MATUNDA ya kiwi huwa nadra kupatikana, lakini huenda umekumbana nayo sokoni, katika maduka ya matunda au hata yakichuuzwa barabarani.

Matunda ya kiwi yenye ngozi inayosheheni vinywele laini na sehemu ya ndani yenye rangi ya kijani kibichi au ya dhahabu yana viwango vya juu vya Vitamini C kuliko matunda kama vile machungwa.

Tofauti na sehemu kubwa ya matunda matamu, kiwi inakoleza ladha ya kipekee ambayo ni mseto wa uchachu na sukari asilia, ikiambatana na nyuzinyuzi, kemikali, na viinimwili muhimu vinavyohitajika mwilini.

Wataalam wa lishe wanapendekeza kula angalau tunda moja au mawili ya kiwi kutokana na sifa zake zinazoboresha afya kwa jumla.

Licha ya kusheheni manufaa anuai kiafya, na sifa tele kwenye tasnia za kutunza afya bora, matunda ya kiwi yameonekana kufunikwa na aina nyinginezo za matunda maarufu kama vile tufaha, tikitimaji, parachichi, na ndizi.

Si ajabu kwamba wataalam wa lishe wanaita kiwi ‘mashujaa wasiosifika kwenye mlo wa matunda’.

Katika siku za majuzi, hata hivyo, matunda ya kiwi yanajipenyeza taratibu kwenye midahalo ya afya na lishe bora.

Manufaa ya kiafya

Matunda ya kiwi yanasheheni viwango vya juu vya Vitamini C, K, na E, madini ya potassium, nyuzinyuzi muhimu na sukari asilia.

Vitamini C huimarisha kinga ya mwili, husaidia kufyonza madini ya Chuma, huzuia uharibifu wa seli, na kulinda ngozi na viungo vya mwili.

Rangi

Japo yote yana viwango vya juu vya Vitamini C, kiwi zenye rangi ya dhahabu zina ngozi laini zaidi, ni tamu zaidi, na zinasheheni viwango vya juu vya nyuzinyuzi muhimu.

Kiwi za kijani kibichi zinapatikana kwa wingi popote iwe dukani au sokoni.

Zina uchachu zaidi, zinasheheni viwango vya juu vya nyuzinyuzi muhimu hivyo kuboresha mfumo wa kusaga chakula, na viwango vya chini vya sukari.

Ngozi ya kiwi

Ni salama kula ngozi ya tunda hili.

Ngozi ya kiwi inaongeza pakubwa viwango vya nyuzinyuzi muhimu mwilini, inaboresha afya ya mfumo wa kusaga chakula tumboni na inasheheni kemikali za ziada zinazoboresha afya, kulingana na wataalam wa lishe.