K’Osewe alidai nilichovya asali ya mkewe, mshtakiwa wa jaribio la mauaji afichua kortini

Na RICHARD MUNGUTI

AFISA wa mauzo katika kampuni moja ya utalii alijipata taabani kutokana na kinywa chake kilichojaa matusi na majivuno Jumatatu aliposukumwa jela kwa kumwita mmiliki wa hoteli moja maarufu jijini Nairobi ‘mnyama’ ndani ya mahakama.

Tom Oywa Mboya ambaye kilio chake kwamba amepokea simu mtu wa familia yake ameaga dunia hakikusikika alitiwa pingu haraka haraka na kusukumwa jela mara moja.

“Ukiwa jela utafikiria vyema lugha utakayokuwa unatumia ndani na nje ya mahakama. Siwezi kuruhusu mtu yeyote kumdunisha binadamu mwenzake kwa kumwita majina ya wanyama wa mwituni. Sio kwa hii korti yangu. Ikiwa nawaheshimu binadamu wenzangu, sembuse wewe?” hakimu Martha Mutuku alaimuru wa mahakama ya Milimani.

Mboya alikuwa ameonywa mara kadha na Bi Mutuku dhidi ya kutumia lugha chafu na kumdunisha William K’Osewe Guda , mmiliki wa hoteli ya Ronalo Kosewe, Nairobi maarufu kwa maankuli ya samaki.

Mboya ambaye Desemba 1, 2016 alijaribu kumuua K’Osewe kwa kumpiga risasi alikuwa akijitetea baada ya kupatikana na kesi ya kujibu.

Akitoa ushahidi aliulizwa na kiongozi wa mashtaka Bw Anderson Gikunda ikiwa K’Osewe alishtuka baada ya kusikia milio ya risasi.

Mboya alijibu, “Alishtuka kisha akalala chini akinikaripia. Huyu ni mnyama mwitu. Mnyama huyu kabisa.”

Wakati huo mahakama ilimuonya mshtakiwa dhidi ya kutumia lugha chafu lakini “sikio la kufa halihisi dawa. Aliendelea kuchemka kwa hasira huku akimkondolea macho K’Osewe aliyekuwa ameketi kortini ameshika mkokonjo.”

Bw K’Osewe alicheka na kueleza mahakama “huyu mshtakiwa ananichukia zaidi.”

Bw K’Osewe wakati wa kesi Januari 19, 2021. PICHA/ RICHARD MUNGUTI

“Unasikia anavyoniita?” K’Osewe alisema kwa sauti akiongeza, “alinipiga risasi ya mgongo na kuniumiza. Siwezi kutembea kama zamani.”

Mahakama ilimtaka Guda anyamaze sheria ishike mkondo wake. Mboya alihukumiwa kusukumwa jela siku moja awaze na kuwazua kuhusu matamshi na lugha yake kwa binadamu aliokumbushwa sio ayawani.

Ameshtakiwa kujaribu kumuua William K’Osewe Guda mnamo Desemba 1 2016 katika eneo la Garden Estate.

Wakili anayemwakilisha Bw Mboya alijaribu kuingilia kati kuomba msamaha kwa kumtetea lakini hakufanikiwa.

Bw Mboya alisema alimpiga risasi Bw K’Osewe kwa vile alikuwa ametisha kumshambulia mara kadha akidai alikuwa amelala mara kadha na mkewe.

“Nilikuwa natoka kula maankuli ya mchana katika hoteli ijulikanano Hagon iliyoko Garden Estate. Bw Osewe alinizuia kwa gari lake kisha akaniambia nitaona cha mtema kuni kwa vile nimekuwa nikilala na mkewe,” Bw Mboya alijitetea.

Alisema alifyatua risasi mbili angani amshtue Bw K’Osewe lakini aliendelea kumsongea akimwelekezea bastola.

“Nilimpiga risasi ya mkono ndipo aachilie bastola yake,” mshtakiwa alimweleza Bi Mutuku.

Alikana alimpiga risasi ya mgongo Bw K’Osewe “Ulinipiga risasi ya mgongo. Niko hapa kortini natembea kwa mikogonjo. Wacha kudanganya korti,” Bw Osewe alipaasa sauti na kumweleza hakimu.

Mshtakiwa alisema K’Osewe alijaribu mara mbili kufyatua bastola lakini risasi zikakwama kutoka.

Wakongwe wanavyoangamia wakimumunya raha ya dunia

NA WANGU KANURI

WAKENYA wanazidi kushangazwa na wazee waliokonga wanapozidi kuiaga dunia katika anasa za dunia, wakilemewa na kazi wanayoamini inawapa utulivu wa mwili na akili, na kuishisia kutumia vidonge vya kuongeza nguvu za kiume.

Kama tamu yaua sumu ya nini? Marehemu David Mluli, aliyekuwa na miaka 80, anaingia kwenye takwimu za hivi karibuni za watu waliofariki dunia wakimumunya uroka katika mzinga ya vidosho wa umri wa wajukuu wao.

Mluli alikuwa akimenya tunda la Neema Kibaya, king’asti mwenye umri wa miaka 33, kabla ya moyo wake kufeli na mwili wake kuzimia.

Kwenye uchunguzi wao, polisi nchini Tanzania wamethibitisha kuwa, hakukuwa na majeraha, ila chupi ya marehemu ilikuwa na matone ya manii kabla ya kuelekea njia ya marahaba.

Siku chache kabla ya tukio la Tanzania, nchini Kenya mzee mwenye umri wa miaka 60 katika Kaunti ya Mombasa alifia juu ya mapaja ya binti mmoja na kufikisha wanne, idadi ya wazee waliokufa kwa kuramba asali.

Stephen Kariuki, alilalamikia maumivu ya kifua wakati wa kushiriki ngono na Esther Karimi mwenye umri wa miaka 33 lakini akaaga punde tu baada ya kufikishwa katika hospitali ya Bomu, Changamwe.

Kisa hiki kinatokea siku kumi na moja baada ya mwanamume mwingine mwenye umri wa miaka 35, Dandora, Nairobi kuzirai na kuaga baada ya kushiriki katika tendo la ndoa.

Mwendazake Robert Maina, mwajiriwa wa hospitali ya Kenyatta alikuwa akirushana roho na mpenziwe Joyce Wairimu wakati ambapo alilemewa kumeza asali na kupumua pumzi ya mwisho.

Mwanzoni mwa Januari 2021, marehemu Kirimi Nkunja aliipungia dunia mkono wa buriani kwa tukio lililotatanisha. Hivi ni baada ya mwili wake kupatikana bila nguo kwenye chumba cha kulala mjini Maua, Igembe Kusini, Kaunti ya Meru.

Mwanamume huyu ambaye alifika katika chumba cha kulala cha New Ben Bella akiandamwa na wanawake wawili, alipatikana na wafanyikazi hotelini hiyo huku wanawake hao wawili wakiwa hawapo kwenye chumba hicho wakati ambapo mwili ulipatikana.

Visa hivi vinaibua hisia na maswali chungu nzima huku wengi wakiuliza kwa nini wanaume wanakunywa dawa hizi za kuongeza nguvu wanaposhiriki ngono.

Isitoshe, je tendo hili la ndoa linafikia wapi linakuwa karaha? Je, ni lazima mwanamume ale uroda na ayahatarishe maisha yake? Maswali haya yaliibua gumzo katika mitandao ya kijamii, huku wakenya wakiwa na haya ya kusema:

“Wanaume tuwache viagra, ni nini kilifanyika kwa chuma ya Doshi?” akauliza @Andrewodera6. “Inastaajabisha vile daima ni mwanamume hufa,” akasema @Paulondeng.

“Serikali lazima ipige marufuku kidonge aina ya viagra haraka. Ikiwa kidonge hiki hakitapigwa marukufu hivi karibuni kitawamaliza wanaume wetu,” akaandika @speakkam.

“Wanaume tutamalizika na hivi vitu ghushi,” akasema @MGithuga. “Afya ya ‘wanajeshi’ hawa inapaswa kuangaziwa mara kwa mara haswa kabla hawajatumwa kwa misheni,” akaandika Steven Winword.

“Ninafikiri kuwa vyumba hivi vya kulala na hoteli vinapaswa kuwapatia wanaume wazee vyakula spesheli kwanza na tena wahakikishe kuwa wamewaajiri madaktari waliobobea kwenye kazi ili waangalie afya za wateja wao pindi tu wamejihifadhia chumba,” akasema Monica Mailo.

 

“Wanaume wazee hawana adabu ambao hawana heshima za familia zao. Mungu awasamehe,” akawashutumu Jane Kamau.

“Tamaa hapo ndipo humfikisha mtu… angeridhika na kile alikuwa anapata kutoka kwa mkewe,” akasema Faith Amoure.

Bila kusahau kuwa tendo la ndoa kwa wanandoa ni kigezo muhimu cha ndoa, ukahaba na matumizi ya dawa kwa minajili ya kushiriki ngono ni baadhi ya mambo ambayo yanawaua wanaume.

Kula uroda ni sababu kuu ya kudorora kwa adabu kati ya wanandoa huku mmoja wao akitafuta njia mbadala ya kukata kiu yake.

Isitoshe, uhusiano wa wasichana wapevu na wanaume wazee umechangia vifo hivi huku ikiwalazimu wanaume husika kunywa dawa hizi za kuongeza nguvu wakati wa tendo hilo.

Kwa mujibu wa Zara Risoldi Cochrane, amabye ni mwanafamasia, matumizi ya dawa hizi bila kipimo unachangia pia ongezeko la vifo vya wanaume kwani nyongeza ya dawa hizi hufanya mwili kufanya kazi zaidi ya kawaida.

“Hii ina maana kuwa uchu wa mwanamume unafanyishwa kazi kupita kiwango kinachofaa huku ukichosha viungo vingine vya mwili. Kwa mfano ujapokunywa Viagra kupita kiwango kinachofaa, uchu wa mwanamume hubaki umesisimka kwa saa nusura nne huku tishu za uchu wake zikiharibiwa. Hii ni kwa sababu, damu iliyoko kwenye uchu wake haipokei okisijeni yoyote,” akaeleza Taifa Leo Dijitali.

Mwanamume afa akiramba uroda lojing’i

Na CHARLES WANYORO 

POLISI katika eneo la Maua, Igembe Kusini, Kaunti ya Meru wanachunguza kisa ambapo mfanyabiashara alipatikana amefia ndani ya lojing’i aliyokodisha kumumunya urojo na wanawake wawili usiku kucha.

Mfanyabiashara huyo aliyetambuliwa kwa jina Kirimi Nkunja anayetoka Muringene, Igembe ya kati aliwasili katika  lojing ya New Ben Bella Jumapili jioni akiandamana na wanawake wawili na kukodisha chumba.

Mnamo Jumatatu watu walishangaa kupata mwili wa mfanyabiashara huyo umefunikwa na shuka kitandani ukiwa uchi. Wanawake aliokuwa nao walitoroka baada ya kuona mpenzi wao ameaga.

Taifa Leo Dijitali ilipozuru eno la mkasa, gari la mwanamume huyo aina ya Toyota Probox lilikuwa limeegeshwa nje ya lojing’i hiyo.

Mamia ya wakazi wa mji huo pamoja na watu wa familia ya marehemu walikusanyika nje ya lojing kuutazama mwili ukiondolewa kupelekwa mochari katika hospitali ya Nyambene kufanyiwa upasuaji.

Shahidi mmoja alisema kondomu nyingi zilikuwa zimetapakaa kote chumbani katika hoteli hiyo ya New Ben Bella.

“Kondomu nyingi zilikuwa mle chumbani. Polisi walifunika mwili wake na blanketi kisha kuutoa kupeleka mochari. Ni aibu mtu kufa katika hali hiyo.Nawahimiza wanaume wawe waaminifu kwa wake zao,” alisema mwendesha boda boda aliyemfahamu mwenda zake.

Rafikiye mhasiriwa huyo alisema huenda alitumia dawa za kuongeza nguvu.

TAFSIRI: WANGU KANURI

Wang’atwa na nyuki wakila uroda

NA JOHN MUSYOOKI

MBIUNI, MACHAKOS 

KIOJA kilishuhudiwa hapa, jombi na kimada wa mtaani walipovamiwa na nyuki wakirushana roho ndani ya kichaka.?

Duru zinasema kwamba jamaa huyo anapenda vichuna wa mtaani kupindukia na alikuwa akiwateka bila kubagua.

Siku ya kioja mwendo wa jioni hivi, jamaa aliondoka na demu kilabuni kama ilivyokuwa desturi yake. Yadaiwa wawili hao walipofika karibu na shamba la mkulima mmoja anayefuga nyuki, polo na demu walipandwa na mzuka na wakatulia kwenye kichaka kilicho karibu.

Wawili hao walianza vituko vyao vya kulishana uroda bila kujali kabla ya starehe zao kuharibiwa na jeshi la nyuki.

Inasemekana baada ya muda mfupi wawili hao walisikika wakipiga nduru huku kila mmoja akiomba usaidizi baada ya kuvamiwa na nyuki hao.

‘Uuuiii! Njooni mtusaidie. Tutauawa na nyuki hawa,’ jamaa alipiga nduru huku demu akijaribu kuwafukuza nyuki hao bila kufua dafu.

Majirani waliokuwa karibu walivutiwa na kamsa hiyo na wakaenda kujua kilichokuwa kimejiri.

Watu walipigwa na butwaa walipowapata wawili hao wakijaribu kuvaa mavazi yao huku nyuki wakiendelea kuwashambulia.

‘Kwani nyuki hawa wametoka kuzimu? Wametuharibia starehe zetu hapa,’ demu alisema aliyekuwa mlevi alisema.

Wakati huo mwenye shamba alifika na kuanza kuwafokea wawili hao kwa kufanya shamba lake kuwa danguro.

‘Nani aliwapatia ruhusa ya kuingia shambani kwangu bila ruhusa? Hapa huwa ninafuga nyuki na kuna mizinga karibu,’ mwenye shamba alisema.

Hata hivyo, nyuki walizidi kuleta fujo na kung’ata kila mtu aliyekuwa karibu akiwemo mwenye kuwafuga.

Ilibidi kila mmoja kutimua mbio kujiokoa.

 

Demu afichua mumewe amemnyima asali kwa miaka 4

Na TOBBIE WEKESA

WANGURU, KIRINYAGA

Kipusa mmoja kutoka hapa aliwashangaza wengi alipodai ndoa yake haina ladha. Mwanadada huyo alidai kuwa tangu aolewe miaka minne iliyopita mumewe hajawahi kumgusa.

Inadaiwa aliitisha kikao cha dharura na wazee wa kanisa baada ya kugundua kwamba mumewe hakuwa akichangamkia tendo la ndoa.

“Miaka minne sasa imepita lakini hajawahi kunigusa kamwe. Hata kunikaribia kitandani hataki,” mrembo alidai.

Wazee wa kanisa walitulia huku kidosho akiendelea kutoa kauli zake.

“Tulipokuwa tukichumbiana aliniambia tusile tunda kwanza hadi tutakapooana. Sasa tumeoana na bado ananiambia ni mapema sana kula tunda,” kipusa aliendelea kusema.

Wazee wa kanisa walibaki kuangaliana huku wengine wakiangalia chini.

“Mimi nina hisia. Nitangoja hadi lini ilhali natamani raha ya ndoa?” kipusa aliwauliza wazee wa kanisa.

Waliohudhuria kikao hiki walibaki vinywa wazi. “Tulipoenda fungate, nilishangaa sana bwanangu aliponiambia hayuko tayari kuonja asali,” kipusa alisema huku akiketi.

Wazee wa kanisa walimrai polo ajitetee naye akadai mrembo anampeleka mbio.

“Huyu mwanamke aache mbio. Kila mechi huwa na maandalizi. Ningali najiandaa. Makombora yaja,” polo alidai huku vicheko vikishamiri. Duru zinasema kipusa aliinuka na kumshutumu jamaa kwa kutosema ukweli.

“Unajiandaa hadi lini? Ni mechi gani hii unayodai unajiandaa. Wewe sema ukweli,” kidosho alifoka.

Penyenye zinasema wazee wa kanisa waliwarai wanandoa hao kuwa na subira huku wakitafuta suluhisho. Hata hivyo mwanadada alisema hangesubiri na akaapa kumuacha jamaa iwapo wazee hawangesuluhisha suala hilo.

“Subira hadi lini. Mimi naomba kumpa huyu jamaa talaka. Hata kitandani analala na nguo. Sijui anaficha nini,” kipusa alitishia.

 

Atisha kukausha asali Krismasi

Na TOBBIE WEKESA

MAILI NANE, ELDORET

Kizaazaa kilizuka kwenye ploti moja mtaani humu baada ya kipusa kumzomea polo kwa kukataa kumpeleka mashambani msimu huu wa sherehe za Krismasi.

Kulingana na mdokezi, kipusa alikasirika na akaapa kumnyima asali hadi mwaka mpya utakapobisha.

“Ploti nzima watu wameenda mashambani. Kwani sisi tunakaa hapa kufanya nini?” kipusa alimshambulia polo.

Inadaiwa jamaa alijitia hamnazo. “Unakataa kunipeleka kwenu kwani unanificha nini? Hata mimi utanijua vizuri,” kipusa alimuonya polo.

Penyenye zinasema tangu amuoe mrembo, jamaa hakuwa amempeleka kwao jambo ambalo lilikuwa likimsumbua mrembo sana.

Duru zinaarifu kwamba polo alikuwa akimhadaa mrembo kwamba hajaoa ilhali alikuwa na wake wawili nyumbani.

Inadaiwa polo aliogopa kumpeleka mrembo nyumbani kwa kuhofia vita vikali.

“Lazima nijipange vizuri ndiposa nikupeleke kwetu. Mambo hayafanywi kienyeji hivyo,” polo alimueleza kipusa.

Kipusa hakutaka kusikia lolote kutoka kwa polo ila ujumbe wa kupelekwa mashambani.

“Uliponioa ulipanga nini? Wewe unakaa mkora. Kwanzia leo usifikiri mambo yatakuwa rahisi kwako,” kipusa aliapa.

Ukali wa kipusa ulimshitua polo.

“Naona unaapa sana. Ni jambo gani unapanga kufanya?” polo alimuuliza kipusa.

Duru zinasema kipusa aliendelea kumzomea polo bila kuogopa lolote.

“Usifikirie mimi ni mjinga. Akili zako ni ndogo sana. Kuanzia leo sitakuwa nikikupakulia asali hadi mwaka huu ukamilike,” kipusa alitishia.

Inadaiwa polo aliamua kukimya kwa kuhofia kuaibishwa.

“Ipo siku nitajipeleka kwenu mwenyewe na nibaki huko,” kipusa alitisha.

Mzee wa kanisa mpenda uroda afichuliwa

Na CORNELIUS MUTISYA

KAVIANI, MACHAKOS

MZEE mmoja wa kanisa eneo hili alipata aibu ya mwaka alipoandikia demu mmoja wa kanisa hilo arafa ya kimahaba na siri ikafichuka kanisani humo.

Penyenye za mtaa zaarifu kuwa, mzee huyo alishurutika kujiuzulu kutoka kwa kamati ya kanisa na pia akaacha kuhudhuria ibada zote kwa sababu ya kugubikwa na aibu,

Mzee huyo alikuwa mshauri mkuu kanisani. Aliheshimiwa mno na kuenziwa na kila mja kanisani humo. Kwa ufupi, alikuwa kipenzi cha watu wengi,” asema mpambe wetu.

Tuliarifiwa kwamba, mzee huyo wa kanisa alikuwa akiandaa hafla tofauti katika makongamano mbalimbali ili kuwapa vijana ushauri-nasaha. Alikuwa akiwahimiza vijana wawe Wakristo wa kweli na kujiepusha na mienendo na tabia inayoweza kuathiri maisha yao ya siku za usoni.

“Ni lazima vijana muwe waadilifu. Jiepusheni kabisa na visa vinavyoweza kuathiri maisha yenu ya baadaye. Kumbatieni neno la Bwana kikamilifu, na bila shaka mtaona matunda na mafanikio yake,” polo alikuwa akiwashauri vijana.

Inasemekana kwamba, mzee huyo alikuwa chui aliyevalia ngozi ya kondoo. Alikuwa akimtamani demu mmoja kanisani humo.

Siku ya tukio, buda aliamua liwe liwalo na akaamua kuandikia demu huyo jumbe fupi za kimapenzi akimuarifu alikuwa akimfeel sana awe mtu wake.

“Darling, unionavyo, nakumiss sana. Umbo lako, sauti yako mwanana na mienendo yako zimenibamba mno. Hakika, naomba tuwe wapenzi wa dhati, yaani wa kufa kuzikana,” polo aliandikia demu huyo arafa.

Duru zaarifu kuwa, demu huyo alikasirika mno kutokana na ujumbe huo , tena kutoka kwa mzee wa umri wa babake na akaamua kumfundisha adabu.

“Demu alienda katika mkutano wa wanakamati baada ya ibada na akalalamika kusumbuliwa na buda huyo. Aliwaonyesha wanakamati ‘sms’ alizokuwa akimwandikia na wote wakabaki vinywa wazi” asema mdaku wetu.

Kulingana na mdokezi, buda aliingiwa na kiwewe na akajiuzulu kutoka kwa kamati. Alikoma pia kuhudhuria ibada kanisani humo.

Nusura aachwe na gari akila uroda

Na NICHOLAS CHERUIYOT

SOTIK, BOMET

JOMBI aliyezuru mji huu kuhudhuria harusi nusura aachwe na basi kwa sababu alikuwa bado akishiriki fuska kwenye gesti.

Kulingana na mdokezi wetu, kulikuwa na hafla ya harusi eneo hili. Jamaa alikuwa miongoni mwa wageni waliofika kutoka mbali kwa basi ili kuhudhuria sherehe hiyo ya kukata na shoka.

Wakati sherehe ikiendelea, jombi alipatana na msichana ambaye alikuwa akimjua zamani. Baada ya kujuliana hali, wawili hao waliamua kufufua mahanjamu yao ya awali.

“Jamaa alimuomba demu amrambishe asali akisema hiyo ilikuwa nafasi yao ya kipekee. Lakini kipusa alichukua muda kujibu ombi hilo kabla ya kumkubalia jombi kukata kiu,” mdaku alisimulia.

Harusi ilipokuwa kileleni, wawili hao walionekana na watu wachache wakiondoka na kuelekea gesti moja kulishana uroda.

Sherehe ilikamilika na watu wakapanda basi kurudi makwao. Lakini mushkil ulitokea ilipojulikana kwamba abiria huyo barobaro hakuwa ameingia ndani ya basi.

“Jamaa alipigiwa simu na aliposhika alidai kwamba alikuwa karibu kufika kwa basi. Wengi waliteta na kulaani kitendo cha jombi huyo kutoweka, na kuwafanya wamsubiri kwa muda mrefu huku usiku ukibisha hodi,” mdokezi aliyekuwa katika sherehe hiyo alieleza.

Fununu zilichipuka kuwa jamaa alikuwa akila uroda, habari zilizowafanya watu kukasirika hata zaidi huku wengine wakiangua kicheko.

“Dereva aliamrishwa kungurumisha basi ili waanze safari ya kurudi nyumbani, naye hakusita kufanya hivyo.

“Lakini hatua chache tu polo alionekana akikimbia mbio huku anapiga kelele asiachwe. Kilichowafanya watu kuangua kicheko ni polo kuonekana akifunga zipu huku akijaribu kukimbia kufikia basi,” mdaku alisimulia.

Yaya aliyejitetea bosi alimpa Sh800,000 baada ya uroda atupwa ndani

Na Joseph Ndunda

Mwanamke aliyedai kuwa bosi wake alimwekelea Sh800,000 kifuani baada ya kumburudisha kimapenzi, Ijumaa alifungwa jela miaka mitatu kwa wizi.

Ruth Khaecha alipatikana na hatia ya kuiba Sh1.3 milioni mali ya mwajiri wake Paul Kanyi Mwangi ambaye alidai alimwekelea kifuani kama zawadi baada ya kufanya mapenzi naye.

Alipokuwa akijitetea, Khaecha alisema aliamua kumpagawisha Kanyi aliyemuita katika chumba chake cha kulala amsaidie kupanga bahasha alizokuwa nazo lakini wakachangamkiana kimapenzi.

Alisema katika hali hiyo, Kanyi alimueleza kwamba bahasha hizo zilikuwa na pesa na binafsi alithibitisha ilikuwa kweli.Alisema baada ya kufanya mapenzi, Kanyi aliwekelea bahasha moja kwenye maziwa yake.

Lakini kwenye uamuzi wake Hakimu Mkuu wa Makadara Heston Nyaga alipuuza madai hayo akisema hayakuweza kuthibitishwa.

Alisema Khaecha aliambia walinzi kwamba alikuwa ametumwa kupeleka nguo kwa fundi zikashonwe walipomuuliza alichokuwa akibeba alipoondoka kwa mwajiri wake.

Mwanafunzi amtandika mwalimu katika fumanizi la uroda darasani

DONNA ATOLA na DICKENS WASONGA

MWALIMU wa shule ya upili katika Kaunti ya Busia anauguza majeraha baada ya kushambuliwa na mtahiniwa wa kiume wa Kidato cha Nne (KCSE) alipomfumania akifanya mapenzi na mwenzake wa kike darasani.

Polisi walisema mwalimu huyo alipigwa na mwanafunzi huyo mvulana muda mfupi baada ya kufanya mtihani wa somo la Baiolojia mnamo Ijumaa

“Baada ya mtihani wa somo la Baiolojia nilizunguka madarasani ndiposa nikapata mwanafunzi huyo akiwa amempakata mwenzake wa kike mapajani. Niliwakaripia na kuwataka kuacha tabia hiyo,” alisema mwalimu huyo aliyeomba jina lake libanwe.

Alisema wawili hao waliendelea kupapasana hata baada ya kuwaonya.

“Ghafla, mtahiniwa wa kiume alinirukia na kuanza kunipiga na kuniumiza mdomoni na puani,” alisema mwalimu.

“Wasimamizi wa mtihani waliokuwa karibu walikuja kuniokoa baada ya kusikia kelele. Walinitoa nje ya darasa na kunipeleka hospitalini. Nilitibiwa katika hospitali ya kaunti na nikaruhusiwa kwenda nyumbani,” aliongeza.

Katibu wa Chama cha Walimu (Kuppet,) tawi la Busia, Bw Mophat Okisai alishutumu kitendo hicho akisema kuwa hiyo ilikuwa ishara kwamba usalama wa walimu umezorota shuleni.

“Kisa hicho kimetushtua na hiyo ni ishara tosha kwamba walimu si salama shuleni. Wanafunzi wanafaa kuchagua kati ya kuwa wahuni au wanafunzi,” alisema Bw Okisai.

Kamanda wa Polisi wa Kaunti ya Busia, Jacob Narengo, alisema mtahiniwa huyo alikamatwa.

Bw Narengo, hata hivyo, alisema mtahiniwa huyo ataruhusiwa kufanya mitihani iliyosalia kabla ya kufikishwa kortini kujibu mashtaka ya kumshambulia mwalimu.

Kwingineko, mtahiniwa katika shule ya Upili ya Member iliyoko eneobunge la Rarieda, Kaunti ya Siaya alizimia na kufariki dunia baada ya kufanya mtihani wa Biolojia mnamo Ijumaa iliyopita.

Kulingana na mkurugenzi wa elimu wa Rarieda, Elijah Adie, mtahiniwa huyo alikuwa amesema alikuwa na maumivu ya kifua.

Mkurugenzi wa elimu alisema mwalimu alimkimbiza mtahiniwa huyo katika hospitali ya Lwak ambako aliaga dunia alipokuwa akiendelea kutibiwa.

“Mvulana huyo alikuwa mgonjwa lakini alionekana thabiti kulingana na mkuu wa shule hiyo Bi Eunice Juma,” akasema Bw Adie.

Ukahaba ni hatia kama uavyaji mimba – Serikali

Na GEOFFREY ONDIEKI

SERIKALI imeapa kumaliza shughuli za ukahaba mjini Nakuru ambazo zimekithiri mitaani.

Kamishna wa Kaunti ya Nakuru Bw Erastus Mbui aliambia Taifa Leo Dijitali kuwa kuna mipango ya kumaliza uovu huo.

Makahaba wanajishughulisha na uovu huo wameripotiwa kuwalazimisha wanaume wanaotumia mitaa hiyo kuchangia kwa utovu wa salama.

Bw Mbui alitaja shughuli hizo za ukahaba zinazoendelea mitaani kuwa kinyume na sheria za Kenya. “Hakuna kibali cha ukahaba nchini Kenya. Ni hatia, kama vile ushoga na uavyaji mimba,” alisema.

Kamishna huyo aliongeza kuwa watashirikiana na serikali ya kaunti kuhakikisha uovu huo unaondolewa.

“Tumepata habari kuwa kundi hilo la mwanawake wana muungano na unaongozwa na kiongozi wao, tutabaini nani aliwasajili na kuwapa kibali,” alisema Bw Mbui.

Hata hivyo, alikiri kutopata malalamishi kutoka kwa polisi kuhusu madai ya wanaume kusumbuliwa wakitumia mitaa hiyo. “Naomba wale wanaume ambao wamesumbuliwa kivyovyote vile wapige ripoti kwa polisi ili watusaidie kuwakamata wahusika,” alisema.

Shughuli za ukahaba hufanyika katikati mwa mji wa Nakuru, Kanu street, Maeneo ya ThreeWays na mtaa wa Kiambuthia.

Wakati mwingine huwa vigumu kwa wapita njia hasa wanaume kutumia mitaa hiyo wakiwa na wake wao kwa sababu [makahaba] huwalazimisha wanaume kwenye mitaa hiyo.

Taifa Leo ilipotembea maeneo ya Kisii Road, Kanu Street na maeneo ya Threeways, ilithibitisha ukweli wa madai haya.

Mwendo wa saa nne asubuhi, kina dada wa umri tofauti wanaonekana wameegema kuta wakiwa wamevalia nusu uchi.

Mmoja wao ambaye aliomba jina lake lisitajwe alisema kuwa wanawake wengi hufanya biashara hii ya ukahaba kutokana na umaskini na changamoto za kimaisha.

“Inatubidi kufanya hii kazi kukidhi mahitaji ya familia zetu na sio eti tunapenda anasa kama wengi wanavyofikiri,” alisema.

Bi Jane [sio jina lake halisi] aliongeza kuwa wasichana wengi wa vyuo vikuu wanajiingiza kwenye biashara hii chafu kwa tamaa ya kupata pesa kirahisi na mwishowe wanakuwa waraibu.

Kipusa agawa asali kulipiza kisasi

Na Tobbie Wekesa

KABUCHAI, BUNGOMA

POLO mmoja wa eneo hili, alishindwa kujieleza alipogundua kuwa mkewe alitekeleza tishio lake la kugawa asali.

Inasemekana kipusa alikuwa ametishia kuchepuka iwapo polo asingekoma kuwa na mipango ya kando.

Kulingana na mdokezi, kipusa alikuwa amekasirishwa na tabia ya jamaa ya kutongoza wanawake wa wenyewe.

Inadaiwa kipusa alijaribu kumkanya polo aachane na tabia hiyo lakini hakukoma.

Inasemekana mara kwa mara wawili hawa walikuwa wakigombana.

Kulingana na mdokezi, kipusa alipoona polo hakuwa tayari kuacha tabia hiyo, naye aliamua kufuata njia hiyo hiyo.

“Usifikirie mimi ni jiwe. Wazungu walisema ‘you do me, I do you’. Sitaki kusikia ukilalamika,” kipusa alimfokea polo.

Penyenye zinasema polo alianza kumzomea kipusa lakini mwanadada alikuwa ameamua.

Juzi jamaa aligundua kuwa kipusa alikuwa ameanza kutekeleza tishio lake.

Inadaiwa polo aliondoka asubuhi na aliporejea jioni, hakumpata mkewe. Alipojaribu kumpigia simu, kipusa hakupokea ila alimtumia ujumbe kumuarifu ajipange.

Inasemekana polo alibaki mdomo wazi. Kipusa aliporejea, alimkuta polo kwenye kochi.

“Mbona leo umerudi mapema hivi? Ama hukuwa na mteja?” kipusa alimuuliza polo.

Duru zinasema polo alipomuuliza kipusa alikotoka, jibu la kipusa karibu limpe polo mshtuko wa moyo.

“Tangu tuoane hatujapata mtoto. Shida ni wewe. Unalima mashamba mengi kisha ukirudi kwangu huwa umechoka. Acha nitafute vijana barobaro huko nje wanaoweza hii kazi,” kipusa alimfokea polo.

“Shughulikia hali yako nami nishughulikie yangu. Ukifanya nami nafanya. Ukirudi kwa nyumba hata nami narudi. Kwani kuna nini,” kipusa aliuliza.

“Ukitembelea vimada wako, nami natembelea wangu. Tuwe sambamba,” mwanadada alieleza bila kupesa jicho.

Alipia kitanda alichovunja akimumunya uroda

NA NICHOLAS CHERUIYOT

KERICHO MJINI

ILIBIDI polo wa hapa kumnunulia rafiki yake kitanda kipya baada ya kuvunja chake akiramba asali ya kisura.

Udaku uliodunda katika meza ya dondoo unaarifu kuwa polo alimpata rafiki yake na kumrai amuachie chumba chake kwenye ploti ya mji huu alishane uroda na demu mmoja.

“Urafiki ni kufaana bwana. Nimefanikiwa kumtongoza kipusa na amenikubali. Uniachie chumba leo alasiri hii yote niwe na raha na binti huyo,” jamaa alimlilia mwenzake.

“Sitaki chumba changu kutumiwa kwa mambo ya ufuska. Mchumba wangu ni Mkristo na hapendi chumba changu kutiwa doa ya usherati,” rafiki ya polo alimjibu mwenzake.

Hata hivyo, polo alizidi kumuomba na hatimaye mwenzake akamwachia nafasi kwa masharti makali.

Mkimaliza mchezo wenu unifulie shuka kuondoa uchafu wenu. Na iwe mara ya mwisho, usinizoee,” jamaa alimwambia polo.

Polo alichukua ufunguo na kuenda kasi kumleta msichana akate kiu yake.

Hata hivyo, mambo yalienda kombo kitanda kilipovunjika muda mfupi baada ya polo na binti kuanza kupandishana mzuka.

“Polo alitueleza kuwa hakutaka tatizo hilo kumharibia raha bali alihamisha mchuano kwenye sakafu na wakapiga hatua vizuri,” mdaku alituarifu.

Baada ya muda mrefu walitoka wakiwa na uchovu tele na njiani wakampata mwenye chumba akielekea kwake.

“Polo alimshukuru kwa ukarimu wake kisha akamwarifu kuhusu kuvunjika kwa kitanda,” mdaku alieleza.

Jamaa alilipuka kwa hamaki na kumtaka polo amnunulie kitanda kipya haraka.

Polo hakuwa na lingine ila kuelekea kwa fundi na kununua kitanda kisha akampelekea jamaa kabla ya kuenda zake akikadiria hasara kwa kutamani ufuska.

Lukaku, Lingard, Sanchez, Bailly na Martial wananimezea mate, nifanyaje?

Na CHRIS ADUNGO

WIKI chache baada ya Fanny Neguesha kumtaka mwanasoka Mario Balotelli kumkoma kabisa, mwanamitindo huyo wa Ubelgiji amefichua kwamba ndoa kati yake na kiungo Mario Lemina wa Southampton inayumbishwa na mawimbi mapya.

Hii ni baada ya kichuna huyo mwenye umri wa miaka 29 kukiri kunyemelewa mitandaoni na majanadume ya Manchester United ambayo kwa mtazamo wake, yana nia ya kumvurugia ndoa.

Kulingana naye; Romelu Lukaku, Jesse Lingard, Alexis Sanchez, Eric Bailly na Anthony Martial wamekuwa wakilihemea pakubwa penzi lake kwa kurusha picha na jumbe za kumtia kishawishini aachane na Lemina tangu mumewe huyo aanze kuhusishwa na uwezekano wa kuhamia uwanjani Old Trafford muhula huu.

Katika mahojiano yake na gazeti la The Sun, Neguesha aliungama kwamba wengi wa wanaume wanaomvizia ni wachezaji na mashabiki wa Man-Utd ambao walimfahamu wakati alipokuwa akitoka kimapenzi na Balotelli aliyekuwa sogora wa Man-City.

Madai ya Neguesha yanajiri mwezi mmoja baada ya kuungama kwamba Balotelli amekuwa akiwania fursa ya kuanza kulitikisa upya buyu lake la asali.

“Ana namba nyingi za simu. Mara anatuma ujumbe, mara anapiga simu, mara anarusha picha. Nahofia hili litaanza kumkera Lemina ambaye amenivumilia sana,” akasema kwa kusisitiza kwamba sasa haoni sababu yoyote ya mumewe kutua Old Trafford iwapo hali itakuwa hivyo jijini Manchester.

Maamuzi ya Balotelli kuliwania tena tunda la Neguesha yalichochewa na hatua ya kichuna huyo kuusifia utenda-kazi wa nyota huyo kila walipokuwa wakishiriki miereka ya faraghani hapo awali.

Katika mojawapo ya kauli zake, alisema bado hajampata fundi wa mahaba anayemzidi Balotelli kwa ujuzi wa kukitalii kisima chake cha maji makuu. Kulingana naye, wepesi wa jembe la Lemina ni kiini cha kutolimika ipasavyo kwa shamba alilojaliwa nalo, na ambalo hapo awali, lilielekea kuzoea kulimwa kwa mitambo mizito isiyozimika upesi.

“Balotelli si dume linalotisha uwanjani pekee. Pia ni gwiji wa mechi za chumbani. Sijaona kati ya wote waliowahi kumenya tunda hili, anayeweza kukifikia kiwango cha fowadi huyo. Ingawa hivyo, kwa sasa nimepania kutulia katika ndoa ili nimzalie Lemina watoto zaidi,” akasema.

Kwa pamoja na Lemina, videge hao wamejaliwa mtoto wa kiume: Isiah-King. Neguesha ambaye ana historia ya kuwa mwepesi wa kujilegeza kimapenzi kwa wanasoka maarufu wenye vipochi vinono kihela, sasa anamtaka mumewe ajiunge na Arsenal.

Neguesha alitemana na Balotelli mnamo 2014 baada ya kuhusiana kwa miezi 18. Mbali na Balotelli, Neguesha amewahi pia kutoka kimapenzi na kiungo wa Crystal Palace na timu ya taifa ya Senegal, Cheikhou Kouyate, 29, na mwanamuziki mzawa wa Canada, Aubrey Drake, 32.

Polo ahama baada ya kufumania mke akitafunwa na rafiki

Na TOBBIE WEKESA

USENGE, BONDO

Kalameni mmoja wa eneo hili aliwashangaza wengi alipoamua kugura boma baada ya kumpata mkewe akila uroda na rafiki yake. Inasemekana polo alifunganya virago na kuondoka bila kumueleza yeyote alikokuwa akienda.

Kulingana na mdokezi, polo alikuwa ameondoka nyumbani kuhudhuria mkutano uliokuwa umeandaliwa na wazee wa ukoo wake.

Duru zinaarifu kwamba mkewe naye alitumia fursa hiyo kumualika jamaa ambaye wengi walikuwa wakimfahamu kama rafiki wa karibu wa polo.

Inadaiwa mwanadada na jamaa huyo waliingia kitandani na kuanza kulishana tunda bila wasiwasi wowote. Penyenye zinasema kabla ya muda mfupi, polo aliwasili bila kubisha.

Mdokezi anasema kwamba polo alimkuta jamaa aliyemchukua kama mwandani wake akichovya asali yake bila wasiwasi.

“Mnafanya nini,” polo alifoka naye jamaa akamkodolea macho tu asijue la kufanya. “Unawezaje kufanya tendo kama hili kwenye kitanda changu,” polo alizidi kumfokea mkewe.

Inasemekana polo aliwaeleza waendelee na shughuli zao. “Nimekuchukua kama rafiki wangu wa karibu sana. Sikujua unanikula kichinichini. Nimekuachia mke huyo ukitaka kumuoa mchukue,” polo alimfokea jamaa.

Penyenye zinasema polo alianza kukusanya vitu vyake huku jamaa akipata mwanya wa kuhepa. “Mwambie mpango wako wa kando arudi akuoe.

“Hata nyumba na kitanda nimemuachia. Mimi naenda zangu,” polo alimueleza kipusa huku akianza safari. Kulingana na mdokezi polo alimueleza kila aliyekutana naye sababu ya kugura boma lake. Wenyeji walishangazwa sana na tukio hilo.

“Huyu mwanamke amenikosea heshima sana. Siwezi kuishi naye tena katika chumba kimoja,” polo aliwaeleza majirani.

Inasemekana mkewe alifunganya virago na kutoweka boma likabaki bila mtu.

Pasta mla fuska abanwa na kidosho

Na Leah Makena

ISINYA, KAJIANDO

Pasta wa hapa, alilazimika kumkabidhi kidosho mmoja sadaka iliyotolewa kanisani ili asianike vitendo vyake vya kula fuska.

Kulingana na mdaku wetu, kipusa alikuwa mpango wa kando wa pasta. Alikuwa akimtembelea mwanadada huyo usiku kula uroda na kisha kurejea kwake kwa sababu alikuwa na familia.

Baada ya miezi kadhaa, pasta alichoshwa na huduma za kipusa huyo na akaamua kumtema lakini akashindwa kwani mrembo alidai alikuwa amemzoea.

Juhudi za pasta za kumshawishi kidosho waachane kwa sababu alikuwa ameoa na ni mchungaji, ziliambulia patupu kwani kidosho alianza kudai pesa kutoka kwake tena kwa vitisho.

Mwanadada alimtaka pasta amwajiri kazi katika kanisa alilokuwa akihudumu lakini akakataa akihofia uhusiano wao ungenduliwa.

Hapo ndipo kidosho alianza kudai hela za kujikimu huku mbinu zote za pasta za kumhepa zikigonga mwamba.

Hivi majuzi, pasta alikatiza mazungumzo na mwanadada. Hata hivyo, alishangazwa kuona mrembo kwenye kanisa lake.

Siku hiyo, kidosho aliomba shemazi kumpeleka hadi ofisi ya pasta akisema alikuwa mgeni wake.

Pasta hakuamini macho yake kidosho apojitoma ndani ya ofisi na kuanza kumfokea kama mtoto mdogo.

“Mbio zako za sakafuni zimeishia ukingoni kwani leo nimekupata. Unawezaje kunihepa ukijua wazi kuwa sina ajira? Mbona hauna utu na nilikuwa nikikuburudisha? Nataka kodi ya nyumba na pesa ya shopping,” kidosho aliwika.

Kwa kuhofia kuanikwa mbele ya washiriki waliokuwa wakimsubiri, pasta alilazimika kumkabidhi sadaka iliyokuwa imetolewa siku hiyo na mwanadada akaondoka akitabasamu.

Pasta alibaki kukadiria hasara asijue la kufanya kwani hakuwa na uwezo wa kuhama kanisa hilo.

Mwalimu amuua mumewe kwa kumnyima uroda

RICHARD MUNGUTI Na DAILY MONITOR

KALIRO, UGANDA

MWALIMU wa shule ya msingi aliyekuwa na uchu wa kuburidishwa kitandani na mume wake, alitenda kisa cha kiajabu alipomuua kwa kukataa kumlisha uroda.

Polisi walioitwa kuondoa maiti ya mumewe aliyekaidi matakwa ya mkewe amwondolee kiu ya muda mrefu ya mapenzi, walisema mwalimu huyo alitumia kisu anachokatia kitunguu kumuua baba watoto.

Mwanamke huyo aliyetambuliwa na Polisi kwa jina Harriet Nambi mwenye umri wa miaka 24 mkazi wa kijiji cha Nakiyanja kilichoko katika baraza la miji wa Kaliro nchini Uganda alimfuma mumewe Musa Batera mwenye umri wa miaka 25 kifuani na kumsafirisha ahera.

Kwa mujibu wa Polisi marehemu alikuwa amekataa kujamiiana na mkewe kwa vile alikuwa amejifungua yapata miezi miwili iliyopita kwa njia ya kufanyiwa upasuaji (caesarean).

Hadi kifo chake, Batera, ambaye ni mume wa wake watatu alikuwa mwenyekiti wa chama che wenye piki piki almaarufu Boda Boda katika mji wa Kaliro tangu 2011. Nambi mwalimu katika shule moja ya msingi mjini Kaliro.

Bi Hasifa Babriye ambaye ni jirani yao alifichua mke huyo na mumewe walikuwa wameanza kufarakana baada ya Nambi kumlaumu mumewe kwa kutompa haki yake ya ndoa.

Mzozo baina ya wawili hao ulikuwa umeanza siku tatu kabla ya Nambi kumdunga kisu cha kifuani..

“Nambi alinieleza mumewe alikuwa amekataa kumtimizia haja zake ilhali alikuwa na kiu kikuu. Nilimshauri asubiri apone kwa vile alikuwa amefanyiwa upasuaji miezi miwili iliyopita,” Babriye alidokeza

Aliongeza, “Nilimshauri ampe mume muda lakini alikataa akisema lazima atamdhuru. Mumewe aliporejea kwa nyumba walikorofishana kisha akamdunga kisu cha mauti.”

Kwa mujibu wa wakazi, Nambi alimshawishi mumewe kuingia chumbani mwao na punde ugomvi ukaanza kisha vita vikazuka.

Afisa mkuu wa Polisi Wilaya ya Kaliro Bw Joseph Kihamba, alithibitisha kisa hicho na kuongeza , “ Nambi ametiwa nguvuni na atafunguliwa mashtaka ya mauaji.”

Bw Kihamba amewashauri wanandoa wasuluhishe tofauti zao kwa njia ya amani na kuwashirikisha watu wa familia zao.

Pia aliwasihi wanandoa wawasiliane na afisi za kijamii badala ya kuchukua sheria mikononi.

Afisa huyo alisema mwalimu huyo angelisubiri tu kwa vile alikuwa amejifungua hivi majuzi na hajapona kidonda.

“Kile mwanawake huyo mwenzangu alifanya ni makosa. Alikuwa amejifungua hivi majuzi na alikuwa amekazana atimiziwe mahitaji yake ya kijamii ilhali madaktari ushauri wanawake wasubiri hadi miezi sita ipite baada ya kujifungua ndipo wawe wamepona. Hakuwa tayari kwa mapenzi,” alisema Jamila Nangiya, mkazi wa Kalirobaada ya kupokea habari hizo za kushtua.

Polisi waliipeana maiti ya Batera kwa familia yake wakaizike huku uchunguzi ukiendelea.

Mwanamke kizimbani kwa kumlazimishia mvulana uroda

Na RICHARD MUNGUTI

MWANAMKE mwenye umri wa miaka 23 ameshtakiwa kwa ubakaji kwa kumlisha mvulana wa darasa la nane tunda la ndoa ndani ya seli katika kituo cha polisi.

Binti huyo, Bi Naomi Nechesa Sanya, alifikishwa katika mahakama ya Milimani Nairobi akikabiliwa na shtaka la kumbaka mwanafunzi wa darasa la nane kwa kumlisha mtoto huyo wa miaka 15 tunda lililokatazwa na Mungu.

Nechesa, aliye na mtoto mchanga wa miezi 11 alimlilia hakimu mwandamizi Bw Kennedy Cheruiyot amachilie huru akanyonyeshe mwanawe.

“Kama mama naumia kwa vile mtoto wangu hajanyonya tangu nilipokamatwa Januari 27, 2019,” alisema Nechesa.

Akaendelea kurai, “Ni haki ya mtoto chini ya sheria za shirika la umoja wa kimataifa la afya (WHO) kwamba watoto wachanga wanyonyeshwe, wazinyimwe maziwa ya mama hadi wafikie umri wa kuweza kula chakula.”

Mshtakiwa alifahamishwa na mshtakiwa kwamba mtoto wake ameumia tangu Jumapili (Januari 27) na hata “anahisi matiti yake yakiuma kwa vile hayajanyonywa.”

“Nakuomba umwonee mtoto wangu mwenye umri wa miezi 11 huruma kwa kuniachilia kwa dhamana ama uamuru aletwe nitakapozuiliwa nimnyonyeshe,” alisema Nechesa.

Lakini ombi hilo la kuachiliwa kwa dhamana lilipingwa vikali na kiongozi wa mashtaka Bw Kennedy Panyako, aliyeomba mshtakiwa azuiliwe kwa muda wa siku tano zaidi kuchunguzwa kwa kosa la mauaji.

“Naomba mshtakiwa azuiliwe kwa siku tano kusaidia polisi kukamilisha uchunguzi wa kosa la mauaji dhidi yake,” Bw Panyako alimweleza hakimu.

Kiongozi huyo wa mashtaka alieleza mahakama kwamba polisi watampelekea mshtakiwa mtoto wake akamnyonyeshe katika kituo cha Polisi cha Riruta atakapozuiliwa.

Bw Panyako , alimweleza hakimu kuwa itakuwa ni ukandamizaji wa haki za mtoto huyo mchanga kunyimwa mapenzi ya mama na pia kutenganishwa naye kwa siku nyingi.

Bw Panyako pia aliomba korti iamuru kesi hiyo ya ubakaji isikizwe Ijumaa (Februari 1) kwa vile mlalamishi amezuiliwa katika korokoro ya watoto.

“Naomba samanzi zitolewe mlalamishi katika kesi hii ya ubakaji anayezuiliwa katika mji wa kurekebisha tabia ya watoto afikishwe kortini kutoa ushahidi dhidi ya Nechesa,” Bw Panyako alimrai hakimu.

Mahakama iliamuru kesi hiyo isikizwe kesho ndipo polisi waendelee kumchunguza Nechesa kwa kesi ya mauaji.

Lakini mshtakiwa huyo aliishangaza mahakama alipomweleza hakimu, “Ni kweli niliiua. Nataka nisomewe hiyo kesi ya mauaji nikiri nihukumiwe niache kutesekea korokoroni.”

Akitoa uamuzi Bw Cheruiyot aliamuru Polisi wampelekee mshtakiwa mwanawe katika kituo cha polisi cha Riruta kumnyonyesha.

Hakimu alimtaka afisa anayechunguza kesi hiyo atekeleze agizo hilo mara moja.

Nechesa alikana mnamo Januari 27 2019 ndani ya seli katika kituo cha polisi cha Riruta alimbaka mwanafunzi huyo aliyekuwa anazuiliwa kwa kosa la kupatikana na bhangi.

Shtaka badala dhidi ya Nechesa ni kupapasa papasa mwanafunzi huyo sehemu zake nyeti.

Mbunge ashauri wasichana wakome kuwapa ‘masponsa’ uroda

Na JADSON GICHANA

MBUNGE Mwakilishi wa Kike Kaunti ya Kisii, Bi Janet Ong’era amewashauri wasichana wajiepushe kushiriki ngono na wazee wa rika la babu zao.

Alisema usuhuba katika ya wasichana wa vyuo na wazee unaendelea kikithiri katika maeneo ya Nyanza jambo ambalo huenda likasababisha ongezeko la maambukizi ya ugongwa wa Ukimwi.

Akizungumza na Taifa Leo mjini Kisii Bi Ong’era alisema mapenzi kama hayo mara nyingi huteka nyara fikira za wasichana hao kiasi kwamba hawana tena ile bidii ya kung’ang’ana katika maisha ili wafikie uthibiti wa kijamii na kiuchumi.

“Ningependa kuwatahadharisha wasichana wote. Jiepusheni na hii mipango ya kufadhiliwa kimapenzi na wazee matajiri. Utaishi vyema ndio ukionekana, lakini jua unajipotezea wakati wako muhimu wa maisha ya baadaye,” aliambia Taifa Leo.

Alieleza kuwa wanaume wengi huchukua hali yao ya umaskini kwa kuwashawishi na kuwadhulumu wasichana hao kwa kushiriki ngono.

Bi Ong’era pia alikemea visa vya unajisi vinavyozidi kuongezeka katika kaunti ya Kisii hivi karibuni.

“Ninawashauri wasichana wa umri mdogo kujiepusha na waze hao ambao nia yao ni kuharibu maisha na kutumia fursa ya gharama ya maisha ya familia ili kushiriki ngono na wao,” alisema Bi Ong’era.

Mbunge huyo wa Kaunti alisema kuwa baadhi ya hatari zilizoko ni kuambukizwa magonjwa kwa kuwa “sio wafadhili wengi wa kimapenzi watakubali kutumia kinga katika tendo la mapenzi.

Ashangaza kumpa mke idhini kugawia makalameni asali

NA BENSON MATHEKA

Kirigiti, Kiambu

BUDA wa hapa aliwashangaza wakazi walipobaini kwamba alimwambia mkewe atafute mpango wa kando wa kumlisha uroda.

Inasemekana jamaa alifikia uamuzi huo kufuatia lalama za mkewe kwamba alikuwa amemkausha kwa muda mrefu bila ya kumtimizia tendo la ndoa.

Kulingana na mdokezi, jamaa alikuwa akikidhi mahitaji yote ya nyumbani lakini ilibainika kuwa alikuwa mzembe wa shughuli za chumbani.

“Kusema ukweli, jamaa ana bidii ya kutafuta mali, mkewe huvaa mavazi ya pesa nyingi, ana gari alilonunuliwa na mumewe na kila wakati hupatiwa pesa za kutosha.”

“Hata hivyo, hakuna aliyekuwa akibaini kwamba mwanadada huyo alikuwa akisononeka kwa kukosa kurusha roho hadi juzi alipomlalamikia mumewe kwa kumpuuza kwa siku nyingi,” alisema mdokezi.

Penyenye zinaarifu kwamba mwanadada alipodai haki yake ya kutoka kimapenzi na mumewe, jamaa alimwambia hakuwa na wakati wa kula uroda.

“Mwanadada alishangaza mama mkwe alipomfahamisha kuwa mumewe alimweleza kwamba hakuwa na wakati wa kushiriki tendo la ndoa. Alimwambia hufika nyumbani akiwa amechoka kwa sababu akili yake hufikiria biashara tu na kumtaka atafute mwanamume wa kuzima ashiki zake ikiwa hawezi kuvumilia,” mdokezi alieleza.

Inasemekana kuwa mama mkwe aliamua kumweleza mumewe na wakamuita mwanao kumshauri lakini jamaa alisisitiza kuwa hakuwa na wakati wa kuharibu akirushana roho.

“Nitashughulika na biashara zangu zinazonipatia pesa za kumtunza mwanamke huyo kuwa jinsi alivyo au nitaziacha ili kufanya mapenzi. Ikiwa hapendezwi na bidii yangu ya kutafuta pesa, ana haki ya kutafuta mwanamume mwingine wa kumpa raha anayotaka ikiwa kwake raha ni kulishwa uroda pekee,” mdokezi alisema akinukuu jamaa alivyowaeleza wazazi wake.

Inasemekana wazazi walisema hawatachoka kumshauri mwana wao kumtimizia mkewe haki ya ndoa.

 

Ndoa ya mwanavikapu aliyerambishwa asali ya wizi sasa inayumba

NA MWANDISHI WETU

ALIYEKUWA nyota wa NBA, Marcus Camby yuko katika hatari ya kusalia mpweke baada ya kushtakiwa kwa kosa la kumtelekeza mtoto ambaye ni zao la jicho lake la nje.

Kwa mujibu wa kipusa Noemi Valdez, Camby ndiye baba wa Makiah, mtoto wa kike mwenye umri wa miaka saba aliyepatikana katika uhusiano wa siri uliodumu kwa kipindi cha mwaka mmoja mnamo 2010.

Akimtaka Camby aliwajibikie zao la miereka waliyoicheza faraghani wakati huo, Noemi kwa sasa ameelekea kortini kwa sababu mbili.

Mosi, anamtaka Camby asiwe na mazoea ya kuonana na mtoto Makiah popote na vyovyote apendavyo. Pili, analitaka dume hilo liwe likimpokeza kima cha Sh80 milioni kila mwezi ili kuyakimu mahitaji ya kimsingi ya Makiah.

Kulingana na gazeti la The Blast nchini Amerika, stakabadhi zote za korti zinaonesha kwamba Makiah alizaliwa mnamo 2011 na Camby hakupinga suala la uzazi.

Mnamo 2012, Noemi alipakia katika mitandao yake ya kijamii picha nyingi alizopigwa kwa pamoja na mwanavikapu huyo pamoja na Makiah katika sehemu mbalimbali za burudani.

Katika mojawapo ya picha, videge hao walipania kudhihirisha ukomavu wa penzi lao kwa kupigana mabusu motomoto mashavuni wakati wakiadhimisha mwaka mmoja wa kuzaliwa kwa mwanao Makiah.

Katika wasilisho lake mahakamani, Noemi anakiri kwamba alishawishika kutoka kimapenzi na Camby kwa kuwa alimsisitizia kwamba alikuwa kapera.

“Nilianza kumfungulia buyu la asali aliponisadikisha kwamba hakuwa na mke wala katika uhusiano wowote mwingine wa kimapenzi,” asema Noemi.

Ilikuwa hadi 2013 ambapo Camby alitemana na Noemi aliyegundua kwamba nyota huyo wa basketiboli ana mke aitwaye Eva ambaye kwa pamoja wamejaliwa watoto wawili. Camby alifanya Eva kuwa wake wa halali mnamo 2008 katika harusi iliyohudhuriwa na wanavikapu maarufu wa NBA.

Mwanaume ang’atwa nyeti kwa kutolipia uroda lojing’i

Na LUCY MKANYIKA

POLISI katika Kaunti ya Taita Taveta wanamsaka mwanamke aliyetoroka baada ya kuuma sehemu nyeti za mwanamume waliyekosana kuhusu bei ya huduma za mapenzi wakiwa ndani ya lojing’i.

Ingawa kamanda wa Polisi katika kaunti hiyo, Bw Francis Warui hakupatikana ili kutoa maelezo zaidi, maafisa walio chini yake walisema kisa hicho kilitokea katika eneo la Njukini, mjini Taveta usiku wa kuamkia Jumatatu.

Mwanaume huyo anaendelea kupata matibabu katika hospitali moja nchini Tanzania ambako alipelekwa na wasamaria wema waliommokoa baada ya kung’atwa.

Wakazi walioshuhudia kisa hicho walieleza kuwa wawili hao walianza ugomvi kuhusu malipo na kupelekea mwanamke huyo kuuma uume wa mteja wake kisha akatoroka.

Duru za kuaminika zilieleza kwamba wawili hao walikuwa walevi na walisikika wakizozana chumbani humo kabla ya mwanamume huyo kuomba msaada.

Wenyeji walilaumu kukithiri kwa pombe haramu katika eneo hilo kama chanzo cha visa kama hivyo.

“Vilevile kuna pombe haramu kutoka nchi jirani ya Tanzania ambayo inaingizwa humu nchini kisiri,” akasema mwenyeji mmoja.

Alisema kuwa wenye mabaa katika eneo hilo wamekuwa wakivunja sheria za uuzaji wa vileo kwa kuuza pombe kabla ya masaa yaliyowekwa kisheria, almaarufu ‘Sheria za Mututho’.

“Pombe inauzwa kila wakati. Wenye mabaa hawajali sheria ya nchi,” akasema.

Alidai kuwa maafisa wa polisi wa eneo hilo wanapewa rushwa na wenye biashara za pombe ili kukwepa mkono wa sheria.

Huddah sasa akiri kuwezwa na uhodari kwa kidume kipya chumbani

Na PETER MBURU

MSOSHALAITI Huddah Monroe hatimaye amepata mpenzi, na sasa anataka kila mtu duniani ajue kuhusu uwezo wa dume lake kumtimizia uchu wa uroda chumbani.

Kwenye ujumbe katika Instagram Stories, Huddah alizungumzia kuhusu mpenzi wake wa mwaka mmoja sasa, ambaye alimtaja kuwa na ‘mchezo wa haja’.

Aliandika namna alivyowezwa na penzi la jamaa wake, japo kwa kinaya, akihofia kujitolea kuhifadhi penzi.

Kulingana naye, kujitokeza kwa jamaa mwenye gemu kali katika maisha yake ni ishara kuwa kuna wasakataji wazuri wa uroda kule nje, na hivyo hajui ikiwa ashikilie huyo ama ajitoe akawatafute.

Hadithi yake ya mapenzi inakuja wiki chache tu baada ya mwenzake Vera Sidika kutemwa na msanii Otile Brown, ambaye alikuwa ameonyesha ishara za kufunga pingu za maisha naye.

Sasa Huddah anasema amevunja sharia yake ya kwanza ya ‘kutowahi kunaswa kwa mapenzi’.

Mbeleni, alikuwa amemtambulisha mwanasoka mmoja kutoka Amerika kama mpenzi wake lakini baadaye akatangaza kuwa waliachana.

Kutoka wakati huo alisema aliamua kutowahi kuingia katika mapenzi yoyote ya kweli, kwani aliona yeye na ndoa ni maji na mafuta.

Lakini sasa anaonekana kuvunja amri yake mwenyewe, huenda kutokana na uhodari wa jamaa mpya aliyempata, lakini tumpe muda kabla ya kusherehekea kuwa mwishowe amepata kidume halisi cha kumwoa.

Wachumba wamwagiwa kinyesi kwa kula uroda nje ya ndoa

Na MASHIRIKA

LANGSA, INDONESIA

WAPENZI wawili walimwagiwa kinyesi kwa kudaiwa kushiriki ngono nje ya ndoa zao katika eneo la Langsa, Indonesia.

Video iliyosambazwa mitandaoni ilionyesha umati wa watu ukiwavuruta mwanamume na mwanamke wanaoonekana kuwa wenye miaka ya thelathini na kuwapeleka kando ya shimo la maji taka.

Walikalishwa hapo kisha umati ukaleta ndoo ambazo zilitumiwa kuchota maji hayo yenye uchafu wa kila aina ikiwemo kinyesi, na kuwamwagia vichwani na mwilini.

Nchini humo wakazi wengi hufuata sheria za Kiislamu na hivyo basi ni haramu kwa watu kutenda ngono nje ya ndoa.

Ripoti za habari zilisema mwanamume huyo ni mkubwa wa idara ya kiserikali na mwanamke husika ni mwajiriwa wake.

Ilidaiwa mwanamume huyo alikuwa akienda nyumbani kwa mwanamke mara kwa mara, na wakazi waliwachunguza mienendo yao kwa muda kabla kuwanasa.

Ilisemekana wawili hao walijitetea na kusema walioana kwa njia ya kidini lakini umati ukaendelea kuwaadhibu.

Walichukuliwa na polisi baadaye ambao walinukuliwa kusema watafanya uchunguzi zaidi na ikiwa itabainishwa kwamba cheti chao cha ndoa ni feki, huenda wakaadhibiwa kisheria kwa kuchapwa mijeledi hadharani.

-Imekusanywa na Valentine Obara

Alilamba vya pembeni, sasa hana ‘transfoma’ baada ya mke kuikata kwa makasi

Na MASHIRIKA

FENGCHENG, UCHINA

MWANAMUME anauguza majeraha mabaya baada ya mke wake kumkata uume wake.

Inasemekana mwanamke huyo alishuku mume wake ana mpenzi wa kando ndiposa akachukua makasi na kumkata uume.

Kulingana na mashirika ya habari Uchina, mwanamume huyo alikuwa akipiga mswaki wakati mke wake alipomshambulia ghafla. Walikuwa wamebishana awali lakini hakujua mke wake alikuwa bado ana hasira.

Duru katika hospitali ambako mwanamume huyo aliyetambuliwa kama Li alillazwa zilisema alifikishwa huko akivuja damu jingi.

Mashirika ya habari yalimnukuu akisema kuwa mke wake alikuwa akimshuku sana.

Ilidaiwa alisema mke wake alimpiga marufuku kuzungumza na rafiki yeyote wa kike wala hata kutabasamu na mwanamke kwa mbali.

Ingawa wamekuwa wakibishana mara kwa mara, hakutarajia kuna siku ingefika ambapo mke wake angemkata uume wake.

Madaktari walinukuliwa kusema alifanyiwa upasuaji wa dharura kuokoa maisha yake lakini hawezi kuhakikishiwa atarejelea hali yake ya kawaida ya udume atakapopata nafuu.

-Imekusanywa na Valentine Obara

Kisanga polo kufumania mganga akichovya asali yake

Na TOBBIE WEKESA

Kibabii, Bungoma

Kalameni mmoja kutoka hapa, alimtimua mganga baada ya kubaini kwamba alikuwa paka asiyeachiwa maziwa.

Kulingana na mdokezi, polo alimualika mganga kwa boma lake amgangue mkewe. Duru zinasema mara kwa mara jamaa alikuwa akimuacha mganga na mkewe mgonjwa ili atibiwe.

Inasemekana mkewe alikuwa ametaabika mno kutokana na ugonjwa ambao haukujulikana na madaktari wa hospitali zote alizozuru.

“Polo aliamua kumtembelea mganga ambapo walisikilizana asafiri hadi kwa boma,,” alieleza mdokezi.

Penyenye zinasema polo alianza kupata fununu kwa majirani kwamba mganga alikuwa akichovya asali kabla ya kuanza kumtibu mkewe.

Inadaiwa siku ya tukio, polo alimdanganya mganga kwamba angerudi jioni. Alimsihi aendelee kumhudumia mkewe.

Jamaa alienda na kujificha kwa nyumba ya jirani.

Kulingana na mdokezi, mganga alianza shughuli zake naye jamaa akawa anachungulia kwa dirisha.

“Hakuamini alichoona. Mganga alikuwa juu ya mzinga akirina asali,” alieleza mdokezi.

Duru zinasema mganga aliangushiwa makofi kadhaa na polo.

“Ilikuwa ni leo pekee. Sijawahi kufanya hivyo tena. Tafadhali nisamehe,” mganga alimrai polo.

Majirani walimzomea mganga huku wakitoa siri zote za mganga huyo.

“Kila wakati huwa unajifungia ndani ya nyumba. Juzi uliwafukuza watoto waliokuwa wakicheza hapa,” jirani alidai.

Inasemekana ilibidi mganga kukiri kosa asiangamizwe. Kwa kusikia hivyo, polo alimpa mganga dakika tano afunganye virago na kuondoka.

Mganga alilazimika kutoroka mbio kwani alihofia gadhabu ya majirani.

Haikujulikana ikiwa baadaye polo alisikilizana na mkewe au la kuhusu kitendo alichofanya na mganga. Hadi wa leo haikujulikana ugonjwa aliougua mke wa jamaa huyo.

Ajabu mwanamume kumea uke kwa nyeti zake baada ya kuchepuka

Na STEPHEN ODUOR

KUMETOKEA kioja katika Kaunti ya Tana River, eneo la Tana Delta baada ya mwanamume mmoja kudai kumea sehemu ya siri za mwanamke kando na zake katika hali tatanishi.

Kulingana na mkewe mwathiriwa, hali hiyo ilijitokeza zaidi ya wiki moja iliyopita baada ya kunaswa kwenye fumanizi na mke wa mtu.

Alisema kwamba mumewe alikumbwa na hali hiyo baada ya kukataa sharti la mlalamishi kutaka kushirikia ngono naye, sawa na mumewe alivyomfanyia mkewe. Mlalamishi huyo alitambuliwa tu kama Joseph.

Mke wa mshukiwa pia alisema alikataa sharti hilo kama njia ya kusuluhisha mzozo huo.

“Joseph alitaka kufanya mapenzi nami kama mume wangu alivyofanya na mkewe ila sote wawili tukakataa,” akasema.

Ni baada ya mzozo huo ambapo Joseph aliondoka kitaratibu, ila akaapa kwamba lazima mtu huyo “angelipia” makosa yake.

Siku tatu baadaye, mshukiwa aligundua uvimbe fulani chini ya sehemu zake za siri, ila akaupuuzilia mbali kama hali ya kawaida.

Hata hivyo, hali ilizidi kuwa mbaya wakati alipoamua kwenda kuoga, kwani uvimbe huo uligeuka ghafla kuwa sehemu za siri za kike, jambo lililothibitishwa na mkewe.

“Alinijia akilia, akinirai nimuelezee kuhusu hali yake. Nilipochunguza vizuri, nilibaini kwamba uvimbe huo unafanana kabisa na sehemu za siri za kike,” akaelezea.

Hata hivyo, masaibu yake hayakuishia hapo kwani usiku uliofuata, waligundua kwamba alikuwa amepata hedhi, kama mwanamke wa kawaida.

Alimwamsha mumewe kuhusu kioja hicho, jambo ambalo lilimshangaza.

Tangu wakati huo, mwanamume huyo amekuwa akijificha nyumbani mwake, huku akienda hedhi kila baada ya saa tatu. Ni mkewe na wazee wachache ambao wamekuwa wakifahamu kuhusu jambo hilo la kiajabu.

Kwa upande wake, mlalamishi anadaiwa kuondoka nyumbani kwake huku mkewe akitoroka vilevile.

Juhudi za wazee kusuluhisha hali hiyo hazijazaa matunda yoyote.

Mkewe mwathiriwa amebadilisha nia na kukubali sharti la mlalamishi kulala naye, ila kulingana na wazee, Joseph sasa hamtaki.

Mzee mmoja, Hiribae Kofa, aliiambia Taifa Leo kwamba badala yake, Joseph anataka Sh300,000 “ili kumrejesha mwathiriwa katika hali ya kawaida.”

Kwa hayo, familia inawaomba wahisani kuisaidia kupata fedha hizo kwani ni vigumu kwao kuzipata kwani hawana uwezo huo.

FUNGUKA: Sihitaji urembo kunyaka wahadhiri chuoni na kuwalambisha asali nipite mitihani

Na Pauline Ongaji

Ni ndoto ya kila mwanafunzi wa chuo kikuu kufanya vyema katika mtihani wake na hata kuhitimu.

Na ni ndoto ambayo Valerie anaifuata kwa udi na uvumba na ananuia kuitimiza. Hata hivyo tofauti na wanafunzi wengine wa kawaida wanaotia bidii kimasomo kuafikia ndoto hii, binti huyu anayesomea shahada ya uzamili katika masuala ya kibiashara katika chuo kikuu kimoja hapa nchini amebuni mbinu kunufaika.

Sawa na msemo wa Kiingereza “The end justifies the means,” Valerie hajali atakachofanya kiwe kibaya au kizuri, mradi apate matokeo anayotaka. Mbinu ya binti huyu ni kuwanasa wahadhiri ili wamdokezee kuhusu maswali kwenye mtihani kabla siku yenyewe.

Kwanza kabisa binti huyu mwenye umri wa miaka 33 sio wale mabinti ambao kwa viwango vya kawaida unaweza waita warembo sana. Valerie sio mmojawapo wa mabinti wanaojirembesha. Kwa hivyo ni kawaida kukutana naye akiwa ameachilia shungi la nywele na ni nadra kwake kujipaka vipodozi.

Badala yake amewekeza nguvu na rasilmali zake kwingineko.

“Nimenoa akili yangu kiasi cha kwamba hilo ndilo lango la kwanza ninalotumia kunasa windo langu kabla ya kuliingiza katika mtego wa mahaba.

Kwangu urembo ni mchuuko sana. Mtu yeyote anaweza kuwa mrembo. Siku hizi kwa mapeni kadha ya kununua vipodozi ghali na nywele za kubandika waweza shindania tuzo ya ‘slay queen’.

Nawe ukiwa hivi, ni vigumu kwa mhadhiri kukuchangamkia na kuwa na makini kwako kwani kuna wengi kama wewe. Ukishamuonjesha, basi ni hivyo anasonga na kumwendea mpumbavu mwingine kama wewe.

Badala yake nimewekeza katika akili yangu, rasilmali ya kipekee ya kuwanasa hawa wahadhiri ambao ni ada kwao kunipa alama za juu kwenye mtihani. Badala ya kununua nywele za kubandika, mimi hutumia pesa zangu kununua vitabu na kuhakikisha kuwa nahudhuria mihadhara yote muhula unapoanza.

Kadhalika mimi hufuatilia mada kuu za kimasomo kabla ya mhadhiri kuingia, kumaanisha kuwa anapoingia kufunza mimi, ni mmojawapo wa wanafunzi wachache wanaochangamkia maswali, mbinu ambayo imenisaidia kunasa wahadhiri wengi, hasa wanaovutiwa na akili ya binti badala ya masuala sahili kama vile sura na umbo la kupendeza.

Lakini mtego wangu haukomei hapo tu kwani nimehifadhi uhondo pindi nikishawakaribisha kwenye ubongo wangu ambao ni sawa na sebule ya nyumba.

Sawa na mgeni maalum, akishaingia ukumbini lililosalia ni kumvuta hadi chumbani ambapo pia nimehakikisha kuwa kibuyu cha asali kimehifadhiwa vilivyo, na nakuhakikishia kuwa pindi anapoonjeshwa sitatumia nguvu nyingi kumshawishi ashughulikie masuala yangu wakati wa mtihani.

Nilianza tabia hii nilipokuwa nikisomea shahada yangu ya kwanza ambapo katika mtihani wa mwaka wa kwanza, licha ya kutia bidii, kuna mabinti wazembe waliofanya vyema zaidi yangu kutokana na uhusiano waliokuwa nao na wahadhiri.

Natarajia kukamilisha masomo yangu mwisho wa mwaka huu ambapo tayari nishapita katika masomo ya nadharia na katika tasnifu ninayoandika kuna ishara kubwa kuwa nitapata alama ya A.

Pia najiandaa kuanza kusomea shahada ya uzamifu pindi baada ya kukamilisha masomo na mtindo utakuwa huo huo hadi mwisho”.