KINARA wa Wiper, Kalonzo Musyoka na mwenzake wa DCP, Rigathi Gachagua wamefichua juhudi fiche za kuzuia mgawanyiko ndani ya upinzani, huku kukiwa na taarifa zinazokinzana kuhusu mkutano wao na Kiongozi wa Jubilee Fred Matiang’i.

Bw Musyoka na Dkt Matiang’i Jumapili asubuhi walichapisha picha za mkutano huo, lakini washirika wao walitofautiana kuhusu wakati uliofanyika.

Baadhi ya viongozi wa upinzani walisema walikuwa wanafahamu mkutano mmoja tu uliofanyika Jumatatu iliyotangulia.

“Sifahamu mkutano wowote uliofanyika Jumapili. Mkutano pekee ninaoufahamu ni ule wa Jumatatu,” alisema afisa mmoja wa upinzani ambaye hakutaka kutajwa.

Aliongeza kuwa Bw Musyoka hakuwa Nairobi Jumapili asubuhi, kwani alikuwa Mombasa.

Mvutano kati ya Bw Gachagua, Dkt Matiang’i pamoja na kiongozi wa DP Justin Muturi ulifikia kilele Jumanne, aliyekuwa naibu rais alipowataja wawili hao kuwa wanasiasa wavivu wanaomtegemea yeye kuwatafutia kura ili wapate urais.

Aliwataka waache kutafuta kura katika mikutano ya hoteli na vipindi vya televisheni, akiwakumbusha kushindwa kwao katika chaguzi ndogo za hivi majuzi.

Hata hivyo, akizungumza katika mkutano wa Ukombozi mjini Kitengela, Kaunti ya Kajiado, Jumapili alasiri, Bw Musyoka alisema upinzani hauna budi kuungana ili kumwondoa Rais William Ruto mamlakani mnamo 2027.

“Hatua ya Rigathi Gachagua kukutana na ndugu yetu Fred Matiang’i asubuhi hii inaonyesha kujitolea kwetu kwa umoja wa upinzani. Hatuna budi kuungana ili kumwondoa Ruto mamlakani kwa njia ya kikatiba,” akasema.

Bw Musyoka aliishutumu serikali kwa kuvuruga soko la chai, hasa Sudan Kusini, hali inayodaiwa kuwagharimu wakulima wa Kenya dola milioni 700 (Sh91 bilioni) kila mwaka.

“Tumeanza kurekebisha makosa ya utawala wa Kenya Kwanza. Ninawasiliana na serikali ya Sudan kupitia balozi wake nikishinikiza kuondolewa kwa marufuku ya chai,” akasema.

Naye Bw Gachagua alisisitiza kuwa hakuna mgawanyiko ndani ya upinzani, akisema alikutana na Dkt Matiang’i kwa kiamsha kinywa Jumapili na pia akazungumza na kiongozi wa People’s Liberation Party Martha Karua.

“Nilikutana na Fred Matiang’i asubuhi hii na amejitolea. Ninafahamu Rais Ruto na washirika wake wanapanga kutumia ziara yao Kisii kuchochea mgawanyiko kati yangu na Matiang’i kwa maslahi yao binafsi, lakini hawatafaulu,” akasema.

Alitaja tofauti hizo kama ushindani wa kawaida wa kindugu katika familia yenye wake wengi, akilaumu wafuasi wenye misimamo mikali na baadhi ya watumiaji wa mitandao ya kijamii kwa kuchoche mvutano aliosema haupo.

“Wakuu wa vyama wanapaswa kuwa waangalifu, la sivyo tutapoteza lengo letu,” akaonya.

Bw Gachagua pia aliahidi kuwa kura za mchujo za DCP zitakuwa huru na za haki, akisema chama hicho hakina wagombeaji wanaopendelewa.

Seneta wa Kajiado Samuel Seki alisema muungano huo utahakikisha mgombeaji wake anapata zaidi ya asilimia 50 pamoja na kura moja zinazohitajika kushinda urais.

Mbunge wa Kajiado Kaskazini Onesmus Ngogoyo naye alisisitiza kuwa DCP itafanya mazungumzo na washirika wengine kama chama cha kitaifa, wala si chama cha jamii fulani kinachompendekeza Gachagua kuwa mgombeaji wa urais.