Lazio watia kapuni alama tatu za bwerere Serie A baada ya Torino kuingia mitini

Na MASHIRIKA

MECHI ya Ligi Kuu ya Italia (Serie A) iliyokuwa iwakutanishe Lazio na Torino iliwapa wenyeji alama tatu za bwerere baada ya wageni Torino kukosa kusafiri uwanjani Olimpico, Roma baada ya maafisa wa afya kutia kikosi kwenye karantini.

Baada ya wanasoka wanane wa Torino kupatikana na virusi vya corona, maafisa wa afya jijini Turin, Italia waliomba kikosi hicho cha Torino kutosafiri mjini Roma kuvaana na Lazio.

Hata hivyo, vinara wa Serie A walitaka mchuano huo usakatwe jinsi ilivyoratibiwa licha ya gozi la awali lililokuwa liwakutanishe Torino na Sassuolo kusitishwa siku tano kabla ya tarehe ambapo vikosi hivyo vilitarajiwa kushuka dimbani.

Licha ya hali iliyowasibu Torino waliokuwa zaidi ya kilomita 680 kutoka mjini Roma, Lazio walikitaja kikosi chao kwa ajili ya mechi hiyo iliyokuwa isakatwe mnamo Machi 2, 2021.

Kutibuka kwa mechi hiyo kulirejesha kumbukumbu za Oktoba 2020 ambapo mechi iliyokuwa iwakutanishe Juventus na Napoli ilikosa kufanyika kwa sababu ya corona japo Juventus wakapokezwa alama zote tatu.

Kwa mujibu wa kanuni za Serie A, Lazio wanatarajiwa kupokezwa alama tatu za bure na ushindi wa 3-0 huku Torino wakiondolewa alama moja kwa kukataa kufika uwanjani kwa ajili ya mechi kati yao na Lazio.

Hata hivyo, Napoli walikata rufaa kwenye Kamati ya Kitaifa ya Olimpiki ya Italia (CONI) baada ya kuondolewa alama na sasa wakapangiwa upya kucheza na Juventus ambao ni mabingwa watetezi wa Serie A.

Torino kwa sasa hawajawahi kucheza mechi yoyote tangu wapige Cagliari 1-0 mnamo Februari 19, 2021. Mchuano wao ujao ni dhidi ya Crotone wanaovuta mkia. Mechi hiyo itasakatwa mnamo Machi 7, 2021.

Lazio watakutakana na Juventus jijini Turin mnamo Machi 6. Watashuka dimbani kwa ajili ya mechi hiyo wakilenga kujinyanyua baada ya kupokezwa kichapo cha 2-0 kutoka kwa Bologna mnamo Februari 27, siku chache baada ya kucharazwa 4-1 na Bayern Munich kwenye mkondo wa kwanza wa hatua ya 16-bora ya Klabu Bingwa Ulaya (UEFA).

TAFSIRI NA: CHRIS ADUNGO

Ronaldo afungia Juventus mabao mawili dhidi ya Udinese na kutua kileleni mwa orodha ya wafumaji bora Serie A

Na MASHIRIKA

CRISTIANO Ronaldo alifunga mabao mawili na kuchangia moja jingine katika ushindi wa 4-1 ulioandikishwa na Juventus dhidi ya Udinese katika Ligi Kuu ya Italia (Serie A) mnamo Jumapili.

Ronaldo aliwafungulia Juventus ukurasa wa mabao kupitia krosi ya Aaron Ramsey katika dakika ya 31 kabla ya kuchangia goli la pili lililopachikwa wavuni na Federico Chiesa katika dakika ya 49.

Ronaldo kwa sasa anajivunia mabao 14 kutokana na mechi 11 zilizopita za Serie A, ufanisi ambao unamweka kileleni ma orodha ya wafungaji bora wa Serie A msimu huu.

Marvin Zeegelaar alifuma bao lililofuta machozi ya Udinese katika dakika ya 90, sekunde chache kabla ya Paulo Dybala kuongeza goli la nne kwa upande wa Juventus ambao ni mabingwa watetezi wa taji la Serie A.

Chini ya kocha Andrea Pirlo, Juventus kwa sasa wanashikilia nafasi ya tano kwa alama 27 japo pengo la pointi 10 linatamalaki kati yao na viongozi AC Milan ambao wamesakata mchuano mmoja zaidi kuliko Juventus.

Kichapo ambacho Udinese walipokezwa kiliwateremsha hadi nafasi ya 13 kwa alama 15 sawa na Fiorentina. Udinese kwa sasa hawajasajili ushindi wowote katika msururu wa michuano minne iliyopita.

Ciro Immobile mfungaji bora wa Serie A

Na CHRIS ADUNGO

FOWADI Ciro Immobile, 30, alitawazwa mfungaji bora wa Ligi Kuu ya Italia (Serie A) na akaibuka pia mfumaji bora miongoni mwa wanasoka wote wa Ligi Kuu ya za bara Ulaya msimu huu wa 2019-20.

Nyota huyu mzawa wa Italia alicheka na nyavu katika mechi iliyoshuhudia waajiri wake Lazio waliomaliza kampeni za msimu huu katika nafasi ya nne jedwalini, wakipepetwa 3-1 na Napoli mnamo Agosti 1, 2020.

Bao la Immobile ambaye pia amewahi kuchezea Borussia Dortmund na Sevilla, lilimwezesha kuifikia rekodi ya fowadi mzawa wa Argentina, Gonzalo Higuain aliyepachika wavuni jumla ya magoli 36 mnamo 2015-16 akivalia jezi za Napoli. Higuain, 32, kwa sasa huchezea Juventus ya Italia.

Fabian Ruiz aliwaweka Napoli kifua mbele kunako dakika ya tisa kabla ya Immobile kusawazisha mambo dakika 13 baadaye. Mabao mengine kutoka kwa Lorenzo Insigne na Matteo Politano yaliwezesha Napoli ya kocha Gennaro Gattuso kutia kapuni alama zote tatu zilizowadumisha katika nafasi ya saba kwa alama 62, nane nyuma ya AS Roma waliofunga mduara wa tano-bora.

Cristiano Ronaldo aliyepumzishwa na Juventus katika mchuano wao wa mwisho dhidi ya Roma, aliambulia nafasi ya pili katika orodha ya wafungaji bora wa Serie A kwa mabao 31, manane zaidi kuliko Romelu Lukaku wa Inter Milan.

Immobile alikamilisha kampeni za msimu huu katika soka ya bara Ulaya kwa mabao mawili zaidi kuliko Robert Lewandowski aliyewafungia Bayern Munich jumla ya magoli 34. Ronaldo aliambulia nafasi ya tatu.

Ilikuwa mara ya tatu kwa Immobile kutwaa taji la mfungaji bora wa Serie A baada ya kulitia kapuni mnamo 2013-14 alipopachika wavuni jumla ya magoli 22 kisha kulinyanyua kwa pamoja na Mauro Icardi mnamo 2017-18 kila mmoja wao alipocheka na nyavu mara 29.

Hii ni mara ya kwanza tangu 2006-07 kwa taji la mfungaji bora katika soka ya bara Ulaya kutomwendea mchezaji asiye wa Ligi Kuu ya Uhispania (La Liga). Taji hilo lilitwaliwa na Francesco Totti wa Roma mnamo 2006-07.

Lionel Messi wa Barcelona aliyeibuka mshindi wa taji hilo katika kipindi cha misimu mitatu iliyopita alifaulu kutikisa nyavu za wapinzani mara 25 pekee muhula huu wa 2019-20.

Juventus wanyakua taji la Serie A kwa msimu wa tisa mfululizo

Na CHRIS ADUNGO

JUVENTUS walitwaa taji la Ligi Kuu ya Italia (Serie A) kwa mara ya tisa mfululizo baada ya kuwapepeta Sampdoria 2-0 jijini Turin mnamo Julai 26, 2020.

Nyota Cristiano Ronaldo aliwafungulia Juventus ukurasa wa mabao mwishoni mwa kipindi cha kwanza baada ya kupokezwa krosi na Miralem Pjanic anayetazamiwa kuyoyomea Uhispania kuvalia jezi za Barcelona mwishoni mwa msimu huu. Bao hilo la Ronaldo lilikuwa lake la 31 hadi kufikia sasa katika kivumbi cha Serie A.

Goli la pili la Juventus ambao kwa sasa wananolewa na kicha wa zamani wa Chelsea, Maurizio Sarri lilipachikwa wavuni na Federico Bernardeschi katika dakika ya 67.

Juventus ndicho kikosi cha pekee kuwahi kunyanyua ubingwa wa ligi mara tisa mfululizo miongoni mwa vikosi vyote vya Ligi Kuu tano za bara Ulaya yaani Uingereza (EPL), Italia (Serie A), Uhispania (La Liga), Ujerumani (Bundesliga) na Ufaransa (Ligue 1).

Kwa kutia kapuni ufalme wa Serie A muhula huu, Juventus wanaendeleza rekodi yao ambayo Bayern Munich ya Ujerumani ilifikia Juni 2020 baada ya kunyanyua ubingwa wa Bundesliga kwa mara ya nane mfululizo.

Ronaldo alikosa fursa ya kumfikia na hata kumpiku mfumaji wa Lazio, Ciro Immobile ambaye kwa sasa ni mshindani wake mkuu katika vita vya kupigana taji la Mfungaji Bora wa Serie A muhula huu.

Hii ni baada ya sogora huyo wa zamani wa Manchester United na Real Madrid kushuhudia penalti yake mwishoni mwa kipindi cha pili ikibusu mwamba wa goli la Sampdoria.

Immobile ambaye kwa sasa anajivunia mabao 34, anamzidi Ronaldo kwa magoli matatu. Fowadi huyo wa zamani wa Borussia Dortmund na Sevilla alipachika wavuni mabao matatu katika ushindi wa 5-1 uliosajiliwa na Lazio dhidi ya Verona katika mechi nyingine ya Julai 26.

Juventus walijibwaga uwanjani wakihitaji kuvuna ushindi mara moja pekee kutokana na mechi tatu walizokuwa wamesalia nazo msimu huu. Hii ni baada ya kupoteza fursa ya kujitwalia taji hilo mnamo Julai 23, 2020 ambapo walipokezwa kichapo cha 2-1 kutoka kwa Udinese. Mchuano dhidi ya Sampdoria ulikuwa wao wa pili kusajili ushindi kutokana na sita ya awali.

Licha ya kuzamisha chombo cha Sampdoria, mchezo wa Juventus ulikuwa wa kiwango cha chini na ni majaribio yao manane pekee kati ya 19 yaliyolenga shabaha kwenye goli la wageni wao.

Ushindi huo ulimvunia Sarri ambaye pia amewahi kunoa Napoli ya Italia taji lake la kwanza la ligi katika historia ya ukufunzi.

Juventus sasa wanaingia katika kundi moja na Celtic kutoka Scotland na Ludogorets Razgrad kutoka Bulgaria ambao wamewahi kutia kibindoni mataji ya Ligi Kuu za mataifa yao kwa misimu tisa mfululizo.

Rekodi ya dunia kwa kikosi kilichowahi kutwaa ubingwa wa Ligi Kuu kwa mara nyingi zaidi inashikiliwa na klabu ya Tafea iliyowahi kunyanyua ufalme wa Ligi Kuu ya Vanuatu kwa misimu 15 mfululizo kati ya 1994 na 2009. Lincoln Red Imps ya Gibraltar na iliyokuwa klabu ya Skonto nchini Latvia zinajivunia rekodi ya bara Ulaya baada ya kutwaa ubingwa wa soka ya mataifa yao kwa mara 14 mfululizo.

Olympique Lyon ya Ufaransa waliwahi kujizolea ubingwa wa Ligue 1 mara saba mfululizo kati ya 2002 na 2008 huku Real Madrid ya Uhispania ikinyanyua ufalme wa La Liga mara tano kwa mpigo, mara mbili zaidi kuliko Huddersfield, Arsenal, Liverpool na Manchester United ambao ni washiriki wa pekee wa EPL kuwahi kutawazwa mabingwa wa soka ya Uingereza mara tatu mfululizo.

Miongoni mwa washiriki wa Ligi Kuu tano za bara Ulaya, Juventus ndio wanaojivunia rekodi ya kunyanyua mataji mengi zaidi ya ligi (36). Wanawapiku mabingwa wapya wa La Liga, Real kwa mataji mawili zaidi.

MATOKEO YA SERIE A (Julai 26, 2020):

Juventus 2-0 Sampdoria

Bologna 3-2 Lecce

Cagliari 0-1 Udinese

Roma 2-1 Fiorentina

Spal 1-1 Torino

Verona 1-5 Lazio

Ronaldo acheka na nyavu na kusaidia Juventus kurejelea Serie A kwa kishindo

Na CHRIS ADUNGO

CRISTIANO Ronaldo alifunga bao na kusaidia Juventus kurejelea kampeni za Ligi Kuu ya Italia (Serie A) kwa ushindi wa 2-0 dhidi ya Bologna mnamo Juni 22, 2020.

Juventus ambao wanafukuzia ubingwa wa Serie A kwa msimu wa tisa mfululizo, sasa wanaselelea kileleni mwa jedwali kwa alama 66, nne zaidi kuliko nambari Lazio ambao watakuwa wageni wa Atalanta mnamo Juni 24.

Ronaldo aliwaweka Juventus kifua mbele kupitia penalti iliyotokana na tukio la beki Matthijs de Ligt kukabiliwa vibaya na Stefano Denswil.

Paulo Dybala alipachika wavuni goli la pili la kikosi hicho cha mkufunzi Maurizio Sarri baada ya kushirikiana vilivyo na Federico Bernardeschi kunako dakika ya 36.

Pigo zaidi kwa Juventus hata hivyo ni ulazima wa kukosa huduma za Danilo katika jumla ya mechi mbili zijazo baada ya beki huyo kuonyeshwa kadi nyekundu mwishoni mwa kipindi cha pili. Alex Sandro na Mattia de Sciglio ambao ni mabeki wengine tegemeo kambini mwa Juventus tayari wanauguza majeraha.

Hadi waliposhuka dimbani kubaana na Bologna, Juventus walikuwa wamesajili sare tasa katika mechi mbili zilizopita. Walikabwa koo na AC Milan kwenye nusu-fainali ya Coppa Italia kabla ya kubanduliwa kusonga mbele kupitia mikwaju ya penalti. Hata hivyo, walizidiwa maarifa kwa penalti katika fainali iliyowashuhudia wakitoshana nguvu na Napoli mwishoni mwa kipindi cha kawaida cha dakika 90.

Sanchez ana risasi moja pekee ya kujiokoa Inter Milan

Na CHRIS ADUNGO

INTER Milan wamethibitisha kwamba fowadi Alexis Sanchez atasalia nao hadi mwisho wa msimu huu akisubiri iwapo usimamizi wa kikosi hicho utampa mkataba wa kudumu au la.

Hii ni baada ya Manchester United ambao ni waajiri wa mfumaji huyo wa zamani wa Barcelona na Arsenal kushikilia kwamba hawamhitaji tena Sanchez ugani Old Trafford.

Soka ya Italia msimu huu ilicheleweshwa na janga la corona ambalo vinginevyo lingempa Sanchez ambaye ni mzawa wa Chile fursa ya kubanduka ugani San Siro mwezi huu.

Kwa mujibu wa Piero Ausillo ambaye ni mkurugenzi wa michezo wa Inter, Sanchez atapata nafasi kadhaa za kudhihirishia usimamizi uwezo wake ugani kwa mara ya mwisho kabla ya mustakabali wake kuamuliwa.

Sanchez anayechezea Inter kwa mkopo kutoka Man-United, hata hivyo amefichua maazimio ya kurejea Chile na kujiunga na kikosi chochote cha Ligi Kuu ya taifa hilo kabla ya kustaafu soka.

Kipute cha Serie A kinatarajiwa kuanza upya mnamo Juni 20 baada ya Waziri wa Micheo, Vincenzo Spadafora kuthibitisha hilo.

Majeraha ya mara kwa mara yamelemaza kabisa makali ya Sanchez ambaye anajivunia bao moja pekee kutokana na mechi 15 zilizopita ndani ya jezi za Inter.

Sanchez amewajibishwa na Chile katika jumla ya mechi 132 na kupachika wavuni mabao 43. Ushawishi wake ugani ulikuwa mkubwa katika fainali tatu zilizopita za kombe la Copa America.

Man-United wanafikiria pia uwezekano wa kumtuma Sanchez hadi Borussia Dortmund kwa matarajio kwamba hatua hiyo itawafanya miamba hao wa soka ya Ujerumani kuwa wepesi wa kuwapatia chipukizi Jadon Sancho.

Kipenga cha kuashiria kurejelewa kwa Serie A kupulizwa rasmi Juni 20

Na CHRIS ADUNGO

KIVUMBI cha Ligi Kuu ya Italia (Serie A) kitarejelewa mnamo Juni 20, 2020.

Haya ni kwa mujibu wa Waziri wa Michezo nchini Italia, Vincenzo Spadafora.

Kampeni za Serie A ziliahirishwa mnamo Machi 9, 2020, zikiwa zimesalia raundi 12 za mechi za kusakatwa kabla ya msimu huu kutamatika rasmi. Hadi kufikia wakati huo, mabingwa watetezi Juventus walikuwa wakiselelea kileleni mwa jedwali kwa alama 63, moja zaidi kuliko Lazio ambao wanashikilia nafasi ya pili.

Wachezaji wa Serie A walianza mazoezi ya kila mmoja kivyake mwanzoni mwa Mei 2020 kabla ya kuruhusiwa kushiriki mazoezi katika makundi madogo ya watu watano mwanzoni mwa wiki hii.

Mnamo Mei 20, Shirikisho la Soka la Italia (FIGC) lilisisitiza tarehe 20 Agosti, 2020 kuwa siku ya mwisho kwa kampeni zote za Serie A katika msimu huu wa 2019-20 kutamatika rasmi kabla ya muhula ujao wa 2020-21 kuanza Septemba 1, 2020.

FIGC ilishikilia kwamba ni matarajio yake kushuhudia ligi za madaraja matatu ya kwanza nchini Italia zikifikia tamati msimu huu. Ingawa hivyo, vinara wa shirikisho hilo walifichua uwezekano wa mchujo kutumika kuamua washindi wa kila ligi iwapo vipute vyote vitalazimika tena kusitishwa pindi baada ya kurejelewa.

Licha ya baadhi ya vinara wa klabu za Serie A kushikilia kwamba wapo tayari kwa kivumbi hicho kurejelewa hata Juni 13, Massimo Cellino ambaye ni mmiliki wa kikosi cha Brescia kinachokokota nanga mkiani mwa jedwali amepinga vikali mapendekezo ya kuanza upya kwa soka ya Italia kabla ya janga la corona kudhibitiwa vilivyo.

“Kurejelewa kwa Serie A ni mzigo mkubwa kwa wachezaji. Tuliacha kushiriki mazoezi mazito miezi miwili iliyopita. Ni hatari sana kuanza ghafla kusakata mechi tatu kwa wiki. Nahofia kwamba tutakuwa na visa vingi vya majeraha hasa ikizingatiwa joto jingi linaloshuhudiwa kwa sasa nchini Italia,” akasema Cellino.

Msimamo wa Cellino unatofuatiana na ule wa beki matata wa Udinese na timu ya taifa ya Nigeria, William Troost-Ekong anayeamini kwamba kurejelewa kwa Serie A kutaamsha hamasa zaidi miongoni mwa wachezaji na kurejesha wingu la matumaini miongoni mwa wakazi wa Italia.

Uwezekano wa Serie A kurejelewa Juni 13 kujulikana Alhamisi

Na CHRIS ADUNGO

SERIKALI ya Italia itaamua mnamo Alhamisi Mei 28, 2020 iwapo wakati mwafaka wa kurejelewa kwa soka ya Ligi Kuu ya taifa hilo (Serie A) msimu huu umewadia au la.

Vikosi vinavyonogesha kivumbi cha Serie A vilikubaliwa kurejea mazoezi ya makundi ya watu 10 mnamo Mei 19 huku klabu zote 20 za ligi hiyo zikiafikiana kuanza upya kampeni za msimu huu mnamo Juni 13, 2020. Soka ya Italia ilisitishwa mnamo Machi 2020 kutokana na janga la virusi vya homa kali ya corona.

Wakati uo huo, Shirikisho la Soka la Italia (FIGC) limeteua Agosti 20, 2020 kuwa siku ya mwisho ambapo kampeni za Serie A zinastahili kuwa zimetamatika rasmi iwapo zitarejelewa Juni 13. Hii ni kwa sababu kampeni za msimu ujao wa 2020-21 zimeratibiwa kuanza rasmi mnamo Septemba 1, 2020.

Hadi kipute cha Serie A kilipoahirishwa, klabu za ligi hiyo zilikuwa zimesalia na mechi 12 kila moja muhula huu. Mabingwa watetezi Juventus wanaofukuzia ufalme wa taji la Serie A kwa mara ya tisa mfululizo msimu huu, wanaselelea kileleni mwa jedwali kwa alama 63, moja zaidi kuliko Lazio ambao ni wa pili.

Kwa mujibu wa FIGC, iwapo ligi yoyote kati ya tatu za madaraja ya juu nchini Italia itasitishwa pindi baada ya kurejelewa, basi washindi wa kila ligi na wale watakaoshushwa ngazi mwishoni mwa muhula huu wataamuliwa kwa njia ya mchujo.

Iwapo itakuwa vigumu kwa ligi hizo kukamilika kupitia mchujo, basi washindi wataamuliwa kwa matokeo yatakayokuwa yamesajiliwa na kila kikosi hadi kufikia wakati wa kusimamishwa tena kwa kampeni za muhula huu.

Ligi ya Daraja la Pili (Serie C) ndiyo inayowaumiza vichwa zaidi vinara wa FIGC hasa ikizingatiwa kwamba kipute hicho kinachojumuisha jumla ya klabu 60 tofauti ambazo zimegawanywa katika makundi matatu, kinakabiliwa na panda-shuka tele za kifedha.

Soka ya Ligi Kuu ya Italia kukamilika rasmi Agosti 20

Na CHRIS ADUNGO

SHIRIKISHO la Soka la Italia (FIGC) limeteua Agosti 20 kuwa siku ya mwisho ya kukamilika kwa Ligi Kuu ya Serie A msimu huu huku kampeni za muhula mpya wa 2020-21 ukitazamiwa kuanza rasmi mnamo Septemba 1, 2020.

Hadi kivumbi cha Serie A kiliposimamishwa kwa muda mnamo Machi 2020 kutokana na janga la corona, kila kikosi kilikuwa kimesalia mechi 12 za kusakata katika kampeni za msimu huu.

Mabingwa watetezi Juventus wanaofukuzia ufalme wa taji la Serie A kwa mara ya tisa mfululizo msimu huu, wanaselelea kileleni mwa jedwali kwa alama 63, moja zaidi kuliko Lazio ambao ni wa pili.

Kwa mujibu wa FIGC, iwapo ligi yoyote kati ya tatu za madaraja ya juu nchini Italia itasitishwa baada ya kurejelewa, basi washindi wa kila ligi na wale watakaoshushwa ngazi mwishoni mwa muhula huu wataamuliwa kwa njia ya mchujo.

Iwapo itakuwa vigumu kwa ligi hizo kukamilika kupitia mchujo, basi washindi wataamuliwa kwa matokeo yatakayokuwa yamesajiliwa na kila kikosi hadi kufikia wakati wa kusimamishwa tena kwa kampeni za muhula huu.

Ligi ya Daraja la Pili (Serie A) ndicho kitendawili kigumu zaidi kwa vinara wa FIGC hasa ikizingatiwa kwamba kipute hicho kinachojumuisha jumla ya klabu 60 tofauti ambazo zimegawanywa katika makundi matatu, kinakabiliwa na panda-shuka tele za kifedha.

Serie A kurejelewa rasmi Juni 13

Na CHRIS ADUNGO

KIPUTE cha Ligi Kuu ya Italia (Serie A) sasa kitarejelewa Juni 13, 2020 iwapo serikali itaidhinisha maamuzi ya vinara wa soka la taifa hilo.

Wasimamizi wa soka ya Italia walikutana Mei 13 na kuafikiana kuhusu tarehe ya kuanza upya kwa kivumbi hicho kitakachoendeshwa chini ya kanuni mpya za afya ambazo zimetolewa na serikali ya Italia katika juhudi za kudhibiti maambukizi zaidi ya virusi vya corona.

Vikosi vyote 20 vya Serie A vilirejea kambini mapema Mei ila kila mchezaji anajifanyia mazoezi kivyake.

Ligi Kuu ya Italia ilisimamishwa kwa muda mnamo Machi 9 zikiwa zimesalia mechi 12 zaidi za kutandazwa katika kampeni za muhula huu.

Juventus ambao wanafukuzia ubingwa wa taji la Serie A kwa mara ya tisa mfululizo msimu huu wanaselelea kileleni mwa jedwali kwa alama 63, moja zaidi kuliko Lazio.

Kwa mujibu wa vinara wa soka wa Italia, wanasoka wa vikosi vyote 20 vya Serie A wataanza kushiriki mazoezi ya pamoja kuanzia Jumatatu ya Mei 18, 2020.

Italia ndilo taifa lililoathiriwa zaidi na janga la corona barani Ulaya huku baadhi ya wachezaji wanaonogesha Ligi Kuu ya Serie A wakipatikana na virusi vya homa hiyo hatari.

Wiki jana, wanasoka watatu wa kikosi cha Fiorentina na wafanyakazi watatu wa klabu hiyo ya Serie A walipatikana na virusi vya corona, siku chache baada ya mchezaji mwingine wa Torino kuugua.

Awali, Waziri Michezo wa Italia, Vincenzo Spadafora, alikuwa ameonya kwamba serikali ilikuwa ikiwazia kufutilia mbali msimu huu mzima wa Serie A baada ya Ufaransa kufutilia mbali msimu mzima wa Ligi Kuu ya Ligue 1 na kusitisha zaidi shughuli zote za michezo nchini humo hadi Septemba 2020.

Ingawa hivyo, kinara wa Shirikisho la Soka la Italia, Gabriele Gravina aliapa kutolegeza kamba katika juhudi za kushawishi Serikali kushirikiana na washikadau wote kufanikisha mipango ya kurejelewa kwa kampeni za Serie A muhula huu.

Katika taarifa iliyotolewa jana na Shirikisho la Soka la Italia (FIGC), kivumbi cha Serie A kimepangiwa kutamatika rasmi kufikia mwanzo wa wiki ya kwanza ya Agosti 2020 na mechi zote zilizosalia zitasakatwa ndani ya viwanja vitupu.

Mbali na Paulo Dybala wa Juventus, wanasoka wengine wa Serie A waliougua corona ni Daniele Rugani, German Pezzella, Patrick Cutrone, Dusan Vlahovic, Manolo Gabbiadini, Omar Colley, Albin Ekdal, Antonio La Gumina, Morten Thorsby, Fabio Depaoli na Blaise Matuidi.

Vikosi vya Italia vyaafikiana kukamilisha ligi ya Serie A msimu huu

Na CHRIS ADUNGO

KLABU zote 20 za Ligi Kuu ya Italia (Serie A) zimeafikiana kukamilisha msimu huu wa 2019-20 kwa kushiriki michuano yote iliyosalia katika kivumbi hicho kabla ya shughuli zote za michezo kusitishwa mwanzoni mwa Machi kutokana na virusi vya corona.

Haya yaliiafikiwa katika mkutano wa jana uliochochewa na ripoti zilizodai kwamba Torino na Brescia walikuwa radhi kugomea kampeni za msimu huu iwapo kipute cha Serie A kingerejelewa kabla ya corona kudhibitiwa vilivyo.

Hata hivyo, imefichuka kwamba kwa sasa kila kikosi ligini humo kinapania kushuhudia msimu huu ukirejelewa wakati wowote kuanzia Mei 18 na kutamatika rasmi.

Hata hivyo, Waziri Mkuu wa Italia, Vincenzo Spadafora ameonya kwamba hakuna uhakika ambao umetolewa na Serikali hadi kufikia sasa kuhusu uwezekano wa kukamilishwa kwa kampeni za Serie A muhula huu.

Baada ya Serikali ya Ufaransa kufutilia mbali msimu mzima wa Ligue 1 na kusitisha zaidi shughuli zote za michezo nchini humo hadi Septemba 2020, gazeti la ‘The Sun’ limedokeza kwamba Rais Emmanuel Macron wa Ufaransa anasukuma viongozi wenzake katika nchi tofauti za bara Ulaya kufuata mkondo wake.

Hata hivyo, Kinara wa Shirikisho la Soka la Italia, Gabriele Gravina ameapa kutolegeza kamba katika juhudi za kushawishi Serikali kushirikiana na washikadau wote kufanikisha kampeni za Serie A muhula huu.

Italia ndilo taifa la bara Ulaya lililoathiriwa zaidi na virusi vya corona baada ya kuripotiwa kwa zaidi ya vifo 28,000 na maambukizi zaidi ya 205,000.

Isitoshe, nyota wa Juventus, Paulo Dybala amepatikana sasa akiwa na virusi vya corona mara nne baada ya kufanyiwa vipimo katika vipindi mbalimbali chini ya majuma sita yaliyopita.

Katika taarifa iliyotolewa Jumamosi na Shirikisho la Soka la Italia (FIGC), kivumbi cha Serie A kimepangiwa kuanza upya wakati wowote kati ya Mei 27 na Juni 2, huku kikitakiwa kutamatika rasmi kufikia mwanzo wa wiki ya kwanza ya Agosti 2020.

Wachezaji wote wametakiwa kuripoti kambini kufikia Mei 4. Mechi 12 zilizosalia katika Serie A muhula huu zitasakatwa ndani ya viwanja vitupu.

Kivumbi cha Serie A kiliahirishwa mnamo Machi 9 na wachezaji kadhaa wa ligi hiyo wakapatikana na virusi vya homa kali ya corona.

Miongoni mwao ni Daniele Rugani, German Pezzella, Patrick Cutrone, Dusan Vlahovic, Manolo Gabbiadini, Omar Colley, Albin Ekdal, Antonio La Gumina, Morten Thorsby, Fabio Depaoli, Dybala na Blaise Matuidi.

Ligi kuu za Poland, Italia miongoni mwa zinazonukia upya

CHRIS ADUNGO na MASHIRIKA

SHIRIKISHO la Soka la Poland limefichua mipango ya kurejelea cha Ligi Kuu ya nchi hiyo almaarufu Ekstraklasa mnamo Mei 29 kwa matarajio ya kuitamatisha rasmi kufikia Julai 19.

Pendekezo hilo limeidhinishwa na Waziri Mkuu wa Poland, Mateusz Morawiecki ambaye ametaka michuano hiyo kusakatiwa katika viwanja vitupu bila mashabiki.

Poland inakuwa nchi ya tano baada ya Ujerumani, Uingereza, Italia na Austria kufichua mipango ya kurejelea ligi kuu za soka katika mataifa yao.

Wiki jana, Waziri Mkuu wa Uingereza, Boris Johnson alidokeza uwezekano wa kuanza upya kwa Ligi Kuu ya Uingereza (EPL) wakati wowote kuanzia Mei 16, 2020.

Tayari vinara wa Ligi Kuu ya Ujerumani (Bundesliga) wamefichua mipango ya kurejelea kipute hicho mnamo Mei 9 baada ya vikosi vyote 18 vinavyowania ufalme wa msimu huu kukita kambi chini ya mwongozo wa kanuni kali za afya.

Mbali na EPL, ligi nyinginezo ambazo zinatarajiwa kurejelewa chini ya masharti makali nchini Uingereza ni tenisi, kriketi na mbio za farasi.

Hata hivyo, kuanza upya kwa vipute hivi kutakuwa zao la majadiliano ya kina kati ya Baraza la Mawaziri, maafisa wa afya na mashirikisho ya michezo husika nchini Uingereza.

Serikali ya Uingereza inatarajiwa kutoa kauli ya mwisho kuhusu tarehe kamili ya kurejelewa kwa EPL mnamo Mei 7 huku marefa, wachezaji, maafisa na makocha wa vikosi vyote 20 vya ligi hiyo kufanyiwa vipimo vya afya.

Mnamo Aprili 27, wanasoka wa Ligi Kuu ya Italia (Serie A) walitakiwa kurejea kambini kufikia Mei 4 kabla ya vikosi vyote vinavyoshiriki kipute hicho kuanza kujifua rasmi kwa michuano iliyosalia msimu huu mnamo Mei 18, 2020.

Haya ni kwa mujibu wa Waziri Mkuu wa Italia, Giuseppe Conte, ambaye alikariri kuwa “hiyo ni mojawapo ya hatua za awali kabisa zitakazorejesha ukawaida nchini humo kadri wanavyozidi kudhibiti maambukizi zaidi ya virusi vya corona”.

Katika taarifa iliyotolewa jana na Shirikisho la Soka la Italia (FIGC), kivumbi cha Serie A kimepangiwa kuanza upya wakati wowote kati ya Mei 27 na Juni 2, huku kikitakiwa kutamatika rasmi kufikia mwanzo wa wiki ya kwanza ya Agosti 2020. Mechi 12 zilizosalia katika Serie A muhula huu zitasakatwa ndani ya viwanja vitupu.

Italia ndiyo nchi ambayo imeathiriwa zaidi na virusi vya corona miongoni mwa mataifa yote ya bara Ulaya. Kufikia jana, zaidi ya vifo 26,600 vilikuwa vimeripotiwa nchini humo.

Vifo 260 vilivyotokea mnamo Jumapili ya Aprili 26 ndiyo idadi ndogo zaidi ya watu kuwahi kuaga dunia kutokana na corona nchini Italia tangu Machi 14, 2020.

FIGC tayari imetoa utaratibu utakaoshuhudia wachezaji, makocha, maafisa na wafanyakazi wote katika vikosi vya Serie A wakifanyiwa vipimo vya afya kuanzia Mei 1, 2020.

Kivumbi cha Serie A kiliahirishwa mnamo Machi 9 na wachezaji kadhaa wa ligi hiyo wakapatikana na virusi vya homa kali ya corona.

Beki Daniele Rugani wa Juventus alikuwa mchezaji wa kwanza wa Serie A kupatikana na virusi hivyo kabla ya wanasoka German Pezzella, Patrick Cutrone na Dusan Vlahovic wa Fioretina kuugua ugonjwa huo. Masogora walioathiriwa katika kikosi cha Sampdoria ni Manolo Gabbiadini, Omar Colley, Albin Ekdal, Antonio La Gumina, Morten Thorsby na Fabio Depaoli ambaye aliwaambukiza Blaise Matuidi na Paulo Dybala wa Juventus.

Huku juhudi nyingi zikielekezwa katika kufanikisha mipango ya kurejea kwa Serie A, Massimo Cellino ambaye ni rais wa kikosi cha Brescia kinachovuta mkia jedwalini, ametaka msimu huu mzima wa kipute hicho kufutiliwa mbali na pasiwepo mshindi wala kikosi kitakachoshushwa ngazi. Tukio hilo ndilo lililofanyika katika Ligi Kuu ya Uholanzi (Eredivisie) wiki jana.

Kufikia Jumapili, zaidi ya visa 11,067 vya corona vilikuwa vimeripotiwa nchini Poland ambayo imeshuhudia vifo 499 kutokana na ugonjwa huo.

Kwa mujibu wa Marcin Animucki ambaye ni rais wa Ekstraklasa vinara wa soka ya bara Ulaya (Uefa) wamewapendekezea kukamilisha ligi yao kufikia Julai 20.

Amesema kwamba vikosi vitarejea mazoezini kwa makundi mnamo Mei 4 kabla ya wachezaji, marefa na maafisa wote wa benchi za kiufundi kufanyiwa vipimo vya afya kati ya Mei 27-28.

Hadi Ligi Kuu ya Poland ilipoahirishwa mwanzoni mwa Machi 2020 zikisalia mechi 11 pekee kwa msimu kukamilika, Legia na Warsaw walikuwa wakiselelea kileleni mwa jedwali kwa alama 51 kutokana na mechi 26. Piast Gliwice walikuwa katika nafasi ya tatu kwa alama 43.

Mwenye nguvu nipishe Juve na Atletico wakivaana UEFA

Na MASHIRIKA

MADRID, Uhispania

UWANJA maarufu wa Wanda Metroplitano jijini hapa unatazamiwa leo Jumatano kujaa hadi pomoni wakati Atletico Madrid watavaana na miamba wa soka ya Italia, Juventus katika pambano la Kundi D la Klabu Bingwa Ulaya (UEFA).

Timu zote zina historia tofauti katika mapambano haya.

Ingawa hivyo, itakumbukwa kwamba majuzi zaidi Juventus waliwabandua nje Atletico Madrid katika raundi ya 16-bora ya michuano hii kutokana na mabao ya fowadi wao matata Cristiano Ronaldo aliyetokea Real Madrid.

Mbali na mashabiki wao kusubiri kwa hamu kuonja ushindi baada ya kushindwa na Real Sociedad mwishoni mwa wiki, kadhalika Atletico wanatarajiwa kulipiza kisasi cha UEFA dhidi ya vigogo hawa wa Ligi Kuu ya Italia (Serie A).

Juventus kwa upande wao walitoka bila ya kufungana na Fiorentina mwishoni mwa wiki iliyopita na sasa wako nyuma ya Inter Milan ambao wameanza kampeni zao kwa matao ya juu baada ya kusajili ushindi mara tatu hadi kufikia sasa msimu huu.

Wenyeji watakuwa na lengo la kufufua ubabe wao katika michuano hii ya Ulaya baada ya kubanduliwa mapema katika mechi za hatua ya mwondoano katika miaka ya karibuni.

Klabu kutoka Italia zimekuwa zikiandikisha ushindi dhidi ya wapinzani wao wa Uhispania, matokeo yakiwa ushindi mara nne pekee katika jumla ya mechi 27 zilizopita.

Messi ataka kumuona Neymar akirudi Barcelona 

Wakati uo huo, staa Lionel Messi anasema “angependa sana nyota Neymar arudi Barcelona kwani kuwasili kwake kutawaongezea nafasi na tumaini la kuyafikia malengo yao.”

Neymar, 27, alijiunga na Paris St-Germain (PSG) kutoka Barcelona mnamo 2017 kwa ada ya rekodi ya dunia ya Sh25.8 bilioni.

“Alitamani sana kurudi,” Messi aliliambia gazeti moja la spoti nchini Uhispania. “Sijui kama klabu ilijaribu kweli kumsajili au la.”

Neymar alifunga jumla ya mabao 105 katika mechi 186 akivalia jezi za Barcelona kati ya 2013-2017, na ana mabao 51 katika jumla ya michuano 58 aliyoichezea PSG. Mchezaji huyo wa timu ya taifa ya Brazil alihusishwa mara kwa mara na taarifa za kurudi Barcelona au kutua Real Madrid wakati wa muhula uliopita wa usajili, ingawa imedaiwa kwamba hakuna klabu yoyote ambayo ilishawishika kumsajili.

“Ningependa Neymar arudi,” alisema kiungo na nahodha wa Barcelona Messi, 32. “Ninaelewa watu hao ambao wanapinga kurudi kwake na inaeleweka kwa kile kilichotokea kwa ‘Ney’ na namna ambavyo aliondoka uwanjani Camp Nou.

“Lakini nikifikiria kuhusu kiwango cha mchezo wake, mimi binafsi nadhani Neymar ni mmoja wa wachezaji bora ulimwenguni,” akasema. Messi.