MTOTO mwenye umri wa miaka minne, Precious Wambui, ameunganishwa tena na mamake Kenya baada ya kuishi Saudi Arabia kwa miaka mitatu kufuatia kufurushwa kwa mamake, Penina Wanjiru, 2025.

Precious aliwasili Nairobi Jumatatu na kukutanishwa na mamake katika afisi za Idara ya Serikali ya Masuala ya Wakenya Wanaoishi Nje ya Nchi.

Bi Wanjiru alisema anafurahi kurejeshewa mwanawe baada ya kipindi kigumu cha kutengana.

“Nina furaha sana kupata mtoto wangu. Haikuwa rahisi na nimekuwa mgonjwa, lakini sasa nitakuwa sawa. Nashukuru idara za serikali zilizotusaidia,” alisema.

Katibu Mkuu wa Masuala ya Wanaoishi Nchi za Nje Roselyn Njogu alisema serikali ililazimika kuthibitisha uraia wa mtoto na uhusiano wake na mamake kabla ya kuanza mchakato wa kumrejesha Kenya.

Maafisa wa ubalozi wa Kenya jijini Riyadh walishirikiana na Serikali kufanya uchunguzi wa DNA, ambao ulithibitisha kuwa Precious ni mwana wa Bi Wanjiru.

Afisa wa maslahi ya watoto pia alitumwa Saudi Arabia kuchunguza hali ya mtoto huyo, aliyekuwa akiishi na malezi ya msamaria mwema.

Bi Njogu alisema idara yake imewarejesha watoto wanane nchini tangu kuanzishwa kwake 2022.

Serikali itaendelea kufuatilia familia hiyo kuhakikisha Precious anapata mazingira salama na huduma zinazohitajika.