mkondo wake.

CATHERINE NYOKABI: Ndoa ya harusi ilivyoishia kwa talaka

Na SAMMY WAWERU

VISA vya unyanyasaji na dhuluma za kijinsia nchini katika miaka ya hivi punde vimeonekana kuongezeka.

Nyingi ya visa hivi vinashuhudiwa katika ndoa na uhusiano wa kimapenzi. Baadhi ya wahusika wameripotiwa kupotea, miili yao kupatikana imetupwa baada ya kuuawa kikatili na kwa njia isiyoeleweka.

Akivuta mawazo yake nyuma, Catherine Nyokabi anasema kwa wakati mmoja alikuwa katika ndoa iliyojawa na uchungu wa moyo. Mapenzi yake yalikuwa afunge ndoa na kuanzisha familia atakayoonea fahari akihusishwa nayo, lakini hayo hayakutimia.

“Tulifanya harusi 2007 nikiwa na umri wa miaka 26, nilitamani kuwa na familia sawa na nilivyoona wazazi wangu wakiishi kwa upendo na amani,” asema Nyokabi, anayependa kujitambua kama Cate. Miezi na miaka ya kwanza katika ndoa huwa yenye furaha, na anasimulia kwamba alikuwa na kila sababu ya kutabasamu.

Ndoa inapoingia doa wahusika; mume na mke, ndio hufahamu fika kiini chake. Ingawa kuna vijisababu kama ukosefu wa uaminifu miongoni mwao, unyanyapaa-presha ya utengano kutoka kwa wazazi, mashemeji, marafiki na hata wafanyakazi wenza ikiwa hawaridhiki.

Catherine Nyokabi alipohojiwa na Taifa Leo Dijitali. Picha/ Sammy Waweru

Vilevile, pandashuka katika familia hujiri iwapo kuna asiyetekeleza majukumu yake kikamilifu hivyo basi kusababisha mvutano.

Miaka kadhaa baada ya Cate na mume wake kufunga nikahi, ndoa yao ilianza kuingia doa. Weledi wa semi walilonga ‘kikulacho ki nguo nguoni mwako’, kulingana na mwanadada huyu ambaye ni mama wa mtoto mmoja ni kwamba aliyeteka mume wake kimawazo ni mmoja wa wasichana walioisimamia harusi yao.

Hakuna kinachouma na kukereketa maini kama kuona mchumba ameelekeza mapenzi yake kwingine, na Cate anaeleza kuwa hili ni suala lililohangaisha moyo wake. Wengi wanapojipata katika hali hii hufikiria kulipiza kisasi, aidha kwa kutafuta mpango wa pembeni, kutendea mwenzake unyama au aliyemnasa mwenzake kwa sababu ya ghadhabu.

Licha ya Cate kujaribu kadri awezavyo kunusuru ndoa yake kwa kuhusisha wataalamu wa masuala ya familia, pasta na wazazi kutoka pande zote mbili, mambo yaligonga mwamba. Anafichua kuwa mwaka wa 2013, yeye na mume wake waliafikiana kutalakiana, uamuzi ambao ulikuwa mithili ya kutafuna tembe kali.

“Mimi ni mcha Mungu, na kulipiza kisasi si suluhu. Hata Biblia inaruhusu ndoa ikikosa uaminifu, talaka inaruhusiwa, sikuwa na budi ila kuchukua mkondo huo. Kwa kufanya hivyo, mauaji tunayosikia kila uchao hayatashuhudiwa,” anaeleza. Picha/ Sammy Waweru

Elizabeth Mwangi, ambaye ni mtaalamu wa masuala ya ndoa na kifamilia anasema kinachosambaratisha familia nyingi ni ukosefu wa mawasiliano. Shida zinapoanza kuibuka, haja ipo wahusika kuwasiliana kwa njia ifaayo na kwa mujibu wa Bi Mwangi ni hatua za kwanza muhimu kunusuru ndoa.

“Kimya ni kama kiambaza, hutaweza kujua kinachofanyika nyuma yake, mawasiliano ndiyo njia ya kutatua migogoro,” aeleza mdau huyu, akihimiza mambo yanapokuwa magumu wataalamu wa kifamilia wahusishwe.

“Ndoa inapoingia unyanyapaa na vita vya mara kwa mara, wahusika wanashauriwa kuachana ili kuepuka maafa,” aongeza Bi Mwangi.

Cate anasema hatua waliyochukua ilimfungua kutoka kwa minyororo inayotunga usaha, wanandoa wafikiriapo kutendeana unyama.

Baada ya kutalakiana, utangulizi haukuwa rahisi ikizingatiwa kwamba alikuwa na mtoto aliyemtegemea. “Mungu alinifungulia milango ya heri, mtoto wangu hakulala njaa,” aelezea.

Hadithi yake inawiana na ya Lucy Wambui Gathungu, ambaye alilazimika kugura ndoa akilalamika kwamba yake ilisheheni dhuluma na vita vya kijinsia. “Nilijaaliwa watoto wawili na siku nyingi tulilala bila chakula kwa sababu bwana hakuwajibikia majukumu,” asema Wambui.

Catherine Nyokabi katika shamba lake la kabichi. Picha/ Sammy Waweru

Anaongeza, “Nilianza kwa vibarua vya dobi na kulimia watu mashamba. Niliweka akiba na hatimaye nikawa mkulima.” Bi Wambui ni mkulima tajika wa mboga kaunti ya Nyeri.

Kwa upande wake Cate anasema hajafa moyo kurejea katika ndoa, japo na mume anayemheshimu. “Ninaamini ndoa ikipata wachumba walio tayari kuanzisha familia, waelewane na kupendana itafanikiwa,” aeleza mjasirimali huyu.

Bali na kuwa mkulima wa matunda aina ya matofaha Nyeri, anafanya biashara jijini Nairobi ikiwa ni pamoja na kuuza miche ya matofaha nje ya Kenya. Barani Afrika, amezuru mataifa kama Botswana, Uganda, Misri, Tanzania na Nigeria kwa madhumuni ya kutoa mafunzo ya kilimo cha matofaha.

Anahimiza wanawake wenza hasa walio kwenye ndoa kusaidia waume wao kutekeleza majukumu. “Kuna njia nyingi za kuweka akiba kama vile vyama vya ushirika na makundi, kina mama wajiunge navyo ili waweze kuimarisha familia zao,” ashauri.

Dhuluma za kimapenzi haziathiri wanawake pekee, pia kuna wanaume wanaopitia unyanyapaa. Wanashauriwa kutafuta mawaidha kutoka kwa wataalamu wa masuala ya ndoa.

Maaskofu na mapadri hunyemelea watawa kimapenzi – Papa Francis

Na MASHIRIKA

KIONGOZI wa Kanisa Katoliki ulimwenguni, Papa Francis amekiri watawa wengi wamekuwa wakidhulumiwa kimapenzi na mapadri na maaskofu.

Hii ni sakata nyingine inayohusu dhuluma za ngono katika kanisa hilo ambalo limekuwa likikumbwa na kashfa tele za wahubiri wake kulawiti watoto wa kiume.

Akizungumza Jumatano akiwa safarini kwenye ndege yake kutoka ziara ya Milki ya Kiarabu (UAE) kuelekea Vatican, Papa Francis alisema makao makuu ya Kanisa Katoliki yalipokea ripoti kuhusu mapadri wanaodhulumu watawa hapa Afrika katika miaka ya tisini, na kuongeza kuwa tatizo hilo bado lipo hadi sasa hasa katika makanisa mapya.

“Kuna mapadri na hata maaskofu ambao wamewahi kufanya hivyo. Nadhani ni kitu ambacho kingali kinaendelea kwa sababu hiki si kitu ambacho huisha tu ghafla, la hasha!” akasema.

Aliongeza: “Sitaki kusikia ikisemekana kwamba kanisa halina tatizo hili, kwa sababu ukweli ni kuwa lipo. Tunahitajika kujitahidi zaidi kulikomesha na tuna nia ya kufanya hivyo.”

Alisema hayo alipoulizwa swali kuhusu ripoti iliyochapishwa majuzi kwenye jarida la ‘Women Church World’ ambalo husambazwa na gazeti la Osservatore Romano linalochapishwa Vatican.

Ripoti hiyo ilifichua jinsi watawa wamekuwa kimya kuhusu dhuluma ambazo wamekuwa wakipitia kwa miongo mingi mikononi mwa maaskofu na mapadri kwa sababu wanaogopa kuadhibiwa wwakifichua.

Suala hilo liligonga vichwa vya habari mwaka uliopita baada ya mtawa kudai askofu wa kanisa lililo nchini India alimbaka mara kadhaa.

Katika kisa hicho, Askofu Franco Mulakkal wa miaka 53, alikamatwa Septemba 21 kwa kushukiwa kumbaka mtawa huyo mara 13 kati ya mwaka wa 2014 na 2016. Papa Francis alimsimamisha kazi kwa muda siku moja kabla akamatwe.

Nchini Kenya, kumekuwa na kashfa tele katika maeneo mbalimbali ya nchi kuhusu madai ya ubakaji na ulawiti unaotendwa na viongozi wa kanisa hilo. Kisa cha majuzi kiliripotiwa Kiambu ambapo padri alidaiwa kushiriki ngono na wasichana wachanga waumini na pia kuwasaidia kuavya mimba.

Mwaka uliopita, shirika la International Catholic Organisation lilitoa wito kwa akina mama wenye watoto ambao baba zao ni mapadri wajitokeze ili watoto hao wafanyiwe uchunguzi wa DNA kwa ajili ya kufanya baba zao wawajibikie ulezi wao.

Papa Francis alisema kuna viongozi wengi wa kidini katika kanisa hilo ambao wamesimamishwa kazi kwa kudhulumu watawa na afisi yake imekuwa ikijitahidi kusuluhisha tatizo hilo kwa muda mrefu.

Kulingana naye, tatizo lenyewe ni la kidesturi lililo na mizizi yake katika jinsi wanawake wanavyotazamwa kuwa wasio na thamani katika jamii.

Alitoa mfano wa kisa kilichotokea Ufaransa ambapo mtangulizi wake, Papa Benedict wa 16 alijaribu kuchukua hatua lakini juhudi zake zikazimwa na baadhi ya maafisa wakuu wa Vatican:

Kumekuwa na mapendekezo kuwa Kanisa Katoliki liwaruhusu mapadri wake kuoa.

‘Siwezi kuwasamehe Dk Kwenye Beat na Hope Kid’

Na FRANCIS MUREITHI

MWANAMKE anayedai alidhulumiwa kimapenzi na wasanii wawili wa muziki wa injili jijini Nairobi amepuuza msamaha wa wasanii hao akisema ulitumwa kupitia mitandao ya kijamii na haukumrejelea moja kwa moja.?

Binti huyo wa miaka 20 kutoka Nakuru ambaye jina lake tumelibana kwa sababu za kisheria, amewalaumu wasanii hao, Dk Kwenye Beat na Hope Kid kwa kumlazimisha ashiriki ngono nao, kitendo kilichomwambukiza ugonjwa wa zinaa.

Msichana huyo pia amesema hatawasamehe wawili hao kwa kumshushia hadhi katika jamii, kumharibia maisha yake kisha kumtelekeza.

“Hili si suala la msamaha. Mimi bado nina makovu ya kile walinifanyia. Baada ya kuonja asali yangu wamenitelekeza na hata hawajali ninachopitia.”

“Mimi ninahitaji pesa za kutibu virusi walivyoniambukiza kwa jina Human Papillomvirus (HPV) vinavyosababisha kansa ya uzazi. Mimi hutumia Sh5,000 kununua dawa kila mwezi. Ninamtegemea ndugu yangu ambaye hawezi kunikimu kwa sababu pia ana familia yake,” akasema mwanamke huyo.

Vile vile alisema kwamba hatua ya wawili hao kuendelea kustarehe na kukimbilia mitandao ya kijamii kumwomba awasamehe ilhali hawajawasiliana naye ama kupendekeza njia za kumpa msaada kama kiburi kisichofaa kuvumiliwa.

“Dk Kwenye Beat na Hope Kid wanashiriki starehe zao bila kujali ninakotoa hela za kununua dawa ghali za kujitibu. Iwapo msamaha wao ni kweli basi wanafaa kunisaidia kugharamia dawa ninazohitaji.”

“Hakuna mahali katika msamaha wao wamenirejelea kwa jina kwa hivyo siwaamini kabisa. Kile nimesalia nacho ni kutubu mbele za Mwenyezi Mungu na kuiomba jamii msamaha,” akashikilia binti huyo.

DK Kwenye Beat ndiye alikuwa wa kwanza kujitosa katika mtandao ya kijamii kisha Hope Kid akafuata baadaye walipoandika msamaha wao.

“Ningependa kwanza kumwomba Mungu msamaha kwa kutenda dhambi. Pia ningependa kuomba msamaha kanisa langu, familia yangu, mashabiki wangu kwa kuwa mimi si binadamu mkamilifu.”

“Mimi ni mwanaume aliyetenda dhambi nyingi ila Mwenyezi Mungu amekuwa akiyabadilisha maisha yangu kila siku. Kwa masikitiko makuu, mambo haya yananifika wakati nilikuwa naendelea kubadilika,” akaandika DK Kwenye Beat.

Hope Kid naye aliandika hivi, “Nimekosa mbele ya Mwenyezi Mungu na binadamu. Nasikitika sana kwa wale ambao vitendo vyangu vimewaathiri kwa njia moja au nyingine. Nawaomba mnitilie dua ili niweze kubadilika kabisa na nisiyarudie makosa yangu,” akaandika.

Mwanamke huyo alifichua kwamba mchungaji wa Hope Kid ndiye alimpigia simu na kumrai arejee Nairobi ili akutane na Hope Kid mwenyewe ila akashikilia kwamba hawezi kufika jijini humo kwa mara nyingine kwa kuwa aliyotendewa na wanamuziki hao bado yanamhangaisha akilini.

Binti huyo pia alifichua kwamba bado haelewi kwa nini Hope Kid alimwambia aende jijini Nairobi kisha baadaye akabadili nia na kumpeleka katika nyumba DK Kwenye Beat ambako walimlazimisha kushiriki ngono nao.

“Mahangaiko na msongo wa kimawazo ninayopitia sasa ni kwasababu ya Hope Kid. Nimemtumia picha kuonyesha jinsi nilivyojikata kidoleni ili kumdhihirishia uchungu ninaopitia,” akafunguka huku akisema kwamba amemweleza mamake mzazi kuhusu kisa hicho japo babake bado yupo gizani kwa sababu hajui namna atakavyopata ujasiri na kumsimulia tukio lenyewe.

Wakati uo huo alimkemea DK Kwenye Beat kwa kumfokea mamake na kumtusi kwenye simu, video hiyo iliposambaa katika mtandao ya kijamii.

Hata hivyo amesema atawasamehe wasanii hao wawili na kutowashtaki mahakamani iwapo watakubali kugharimia matibabu yake na mambo mengine ya kimsingi.

Makubaliano hayo kulingana naye yataafikiwa mbele ya wakili kutoka Chama cha mawakili wanawake (FIDA) na itakuwa funzo kwa wasanii wengine wenye mazoea ya kuwanyanyasa mabinti kimapenzi bila  adhabu.

Wito kituo cha kuokoa wasichana waliodhulumiwa kijengwe

NA KALUME KAZUNGU

MASHIRIKA yasiyo ya kiserikali na wanaharakati wa kupigania haki za watoto kaunti ya Lamu wanaitaka serikali na wadau kuanzisha kituo maalum cha kuwaokoa watoto hasa wasichana wanaopitia dhuluma mbalimbali maishani, ikiwemo kulazimishwa ndoa za mapema, mimba zisizohitajika na ubakaji.

Katika kikao na wanahabari mjini Hindi Ijumaa, maafisa wa Shirika la World Vision Kenya na wale wa Miungano ya kijamii walisema kuna haja ya wasichana wote wanaotungwa mimba au kubakwa wakiwa shuleni kujengewa kituo maalum kitakachowawezesha kuendeleza masomo yao bila hofu.

Afisa Msimamizi wa World Vision kwenye kaunti za Lamu, Tana River na Garissa, Emmanuel Mkoba na Afisa Mtetezi wa Haki za Watoto, Kaunti ya Lamu, Bi Malika Mwangi, walisema inasikitisha kwamba licha ya Lamu kushuhudia visa vya mara kwa mara vya wasichana kubakwa, kutungwa mimba na hata kuozwa kwa lazima, hakuna hatua yoyote iliyochukuliwa ili kujenga kituo cha kuokoa waathiriwa kama hao.

Kituo cha kuokoa watoto waliodhuklumiwa ambacho kiko karibu ni kile cha Malindi, Kaunti ya Kilifi.

Bw Mkoba aliiomba kaunti, serikali kuu na wadau mbalimbali kujitokeza ili kuanzisha kituo hicho.

Mwakilishi Mwanamke, Kaunti ya Lamu, Bi Ruweida Obbo akiandamana na afisa wa watoto Kaunti ya Lamu, Maxwell Titima muda mfupi baada ya kuokoa wasichana waliodhulumiwa eneo la Kiunga, Kaunti ya Lamu. Wito umetolewa kwa kituo maalum kujengwa ili kuwaokoa wasichana waliodhulumiwa. Picha/ Kalume Kazungu

“Wasichana wengi wa umri wa kwenda shule wamekuwa wakiacha masomo punde wanapotungwa mimba au kubakwa kutokana na hofu ya kukejeliwa na wenzao wanaporudi shuleni mwao. Suluhu ya pekee itakayohakikisha wasichana kama hao wanaendelea na masomo ni kituo maalum cha kuokoa waathiriwa hao kianzishwe Lamu,” akasema Bw Mkoba.

Bi Malika aliwalaumu baadhi ya wazazi kwa kuchangia visa vya dhuluma hasa za kingono na ndoa za mapema miongoni mwa wasichana wao.

Bi Malika alisema kituo hicho kikibuniwa Lamu kitakuwa msaada mkubwa kwa jamii ambayo imekubwa na changamoto za muda mrefu hasa kuhusiana na elimu ya mtoto wa kike.

“Kituo kikibuniwa kitachangia pakubwa kuboreshwa hata kwa elimu ya mtoto wa kike eneo hili. Isitoshe, ni jukumu la mzazi kusimama kidete kuona kwamba wasichana wao wanasoma. Inasikitisha kuona kwamba baadhi ya wazazi wanachangia kudhulumiwa kwa watoto wao. Tuko macho na tutawashtaki wazazi kama hao,” akasema Bi Malika.

Kulingana na ripoti ya World Vision, tawi la Lamu, jumla ya wasichana 25 walidhulumiwa kwa kubakwa na wazazi wao kaunti ya Lamu kati ya Januari na Mei mwaka huu.

Baadhi ya maeneo ambayo yameathirika sana na dhuluma dhidi ya watoto ni pamoja na Hindi, Bobno, Sabasaba, Bar’goni, Kiunga na sehemu zingine.

Dhuluma za kimapenzi dhidi ya wanawake zachacha Sudan Kusini

CHARLES WASONGA Na MASHIRIKA

JUBA, Sudan Kusini

MAMIA ya akina mama na wasichana wamekuwa wakinajisiwa na kutendewa aina zingine za unyama kwa muda wa siku kumi zilizopita kaskazini mwa Sudan Kusini, Shirika la Madaktari Wasio na Mipaka limesema.

Mhudumu mmoja wa afya katika shirika hilo alisema katika muda wa siku 10 zilizopita jumla ya wanawake 125 walifika katika kliniki yao iliyoko eneo la Bentius kusaka huduma ya matibabu baada ya kudhulumiwa.

Idadi hiyo ni juu zaidi kuliko ile ambayo imeshuhudiwa katika muda wa miezi 10 iliyopita.

“Miongoni mwao ni wasichana wenye umri wa chini ya miaka 10, wanawake wenye umri wa zaidi ya miaka 65 na wengine ambao wajawazito,” akaongeza mhudumu huyo ambaye hakutaka kutambuliwa kwa jina.

Taifa hilo limekuwa likizongwa na vita vya wenyewe kwa wenyewe tangu lilipata uhuru wa kujitawala kutoka Sudan mnamo mwaka wa 2011. Hata hivyo, mapigano yalizuka baada ya miaka miwili huku eneo la Bentiu likiwa moja ya maeneo yaliyoathirika zaidi.

Mkataba wa amani ulitiwa saini mwezi Septemba mwaka huu kati ya mrengo wa serikali na ukiongozwa na Rais Salva Kiir na ule wa kiongozi wa waasi Riek Machar.

Mhudumu mwingine wa afya kwa jina Ruth Okello pia alithibitisha kuwa idadi ya visa vya dhuluma za kimapenzi iliyoripotiwa katika kliniki ya iliyoko Bentiu, jimboni Unity, imeongezeka zaidi katika siku chache zilizopita.

“Kwa muda wa zaidi ya miaka mitatu ambao nimekuwa nikifanyakazi kazi Sudan Kusini, sijawahi kushuhudia ongezeko la waathiriwa wa dhuluma za kimapenzi kiwango hiki wakisaka hudumu za afya katika kliniki yetu,” akasema.