Pesa za wizi hazina maana, akiri pasta

Na MWANGI MUIRURI

PASTA Cyrus Njora wa Kanisa la Maximum Miracle Centre amefungua roho yake na kukiri jinsi alivyokuwa jambazi sugu aliyeshiriki wizi wa zaidi ya magari 100 yaliyompa zaidi ya Sh27 milioni kutoka soko la taifa mojawapo la ukanda wa Afrika Mashariki.

Anakiri kuwa alianza kwa kujifanya mteja wa ukodishaji magari ambayo aliishia kuyauza katika taifa hilo jirani na kisha akawa katika genge la kujihami ambalo liliiba mengine zaidi kimabavu.

Pasta Njora anasema kuwa katika kipindi cha miaka miwili aliyokuwa katika mtandao huo wa ujambazi, wenzake sita waliuawa kwa kupigwa risasi na maafisa wa polisi huku yeye akiponea siku ya sadfa.

Kinachomkera zaidi ni kuwa licha ya wizi huo uliomvunia mamilioni, alipokamatwa mwaka wa 2008 na akahukumiwa kifungo cha miaka 22 gerezani, hakuwa hata na ndururu.

“Leo hii nina ushuhuda kwamba pesa za wizi hazitawahi kukufaa. Hatari ya ujambazi hata sio kukamatwa au kuuawa ana na raia au polisi, bali uchungu ni kuishia kuteseka ukiwa huna hata ndururu,” asema.

Pasta Njora anasema kuwa katika kilele chake cha ujambazi, angetia mkobani takriban Sh100,000 asubuhi na zote kabla ya jua kutua ziwe zimetumika katika raha na anasa ya ulevi, nyama choma na mahaba.

“Ujambazi hukupa raha tupu isiyo na kifani. Kuna ile kasumba kwamba ukiwa na pesa hutakuwa na bidii ya kutafuta tena na tena. Ujinga ndani ya bongo la jambazi ni sawa na ushetani. Utapata majambazi katika mikutano ya maandalizi ya mikakati yao wakijigamba jinsi walivyochoma maelfu kwa siku moja tu lakini siku ya kukamatwa na kuhukumiwa, hata adaiwe faini ya Sh10,000 pekee, utapata hana,” asema.

Pasta Njora anasema kuwa alipozaliwa katika kijiji cha Ichamara katika Kaunti ya Nyeri mwaka wa 1985, wazazi wake walikuwa na dua njema tu kwake na alipojiunga na Shule ya Msingi ya Kihate na kisha akajiunga na ile ya Upili ya Tambaya ambapo aliokoka mwaka wa 2000 akiwa Kidato cha Pili, ndoto yake ilikuwa aishie kuwa daktari wa upasuaji.

“Lakini nilipata alama ya C katika matokeo ya mtihani wa kitaifa wa Kidato cha Nne (KCSE) mwaka wa 2002 na kukosa mwaliko wa kujiunga na chuo kikuu na ikizingatiwa ukata katika familia yetu, ikawa tamati ya masomo yangu. Lakini walinifadhili nikasomea udereva,” asema.

Ni katika hali hiyo ambapo mnamo Februari 10, 2003, aliondoka nyumbani akiandamana na rafiki yake aliyekuwa amemtangulia jijini Nairobi na akapata kazi ya kuuza kanda za muziki katika mtaa wa River Road.

“Ni katika kukumbatia ushauri wazazi wangu walionipa nikiondoka nyumbani wakinihimiza nijichunge na athari za anasa na kutojielewa kimaisha katika jiji kuu ambapo nilichapa kazi kwa bidii na kwa siku ningejipata nikiwa na faida ya Sh1,000,” asema.

Mwaka wa 2005, Pasta Njora alikuwa ameweka akiba iliyomwezesha kufungua duka lake la kanda za muziki jijini Nairobi.

Kijana aliyekuwa ameonyesha nia ya kufaulu katika maisha yake aligeuka ghafla mwaka wa 2006.

“Nikiwa katika duka langu, kuna wanafunzi wawili; mmoja wa kike na mwingine wa kiume waliokuja na wakaniachia mikoba yao ya shule. Tulikuwa tunafahamiana. Mimi hata sikuangalia ni nini kilikuwa ndani ya mikoba hiyo. Lakini muda baadaye, yule kijana alirejea na akachukua mkoba mmoja. Saa chache baadaye, yule msichana alikuja na alipodai mkoba wake, ukawa hauko. Kumbe wake ulikuwa na kipakatalishi na ndio uliochukuliwa na yule kijana! Mambo yakageuka kuwa balaa tupu,” asema Pasta Njora.

Maisha ya rumande

Mwanafunzi huyo alikuwa binti ya afisa wa polisi wa cheo cha juu ambaye alifika katika duka la Pasta Njora akiwa na hamaki, akamkamata mwendo wa saa nane na kabla ya saa kumi, alikuwa ameshtakiwa kwa wizi wa kipakatalishi na ambapo baada ya kukanusha mashtaka mahakama iliagiza atupwe rumande kwa kipindi cha siku 14 au atoe dhanama ya Sh100,000.

Wiki ya tatu akiwa katika rumande ya Viwandani kuna vijana wawili walioletwa na wakafahamiana na ambao anawatambua kama Kevoh na Njoroge.

“Waliniambia kuwa walikuwa wananifahamu kwa kuwa walikuwa na makao yao karibu na duka langu. Waliniambia nisiwe na wasiwasi kwa kuwa wangenisaidia. Waliagiza niwape namba ya kesi yangu na hakimu aliyekuwa akiishughulikia. Nilitii,” asema.

Wawili hao walikaa kwa rumande siku moja tu na wakatoka.

“Baada ya siku mbili, walikuja kunitembelea na ndipo waliniagiza kuwa nikirejeshwa mahakamani nikiri kuwa niliiba kompyuta hiyo ndogo. Nilifanya hivyo na sijui ni nini kilijiri kati yao na mahakama kwa kuwa nilishtukia tu nimeachiliwa. Hapo ndipo nilijua kwamba kufungwa huwa ni kwa hiari, ukijielewa, uhuru ni wako mahakamani bora tu ujue jinsi ya kuumiliki,” asema.

Wawili hao hatimaye walikiri kwake kuwa walikuwa majambazi sugu jijini na wakamsajili katika sakata ya wizi wa magari.

“Kazi yangu ya kwanza kufanya nao ilikuwa ya kuendesha gari la wizi hadi Tanzania na nikalipwa Sh65,000. Utamu wa pesa ukaniteka nyara na kabla sijajua nilikuwa nafanya nini, nikawa nimejipa kitambulisho na leseni bandia na ambazo nilitumia kukodisha magari na kuishia kuyauza,” asema.

Novemba 2007, Kevoh na Njioroge wakapigwa risasi na maafisa wa polisi.

“Niliponyoka mauti kwa kuwa mtoto wangu alikuwa akisumbuliwa na mwili na sikuandamana nao katika dili moja ya wizi ambayo ilitibuka na wakauawa,” asema.

Aliunda genge lingine la vijana wanne na ambao waligeuza mbinu ya wizi na wakakumbatia ule wa kimabavu wakiwa wamejihami kwa bunduki na bahati ya mtende tena ikamnusuru mauti ambapo wanne hao waliuawa na risasi za polisi mwaka wa 2008.

Akiwa na upweke wa ujambazi na tamaa ya pesa, mnamo Novemba 13, 2008, alijitokeza karibu na hoteli ya Hilton jijini Nairobi akiwa anaendesha gari la wizi na ambapo miongoni mwa raia alikuwemo mmoja wa wanawake ambao alikuwa ameibia gari hapo awali.

“Nilikuwa katika msongamano wa magari. Nilimwona huyo mwanamke akikimbia kwa gari langu akiwa anapiga usiahi. Nilijua mara moja nilikuwa katika hatari kuu. Nilijaribu kurudisha gari nyuma na nikagonga lililokuwa nyuma yangu. Nikajaribu kulisogeza mbele na nikagonga lililokuwa mbele yangu… Raia walinisakama na nikapewa kipigo cha kitutu kilichoishia kunakiliwa katika gazeti la Nation siku iliyofuata…Nilikuwa nimeingizwa shingo katika gurudumu na kumiminiwa petroli. Lakini kuna mwanamke alibishana akisema nisichomewe karibu na kibanda chake. Nilibururwa nikachomewe kwa barabara na ndipo polisi waliingia na wakafyatua risasi mbili juu. Kwa mara nyingine tena, nikanusurika mauti,” asema.

Lakini aliishia kushtakiwa na ambapo alihukumiwa miaka 22 gerezani lakini muujiza mwingine ukamwandama alipoachiliwa baada ya miaka 10.

“Hii ni baada ya ripoti za jela kunitetea kuwa nilikuwa nimebadili mienendo na hata nilikuwa nimesomea taaluma ya uchunganji iliyokuwa imenigeuza kuwa pasta katika gereza kuu la Kamiti,” asema.

Ni katika kipindi hicho cha kuhudumia kifungo chake alipookoka na alipotoka gerezani akakumbatiwa na Askofu Pius Muiru alioyempa ajira kama pasta wa kanisa lake la Maximum Miracle Centre.

Pasta kusubiri Yesu korokoroni

Na GEORGE MUNENE

PASTA wa dhehebu la Akorino aliyewanajisi na kuwatunga mimba binti zake wawili wenye umri wa chini ya miaka 18, sasa amefungwa jela kwa miaka 140. Pasta huyo wa miaka 51, anayetambulika kama John Gichira Gichini, alipatikana na hatia baada ya kukiri mashtaka.

Sasa ataishi gerezani maisha yake yote akisubiri kurudi kwa Yesu ambaye kwenye Biblia amehubiri habari za kurudi kwake siku ya kiama.

Katika uamuzi huo muhimu, Hakimu Mkuu wa Mahakama ya Baricho katika Kaunti ya Kirinyaga, Anthony Mwicigi alisema pasta huyo aliharibu maisha ya binti zake wawili, na hivyo alihitaji adhabu kali ili awe funzo kwa wengine.

Alimfafanua mzee huyo kama mtu mbaya sana, ambaye jina lake linapaswa kuingizwa katika sajili ya wahalifu sugu wa dhuluma za ngono nchini.

‘Mshukiwa alitumia vibaya nafasi yake kama baba na kuharibu maisha ya binti zake. Ni jambo la aibu na mwiko, na kwa sababu hiyo anahitaji kifungo cha muda mrefu gerezani,’ akasema hakimu kwenye uamuzi wake.

Akinukuu Biblia, Hakimu Mwicigi alisema pasta huyo alikuwa mtu mwovu ambaye siku zake za kuishi duniani zilikuwa zimehesabiwa.

‘Kumwogopa Mungu kunaongeza siku, lakini miaka ya watu waovu itafupishwa,’ alisema hakimu kuhusu makosa mawili dhidi ya pasta huyo ya kushiriki ngono na watoto wake ambapo alihukumiwa kuhudumu kifungo cha miaka 70 gerezani kwa kila moja.

Vifungo hivyo vitaambatana pamoja.Mnajisi huyo alikuwa ameshtakiwa kwamba kati ya Juni 2019 na Agosti 2020 aliwanajisi binti zake wenye umri wa miaka 14 na 16 katika eneobunge la Ndia.

Upande wa mashtaka ulieleza korti kwamba mhalifu hiyo anapaswa kutazamwa kama aliyepatikana na hatia kwa mara ya kwanza na kueleza kwamba vyeti vya ubatizo vya watoto hao viliashiria kwamba walikuwa wa chini ya umri wa miaka 18.

Fomu za P3 na nakala za matibabu zilizowasilishwa kortini kama ushahidi zilithibitisha kwamba watoto hao walidhulumiwa.

Akijitetea, Gichira alieleza korti kuwa ‘alipotoshwa na shetani’ kutenda makosa makubwa kama hayo, na kuomba msamaha kutoka kwa binti zake na mahakama.

Alisisitiza kwamba hakuna aliye mkamilifu kote duniani na hivyo anapaswa kuhurumiwa badala ya kulaaniwa.’Shetani bado hajafungwa. Bado anatawala duniani na kuwafanya watu kutenda dhambi.

Ni kweli nilitenda dhambi lakini ninajutia na nitafurahi sana ikiwa nitasamehewa. Ni mara yangu ya kwanza kutenda kosa kama hilo maishani mwangu,’ alijitetea.

Hakimu alieleza kwamba wasichana hao tayari wameacha shule baada ya kulemewa na ujauzito. Binti mkubwa tayari amejifungua.

Pasta huyo alikuwa akiwahadaa binti zake kuingia chumbani mwake wakati mama yao hakuwa nyumbani na kuwatishia kuwaua endapo wangefichua uovu aliokuwa akiwafanyia.

Mapasta washtaki serikali kuzuia ibada

Na MAUREEN KAKAH

MAPASTA watatu wameelekea kortini kutaka agizo la kuondolewa marufuku ya kuendesha ibada, na badala yake hatua ziwekwe kuzuia kusambaa kwa virusi vya corona makanisani.

Mahakama Kuu jana iliidhinisha kesi hiyo kuwa ya dharura na kuamua itajwe Aprili 16.

Jaji James Makau aliidhinisha kesi iliyowasilishwa na mapasta Don Mutugi Majau, Joan Miriti na Alex Gichunge ambao wamewashtaki mawaziri wa Usalama wa Ndani, Afya na Habari na Mawasiliano pamoja na Mwanasheria Mkuu na Inspekta Jenerali wa polisi.

Jaji Makau aliorodhesha kesi hiyo kusikilizwa Alhamisi wiki ijayo na akaagiza mapasta hao kuwakabidhi washtakiwa stakabadhi za kesi kabla ya Aprili 14.

Katika kesi hiyo, mapasta hao wanakubali hatua za serikali za kuzuia kusambaa kwa corona lakini wanasema Wakenya wanahitaji makanisa kutafuta utulivu.

Wanapinga agizo la watu kutokusanyika lililohusisha makanisa kufungwa wakati huu na kwamba uamuzi huo ulifikiwa bila wadau husika kushauriwa.

Mapasta hao wanadai kuwa ibada zinapaswa kuendelea huku wanaohudhuria wakivalia barakoa, glavu na kutumia sabuni zenye dawa.

Wanaendelea kudai kuwa kafyu na agizo la kutokusanyika lilitangazwa na serikali bila kushauriana na makanisa ambayo yangesaidia kuhamasisha umma kuhusu umuhimu wa kudumisha usafi na kuhubiri amani na umoja huku likitoa misaada ya chakula kwa wasiojiweza.

“Walalamishi pamoja na waumini wengine hawawasilishi kesi hii kortini wakiwa na lengo la kusambaza corona. Lengo lao pekee ni kutaka kukusanyika katika ibada wakifuata masharti yaliyowekwa,” alisema wakili wao John Swaka.

Aliongeza, “Jukumu la makanisa wakati kama wa janga hili linalokumba nchi hii na ulimwengu, ni kuwapa watu matumaini. Kwa unyenyekevu wanaomba mahakama hii kuwasaidia kwa sababu haki na uhuru wao umekiukwa,” alisema.

Walidai kuwa majaji, madaktari na wanahabari wanahatarisha maisha yao wakiwahudumia Wakenya na hivyo basi mapasta pia wanapaswa kuorodheshwa kama wanaotoa huduma muhimu.

Ingawa wanakiri kuwa vitendo vya ibada haviwezi kuendelezwa kama kawaida, walisema mapasta wanatoa huduma muhimu na hawafai kuzuiwa kwa sababu wanafaa kuwa wakisaidia kupiga vita corona kupitia maombi.

Mapasta hao wanataka makanisa waruhuisiwe kuongoza ibada huku viongozi wakihakikisha waumini wamefuata masharti ya serikali.

Serikali ilipiga marufuku ibada makanisani wakati ilipoagiza kusiwe na makongamano aina yoyote kitaifa ili kuzuia ueneaji virusi vya corona.

Tangu wakati huo, makanisa mengi yaligeukia kueneza injili kupitia mitandaoni, televisheni na redioni.

Pasta adinda kuombea polo aliyekataa kuoa bintiye

Na John Musyoki

OTHAYA, Nyeri

Pasta wa kanisa moja eneo hili, alishangaza waumini alipodinda kumuombea jamaa aliyekataa kuoa binti yake.

Penyenye zinasema jamaa alikuwa akimchumbia binti wa pasta huyo lakini kwa sababu ambazo hazikueleweka alikataa kumuoa na akafunga ndoa na mwanadada mwingine wa kijiji chao.

Siku ya kioja jamaa alikuwa ameugua na waumini wa kanisa wakamuomba pasta amtembelee nyumbani kwake akamuombee.

Pasta kusikia hivyo, alichemka na kuanza kulalamika akidai jamaa huyo alikuwa amemkosea sana.

“Maombi yana gharama yake. Nilikuwa na matumaini makubwa kwa jamaa huyo kwamba angemuoa binti yangu ila hilo halikufanyika. Jamaa huyo aliharibia binti yangu muda na simpendi. Kama mnamjali nendeni mkamuombee,” pasta aliwaambia waumini wake.

Waumini wa pasta huyo walishangaa na kumgombeza pasta huyo kwa kukataa kwenda kumwombea jamaa.

“Wewe ni pasta wa sampuli gani kama una wivu na roho ngumu kama chuma. Jamaa huyo alikuwa na haki ya kuoa msichana aliyempenda. Kumbuka wahenga walisema kuwa, kuchumbia sio kuoa,” mwanadada mmoja alimwambia pasta.

Hata hivyo waumini wa pasta huyo waliamini na kufunga safari ya kwenda kumwombea jamaa. Inasemekana baada ya siku chache, jamaa alipata nafuu na kurejelea hali yake ya kawaida.

Aliposikia pasta alikataa kwenda kumuombea, jamaa alisikitika sana na kusema pasta alikuwa akimlazimisha aoe binti yake.

“Nasikitika pasta anaweza kuwa na machungu kwa sababu nilikataa aliponilazimisha kuoa binti yake. Naona jambo la muhimu kufanya ni kuhama kanisa lake ili awe na amani,” jamaa alisema.

Haikujukana ikiwa jamaa huyo alihama kanisa hilo au la.

Pasta muuaji aliwahi kufungwa Shimo la Tewa

DERICK LUVEGA na GASTONE VALUSI

PASTA aliyemuua mkewe kanisani kisha akajitoa uhai alikuwa ametumikia kifungo gerezani kwa kumtishia mkewe awali, imefichuka.

Mnamo Jumapili, Pasta Elisha Misiko wa Kanisa la Ground for God’s Gospel Ministries jijini Mombasa alimuua mkewe, Bi Ann Mghoi kwa kumdunga kisu kisha akajikata shingoni kwa kisu hicho wakati wa ibada.

Hapo jana, mamake Bw Misiko, Bi Margaret Nandoya alisema kuwa mzozo kuhusu usimamizi wa kanisa hilo ulianza baada ya mwanawe kumaliza kutumikia kifungo cha mwezi mmoja katika Gereza la Shimo la Tewa kwa shtaka la kutoa tishio la kumuua mkewe.

“Walitofautiana kuhusu umiliki wa kanisa hilo ambapo alimtumia mkewe jumbe za kumtishia. Mkewe aliripoti suala hilo kwa polisi. Hilo ndilo lilimfanya kukamatwa na kufungwa gerezani,” akasema Bi Nandoya nyumbani kwake Vihiga.

Akaongeza: “Wakati alipoondoka gerezani, alimpata mkewe akiliendesha kanisa hilo huku akichukua pesa zote zilizotolewa kama sadaka. Hilo ndilo lilimkasirisha.”

Bi Nandoya alisema kuwa mwanawe alifanya kazi za vibarua jijini Mombasa, hali iliyomwezesha kulijenga kanisa hilo bila usaidizi wowote.

Alisema kuwa alifahamishwa kuhusu mzozo huo, wakati suala hilo lilikuwa likiendelea kusuluhishwa.

“Alikuwa mtoto mzuri na mhubiri aliyeelewa kazi yake. Wawili hao walifanya harusi ya kanisa na wamekuwa wakitutembelea katika nyakati mbalimbali. Walikuwa na tofauti kadhaa kuhusu usimamizi wa kanisa hilo kwani walikuwa wakizozana kila wakati. Namwomba Mungu anisaidie. Sijui nitafanya nini. Nimesumbuka sana kutokana na tukio hilo,” akasema.

Bw Misiko alisomea katika Shule ya Msingi ya Chango, ambapo baadaye alielekea katika Shule ya Upili ya Mbale.

Mnamo Jumapili, aliondoka kutoka kiti chake na kumshambulia mkewe kwa visu viwili alivyokuwa ameficha katika shati lake.

Alimkata mara kadhaa. Washirika waliojawa na wasiwasi waliingilia kati na kumkimbiza katika Hospitali Kuu ya Pwani alikofariki alipokuwa akipokea matibabu.

Familia ya Bw Misiko, mwenye umri wa miaka 55, ilimtaja kuwa mtu aliyemcha Mungu na aliyejitolea kwa hali na mali maishani kulijenga kanisa hilo. Ilimlaumu mkewe kwa kuchukua usimamizi wake kwa nguvu.

Anatoka katika kijiji cha Idunga, Kaunti Ndogo ya Vihiga, Kaunti ya Vihiga, ambapo alikuwa kifungua mimba katika familia hiyo. Alilelewa katika Kanisa la Quakers lakini baadaye akabuni kanisa lake.

Wawili hao walikuwa wamewatembelea jamaa zao katika kaunti hiyo ambapo baadaye walirejea Mombasa. Wana watoto wanne.

Kwingineko, wanaume wameshauriwa kutafuta ushauri wanapohisi kuhangaishwa na wake zao ili wasaidiwe badala ya kuzua vurugu nyumbani.

Askofu wa kanisa la Missionary ya Kenya, Charles Kinyanjui alisema kuwa vifo vilivyotokea Jumapili kanisani Mombasa vingeepukwa endapo marehemu Misiko angetafuta ushauri wa wenzake na wataalamu.

“Nafikiri mambo kuhusu unyanyasaji na vurugu nyumbani hauchagui kama wewe ni mchungaji, mwanajeshi au mwalimu,” akasema katika afisi yake mjini Tala.

Bw Kinyanjui aliongeza kuwa wanaume huficha hisia zao zinazowapelekea kuwa na shida na mwishowe kuzua vurugu manyumbani mwao.

“Wanaume wanapaswa kufungua roho na kuongea waziwazi kuhusu masahibu yanayowazonga badala ya kunyamaa. Kama tungekuwa na wataalamu katika kila kijiji, mambo tangeimarika” akasema.

Wakenya wengi hutafuta huduma za ushauri kutoka kwa wachungaji.

Mhubiri ajiua baada ya kumsababishia mke majeraha yaliyomuua

DIANA MUTHEU na ANTHONY KITIMO

MHUBIRI mmoja eneo la Bamburi, Kaunti ya Mombasa alijitoa roho Jumapili katika madhabahu ya kanisa lake, baada ya jaribio la kumuua mkewe ndani ya kanisa hilo katikati ya ibada, kutibuka japo pia alifariki baadaye akitibiwa.

Mhubiri huyo, Bw Elisha Misiko wa kanisa la Ground for God’s Gospel Ministries lililoko Chembani, Bamburi, alimdunga mkewe, Ann Mghoi mgongoni kwa kutumia kisu kisha akajitoa uhai kwa kujikata shingo akitumia kifaa hicho.

Mwanamke huyo aliyenusurika na majeraha ya kisu mgongoni, mkononi na tumboni baadaye aliaga dunia mwendo wa saa saba mchana, alipokuwa akiendelea kupata matibabu katika hospitali kuu ya eneo la Pwani (CGPH).

Bi Mghoi aliokolewa na washirika wa kanisa hilo na kukimbizwa hospitalini.

Polisi walithibitisha kuwa kiini cha mauaji hayo ni mgogoro kati ya wanandoa hao baada ya kupata waraka wenye zaidi ya kurasa 10, ulioelezea sababu za mhubiri huyo kuchukua hatua hiyo ya kutisha.

Miongoni mwa masuala yaliyonukuliwa katika karatasi hizo ni pamoja na mke wake kumvunjia heshima na pia kumdharau licha ya kujitolea kwake kulijenga kanisa hilo.

Kamanda wa Polisi wa Kaunti-ndogo ya Kisauni, Bw Julius Kiragu alisema mhubiri huyo alifariki katika kanisa hilo na mwili wake ukapelekwa katika chumba cha kuhifadhia maiti cha hospitali ya CGPH.

“Watu kadhaa wameandikisha taarifa na tumethibitisha tukio hilo lilitokea baada ya mke wa mhubiri huyo kujaribu kumtoa mchungaji huyo katika kanisa ambalo alijitahidi kulijenga,” alisema Bw Kiragu.

Mzee wa kijiji, Bw Mtengo Amuri, alisema kuwa mhubiri huyo alitenda unyama huo kufuatia ugomvi uliokuwa unaendelea kati yake na mkewe.

“Wawili hawa wamekuwa wakiliendesha kanisa hili kwa zaidi ya miaka minane. Miezi michache iliyopita, kumekuwa na tofauti baina yao kuhusu usimamizi wa kanisa hilo. Tunashuku kuwa hiyo ndiyo sababu kuu ya tukio hilo,” alisema Bw Amuri.

“Mchungaji huyo alitembea polepole hadi kwenye altari ambapo mkewe alikuwa ameketi. Alimdunga mgongoni kwa kutumia kisu na alipojaribu kumkata koo, mke wake alijizuia kutumia mkono kabla ya waumini kumuokoa.”

Muumini mmoja wa kanisa hilo ambaye alizungumza na ‘Taifa Leo‘, alisema kuwa wawili hao walikuwa na ugomvi nyumbani hata kabla ya kuhudhuria ibada.

“Leo ni Jumapili ya kwanza ya mwaka 2020. Tunasikitika kuwa tumekuwa tukijitahidi kusuluhisha mgogoro kati ya wawili hawa bila ya kufanikiwa,” alisema mmoja wa waumini.

Alidokeza kuwa vita kati ya mhubiri huyo na mkewe vilianza kutokana na usimamizi wa kanisa hilo pamoja na fedha.

Marehemu hao wamewaacha watoto wanne wenye umri wa chini ya miaka 18.

Waziri ataka mapasta tapeli wahukumiwe kama wahalifu

NA CHARLES WANYORO

WAZIRI Utumishi wa Umma Prof Margaret Kobia Jumapili amependekeza kwamba wahubiri wanaodai kuwa na uwezo wa kuwaombea wanawake ili wapate waume na fedha, wachukuliwe kama wahalifu wanaoendeleza dhuluma za kijinsia.

Prof Kobia alisikitika kwamba tabia hiyo imeongezeka miongoni mwa wahuburi ambao huwahadaa wanawake kwamba ibada takatifu itawapa waume, fedha na hata kuponya maradhi sugu yanayowaandama.

Akizungumza katika uwanja wa Kinoru, mjini Meru wakati wa kugawa hundi kwa makundi ya vijana na wanawake, Prof Kobia alieleza kusikitishwa kwake na hali wanayopitia wanawake ambao hupoteza heshima yao katika jamii na fedha baada ya kutapeliwa.

Aidha, alisema wanawake huogopa kuzungumzia dhuluma mikononi mwa wahubiri au viongozi wa kidini, kwa imani kuwa maombi yao yatakuja kutimia.

Kulingana na Prof Kobia, uwezo wa kiuchumi utawaepusha wanawake wajane na maskini kuingia kwenye mtego wa wahubiri wakora ambao huwanyanyasa.

“Kile ambacho tunawaomba wanawake ni kuwa wainuke ili wawe na uwezo wa kiuchumi ambao utawasaidia kuwasomesha wanao au kuwapa huduma bora za kimatibabu. Ukiwa na pesa basi una sauti na hakuna mtu ambaye atakuhadaa ili ajinufaishe,” akasema Bi Kobia.

Alitoa wito kwa umma kujifahamisha na namna ya kuwatambua wahubiri waongo wenye tamaa ya kuzima kiu chao cha mapenzi kwa wanawake wasiojiweza na akataka wananchi kukemea suala hilo kwa kinywa kipana bila kuogopa.

“Maombi yetu husikizwa moja kwa moja na Mwenyezi Mungu. Dhuluma zinazotekelezewa wanawake zinafaa kuorodheshwa kama za kijinsia. Wanawake wengi wanaopitia dhuluma hizi na hunyamaza na mara nyingi ni wale maskini wasiojiweza,” akaongeza Prof Kobia.

Waziri huyo msomi pia aliwaomba vijana kutotegemea mapeni machache kutoka kwa wanasiasa akiwataka wajiajiri na kutia bidii maishani.

Prof Kobia alisisitiza kwamba Rais Uhuru Kenyatta ana nia ya kuhakikisha vijana, walemavu na wanawake wanajiendeleza kupitia fedha zinazotolewa kupitia vyama vya ushirika.

Naibu Gavana wa Meru Titus Ntuchiu ambaye pia alihudhuria hafla hiyo aliwaomba vijana kutokata tamaa wakikosa ajira za serikali baada ya kumaliza masomo vyuoni.

Mbunge wa Imenti ya Kaskazini Rahim Dawood naye alisema yupo tayari kushirikiana na serikali ya kaunti kusaidia makundi ya vijana, walemavu na akina mama kuanzisha miradi ya kuwanufaisha na kuwapa mapato mazuri.

Mwanamume apokonywa mke na pasta aliyesimamia harusi yake

Na KNA

MFANYABIASHARA mmoja kutoka eneo la Juja Farm, Kaunti ya Kiambu, anasononeka baada ya mkewe wa miaka 26 waliyejaliwa watoto watano kunyakuliwa na pasta aliyesimamia harusi yao.

Bw John Kanyua ameshindwa kuelewa ni vipi pasta aliyewasaidia wakati wa ndoa yao, hata akatia saini cheti chao cha harusi, alimnyelea mkewe wa zaidi ya miongo miwili.

Mwanamume huyo hakutambua kuwa pasta huyo alikuwa akimezea mate mkewe, Leah Wambui, kwa miaka hiyo yote licha ya baadhi ya waliohudhuria harusi yao kubaini ukweli huo.

Hayo yote yalianza wanandoa hao walipoanza kuhudhuria kanisa la pasta huyo eneo la Juja Farm.

Na baada ya kupendezwa na mchango wao kanisani, pasta huyo alimteua Leah kuwa naibu wake katika Kanisa hilo, jambo lililofanya mke wa pasta kuingiwa na wasiwasi.

“Nilipinga uteuzi, lakini alinipuuzilia mbali. Nilimkabili Leah na kumwonya dhidi ya kucheza na mume wangu. Alionekana asiye na hatia, na nikakubali,” alisema Agnes Wangivi, mke wa pasta huyo mwenye umri wa miaka 34 ambaye wamejaliwa watoto watatu.

Urafiki kati ya Leah na pasta uliendelea kunawiri kiasi kwamba, kiongozi huyo wa kanisa angemwalika (Leah) nyumbani kwao kwa hafla za kifamilia, lakini bila kuandamana na mumewe.

“Hapa ndipo nilianza kuuliza maswali kuhusu urafiki wao. Nilimkabili Kinyua na kumwambia amwambie mkewe aachane na mume wangu, lakini hakuwa makini. Hatimaye mume wangu alitelekeza familia yake na kutoweka na Leah mnamo 2015,” Bi Wangivi aliongeza.

Kanyua anasema kuwa hali ilikuwa mbaya kiasi kwamba, mara kadha pasta huyo angefika nyumbani kwake asubuhi na kusalia mle mchana kutwa na mkewe wakiwa wamejifungia chumbani.

Hii ilimfanya kuwaita maafisa wa utawala na viongozi wa kanisa ili wamsaidia kutatua shida hiyo.

“Hali ilikuwa mbaya kwani pasta alitoroka na mke wangu pamoja na watoto na wakakodisha nyumba katika soko la karibu ambako wanaishi,” alisema.

Wataka kurejesha mahari

Wazazi wa Leah sasa wamewasiliana na Kanyua wakimtaka akubali warejeshe mahari aliyotoa kwao ili kutoa nafasi kwa harusi mpya ya binti yao, lakini mwamume huyo amekataa.

Pasta huyo pia amewaambia watoto wake kwamba, anapanga kuoa mke mwingine na kwamba ametengana na mama yao.

Licha ya kukabiliwa na shida hii, Kanyua bado hulipa karo ya watoto wake kando na kutuma chakula wanakoishi na pasta.

“Hii haiwezekani na siwezi kukaa nikitizama mtu mwingine akichukua familia yangu. Ikiwa serikali haitaingilia kati, nitaamua la kufanya. Nimegharimika pakubwa kutunza familia yangu kwa miaka hiyo yote. Sitaruhusu harusi hiyo kuendelea na nitawasilisha kesi ya kuipinga. Akome kuharibu jina lake na aombe msamaha, na nitamkubali arejee nyumbani,” alisema Bw Kanyua.

Mganga aonya pasta kwa kumchomea biashara

Na TOBBIE WEKESA

HAMISI, VIHIGA

KIOJA kilizuka eneo hili baada ya mganga kumshambulia pasta akimlaumu kwa kumharibia jina.

Kulingana na mdokezi, mganga alienda moja kwa moja hadi kwa boma la pasta na kuanza kumfokea huku akitishia kumwadhibu vikali.

Duru zinaarifu kwamba pasta alikuwa akiwakashifu wale waliopenda kutafuta huduma za mganga huyo.

Katika mahubiri yake, pasta alikuwa akimkemea mganga huyo huku akimuita ibilisi mkubwa anayewapora watu.

Habari zilipomfikia mganga alikasirika. “Una ujinga sana. Mbona usishughulike na mambo yako nami nishughulike na yangu,” mganga alimshtumu pasta.

Inasemekana pasta alimkemea mganga huyo huku akimtaka aondoke kwake mara moja. “Acha kuleta mashetani wako hapa. Ondoka haraka,” pasta alimkemea mganga.

Inadaiwa mganga alimuonya pasta kuacha kutaja jina lake kabisa. “Kila mtu afanye kazi yake. Kama unaona yako haikupi riziki basi njoo nikufunze yangu badala ya kuniharibia jina,” mganga alimshauri pasta.

Penyenye zinasema pasta alitishia kuwaita waumini wa kanisa lake kumtimua mganga.

“Ukitaka kuwaita waite. Usipokomesha uchochezi, walahi hutaamini kitakachokufanyikia na utakuja kwangu kunitafuta,” mganga alimtishia pasta.

Majirani wa pasta walibaki vinywa wazi. “Mwambieni huyu mtu wenu aachane na jina langu. Kanisani mwake hawezi kutamatisha mahubiri yake kama hajalitaja jina langu kwa ubaya. Nashuku ni pasta bandia,” mganga aliwaeleza majirani.

Inasemekana pasta aliudhika sana na semi za mganga. “Shetani ashindwe. Unadai kuwaponya watu lakini ni uongo mtupu. Umewahadaa watu wengi humu kijijini,”pasta alimfokea mganga.

Aliendeleza, “Siku ya nyani kufa inakaribia, nakwambia inakaribia kwa jina la Yesu, ondoka hapa.”

Pasta mla fuska abanwa na kidosho

Na Leah Makena

ISINYA, KAJIANDO

Pasta wa hapa, alilazimika kumkabidhi kidosho mmoja sadaka iliyotolewa kanisani ili asianike vitendo vyake vya kula fuska.

Kulingana na mdaku wetu, kipusa alikuwa mpango wa kando wa pasta. Alikuwa akimtembelea mwanadada huyo usiku kula uroda na kisha kurejea kwake kwa sababu alikuwa na familia.

Baada ya miezi kadhaa, pasta alichoshwa na huduma za kipusa huyo na akaamua kumtema lakini akashindwa kwani mrembo alidai alikuwa amemzoea.

Juhudi za pasta za kumshawishi kidosho waachane kwa sababu alikuwa ameoa na ni mchungaji, ziliambulia patupu kwani kidosho alianza kudai pesa kutoka kwake tena kwa vitisho.

Mwanadada alimtaka pasta amwajiri kazi katika kanisa alilokuwa akihudumu lakini akakataa akihofia uhusiano wao ungenduliwa.

Hapo ndipo kidosho alianza kudai hela za kujikimu huku mbinu zote za pasta za kumhepa zikigonga mwamba.

Hivi majuzi, pasta alikatiza mazungumzo na mwanadada. Hata hivyo, alishangazwa kuona mrembo kwenye kanisa lake.

Siku hiyo, kidosho aliomba shemazi kumpeleka hadi ofisi ya pasta akisema alikuwa mgeni wake.

Pasta hakuamini macho yake kidosho apojitoma ndani ya ofisi na kuanza kumfokea kama mtoto mdogo.

“Mbio zako za sakafuni zimeishia ukingoni kwani leo nimekupata. Unawezaje kunihepa ukijua wazi kuwa sina ajira? Mbona hauna utu na nilikuwa nikikuburudisha? Nataka kodi ya nyumba na pesa ya shopping,” kidosho aliwika.

Kwa kuhofia kuanikwa mbele ya washiriki waliokuwa wakimsubiri, pasta alilazimika kumkabidhi sadaka iliyokuwa imetolewa siku hiyo na mwanadada akaondoka akitabasamu.

Pasta alibaki kukadiria hasara asijue la kufanya kwani hakuwa na uwezo wa kuhama kanisa hilo.

Ajabu ya magavana kuajiri mapasta kuwaombea

Na VALENTINE OBARA

MAGAVANA wanawaajiri wahubiri wa kuwaombea na kuwapa ushauri wa kiroho kwa mshahara wa hadi Sh1.7 milioni kwa mwaka, ripoti ya Tume ya Mishahara ya Watumishi wa Umma (SRC) imefichua.

Ripoti hiyo iliyotolewa Jumanne pia imefichua mbinu chafu zinazotumiwa na magavana na madiwani kujilipa mishahara na marupurupu pamoja na kutuza marafiki wao.

Washauri hao wa kidini, ambao wakati mwingi huwa ni wahubiri wa dini tofauti wakiwemo mapasta na masheikh, wanakuwa na majukumu ya kuwapa wakuu hao wa kaunti ushauri wa kiroho, kuwaombea na kuongoza maombi wakati wa hafla za zinazohudhuriwa na magavana.

Kulingana na SRC, hatua ya magavana kuwaajiri wahubiri kama washauri na kuwalipa kwa pesa za umma ni ukiukaji wa sheria.

Hii ni kwa sababu Mamlaka ya Mpito iliyokamilisha kazi yake 2016 ilikuwa imependekeza magavana wawe na washauri wa masuala ya uchumi, sheria na siasa pekee.

“Washauri walilipwa mshahara wa wastani wa Sh1.7 milioni kwa mwaka kwa kila mshauri katika kipindi kilichochunguzwa,” ikasema ripoti hiyo iliyotolewa na Mwenyekiti wa SRC, Bi Lyn Mengich (pichani).

Ukora

Ripoti hiyo pia imeonyesha kuwa serikali za kaunti huajiri watu wenye elimu ya chini kushikilia nyadhifa kubwa afisini.

Kwa mfano, watu walio na cheti cha stashahada walipatikana wakifanya kazi zilizotengewa wenye Digrii katika daraja la ‘K’, huku wenye Diploma wakifanya kazi za usimamizi kwenye daraja la ‘L’.

Cha kushangaza ni kuwa idadi ya watu walioajiriwa katika serikali za kaunti ilipanda kwa kasi mno katika kipindi cha fedha cha mwaka wa 2016/2017 kabla ya Uchaguzi Mkuu kufanyika.

Hali hii ilipelekea kiwango cha fedha kilichotumiwa kulipa mishahara kiongezeke kutoka Sh104.9 bilioni mwaka uliotangulia hadi Sh128.5 bilioni.

Kiwango hiki ni kikubwa zaidi tangu serikali za kaunti zilipoanza kuongoza mwaka wa 2013, na kilipungua hadi Sh75.7 bilioni mwishoni mwa Desemba 2018.

Serikali za kaunti zililaumiwa pia kwa kuwapa watu wasiostahili vyeti vya kudai ni walemavu, ili wapate kazi na tenda zilizotengewa walemavu.

Madiwani pia

Madiwani hawakuachwa nyuma katika wizi wa pesa za umma. Kulingana na ripoti ya SRC, kuna madiwani ambao huweka afisi zao nje ya wadi wanazosimamia ili waweze kudai marupurupu ya juu ya usafiri.

Madiwani pia hupokea marupurupu ya kuhudhuria vikao vya kushauriana na umma, pamoja na ya kutekeleza shughuli za wadi ilhali hakuna stakabadhi zozote za kuthibitisha malipo hayo ni halali.

Bi Mengich alishauri serikali za kaunti na mashirika ya kiserikali kufuata miongozo ya kisheria katika kuajiri watumishi wa umma na kulipa mishahara na marupurupu ili kuepusha uharibifu wa fedha za wananchi.

“Kiwango cha fedha zinazotumiwa kugharamia mishahara kimekuwa kikipanda kila mwaka na kumekuwepo na juhudi serikalini kukipunguza hadi kiwango kinachoweza kustahimiliwa,” akasema.

Ripoti hiyo ilitolewa wakati ambapo bado kuna mvutano kati ya SRC na wabunge kuhusu marupurupu ya nyumba ya Sh250,000 kila mwezi, ambayo tume hiyo inasema hayakupitishwa kisheria.

Pasta afumaniwa na polisi akifukua miili ili auze shamba

Na PETER MBURU

POLISI eneo la Naivasha, Kaunti ya Nakuru Alhamisi walimkamata mhubiri, baada ya kumfumania akifukua miili ya watu wa familia yake, ili auze shamba.

Samuel Macharia, mhubiri kutoka Nairobi alikamatwa nyumbani kwake katika kijiji cha Kinamba, akiwa tayari amefukua miili ya watu watatu; wa mamake, mkewe wa kwanza na mwanawe wa kiume.

Alikuwa akitaka kufukua makaburi saba katika shamba hilo, ili aliuze kwa mtu anayefanya kazi ya kuchimba timbo.

Alisema kuwa alikuwa akipanga kuzika maiti hizo zilizozikwa kati ya 1975 na 2016 tena, katika shamba lingine baada ya kuuza hilo.

Hata hivyo, alikamatwa kwa kuwa hakuifukua akifuata sheria, akijitetea kuwa gharama za kufukua miili akipitia njia ya korti ni ghali mno.

“Nilikuwa nimependekeza kuuza sehemu nyingine ya shamba lakini mnunuzi aliposema anataka hapo sikuweza kupata pesa za kufukua maiti hizo. Gharama ya kufukua mwili wa mtu mzima ni Sh50,000 na wa mtoto ni Sh30,000 nikipitia kortini na niliona zingezipata,” akasema mwanamume huyo.

Majirani, hata hivyo, walisema hali ya watu kufukua miili eneo hilo imekuwa kawaida, wakisema watu mara kwa mara wamelazimika kufanya hivyo kwa sababu tofauti.

MAPISHI: Pasta na meatballs zenye cheese

Na MARGARET MAINA

mwmaina@ke.nationmedia.com

MUDA wa kuandaa: Dakika 10

Muda wa kupika: Dakika 30

Walaji: 2

Vinavyohitajika

  • 250g/ nusu paketi ya tambi
  • Kilo ½ ya meatballs
  • Nyanya 1 kubwa
  • Kitunguu 1
  • Kijiko 1 cha kitunguu saumu
  • Kijiko 1 cha tangawizi
  • Kikombe 1 nyanya ya kopo
  • Vijiko 2 vya mafuta ya mzaituni
  • Kikombe 1 maji
  • ½ kikombe mozzarella cheese
  • Majani ya giligilani

Maelekezo

Weka nyanya na kitunguu kwenye blenda kutengeneza rojo; twanga kitunguu saumu na tangawizi kwa ajili ya sosi, weka kando.

Katakata mozzarella cheese vipande vidogovidogo vya mraba, katakata pilipili na majani ya giligilani vipande vidogovidogo.

Meatballs. Picha/ Margaret Maina

Kwenye sufuria katika moto wa juu kiasi, chemsha mafuta kiasi cha vijiko viwili. Ongeza meatballs. Kaanga kwa dakika mbili au mpaka iwe ya kahawia kwa nje ila isiive kabisa.

Hamisha nyama kwenye sahani.

Chemsha tambi ukifuata maelezo yaliyoko kwenye paketi. Chuja maji, weka pembeni.

Kwenye sufuria uliyotumia kupika nyama, rudisha kwenye moto. Ongeza vijiko viwili vya mafuta, yakichemka ongeza kitunguu saumu na tangawizi pika mpaka viive.

Pasta na meatballs. Picha/ Margaret Maina

Ongeza rojo ya nyanya na nyanya ya kopo, koroga vizuri.

Pika mpaka nyanya ziive vizuri.

Ongeza kikombe kimoja cha maji, acha yachemke mpaka sosi ianze kutokota.

Ongeza nyama, pika kwa dakika tano au mpaka iive vizuri. Kuwa mwangalifu isiive sana kwa sababu cheese kuanza kuchuruzika kwa nje.

Ongeza tambi zilizochemka, pika kwa dakika zingine mbili.

Weka majani ya giligilani. Toa kwenye moto.

Pakua chakula kiliwe kikiwa bado moto

Wakabili pasta kwa kuwaita wenye dhambi

Na LEAH MAKENA

NAARI, MERU

Pasta wa hapa alijipata mateka alipofungiwa kwenye ofisi yake kwa saa kadhaa kwa kuondoa majina ya waumini kwenye sajili ya ushirika akidai walikuwa wenye dhambi.

Mchungaji huyo alidai kwamba baadhi ya washiriki walikuwa wameoa mabibi wengi, hulewa chakari na hata kutumia mali ya kanisa kwenye shughuli zao bila kujali.

Inasemekana kuwa kila walipoenda kinyume na mafunzo ya Kikristo na sheria za kanisa, washiriki hao walikuwa wakifumba macho mapasta wa awali kwa hela ili anyamazie makosa yao wakidai kila mtu ni mwenye dhambi na hakuna aliyekuwa mkamilifu mbele ya Mungu.

Kizungumkuti kilizuka pasta alipohamishiwa kanisa hilo. Baada ya kufanya uchunguzi na kujua kuwa washiriki walikuwa wakioga dhambini, pasta aliwapa onyo lakini wakadinda kubadilisha mienendo wakidai walikuwa wamezoa maisha ya starehe.

Hapo ndipo mtumishi aliita kikao cha kamati kuu ya kanisa na kuondoa asilimia kubwa kwenye ushirika akitaja kila mmoja kulingana na dhambi zake.

Inasemekana kwenye ibada iliyofuata, washiriki walipashwa habari na wakaanza manung’uniko wakimtaja pasta kuwa mjuaji kwa kujaribu kuwatishia maisha.

Siku ya kioja, baadhi ya washiriki walivamia pasta akiwa kwa ofisi yake, wakachukua funguo na kufunga mlango.

Pasta alipogundua kuwa mambo hayakuwa shwari alianza kuvutia washiriki waya ili wafike kumnusuru. Kwa zaidi ya saa nane, pasta aling’ang’ana bila kufanikiwa kwani wengi walimzimia simu na kukataa kuzungumza naye.

Aliamua kumuita mke wake aliyefika na vijana wawili na wakalazimika kuvunja mlango.

Mgogoro kati ya pasta na washiriki uliendelea hadi akahamishwa kutoka kanisa hilo.

Pasta akataa harusi ya mpenzi wa zamani

Na Ludovick Mbogholi
MOMBASA MJINI

Kisanga kilizuka mjini hapa pasta alipokataa kuunganisha wachumba kuwa mume na mke dakika za mwisho siku ya harusi.

Maharusi walifika kanisani kufunga pingu za maisha lakini mtu wa Mungu akakataa. Baadaye ilibainika kwamba bi harusi alikuwa mchumba wake kabla ya kumuacha na kumchumbia bw harusi.

Kulingana na mdokezi, ilikuwa imewachukua wachumba muda mrefu kupanga harusi na siku ilipofika waliwasili kanisani wakiandamana na wapambe wao wakitaka kufungishwa ndoa.

“Siwezi kufanya hivyo, tafuteni mchungaji mwingine,” pasta aliwaambia maharusi hao.

Wapambe walitaka kuelezwa sababu za mchungaji kukataa kutimiza agano lake na maharusi na wakashtushwa na jibu lake.

“Maharusi hawa hawaaminiani, ndoa yao huenda isidumu, nitakuwa nafanya kazi asiyoipenda Mungu, kwanza lazima wajitakase wasafiane nia. Pili siwezi kumkufuru Mungu kwa kufungisha ndoa ambayo haitakuwa na uaminifu,” alidai mchungaji.

Mmoja wa wapambe wa bi harusi alifahamu kiini na akatoboa siri.

“Bi harusi awali alikuwa mpenzi wa pasta, lakini walitofautiana akampata huyu anayetaka kufunga naye pingu za maisha,” mpambe alitoboa siri.

Mchungaji kusikia hivyo alifoka.

“Sifungishi ndoa ya mwanamke asiyekuwa mwaminifu, nimepata maono kutoka kwa Mungu kuwa, huyu hawezi kuishi na mwanamume kutokana na ukosefu wa utulivu,” alidai mchungaji. Maneno yake yalimchemsha bi harusi akamkemea vikali.

“Wewe hufai kuhudumia kondoo, una tabia mbovu na hustahili kuitwa mtu wa Mungu, ushindwe katika jina la Yesu,” bi. Harusi aliwaka kwa hasira akimkemea mchungaji.

Ilibidi maharusi waondoke pasta alipokaa ngumu.

“Kumbe wewe ni mchungaji usiyetaka kupitwa na marinda… tamaa yako ya fisi itakuuwa uzikwe na wanawake uliowachezea, ukawatumia na kuwatupa,” alifoka mpambe mmoja wa bw harusi.

Pasta atorokea kisiwani akidai Huduma Namba ni ya kishetani

Na GAITANO PESSA

MHUBIRI kutoka kijiji cha Mubwayo, eneo la Bunyala, Kaunti ya Busia ameshangaza wakazi baada ya kuuza mali yake na kuhama, ili kuepuka kujisajili kwa mpango wa ‘Huduma Namba’.

Pasta Peter Lungekhe aidha amekuwa akirai waumini wa kanisa lake kuhama pamoja naye kuelekea kisiwa cha Bulindi, Yala ambapo anasema hakuna atakayewafikia.

Bw Lungekhe anaripotiwa kuapa kuwa katu hatajisajili kwa mpango huo wa serikali, akisema unaashiria mwisho wa dunia.

“Hata mkinipeleka kwa Rais Uhuru Kenyatta nitamwambia kuwa sitajisajili kwa Huduma Namba. Sitaki kitu chochote kinachohusiana na Huduma Namba. Mimi ni mfuasi sugu wa Biblia ambayo ilitabiri hili kuja nyakati za mwisho,” mhubiri huyo wa SDA akasema.

Tangu kuanzishwa kwa mpango wa Wakenya kujisajili kwa Huduma Namba, pingamizi zimeibuka zoezi hilo likihusishwa na ushetani na katika Kaunti hiyo ya Busia, kikundi cha wafuasi wa pasta Lungekhe pia wameuza mali yao, wakijitayarisha kuondoka nchini.

“Tayari nimeaga familia yangu na kuwaambia kuwa tutaonana tena. Na hata tusipoonana bado ni sawa. Hata Biblia inasema Petero alishtakiwa kwa kuhubiri ukweli na kwa hilo niko tayari,” pasta Lungekhe akasema.

Hatua yake, hata hivyo, imevutia maoni tofauti kutoka kwa wakazi, wengine wao wakisema hali inayoshuhudiwa ni kwa kuwa serikali haikuelimisha umma kabla ya kuanzisha zoezi hilo.

“Tunashuhudia kuchanganyikiwa kwa kuwa serikali haikuelimisha umma ifaavyo. Pia, kuharakisha zoezi hili na hali kuwa vifaa ni vichache kumeharibu mambo,” akasema Xlare Ajiambo.

Lakini wakazi wengine kama Peter Ojanji walisema kuwa viongozi wa kidini ndio wanafaa kuwa mstari wa mbele kurai watu kujisajili, badala ya kuhubiri kinyume.

“Naelewa hata Jaji Mkuu David Maraga ni mfuasi sugu wa SDA lakini hajauza mali yake,” akasema Bw Ojanji. Waziri Msaidizi wa Masuala ya Nje Ababu Namwamba amekashifu wale wanaopinga zoezi hilo la serikali, akiwataja maadui wa maendeleo.

“Sioni mahali kuna ushetani katika zoezi la kawaida la serikali kuorodhesha watu. Tuache mambo yasiyosaidia taifa kusonga mbele,” akasema Bw Namwamba.

Kulingana na Kamishna wa Kaunti ya Busia, angalau watu 283,872 (asilimia 81.3) wamesajiliwa katika mpango huo wa NIIMS, kila siku serikali ikilenga kusajili watu 24,000. “Nina furaha wakazi wa Busia wametii wito na kujitokeza kujisajili. Kaunti imebakisha watu 65,000 kutimiza lengo,” akasema kamishna huyo.

Pasta asusia mazishi ya sonko mkono ngamu

Na Leah Makena

KAGEENE, MAUA

Kizungumkuti kilizuka kwenye boma moja katika kijiji hiki pasta alipodinda kufika kwenye mazishi akidai mwendazake alikataa kusaidia kanisa alipokuwa hai.

Ilikuwa desturi ya pasta kufika kwa boma za washiriki wake hasa wakikumbwa na misiba ili kuwapa pole na kisha kuwasaidia kuwapa mkono wa buriani wapendwa wao.

Yasemekana bwanyenye mmoja wa hapa alikufa baada ya kuugua kwa muda mfupi na familia yake ikamuarifu pasta siku ya mazishi ili afike kuongoza ibada. Kila kitu kilikuwa shwari hadi mwendo wa saa saba pasta alipokosa kufika na familia ikawa na wasiwasi kwa sababu hakuwa ametuma ujumbe wowote kueleza kuwa angechelewa.

Pasta alitegua kitendawili alipopigiwa simu kwa kukiri kuwa hangeongoza mazishi akidai marehemu alikuwa mjeuri akiwa hai. “Sina jema la kusema kuhusu mwendazake kwani alikuwa mtu wa fitina kanisani.

Kila nilipowataka washiriki kutoa pesa kwa ajili ya injili aliwachochea akisema nilitaka kujilimbikizia mali kwa kutumia pesa zao. Isitoshe, alikataa kutoa zaka na kuapa kutohudhuria harambee yoyote kwani kwa kufanya hivyo aliona angekuwa akinilisha. Nani ataongoza mazishi ya mtu kama huyu?” pasta alijitetea.

Licha ya wazee kumuomba msamaha kwa niaba ya mwendazake, pasta alishikilia kuwa hangefika na kuwataka kutafuta mwingine kuwasaidia.

Baada ya kukosa kumshawishi, wazee walijadiliana na kumkabidhi moja wao mamlaka ya kuongoza mazishi mwendo wa saa kumi na moja jioni.

Msimamo wa pasta uliwashangaza wengi na baadhi wakasema ni funzo kwa wafuasi kuchunga mienendo yao kwani wanajua fika kuwa watapata aibu iwapo watamhitaji ilhali walikuwa wakimdharau.

 

Pasta mgeni atoroka na kapu la sadaka waumini wakiomba

NA CORNELIUS MUTISYA

MISUUNI, KATHIANI

Hali ya mshikemshike ilizuka eneo hili pasta mgeni alipotoroka na kikapu kilichojaa sadaka waumini walipokuwa wamezama katika maombi.

Kulingana na mpambe wetu, pasta wa kanisa hilo alimualika mwenzake kutoka kaunti jirani ili awalishe waumini chakula cha kiroho na baadaye kuongoza harambee ya kupanua kanisa hilo.

“Mtumishi wa Mungu alikuwa na matumaini makubwa kuwa mwenzake angechangisha pesa nyingi katika harambee hiyo kwa sababu alikuwa na ufasaha wa kuongea. Hii ndio sababu kuu ya kumualika kanisani,” alisema mdokezi.

Twaarifiwa kwamba, wakati wa ibada ulipowadia, kanisa lilikuwa limejaa pomoni. Wanakwaya walianza kwa kughani nyimbo mbili na baadaye pasta akanyanyuka ili amualike mgeni wake awalishe waumini chakula cha kiroho.

“Mahubiri ya pasta huyo mgeni yalikuwa moto moto na yaliwagusa wengi rohoni,” asema mdaku wetu.

Inasemekana kwamba, sadaka zilitolewa kwa wingi na kikapu kikawekwa madhabahuni alipokuwa ameketi pasta huyo mgeni.

Inadaiwa kwamba pasta wa kanisa hilo aliinuka na akawaongoza waumini kwa maombi kabla ya kuanza mchango.

Kila mmoja alianza kuomba kwa ndimi na kupandwa na jazba! Ni wakati huo pasta mgeni alipochukua kikapu kilichojaa sadaka na akaondoka polepole na kutoroka kupitia kichaka kilichoko karibu na kanisa.

Penyenye za mtaa zaarifu kuwa, waumini walipomaliza maombi, walipigwa na butwaa walipopata mgeni alikuwa ametoroka na sadaka yote.

Hata hivyo, jitihada zao za kumsaka ziliambulia patupu maana alikuwa ametokomea kusikojulika na akafunga simu yake.

Waumini na pasta wao walibaki wameduwaa kutokana na kisa hicho cha kustaajabisha huku wakimlaani kwa kuiba sadaka bila kuhofia kipigo kutoka kwa Mungu. Pasta wao aliapa kumsaka mgeni wake ili achukuliwe hatua za kisheria.

Nitakuwa pasta nikistaafu kutoka siasa 2032 – Ruto

Na BENSON MATHEKA

NAIBU Rais Dkt William Ruto amesema kwamba analenga kazi ya kuhubiri atakapostaafu siasa katika kipindi cha miaka kumi ijayo.

Dkt Ruto alisema kwamba ni makosa kwa viongozi kukwamilia mamlakani kwa muda mrefu na akatangaza kuwa anapanga kuendeleza neno la Mungu baada ya kuacha siasa.

Akizungumza katika hafla ya kusherehekea miaka 50 ya kuhudumu kwa Askofu Samuel Thiong’o wa kanisa la Pentecostal Evangelistic Fellowship of Afrika (PEFA) mjini Kitale, Kaunti ya Trans Nzoia mnamo Ijumaa, Dkt Ruto alisema kwamba alianza kazi ya kuhubiri akiwa muumini wa kanisa la African Inland Church (AIC) kabla ya kujiunga na kanisa la Pentekosti.

“Nililelewa katika kanisa la AIC lakini sasa mimi ni Mpenteskosti. Na kama alivyosema askofu (Thiongo), hii Pentekosti na Evangelisiti iko sawa na mimi kabisa,” alisema Dkt Ruto.

Kamati ya uwiano iliyoteuliwa na Rais Uhuru Kenyatta na kiongozi wa upinzani Raila Odinga inaendelea kukusanya maoni kutoka kwa umma na wengi wanapendekeza Katiba irekebishwe kupunguza mamlaka ya rais.

Baadhi wamependekeza kubuniwa kwa wadhifa wa waziri mkuu na manaibu wake na rais awe akihudumu kwa kipindi kimoja cha muda wa miaka saba pekee.

Dkt Ruto amekuwa akipinga marekebisho ya Katiba yanayolenga kubuni nyadhifa kunufaisha watu fulani.

Pasta aonya mwanawe asipotoshe vidosho kanisani

Na JOHN MUSYOKI

Machakos Mjini

KULIZUKA kioja mtaani hapa pasta alipomkemea mwanawe akimlaumu kwa kutaka kupotosha kipusa muumini wa kanisa lake.? Inasemekana kijana wa pasta alikuwa akimmezea mate kichuna wa kanisa hilo japo hakuwa akienda kanisani.

Siku ya kioja, jamaa alijipata pabaya babake alipompata akipiga gumzo na mwanadada huyo na akamkemea mbele ya umati wa watu.

“Unataka nini hapa kanisani.Kwanza wewe huwa haushiriki katika kanisa hili. Unafanya nini na dada huyu.Wewe ni mwanangu lakini sitakubali upotoshe msichana huyu.Tabia yako haifai. Nimekuonya mara nyingi uokoke lakini umekuwa na roho ya chuma,” pasta alimwambia mwanawe.

Yasemekana jamaa hakuruhusu baba yake aendelee kumdhalilisha mbele ya watu. Alimwambia baba yake hakufaa kuingilia maisha yake ya kibinafsi.

“Wewe ni pasta na baba yangu hilo sikatai. Lakini kinachokuwasha ni nini. Hata kama sijaokoka hufai kunizuia kumchumbia mwanadada huyu. Hautanizuia kufanya jinsi ninavyotaka,” polo alimwambia babake.

Pasta alikaa ngumu na kumwamuru jamaa kuondoka uwanja wa kanisa.

“Kufumba na kufumbua sitaki kukuona ukisimama na mwanadada huyu na ukiendelea kunikaidi nitakuonyesha cha mtema kuni,” pasta alitisha.

Hali ilizidi kuchacha ikawa ni vuta nikuvute kila mmoja akitetea upande wake.

“Kwa sasa ningependa ujue kwamba nampenda mwanadada huyu kwa dhati.Naondoka sasa hivi lakini ningependa kukuhakikishia kwamba hautanuzuia,” jamaa aliongeza na kuondoka.

Inasemekana mwanadada hakusema lolote mtu na baba yake walipokuwa wakilaumiana kwa sababu yake.? Umati ulianza kunong’onezana kuhusu kisa hicho huku wengi wakipigwa na butwaa na kukosa majibu ya maswali waliyojiuliza.

Hata hivyo, haikujulikana kilichojiri baada ya kioja hicho.

BRAZIL: Pasta kutoka kuzimu

NA MASHIRIKA

PASTA mmoja amekamatwa kwa madai ya kubaka waumini wake, baada ya kuwahadaa kuwa uume wake una ‘maziwa matakatifu’ ambayo wanahitaji ili wapone.

Bw Sobrino Valdeci Picanto, pasta kutoka Brazil anadaiwa kuwa aliwahadaa waumini hivyo kama mbinu ya kuhubiri neno, akisema ‘maziwa’ hayo ni matakatifu.

Pasta huyo anadaiwa kuwaambia waumini kuwa sehemu zake nyeti zimebarikiwa na kuwa “mungu ameziweka maziwa matakatifu ya roho mtakatifu’ na hivyo alitaka kuwapa.

“Alitwambia kuwa Mungu angeingia katika maisha yetu kwa njia yam domo tu,” akasema mfuasi.

“Mara nyingi baada ya ibada, pasta Valdeci amekuwa akitutaka kumfanyia ngono ya mdomo hadi roho mtakatifu aje na kuletea kanisa pesa,” akasema.

Pasta huyo wa miaka 59 alikamatwa alipokuwa eneo la Apore, Goias, nchini Brazil kwa kuwabaka wanawake kadha ambao ni waumini wa kanisa lake.

Aliwahadaa kuwa sehemu zake nyeti zimetiwa ‘mafuta matakatifu ya kiroho.’

Aidha, alidai kuwa alikutana na yesu katika soko la ngono, ambapo alimpa kazi ya kusambaza ‘manii matakatifu’ nchini kote, akianza na waumini wa kanisa la Apore ambalo huwa anahubiri.

“Valdecir aliopatikana peupe akipiga punyeto uume wake usoni mwa mfanyabiashara wa eneo hilo, kwa ahadi kuwa biashara yake ingenawiri baada ya kupata ‘mafuta hayo matakatifu.’

Kisa hicho kimetokea baada ya kingine Afrika Kusini, ambapo mhubiri mwingine naye alijeruhiwa vibaya na simba alipoenda kujianika mbele yao, akidai kuwa nguvu za roho mtakatifu zingemlinda. Aliokolewa na askari wa kulinda wanyama pori ambao walipiga risasi hewani kutawanya wanyama hao.

Wiki chache baadaye, mhubiri Mboro pia kutoka Afrika Kusini aliripotiwa kwenda mbinguni kwa mwili wakati ibada ilikuwa ikiendelea, kisha akarejea wiki moja baadaye na kudai kuwa alipiga picha za selfie na Yesu.

Amekuwa akiuza picha hizo kwa Sh50,000 moja. Aidha mhubiri huyo alidai kuwa Yesu ana mke Mwafrika ambaye ni mrembo sana, huko mbinguni.

Ajuta kuropokwa pasta wake hutafuna kondoo

Na DENNIS SINYO

TESO, BUSIA

KALAMENI mmoja alikuwa na wakati mgumu alipoitwa kanisani kuthibitisha madai kwamba pasta wake ni mzinifu.

Yasemekana jamaa huyo alikuwa akieneza udaku kwamba pasta wao alikuwa akila fuska mitaani.

Jamaa alidai kwamba pasta alikuwa na uhusiano wa kimapenzi na mke wa mshirika wake.

Kulingana na mdokezi, jamaa alikuwa amemfahamisha mume wa mwanamke huyo kwamba pasta alikuwa akiharibu ndoa yake.

“Najua utashtuka lakini ujue kwamba kuna mtu anayechovya asali kutoka kwa mzinga wako. Kama huna habari ujue mchungaji wetu amekuwa akinyemelea mke wako,” jamaa alimweleza mume wa mwanamke huyo.

Pasta alipopata habari hizo, alimuita jamaa mbele ya kanisa na kumtaka kutangaza alichojua ili ukweli ujulikane.

Pasta huyo alisema alipokea ujumbe huo kwa mshtuko huku akitaka jamaa kuweka bayana ukweli wa mambo.

“Kwa muda sasa nimekosa amani kwa sababu ya mambo nisiyoyajua. Naomba mmoja wetu ambaye anasemekana kusambaza ujumbe huo aje aseme ukweli mbele ya kanisa,’’alisema pasta akimuita jamaa.

Yasemekana jamaa huyo alishindwa kuongea kwa muda.Alianza kutokwa na kijasho huku akiomba msamaha. Alijuta akisema alitoa madai hayo bila kufanya uchunguzi akidokeza kwamba yeye pia alisikia tu kutoka kwa watu.

“Wacha niombe msamaha mbele ya kanisa lote. Mnisamehe kwa yale yote nimesema lakini ukweli ni kwamba niliyasikia madai hayo kwa watu tu,’’alijitetea jamaa.

Mke wa mchungaji alianza kutokwa na machozi kwa sababu ndoa yao ilikuwa imeanza kusambaratika madai hayo yalipoibuka.

Pasta huyo aliungana na kanisa kumsamehe jamaa na kushauri waumini kujiepusha na udaku.

Pasta atimua polo kumtamani bintiye kanisani

NA JOHN MUSYOKI

MACHAKOS MJINI

KISANGA kilizuka katika kanisa moja hapa jamaa alipofurushwa kwa madai ya kuharibu binti ya pasta. Inasemekana jamaa alikuwa mgeni katika kanisa hilo aliposimama kusalimia waumini na kudai nia yake ilikuwa ni kuoa binti ya pasta.

Matamshi yake yalimkera mtumishi wa Mungu na akamnyang’anya kipaza sauti na kumwamuru aondoke kabla ya kumchukulia hatua. “Kijana wewe, toka nje mara moja kabla sijachemka kwa hasira. Wewe ni nani na sijawahi kukuona hapa wala hujaja kwangu kujitambulisha?” pasta alimfokea.

Jamaa alijaribu kujitetea lakini mtumishi wa Mungu alimpuuza. “Kwanza wewe sio muumini wa kanisa hili na hauna nafasi ya kudai utaoa binti yangu mbele ya waumini bila ruhusa kutoka kwangu, kwenda kabisa!” Pasta alizidi kuchemka.

Hata hivyo, jamaa alijkakamua kujitetea lakini juhudi zake ziliambulia patupu. “Pasta kuwa mpole. Nishapendana na binti yako kwa dhati na hata usiku silali nikimfikiria. Binti yako sasa amekomaa na ana haki ya kuolewa. Kwa nini umemfunga nyumbani kama kuku, mpe uhuru wake aolewe,” jamaa alimwambia pasta

Inasemekana pasta alimrukia jamaa akitaka kumcharaza lakini akazuiliwa na waumini. “Huyu kijana anataka kumharibu binti yangu. Sitakubali hilo kutendeka. Hana hata heshima kuja hapa kanisani kutangaza anataka kumuoa binti yangu. Binti yangu sio kahaba na sitaruhusu mwanamume aliyepotoka kumharibu,” pasta alisema.

Jamaa kuona hivyo aliamua kuondoka kanisani na kwenda zake. Hata hivyo haikujulikana ikiwa alikuwa akimchumbia binti ya pasta huyo ambaye hakuwa kanisani wakati wa kisanga hicho.

Kwa mujibu wa mdokezi, pasta alikuwa mkali sana na hakurusu mabinti zake kutoka nje ya boma bila ruhusa.

Pasta azirai na kufa katika mzozo wa chai na binti yake

BENSON AMADALA na MACHARIA MWANGI

UGOMVI kati ya pasta mstaafu wa Kanisa la Church of God eneo la Ingotse, Kaunti ya Kakamega na bintiye kuhusu chai ulipelekea kifo cha mzee huyo mnamo Ijumaa.

Habari zilielea kuwa Pasta Gabriel Amayo Nangabo,76, kutoka kijiji cha Ematetie, Kata ya Butsotso ya Kati, alikasirishwa na hatua ya mwanawe wa miaka 21 kumwaga chai ambayo mkewe alikuwa ametayarisha.

Kulingana na mkewe Pasta Amayo, Bi Beatrice Amanya, alikuwa jikoni akimpikia mumewe chai ndipo mwanawe akaingia akiwa amepandwa na hasira na kuzua ugomvi.

“Mwanangu alichukua birika iliyojaa chai akaimwaga. Babake alipoingilia kati aliendeleza ukatili kwa kuanza kutupiga kwa mawe,” akasema Bi Amanya kwa masikitiko.

Kulingana na jirani Alfred Kitayi, alivutiwa na kelele na vishindo hivyo na alipofika alpiata mzee huyo ameanguka chini akiwa ameaga dunia.

Bi Amanya alifichua kwamba mwanawe amekuwa msumbufu tangu awache masomo baada ya kupata mimba.

OCPD wa Kakamega John Chebii alithibitisha kisa hicho na kusema kwamba msichana huyo amekamatwa na polisi wanaendelea uchunguzi.

“Tunasubiri matokeo ya uchunguzi wa maiti kabla ya kuamua iwapo tutamshataki msichana huyo,” akasema Bw Chebii.

Katika Kaunti ya Nakuru, afisa polisi wa Utawala (AP) alimpiga risasi na kumjeruhi mhudumu wa duka la M-Pesa mwenye umri wa miaka 18, kabla ya kujitoa uhai kwa risasi katika eneo la Ndabibi.

Mkuu wa polisi wa eneo hilo, Bw Samuel Waweru aliambia wanahabari kwamba afisa huyo alienda katika duka hilo Jumamosi asubuhi na akampiga risasi mhudumu huyo.

Bw Waweru alieleza kuwa msichana huyo alipata majeraha na akakimbizwa katika Hospitali ya Kaunti Ndogo ya Naivasha ambako anaendelea kupokea matibabu.

“Nimewasiliana na msimamizi wa hospitali na amesema tineja huyo anaendelea vyema,” akasema Bw Waweru.

Mkuu huyo wa polisi, ambaye alikuwa akizungumza katika eneo la tukio, alisema baada ya kumfyatulia msichana huyo risasi, afisa huyo alienda nyumbani kwake ambapo alijipiga risasi na kujiua.

Mwili wake ulipelekwa katika hifadhi ya maiti ya Hospitali ya Kaunti Ndogo ya Naivasha.

Pasta mpenda sketi afichuliwa kwa ndoto

Na LEAH MAKENA

KAGEENE, MERU

MUUMINI wa kanisa moja eneo hili alijipata mashakani alipotimuliwa kanisani kwa kumwambia pasta kwamba aliota akiondolewa kama kiongozi wa kanisa hilo.

Yasemekana jamaa alimweleza pasta kwamba alifunuliwa ndotoni kwamba uongozi wake haungedumu kwa muda mrefu iwapo hangebadili mwenendo wake.

Kulingana na mdokezi, jamaa alimweleza pasta kwamba aliota akiwa amefumaniwa na wafuasi akistarehe na vichuna wa kanisa lake, jambo walilokashifu vikali na kumtaka kukoma kuongoza kanisa.

Muumini huyo alisema ndotoni alifunuliwa kwamba muda wa pasta kuhudumu ulikuwa ukikaribia kuisha kwa sababu ya tabia yake.

Mshiriki aliongeza kuwa ndoto hiyo ilikuwa na ukweli ndani yake akidai kuwa kila analoota huwa linatimia au kutimia baada ya muda na akamtaka pasta kutubu na kuomba ili kuepuka majaribu yaliyokuwa mbele yake.

Hapo ndipo pasta alipandwa na hasira na kuanza kumfokea muumini huyo akimtaja kama nabii wa shetani na kumtaka kutafuta kanisa tofauti ikiwa anaamini ni mbaya.

“Hata hauna haya kuja kwa mtumishi wa Mungu na kutoa hadithi za ujinga? Ninajua unaona gere kwa sababu vijana wananiheshimu na kuwa karibu na mimi ila sitakupa muda uendelee kupotosha washirika. Leo iwe mwisho wa kukuona kwenye uwanja huu,” pasta aliamuru.

Mfuasi alikubali kutii ila akaendelea kumuonya pasta kwenye mitandao ya kijamii akiwasihi washirika kutafuta makanisa mengine kwa madai kuwa pasta alikuwa amekosa maadili.

Minong’ono yasema kuwa pasta alikuwa mpenda vidosho na alifanya mipango kabambe nao chini ya maji na ndiposa akamfurusha jamaa kwa hofu kuwa njama zake zingegunduliwa.

 

Nyoka wavamia pasta akitimua mapepo

NA MWANDISHI WETU

Kasikeu, Makueni

Hali ya taharuki ilitanda eneo hili pasta mmoja msifika aliposhambuliwa na nyoka wawili alipokuwa akijaribu kufukuza mapepo katika boma la jirani ya muumini wa kanisa lake.

Ripoti za mtaa zinaarifu kuwa, pasta huyo alitimua mbio za kufa kupona huku akipiga kamsa, nao nyoka hao wakapotea kimiujiza, tena kwa njia ya ajabu sana!

Kulingana na mdokezi wetu, mwenye boma hilo alimwendea jirani yake aliyekuwa ameokoka na kumsihi amsaidie kwa vyovyote vile kuyatoa mapepo yaliyokuwa yakisumbua familia yake kila siku.

Aliahidi kumletea Mtumishi wa Mungu aliyekuwa gwiji wa kuyakomoa mapepo ya kila sampuli.

Inasemekana kwamba, muumini huyo alimuarifu pasta masaibu na madhila ya jirani yake na siku ya kufukuza mapepo ikapangwa. Mwenye boma alitakiwa atafute sadaka nono .

Siku ilipowadia, pasta alifika katika boma hilo huku akiwa ameezeka Biblia kwapani na akaitisha sadaka kwanza ili aanze ‘kazi’ yake bila wasiwasi wowote.

Alikabidhiwa Sh5000 na akaanza kuomba kwa ndimi huku akizunguka boma hilo.

Tunaarifiwa kwamba, wakati pasta alipokuwa nyuma ya nyumba ya mwenyeji wake, nyoka wawili walichomoka kama swara kutoka kusikojulikana na kumshambulia.

Hata hivyo, alinusurika kiajabu na akachana mbuga huku akipiga nduru kwa hofu.

Hata hivyo, nyoka hao walitoweka kimiujiza na kuwaacha wengi vinywa wazi huku mwenye boma akijifungia ndani ya nyummba akiogopa kushambuliwa na umati huo uliokuwa umejaa mori.

”Hiki ni kisa cha ajabu mno eneo hili,” mkazi mmoja alisikika akisema.

 

Vurugu waumini wakipinga pasta kutumia hela za kanisa kujinunulia gari

Na CAROLINE MUNDU

VURUGU zilitokea katika Kanisa la Nyalenda Baptist mjini Kisumu Jumapili kufuatia madai kwamba pasta alitumia pesa za kanisa kununua gari bila idhini ya waumini.

Pasta Samuel Otieno, pamoja na wasimamizi wengine wakuu wa kanisa hilo, walidaiwa kutoa Sh800,000 kwenye akaunti ya kanisa na kununua gari aina ya Toyota Axio bila ruhusa wala kufahamisha waumini na viongozi wengine.

Kulingana na katibu wa kanisa, Bi Monica Mugaro, fedha za kanisa zilitolewa benki bila yeye kujua kama inavyohitajika na kanuni za usimamizi wa kanisa hilo.

“Tulishtuka tulipofahamishwa kupitia kwa tangazo kanisani kwamba pesa zilitolewa benki na gari likanunuliwa. Zaidi ya hayo, hatujaonyeshwa risiti wala kuona pesa zilizobaki baada ya gari kununuliwa,” akasema.

Hata hivyo, Bw Otieno pamoja na Shemasi Mkuu wa kanisa, Bw Dennis Oduol walikanusha madai hayo na kuahidi kuwasilisha stakabadhi zote ambazo waumini wenye malalamishi wanataka kuona.

“Kabla Jumapili ijayo tutakuwa tayari tumewaita viongozi wenye malalamishi na kuwaonyesha kila stakabadhi za ununuzi wa gari hilo,” akasema Bw Otieno.

Duru zilisema kuwa viongozi waliouliza kuhusu fedha hizo walipewa barua kwamba wameondolewa kwenye nyadhifa zao kwa mwaka mmoja na wakaonywa wasiwahi kuingia katika uwanja wa kanisa wala kujihusisha na waumini wengine.

Mwenyekiti wa kanisa hilo alimlaumu pasta wao kwa kile alichosema ni kuwadhulumu waumini.

“Tunagharamia ada zake za maji, stima, marupurupu kila Jumapili ilhali bado anatumia vibaya fedha za kanisa. Ni wazi kwamba yeye si kiongozi anayeongozwa na roho mtakatifu,” akalalama mwenyekiti huyo, Bi Catherine Otieno.

Kioja hicho kilivutia maafisa wa polisi wenye silaha ambao waliitwa kutuliza hali.

Mapasta wamekuwa wakilaumiwa kwa kuishi maisha ya kifahari huku waumini wao wengi wakiishi maisha ya uchochole.

Pasta azaba kidosho kofi kwa kumtongoza

Na JOHN MUSYOKI

Machakos

KIPUSA mmoja kutoka mahali hapa alikiona cha mtema kuni alipozabwa makofi na pasta kwa kumtongoza walipokutana njiani.?

Inasemekana pasta na demu huyo walikuwa marafiki hapo awali lakini wakakosana baada ya jamaa kuamua kumtumikia Mungu.

Baada ya pasta kumaliza masomo yake ya innjili, aliendelea kuhubiri akiwa katika harakati za kutafuta mwanamke wa kuoa.? Siku ya kioja, pasta alipokuwa akielekea nyumbani kutoka kanisani, alikutana na mpenzi wake wa awali.

Demu alianza kueleza jinsi alivyokuwa akimpenda pasta huyo na kumlaumu kwa kumpuuza.

“Hei, nimekuwa nikikutafuta kwa muda mrefu. Mimi bado ninakupenda. Najua unaendelea kutafuta mwanamke wa kuoa. Kumbuka tulianza uhusiano wetu kitambo na hakuna haja ya kuhangaika nikiwa hapa. Niko sawa,” demu alimwambia pasta.

Pasta kwa upande wake alimpuuza lakini demu bado alisisitiza kwamba alikuwa anampenda.

“Hata hauna haya kusimama mbele yangu na kuanza kunihadithia stori kama hizo. Mimi sitaki hadithi zako. Kumbuka vile ulivyonitesa na kuniona nikiwa mtu bure kabisa. Nilipoamua kuwa pasta uliniacha na kunirushia cheche za matusi. Ulikuwa unataka nifanye nini? Baadaye ulianza kutembea na wanaume mitaani. Wewe ni kahaba. Toka mbele yangu kabla sijachemka,” pasta alimwambia kipusa.

Licha ya demu kukemewa na pasta, alisisitiza kwamba mtumishi wa Mungu alikuwa wake.

“Wewe ni wangu na mtu akijaribu kuja kujipendekeza kwako nitapambana naye kufa kupona,” demu alimwambia pasta.? Pasta alikasirika na kumwangushia demu kofi moto la usoni.

“Wacha kunisumbua. Sitaki presha zako. Hata ukijipendekeza kwangu mimi siwezi kukuoa. Kwenda kabisa,” pasta alifoka.

Inasemekana baada ya demu kuangushiwa kichapo, alitoka shoti mfano wa mtu aliyefukuzwa na mapepo na kutoweka asijulikane ameenda wapi.