LITA moja ya petroli inauzwa Sh450 katika miji ya Ilbisil na Mali Tisa, Kaunti ya Kajiado, kufuatia madai kwamba baadhi ya wamiliki wa vituo vya mafuta wanahodhi bidhaa hiyo, hali ambayo huenda ikatatiza shughuli za usafiri katika maeneo yaliyoathirika.

Kaunti hiyo imekumbwa na uhaba mkubwa wa mafuta unaohusishwa na shinikizo katika soko la kimataifa la mafuta kufuatia mzozo kati ya Israel na Iran pamoja na mabadiliko ya thamani ya sarafu.

Madereva katika maeneo mbalimbali ya Kaunti ya Kajiado pia wameathiriwa na ongezeko kubwa la bei ya mafuta ya dizeli la Sh272 kutoka bei ya awali ya Sh178 kwa lita.

Kulingana na Mamlaka ya Udhibiti wa Kawi na Petroli (EPRA), bei ya mafuta Kenya zilibaki bila mabadiliko kuanzia Machi 15 hadi Aprili 14, 2026, zikisalia thabiti jijini Nairobi na maeneo jirani, ikiwemo Kajiado, kwa Sh178.28 kwa petroli, Sh166.54 kwa dizeli, na Sh152.78 kwa mafuta ya taa.

EPRA ililenga kudumisha utulivu wa bei licha ya kupanda kwa gharama za uagizaji kutoka nje, huku serikali ikitumia mfuko wa ruzuku.

Licha ya malori kadhaa ya mafuta kuonekana na madereva yakisambaza mafuta katika vituo vya mafuta katika miji iliyoathirika kando ya Barabara Kuu ya Namanga, wamiliki wa vituo wanadaiwa kusababisha uhaba bandia ili kuongeza faida.

“Tumeona malori yakisambaza mafuta katika vituo mbalimbali vya petroli lakini wamiliki wamekataa kutuuzia sisi (waendesha boda boda na madereva). Usafiri katika miji iliyo kando ya barabara ya Namanga uko hatarini kukwama kabisa,” alisema John Lesi, mwendesha boda boda katika mji wa Ilbisil.

Madereva na waendeshaji pikipiki waliokasirika, ambao wamekuwa wakipanga foleni kwa saa nyingi katika siku mbili zilizopita kwenye vituo vya mafuta, wamewashutumu wahudumu kwa kuuza mafuta kwa Sh450 kwa lita.

Baadhi ya wafanyabiashara pia wamechukua fursa hiyo kuuza petroli kando ya barabara katika chupa za plastiki licha ya hatari inayoweza kutokea na kusababisha mauti.

“Tumeona baadhi ya wamiliki wa vituo vya mafuta wakijaza chupa za plastiki na kuwapa wahudumu wao wauze kwa madereva kwa Sh450 kwa lita ya petroli na dizeli. Huu ni unyanyasaji kwa wateja,” alisema dereva, Bw Isaac Kipale.