POLISI wamegundua mtandao unaoshukiwa kujihusisha na ulanguzi wa mihadarati kimataifa kupitia mpaka wa Kenya na Tanzania.

Hii ni baada ya mshukiwa aliyekamatwa nchini Tanzania kuwaongoza wapelelezi wa Kenya hadi kwenye shehena ya mihadarati yenye thamani ya Sh3.6 bilioni katika Kaunti ya Kwale.

Mkurugenzi wa Idara ya Kuchunguza Uhalifu (DCI), Bw Mohamed Amin, alithibitisha kukamatwa kwa washukiwa watatu katika operesheni ya pamoja ya mashirika mbalimbali ya usalama.

Operesheni hiyo ilisababisha kupatikana kwa kilo 454 za dawa za kulevya katika eneo la Msambweni.

Washukiwa hao watatu, ambao ni raia wawili wa Tanzania na mwanamke mmoja raia wa Uganda, wanazuiliwa na polisi wakisubiri kufikishwa mahakamani.

Duru zilisema mihadarati hiyo inashukiwa kuwa methamphetamine, huku uchunguzi wa kuthibitisha ukisubiriwa.

Operesheni hiyo, iliyoanza kwa kukamatwa kwa mshukiwa mmoja nchini Tanzania Novemba 5, ilifichua watu wengine wanaoshukiwa kuhusika katika biashara hiyo katika vijiji viwili vya Kwale.

Kwa mujibu wa DCI, maafisa wa Tanzania walimkamata mshukiwa wa kwanza akiwa na kilo 259 za mihadarati katika shehena tofauti, inayoshukiwa kuwa ni methamphetamine na kokeni, kabla ya kumkabidhi kwa maafisa wa Kenya katika kituo cha mpakani cha Lunga Lunga-Horohoro.

Wapelelezi walisema mshukiwa huyo aliwaongoza maafisa hadi Kijiji cha Shirazi, katika eneo la Kingwede Shirazi, ambako walipata makazi ya mshukiwa wa pili.

Baada ya mahojiano zaidi na ufuatiliaji, kikosi hicho kilielekea Kijiji cha Ganja La Simba, katika eneo la Kinondo, ambako maafisa walipata kilo 454 za mihadarati na kumkamata mshukiwa wa tatu.

Vijiji hivyo viwili viko karibu na Bahari Hindi, hali inayofanya wapelelezi kushuku uwezekano kuwa ulanguzi ulifanywa kwa boti au dau lililodhaniwa kuwa la uvuvi.

Magari mawili na pikipiki moja pia zilikamatwa katika operesheni hiyo, ambayo DCI imesema bado inaendelea.

DCI imesema operesheni hiyo inaonyesha umuhimu wa ushirikiano wa kushiriki taarifa za ujasusi kati ya vyombo vya usalama vya Kenya na Tanzania, ikiwa ni sehemu ya juhudi za kuvunja mitandao ya uhalifu wa kupangwa inayovuka mipaka ya nchi.

Tukio hilo limeibua upya wasiwasi kuhusu kuongezeka kwa uwezekano wa Kenya kutumiwa na mitandao ya kimataifa ya biashara haramu ya dawa za kulevya, hasa ile inayojihusisha na usafirishaji wa methamphetamine.

Mwaka uliopita, meli iliyokuwa imebeba methamphetamine yenye thamani ya Sh8.2 bilioni ilizuiliwa katika Bahari Hindi na washukiwa sita raia wa kigeni wakakamatwa.

Jeshi la Wanamaji nchini lilinasa meli ya MV Mashallah ikiwa imebeba zaidi ya kilo 1,024 za methamphetamine baharini.

Haijabainika wazi dawa hizo zilikuwa zikielekea wapi, huku kesi dhidi ya washukiwa ikiendelea na mihadarati hiyo kuteketezwa kwa amri ya mahakama.

Katika mwaka wa 2014, meli ya MV Amin Darya ilikamatwa ikiwa na dawa za kulevya zenye thamani ya Sh1.3 bilioni.

Ingawa wafanyakazi wake walihukumiwa kifungo cha maisha awali, Mahakama Kuu baadaye ilibatilisha hukumu hizo baada ya kubaini kutokuwepo kwa ushahidi usiotiliwa shaka, ikiwemo kutokuwa na uhakika kuhusu eneo ambalo meli hiyo ilikuwa wakati ilipokamatwa.