ZAIDI ya wakulima 700,000 wa majanichai wanatarajiwa kupokea malipo ya bonasi ya kila mwaka leo, huku fedha hizo zikiingia katika akaunti zao pamoja na malipo ya kawaida ya mwezi Septemba.

Mwenyekiti wa Mamlaka ya Kilimo cha Majanichai (KTDA) Enos Njeru, alisema fedha hizo zilitolewa Ijumaa kwa hivyo wakulima watazipokea kwenye benki leo.

Katika mabadiliko ya utaratibu wa kawaida, viwanda vya chai ndivyo vitakavyotangaza viwango vya bonasi, vinavyojulikana pia kama malipo ya pili, badala ya bodi ya KTDA kufanya hivyo kwa niaba yao.

Jumla ya fedha zitakazolipwa na viwanda 77 vilivyounganishwa kuwa vitengo 54 bado hazijatangazwa.

Katika mwaka wa kifedha wa 2024/2025, wakulima walipokea Sh69.8 bilioni, ambazo ni Sh20 bilioni chini ya Sh89.6 bilioni zilizolipwa mnamo 2023/2024.

Ingawa viwango rasmi vya mwaka huu havijatangazwa, bonasi zinakadiriwa kuwa kati ya Sh12.50 na Sh50 kwa kila kilo ya majanichai mabichi, kutegemea kiwanda husika.

Mwenyekiti wa Kiwanda cha Chai cha Tirgaga, Kipngeno Rono, alisema viwanda huzingatia gharama za uendeshaji na bei ya chai sokoni kuamua malipo kwa wakulima.

Gharama za umeme, kuni, mafuta, maji, ukusanyaji wa majani, gharama ya kutengeneza mashine, mishahara na mikopo pia huzingatiwa.

Malipo hayo hutegemea mwaka wa kifedha unaoisha Juni 30. Bei za mnada wa chai Mombasa na thamani ya Shilingi dhidi ya Dola pia huathiri bonasi.