MBUNGE wa Kasarani, Ronald Karauri, amejiunga rasmi na chama tawala cha UDA na kutangaza azma ya kuwania ugavana wa Nairobi katika uchaguzi mkuu wa 2027, akizima uvumi kwamba angejiunga na ODM.

Bw Karauri alikuwa ametajwa miongoni mwa wanasiasa waliotarajiwa kuhamia ODM wiki hii. Hata hivyo, ameamua kujiunga na UDA, hatua inayozidisha ushindani wa kisiasa kuhusu udhibiti wa uongozi wa Nairobi.

Hatua hiyo inajiri wiki mbili baada ya Gavana Johnson Sakaja kuondoka UDA na kujiunga na ODM, chama ambacho pia ni mshirika wa Serikali Jumuishi.

Akizungumza wakati wa kupokelewa UDA, Bw Karauri alisema ataanza ziara katika wadi zote 85 za Nairobi ili kukieneza chama hicho na kujipatia uungwaji mkono kuelekea uchaguzi ujao.

Alisema ajenda yake kuu ni kuboresha maisha ya wakazi wa jiji hilo, hasa vijana, kwa kuanzisha nafasi za ajira na kuimarisha uchumi.

“Tunataka kuunda nafasi za ajira kwa vijana. Mnapoenda kupiga kura, chagueni mtu atakayewaajiri na kubadilisha maisha yenu. Safari ya kuibadilisha Nairobi ndiyo imeanza,” akasema.

Mbunge huyo alikosoa utendakazi wa Gavana Sakaja, akidai kuwa ameshindwa kusimamia jiji ipasavyo na kuliacha katika hali mbaya. Aliahidi kuboresha huduma na kurejesha hadhi ya Nairobi iwapo atachaguliwa kuwa gavana.

Alisema licha ya kupata mialiko kutoka vyama mbalimbali, aliamua kujiunga na UDA baada ya kushirikiana na viongozi wa mirengo tofauti alipokuwa mbunge huru.

Alipokelewa na Katibu Mkuu wa UDA Hassan Omar, Kiongozi wa Wengi katika Bunge la Kitaifa Kimani Ichung’wah, Mbunge wa Dagoretti Kusini John Kiarie na Seneta Mteule Karen Nyamu, pamoja na madiwani na wagombeaji wa chama hicho.

Bw Omar alisema UDA ina imani na uwezo wa Karauri kushinda ugavana na kwamba chama hicho hakitakubali kupoteza nafasi hiyo.

Alisema licha ya ushirikiano wa UDA na ODM katika serikali jumuishi, kutakuwa na ushindani wa kirafiki katika kinyang’anyiro cha Nairobi na Mombasa.

Aliwataka wagombeaji wa UDA kushirikiana na viongozi wa chama hicho, akisisitiza kuwa Bw Karauri anapaswa kutafuta uungwaji mkono kutoka kwa wananchi wa matabaka, makabila na dini zote.

Naye Bw Ichung’wah alisema Rais William Ruto alimwelekeza kumpokea mbunge huyo, akieleza kuwa Nairobi inahitaji kiongozi mwenye uwezo wa kusimamia miradi ya maendeleo na kuifanya kuwa kitovu cha biashara katika ukanda huu. Alisema wakazi wa Nairobi wana imani na uongozi wa Bw Karauri.

Hata hivyo, kujiunga kwake na UDA kunabadilisha hesabu za kisiasa katika ODM, ambako Bw Sakaja, Naibu Kiongozi wa chama hicho Simba Arati na Mwenyekiti wa ODM Nairobi George Aladwa wanatajwa kuwa na nia ya kuwania ugavana.

Bw Arati alikuwa ametangaza kuwa Karauri angejiunga na ODM na kushiriki mchujo pamoja na wagombeaji wengine. Aliahidi uteuzi wa haki na uwazi.

Kwa upande mwingine, baadhi ya madiwani na wagombeaji wa UDA Nairobi wamepinga hatua ya Sakaja kujiunga na ODM, wakisisitiza kuwa hawako tayari kukikabidhi chama hicho kiti cha ugavana kwa kisingizio cha ushirikiano wa kisiasa.