Sababu ya mashabiki wa Ingwe kukosa imani na Rupia

Na GEOFFREY ANENE

Mashabiki wa AFC Leopards wamemlia sana mshambuliaji Elvis Rupia baada ya kupoteza penalti timi hiyo ikilimwa na Tusker 1-0 uwanjani Afraha mjini Nakuru kwenye Ligi Kuu, Jumapili.

Rupia, ambaye alijiunga na Leopards almaarufu Ingwe kwa kandarasi ya miezi sita kutoka Wazito FC mwezi uliopita, alikuwa amesifiwa na mashabiki hao alipopachika bao la ushindi katika ushindi wa 1-0 dhidi ya Ulinzi Stars katika mechi iliyopita.

Hata hivyo, mshambuliaji huyo wa zamani wa Nzoia Sugar hakuwa na kismati katika mechi hiyo yake ya pili.

Baada ya Ingwe kupoteza alama zote tatu dhidi ya wanamvinyo wa Tusker, Rupia amelaumiwa. Shabiki Brian Munala alielekeza kidole chake cha lawama kwa mchezaji huyo wa zamani wa Power Dynamos nchini Zambia. “Elvis Rupia anafaa kuondoka timu hii. Nimesikitishwa.” Aliongeza baadaye, “Huwezi kupoteza penalti na utarajie kuibuka na ushindi.”

SirGody E Wes aliuliza kwa kejeli, “Kufunga penalti tu? Yaani kocha hajui nani anafaa kupiga penalti???

“Tulipoteza penalti. Hiki ni kitu kocha anafaa kuangazia kwa makini,” alisema Chris Murunga.

Smith Evans alisema, “Mlipoteza penalti na kisha mnaishia kujutia.”

“Kupoteza penalti kuliua kasi ya AFC Leopards,” alisema Meshack Etindi.

Naye Jonathan Kweyu alirushia Leopards swali, “Mbona mliachilia (John) Makwata? Hii ni aibu.” Penalti ya Rupia ilikuwa ya tatu katika mechi tatu ambayo Ingwe imepoteza baada ya Makwata kupoteza mbili dhidi ya Kisumu All Stars mnamo Januari 25 kabla anunuliwe na miamba wa Zambia, Zesco United.

Baada ya matokeo kati ya Ingwe na Tusker, Tusker imerukia nafasi ya pili kwa alama 41 na kusukuma Kakamega Homeboyz nafasi ya tatu kwa tofauti ya magoli. Mabingwa watetezi Gor Mahia, ambao walizabwa 3-1 na Sofapaka mnamo Februari 8, wanaongoza kwa alama 44. Leopards inapatikana katika nafasi ya sita kwa 34.

K’Ogalo, Ingwe kusakata mechi zao za ligi KPL

Na JOHN ASHIHUNDU

LICHA ya matatizo ya kifedha yanayokumba timu za Gor Mahia na AFC Leopards baada ya wadhamini wao SportPesa kujiondoa, timu hizo zenye ushawishi mkubwa nchini zitafika uwanjani leo Jumamosi kucheza mechi zao za Ligi Kuu nchini (KPL).

Kwenye mechi hizo zitakazoanza saa tisa alasiri, Gor Mahia watakuwa wenyeji wa Ulinzi Stars katika mechi itakayochezewa uwanja wa MISC, Kasarani, wakati AFC Leopards wakisafiri hadi Bunguma kuvaana na Nzoia Sugar ugani Masinde Muliro.

Tayari ukosefu wa kifedha umesababisha kuondolewa ligini kwa klabu ya Nzoia Sugar ambayo ilishindwa kufika uwanjani mara tatu, kinyume na sheria za FIFA.

Ligi kuu ya KPL imekumbwa na wakati mgumu tangu kujiondoa kwa SportPesa, huku timu zikitegemea mashabiki wao.

Imeripotiwa kwamba Gor Mahia na AFC Leopards ambazo zinaendelea kufanya vizuri kwenye ligi hiyo hazijalipa wachezaji wao mshahara wa miezi miwili kufikia sasa.

K’Ogalo wanaongoza msimamo wa ligi hiyo kwa pointi 24, nane mbele ya Ingwe ambao wanashikilia nafasi ya tisa.

Kutokana na hali hii, wachezaji kadhaa wa timu hizo tayari wameaitisha barua za kuwaruhusuwaondoke.

Mlinzi wa Gor Mahia, Maurice Ojwang ni miongoni mwa wachezaji tegemeo wa Gor Mahia anayetaka kuondoka, huku Whyvonne Isuza, Tresor Ndikumana na Vincent Abamahoro wakitaka waachiliwe na Ingwe.

Nahodha akosa kufika mazoezini

Nahodha wa Leopards Soter Kayumba hajafika mazoezini tangu pambano la Mashemeji Derby lichezwe Novemba 10, 2019, ugani MISC, Kasarani.

Akizungmzia hali hiyo, mwenyekiti wa AFC Leopards Dan Shikanda alisema gharama ya klabu hiyo kwa mwezi ni Sh4.2 milioni, huku akiongeza kuwa wanahitaji Sh20 milioni kulipa madeni.

Kwa upande mwingine, mwenyekiti wa Gor Mahia Ambrose rachiel alisema kamati yake inafanya kila juhudi kuhakikisha timu hiyo imepata mdhamini haraka iwezekanavyo.

Kamati yaundwa kupokeza mamlaka Ingwe

Na JOHN ASHIHUNDU

Muungano wa wawaniaji wa nyadhifa mbalimbali kwenye uchaguzi ujao wa klabu ya AFC Leopards, kwa ushirikiano na washikadau, Jumatatu usiku waliunda Kamati ya Muda ya Kupokeza Mamlaka (ATT) kwa viongozi watakaochaguliwa mwezi ujao wa Juni.

Kamati hiyo chini ya Vincent Shimoli itahakikisha kwamba katiba ya klabu hiyo inaambatana na Sheria Mpya za spoti nchini kama ilivyoagizwa na afisi ya Wizara ya Michezo mnamo 2018, lakini ikapuuzwa na Kamati Kuu ya klabu hiyo ya ligi kuu ya Kenya (KPL) inayodhaminiwa na SportPesa.

Katiba hiyo walisema itawasilishwa kwa wanachama wakati wa Mkutano Mkuu wa Klabu ili iidhinishwe rasmi ili ianze kutumika.

Kamati hiyo ya ATT itakayokuwa mamlakani kwa kipindi cha mwezi mmoja inatarajiwa kuidhinishwa rasmi Jumapili wakati wanachama wa klabu hiyo watakusanyika katika uwanja wa Railway Club, Nairobi kupanga mipango mikakati ya kuandaa mkutano mkuu wa klabu.

Siku hiyo, Jumapili, kadhalika kamati hiyo inatarajiwa kuteua Bodi ya kusimamia uchaguzi na kuwapa wanachama muda zaidi wa kujiandikisha kama wapigaji kura.

Mapendekezo hayo yalipitishwa wakati wanachama walikutana jijini Nairobi na watakaowania viti kwenye uchaguzi huo.

Kadhali, kikao hicho kiliwaitisha viongozi walio mamlakani kuondoka usukani kesho Jumatano mara tu baada ya ya mechi ya mwisho dhidi ya Western Stima na kumuachia uadhifa Afisa Mkuu wa Klabu jukumu la kulinda mali ya klabu.

Vile vile kikao hicho kiliwaamuru maafisa wa sasa wasijaribu kuwania viti wakati wa uchaguzi huo baada ya kushindwa kutekeleza wajibu wao ipasavyo na uongozi duni..

Mkutano huo pia ulikataa Kamati iliyoundwa na maafisa wa klabu Kuusimamia Uchaguzi ujao (EMG) huku ukidai kwamba iliundwa kwa upendeleo baada ya kugunduliwa kwamba waliopewa mamlaka hayo ni marafiki wa karibu wa viongozi wa klabu hiyo wanaonuia kuhifadhi viti vyao.

Hatimaye Ingwe yapata mnyonge wa kunyonga

NA GEOFFREY ANENE

AFC Leopards ilimaliza ukame wa mechi tano bila ushindi kwa kulipiza kisasi dhidi ya Mount Kenya United katika ushindi wao wa mabao 2-0 kwenye mechi ya Ligi Kuu ya raundi ya 32 uwanjani Kenyatta mjini Machakos, Alhamisi.

Ingwe, ambayo iliingia mchuano huu ikiuguza vichapo viliwili mfululizo kutoka kwa KCB na mabingwa Gor Mahia, ilipata mabao ya ushindi katika dakika 15 za mwisho kupitia kwa Boniface Mukhekhe. Vijana wa Casa Mbungo, ambao walilemewa na Mount Kenya 2-1 mwezi Februari, wana alama 42.

Wamerukia nafasi ya tisa na kusukuma Ulinzi Stars nafasi moja chini katika nafasi ya 10. Wanajeshi wa Ulinzi walikabwa 3-3 na Kariobangi Sharks hapo Mei 22. Mount Kenya, ambayo imeshaaga Ligi Kuu, imezoa alama 18 kwenye ligi hii ya klabu 18.

Uwanjani Ruaraka, mabingwa mara 11 Tusker walitupa uongozi mara mbili na kutoka 2-2 dhidi ya wageni wao Zoo kutoka kaunti ya Kericho.

David Majak alichenga safu ya ulinzi ya Tusker na kumwaga kipa Robert Mboya dakika ya 16. Hata hivyo, Kevin Odhiambo alihakikisha timu yake ya Zoo inaenda mapumzikoni 1-1 aliposawazisha dakika ya 36.

Mvua ilitisha kuvuruga mchuano huu wa raundi ya 32 kabla ya mapumziko. Hata hivyo, ilipungua na kuruhusu kipindi cha pili kuendelea. Mboya alijaribiwa vilivyo katika kipindi hiki pale Zoo ilimsukumia makombora kadha kabla ya Tusker kuchukua uongozi tena kupitia kwa Boniface Muchiri aliyechota frikiki safi dakika ya 72.

Tusker, ambayo ilifungwa bao la pili dakika ya 85 kutoka kwa Danson Chetambe, ina jumla ya alama 50. Inashikilia nafasi ya saba. Zoo iko katika nafasi ya 16 kwa alama 29.

#MashemejiDerby: Kivumbi Kasarani

Na GEOFFREY ANENE

Kivumbi kinatarajiwa katika mechi inayosubiriwa kwa hamu kubwa katika kalenda ya soka ya Kenya wakati mahasimu wa tangu jadi AFC Leaopards na Gor Mahia watashuka katika uwanja wa kimataifa wa Kasarani kwa mechi ya Ligi Kuu ya raundi ya 31, Jumamosi (4.15pm).

Mashabiki wa klabu zote pamoja na makocha wa timu hizi Andre Casa Mbungo (Leopards) na Hassan Oktay (Gor) wamesema timu zao ziko tayari kulambisha mwenzake sakafu.

Mashabiki walianza kumiminika katikati ya jiji la Nairobi mapema asubuhi wakiimba, kupiga ngoma na kucheza densi na kutaniana.

Wale wa Leopards wanasema leo Gor ‘lazima ilale’, huku wale wa Gor wakisema imezoa kupiga Leopards na hawatarijii kitu tofauti katika gozi hili lao la 91.

Mashabiki walitumia muda mwingi katika ya jiji la Nairobi kujipasha moto kabla ya mchuano huo wenye umuhimu mkubwa wa Gor kunyakua taji lake la 18 leo ama sherehe zao zicheleweshwe.

Pande zote zitateremka katika uwanja wa Kasarani unapbeba mashabiki 60, 000 zikiuguza vichapo baada ya Leopards kupepetwa 1-0 na KCB nayo Gor ikapokea dozi sawa na hiyo kutoka kwa Nzoia Sugar mnamo Mei 15.

Baadhi ya wachezaji wanaotarajiwa kutambisha katika gozi hili ni Whyvonne Isuza na Brian Marita kwa upande wa Leopards inayoshikilia nafasi ya 10 kwa alama 39 nayo Gor inajivunia wachezaji nyota kama Jacques Tuyisenge kutoka Rwanda na Francis Kahata.

Gor ikipata ushindi ama hata sare itatawazwa bingwa wa ligi hii ya klabu 18 ikiwa nambari mbili Bandari italemewa na nambari 16 Zoo mjini Mombasa, leo.

Vikosi vitarajiwa: AFC Leopards – Ezekiel Owade, Isaac Kipyegon, Dennis Sikhayi, Christopher Oruchum, Robinson Kamura, Said Tsuma, Eugene Mukangula, Musa Assad, Boniface Mukhekhe, Jaffari Owiti, Aziz Okaka, Jairus Adira, Soter Kayumba, David Ochieng’, Austin Odhiambo, Brian Marita, Vincent Oburu, Yeka Wayi.

Gor Mahia – Peter Odhiambo, Philemon Otieno, Joash Onyango, Harun Shakava, Wellington Ochieng’, Francis Kahata, Kenneth Muguna, Boniface Omondi, Nicholas Kipkirui, Samuel Onyango, Jacques Tuyisenge, Geoffrey Ochieng, Joachim Oluoch, Ernest Wendo, Hashim Sempala, Erisa Ssekisambu, Francis Mustafa, Boniface Oluoch.

Msisimko Ingwe na Gor zikionana tena debi ya KPL

Na JOHN ASHIHUNDU

MAHASIMU wa jadi, AFC Leopards na Gor Mahia watakutana Jumapili kwa mara ya mwisho msimu huu katika mechi ya mkondo wa pili katika uwanja wa kimataifa wa Moi, Kasarani.

Mechi hii itakayoanza saa tisa alasiri itakuwa mara ya 91 kwa timu hizo kukutana kwenye ligi hiyo kuu ya taifa.

Zilipokutana katika mkondo wa kwanza pia uwanjani humo, Gor Mahia waliibuka na ushindi wa 2-0, lakini Leopards wameapa kulipiza kichapo hicho ambacho kilikuwa cha mara ya tano tangu Ingwe iwashinde 1-0 mnamo Mei 2016 kutokana na bao la Lamine Diallo.

Makocha wa pande zote mbili, Hassan Oktay wa Gor Mahia na Andrea Cassa Mbungo wanarejesha vikosi vyao uwanjani baada ya timu hizo kupoteza mechi zao katikati mwa wiki.

Leopards walibwagwa na KCB kwa 1-0 mjini Machakos, Jumatano, wakati Gor Mahia wakichapwa 1-0 na Nzoia Sugar katika mechi iliyochezewa Mumias Complex.

Gor Mahia wataingia uwanjani kutafuta ushindi ambao utawawezesha kutawazwa mabingwa wa msimu huu, kwani watakuwa wamefikisha pointi 60 ambazo haziwezi kufikiwa na timu nyingine.

Iwapo watafanikiwa, huu utakuwa ushindi wao wa mara ya 18 wakati Leopards ikijivunia taji hilo mara 13.

“Wapinzani wetu kwa sasa wanaongoza jedwalini, lakini kuhusu mechi ya Jumapili, wasitarajie mteremko. Walitushinda katika mkondo wa kwanza, lakini raundi hii watashangazwa jinsi tutakavyowakabili kuanzia dakika ya kwanza,” Mbungo alisema.

Kupoteza

Leopards wamepoteza mara tatu katika mechi 13 wakati Gor Mahia wameshindwa mara moja pekee katika mechi 10 za karibuni.

Kwa upande mwingine, wasimamizi wa mechi hiyo wamewahakikishia mashabiki usalama wa kutosha huku wakitoa mwito kwa kila mtu atakayekuwa uwanjani humo kuchangia kwa njia yoyote ile kuhakikisha kuna usalama wa kutosha.

Mkuu wa kitengo cha usalama katika kampuni ya SportPesa, Mathews Waria alitoa hakikisho hilo kwa mashabiki wote watakaofika uwanjani Jumapili katika mechi hiyo ambapo kocha Mbungo anatarajiwa kumuanzisha Whyvonne Isuza akishirikiana na Paul Were.

Gor Mahia kwa upande wao wanafurahia kurejea mastaa Jacques Tuyisenge, George Odhiambo, Francis Kahata na Kenneth Muguna kikosini.

Mashabiki watalipa Sh500 na Sh200 kushuhudia mechi hiyo.

Tiketi zitapatikana katika maeneo ya Kenya Cinema, Thika Road na nje ya uwanja wa Kasarani katika milango nambari 2 na 12.

Nzoia kualika Stima, Leopards ikichuana na Sharks gozini KPL

Na CHRIS ADUNGO

NZOIA Sugar watakuwa na kocha mpya watakaposhuka dimbani hii leo Jumatano kuvaana na Western Stima katika mchuano wa Ligi Kuu ya Kenya (KPL) uwanjani Sudi, Bungoma.

Kwa mujibu wa Yappets Mokua ambaye ni Mwenyekiti wa Nzoia, kubwa zaidi katika maazimio yao msimu huu ni kuwa miongoni mwa vikosi vitakavyofunga orodha ya tisa-bora jedwalini.

Kulingana naye, nafasi yoyote katika mduara huo itakuwa fahari na tija zaidi kwa kikosi chake ambacho kimelazimika kukabiliana na panda-shuka za kila sampuli msimu huu.

Baker Lukoya wa AFC Leopards (katikati) awapiga chenga wachezaji Geoffrey Shiveka (kulia) na James Mazembe katika mchuano wa awali wa Ligi Kuu ya KPL uliowakutanisha na Kariobangi Sharks ugani Kenyatta, Machakos mnamo Desemba 2018. Picha/ Kanyiri Wahito

Mbali na changamoto za kifedha, Nzoia wameathiriwa pakubwa na pigo la kubadilisha makocha mara kwa mara tangu kubanduka kwa mkufunzi Bernard Mwalala ambaye kwa sasa anadhibiti mikoba ya Bandari FC.

“Azma yetu ni kutinga mduara wa tisa-bora msimu huu. Hili halimaanishi kwamba hatuna msukumo wa kufanya vyema zaidi na kukabiliana vilivyo na ukubwa wa viwango vya ushindani. Ni malengo yaliyo na uhalisia hasa ikizingatiwa pandashuka zetu kufikia sasa,” akasema Mokua.

Nzoia wanashuka dimbani kuvaana na Stima wakijivunia alama 28 zinazowaweka katika nafasi ya 12 kutokana na mechi 23 zilizopita.

Baada ya kubanduka kwa Mwalala, Nzoia walimpokeza mikoba kocha Nicholas Muyoti aliyeagana na Thika United.

Katikati ya msimu, usimamizi ulimwajiri mkufunzi Godfrey ‘Solo’ Oduor aliyejaza nafasi ya Muyoti aliyeyoyomea kambini mwa Kakamega Homeboyz.

Kocha mshikilizi

Hadi Oduor alipopokezwa rasmi mikoba ya Nzoia, Edwin Sifuna aliaminiwa kuwa kocha mshikilizi wa kikosi hicho.

Oduor ambaye amewahi pia kuwatia makali vijana wa Kibera Black Stars alitambulishwa rasmi kwa wachezaji na mashabiki wa kikosi chake mnamo Aprili 22 na kibarua chake cha kwanza ni mechi ya leo dhidi ya Stima.

Nafuu zaidi kwa Oduor ni marejeo ya nyota Elvis Ronack na Stephen Etyang ambao kwa sasa wamepona majeraha. Wawili hao wanatarajiwa kuunga kikosi cha kwanza cha Nzoia.

Thomas Wanjala ambaye alikuwa mkekani awali, pia anatarajiwa kuwa tegemeo kubwa la Nzoia baada ya kuwaongoza waajiri wake kuwakomoa Mathare United 3-2 mwishoni mwa wiki.

Katika mchuano mwingine unaotarajiwa kuwasisimua zaidi mashabiki ni kivumbi kitakachowakutanisha Kariobangi Sharks na AFC Leopards uwanjani MISC Kasarani.

Mabingwa mara nne wa KPL, Ulinzi Stars watakuwa wenyeji wa Vihiga United ugani Afraha, Nakuru huku Chemelil Sugar wakipimana ubabe na wanabenki wa KCB uwanjani Kenyatta, Machakos.

Alhamisi itakuwa zamu ya Gor Mahia kuvaana na Mount Kenya United waliopo katika hatari ya kuteremshwa ngazi mwishoni mwa muhula huu.

Ratiba ya KPL (Leo Jumanne):

Sharks na Leopards (3:00pm, MISC Kasarani)
KCB na Chemelil (3:00pm, Machakos)
Ulinzi Stars na Vihiga Utd (3:00pm, Nakuru), Nzoia Sugar na Stima (3:00pm, Sudi Bungoma)
(Kesho):
Mt Kenya Utd na Gor (3:00pm, Kenyatta, Machakos)

KPL kutoa uamuzi kuhusiana na gozi la Leopards, SoNy

Na GEOFFREY ANENE

MECHI ya mkondo wa pili ya Ligi Kuu kati ya SoNy Sugar na AFC Leopards inatarajiwa kuamuliwa leo Jumanne ama kama itarudiwa katika tarehe mpya au wenyeji SoNy wapoteze alama baada ya kutibuka Jumatatu ikiwa ni kwa siku ya pili uwanjani Awendo.

Mchuano huo wa raundi ya 23 ulikatizwa mnamo Aprili 14 jioni zikisalia dakika 25 utamatike baada ya mvua kubwa kuponda uwanja huo wa nyumbani wa SoNy.

Uliahirishwa hadi Aprili 15 kuanzia saa nne asubuhi, lakini haukuweza kuendelea baada ya mabingwa mara 13 Leopards kukataa kucheza kutokana na kukosekana kwa vifaa muhimu vinavyohitajika kama ambulensi.

Kisheria, lazima timu ilio nyumbani ahakikishie wageni usalama wao kwa kuwa na polisi wa kutosha pamoja na ambulensi ilio na vifaa vya matibabu.

Inasemekana mashabiki wa SoNy waliwazuia wachezaji wa Leopards kwa saa nzima kutoka uwanjani baada ya wageni kushikilia lazima vifaa hivyo viwepo kabla ya mechi kuendelea.

Nahodha wa SoNy, Enock Agwanda aliwatuliza mashabiki walioruhusu wachezaji wa Ingwe kuondoka uwanjani.

Afisa mmoja katika kampuni inayoendesha Ligi Kuu, KPL, alieleza Taifa Leo hapo Jumatatu kwamba “mechi yoyote haiwezi kuanza kabla ya ambulensi kuwasili kwa hivyo timu lazima zisubiri hadi ifike uwanjani.”

Aliongeza kwamba mechi hiyo itarudiwa, ingawa akasema hawezi kuzungumzia kama suala hili litashughulikiwa na Kamati Huru ya Nidhamu (IDCC).

Huku hayo yakijiri, hakuna mabadiliko kwenye jedwali la Ligi Kuu katika nafasi tatu za kwanza zinazoshikiliwa na Gor Mahia, Sofapaka na Bandari, mtawalia.

Hata hivyo, uongozi wa Gor wa alama tatu juu ya jedwali ulikatwa hadi tofauti ya magoli baada ya Sofapaka kulemea KCB 1-0 Jumapili.

Mashabiki wa klabu ya AFC Leopards washerehekea bao la Alex Orotomal, Ingwe ilipokabiliana na Thika United Agosti 18, 2018, uwanjani Thika. Picha/ Kanyiri Wahito

Gor na Sofapaka zimezoa alama 44 kila moja, ingawa mabingwa watetezi Gor wamesakata mechi nne chache.
Bandari ina alama 42 kutokana na mechi 22 baada ya kuchapa Western Stima 2-1.

Kakamega Homeboyz na Tusker zimeruka juu nafasi moja hadi nambari nne na tano zikiwa na alama 37 kila mmoja baada ya kushinda Vihiga United 1-0 na Kariobangi Sharks 2-0, mtawalia.

Mathare United imesukumwa chini nafasi mbili hadi nambari sita alama mbili nyuma.

SoNy inasalia ya saba kwa alama 34, tatu mbele ya Sharks.

Licha ya kupoteza mechi mbili mfululizo, KCB inasalia katika nafasi ya tisa kwa alama 29 sawa na Ulinzi Stars inayofunga 10-bora baada ya kuruka juu nafasi mbili.

Nzoia na Leopards zimezoa alama 28 na 27 mtawalia.

Zimeshuka chini nafasi moja kila mmoja. Stima na Chemelil Sugar zimesalia katika nafasi ya 13 na 14 kwa alama 26 na 25, mtawalia.

Posta Rangers imerukia nafasi ya 15 kwa alama 21 baada ya kupepeta wavuta-mkia Mount Kenya United 6-2. Vihiga ni ya 16 baada ya kuteremka nafasi moja.

Ina alama 20. Zoo na Mount Kenya zinashikilia nafasi mbili za mwisho kwa alama 17 na 12 mtawalia.

Leopards na Nzoia zatamba, Rangers ikishuka zaidi KPL

Na GEOFFREY ANENE

AFC Leopards na Nzoia Sugar ndizo klabu zilizoimarika zaidi kwenye jedwali la Ligi Kuu baada ya mechi za raundi ya 21 kusakatwa wikendi.

Mabingwa mara 13 Leopards, ambao mwezi mmoja uliopita walikuwa ndani ya mduara hatari wa kutemwa, wameendelea kujiondoa karibu na maeneo hayo kabisa baada ya kuchapa Ulinzi Stars 1-0 Jumapili na kuruka juu nafasi mbili hadi nambari 10.

Vijana wa Casa Mbungo wana alama 26. Wako alama moja mbele ya Nzoia ambao pia wamepia hatua mbili mbele kufuatia ushindi wao wa mabao 6-1 dhidi ya Mount Kenya United.

Kocha Casa Mbungo wa klabu ya AFC Leopards. Picha/ Maktaba


Mabingwa wa mwaka 2006 SoNy Sugar pia wako katika orodha ya timu tatu zilizotia fora baada ya kupata ushindi wao wa tatu mfululizo dhidi ya Posta Rangers kwa kuwalemea 2-1.

SoNy wameruka juu nafasi moja hadi nambari saba.

Wamezoa alama 31. Hakuna mabadiliko katika nafasi tatu za kwanza ambapo Gor Mahia inaongoza kwa alama 44. Uongozi wa Gor wa alama saba, hata hivyo, ulikatwa hadi nne baada ya washindi wa mwaka 2009 Sofapaka kuzaba Zoo 2-0.

Gor bado ina mechi mbili mkononi. Imezoa alama 44. Huenda ikacheza mechi moja ligini kabla ya kuelekea nchini Morocco kwa mechi ya marudiano ya Kombe la Mashirikisho la Bara Afrika dhidi ya Berkane. Ilichapwa 2-0 uwanjanio Kasarani Jumapili.

Bandari inasalia katika nafasi ya tatu kwa alama 39, moja nyuma ya Sofapaka iliozamisha Kariobangi Sharks 1-0. Wafalme wa mwaka 2008 Mathare United wamekwamilia nafasi ya nne kwa alama 35 baada ya kukubali sare ya 1-1 dhidi ya washindi mara 11 Tusker.

Kakamega Homeboyz ni ya tano kwa alama 33 baada ya kuandikisha ushindi wao wa nne mfululizo wakichabanga Chemelil Sugar 2-0. Nambari sita ni Tusker, ambao wamezoa alama 31 sawa na SoNy nayo Sharks iko alama moja nyuma katika nafasi ya nane.

KCB, ambayo imerejea Ligi Kuu baada ya kuwa ligi ya daraja ya pili misimu mitatu, wanashikilia nafasi ya tisa kwa alama 29. Walipata alama tatu katika raundi ya 21 kwa kuliza Vihiga United 3-0. Leopards wanafunga mduara wa 10-bora.

Ulinzi iko chini nafasi mbili hadi nambari 12 kwa alama 25. Western Stima, ambao walianza msimu vyema na hata kuonekana wagombeaji halisi wa taji baada ya kurejea kutoka ligi ya daraja ya pili, wanaendelea kuteremka chini ya jedwali. Wanaumeme hawa wanashikilia nafasi ya baada ya kushuka nafasi mbili.

Wanashikilia nafasi ya 13 kwa alama 25. Ulinzi na Stima wamecheza mechi 20 kila mmoja.
Chemelil, Vihiga na Rangers wamesalia katika nafasi za 14, 15 na 16 wakiwa na alama 21, 20 na 17, mtawalia.

Zoo, ambayo haina ushindi katika mechi tano, imesalia katika nafasi ya 17 kwa alama 17. Imefungwa mabao mengi kuliko Rangers. Baada ya kupoteza mechi sita mfululizo, Mount Kenya iliyoponea chupuchupu kutupwa katika Ligi ya Supa msimu uliopita, inasalia mkiani kwa alama 12 kutokana na mechi 21.

Ingwe mawindoni kusafisha rekodi yake duni dhidi ya Stima

Na GEOFFREY ANENE

AFC Leopards inatarajiwa Jumamosi kuwa na kibarua kigumu dhidi ya Western Stima itakapoalika klabu hii kutoka kaunti ya Kisumu ambapo Ingwe watakuwa wenyeji katika uwanja wa Kenyatta mjini Machakos.

Leopards, ambayo itaruka kutoka nafasi ya 17 hadi nambari 13 ikilemea Stima, imekuwa ndani ya maeneo hatari ya kutemwa ama alama chache nje ya mduara huu kwa kipindi kikubwa msimu huu. Haina ushindi dhidi ya Stima katika mechi nne zilizopita.

Mabingwa mara 13 Leopards walishinda wanaumeme wa Stima mara ya mwisho mwaka 2015 walipowazima 1-0 katika mechi ya mkondo wa pili. Ingwe ilipoteza nyumbani na ugenini dhidi ya Stima msimu 2016 na kukubali wanaumeme hao kutoa alama nne dhidi yao mwaka 2017.

Rekodi hii inaiweka Leopards katika nafasi mbaya kabla ya mchuano huu ambao inahitaji ushindi ili kujiondoa katika mduara hatari wa kutemwa.

Vijana wa Casa Mbungo waliingia katika mduara hatari katikati mwa juma baada ya Zoo kuambulia alama moja muhimu dhidi ya Nzoia Sugar na kuruka juu nafasi moja hadi nambari 16.

Zoo wako mbele ya Ingwe kwa tofauti ya magoli. Klabu hizi mbili zimezoa alama 16 kutokana na mechi 18 na 17, mtawalia.

Leopards itapata motisha ya kutafuta ushindi kutokana na kwamba Stima ni mojawapo ya timu zinazofanya vibaya sana wakati huu.

Stima haina ushindi katika mechi tano zilizopita baada ya kukubali sare dhidi ya Gor Mahia (mabingwa watetezi), Vihiga United na Mathare United na kulimwa bila kufunga bao dhidi ya SoNy Sugar na Chemelil Sugar.

Ingwe iliajiri mchezaji wake wa zamani Anthony Kimani kuwa msaidizi wa Mbungo. Baada ya kuteuliwa kwake Machi 19, mashabiki walimtaka asaidie kurekebisha ngome ya Leopards inayovuja.

Baadhi yao hawakuridhika na kuteuliwa kwake kwa hivyo mechi hii yake ya kwanza ni mtihani kwake.

Itawapa wakosoaji wake sababu ya kuendelea kumpapura Ingwe isipopata matokeo mazuri dhidi ya Stima.

Mechi nyingine itakayosakatwa Jumamosi itakutanisha Chemelil Sugar na Bandari mjini Chemelil.

Wakati moja Bandari ilionekana kuwa mgombeaji halisi wa taji, Hata hivyo, imefifia. Imeambulia alama moja katika mechi tatu zilizopita.

Sofapaka inaongoza kwa alama 33 kutokana na mechi 18 ikifuatiwa alama moja nyuma na Gor, ambayo haijasakata mechi mbili.

Bandari ni ya tatu kwa alama 32 baada ya kucheza mechi 17.

Baada ya kupoteza mechi mbili zilizopita dhidi ya SoNy Sugar na Ulinzi Stars, Bandari itakuwa na presha ya kupata ushindi angaa ifufue matumaini ya kusalia katika mbio za kuwania taji.

Ratiba:

Machi 23

AFC Leopards na Western Stima (Machakos, 3.00pm),

Chemelil Sugar na Bandari (Chemelil, 3.00pm)

Machi 24

Posta Rangers na KCB (Machakos)

Machi 26

Tusker na Kariobangi Sharks (Ruaraka, 3.00pm)

Mashabiki wazidi kutamaushwa na matokeo ya Ingwe

Na GEOFFREY ANENE

MASHABIKI wa AFC Leopards sasa wanajiuliza “timu yetu ilikosea wapi?” baada ya vichapo kuizidi huku ligi ikikaribia kufika katikati.

Ingwe, jinsi timu hiyo inafahamika kwa jina la utani, imeshinda mechi mbili pekee (Posta Rangers 2-0 na Chemelil Sugar 2-1) kati ya 13 imesakata tangu ianze msimu kwa kukabwa 1-1 dhidi ya Kariobangi Sharks mnamo Desemba 9, 2018.

Mabingwa hawa mara 13 wa Kenya wako ndani ya mduara hatari wa kutemwa baada ya kuambulia alama 10 pekee kutoka mechi walizosakata. Walimiminiwa kichapo cha tano mfululizo walipobwagwa 1-0 na Ulinzi Stars katika uwanja wao wa nyumbani wa Kenyatta mjini Machakos mnamo Februari 17. Waliingia mechi hiyo yao ya 13 wakiuguza kupepetwa na Zoo 1-0 (Januari 30), Bandari 4-1 (Februari 3), Mount Kenya United 2-1 (Februari 6) na Gor Mahia 2-0 (Februari 9).

Baada ya kuzamishwa na Ulinzi kupitia bao la Dan Waweru lililopatikana dakika ya tatu, mashabiki wa Ingwe waliudhika na matokeo wakisema inastahili kuwa katika Ligi ya Supa na wala si Ligi Kuu.

Mashabiki Erick Shiakachi na Shikangah Minyata Kevin waliuliza, “Tulikosea wapi?” Babyrich Barasa, “Ingwe itabaki kuwa hadithi tu.” Benard Barasa Romrom, “Tiluraruka….” Joseph Okalama Anyangu, “Upuuzi.” Cornelius Jumbe, “Tuende relegation (Ligi ya Daraja ya Pili) tujipange.”

Matokeo haya duni yanaendelea kuandama Ingwe licha ya wachezaji kurejeshewa mpango wa kuwapata bonasi kutoka Sh3,000 hadi Sh7,000 na pia maafisa timu hiyo kukutana na Waziri wa Michezo Rashid Echesa kutafuta suluhu ya changamoto inapitia. Mnamo Februari 14, 2019, Echesa alitangaza kwamba serikali imepiga jeki Ingwe kwa Sh2 milioni.

Leopards itamenyana na mabingwa wa mwaka 2008 Mathare United (Februari 23), washindi wa mwaka 2006 SoNy Sugar (Machi 2), mabingwa mara 11 Tusker (Machi 9) na wafalme wa mwaka 2009 Sofapaka (Machi 16) katika mechi zake nne zilizosalia kabla ya ligi hii ya klabu 18 kufika katikati.

Ingwe wajinyanyua KPL

NA CECIL ODONGO

AFC Leopards Alhamisi waliandikisha ushindi wao wa pili kwenye ligi kwa kuicharaza Chemelil Sugar 2-1 katika uga wa Moi jijini Kisumu.

Ingwe walifungua ukurasa wa mabao katika kipindi cha kwanza Jaffery Owiti alipotumia kutoelewana vyema kwa kipa wa Chemelil Sugar Kevin Otieno na mlinzi Crispin Opondo kufunga bao safi baada ya kupata mpira kirahisi.

Bao hilo muhimu lilipatikana baada ya Ingwe kuwazidishia wapinzani presha kwa kumiliki asilimia kubwa ya mpira na kukita kambi kwenye lango lao wakilenga kufunga goli.

Hata hivyo, kiungo mahiri wa Ingwe Eugene Mukangula alitia msumari moto kwenye kidonda cha Chemelil katika mwanzo wa kipindi cha pili kwa kufunga bao la pili.

Juhudi za kocha wa Chemelil Francis Baraza kuongeza makali ya safu yake ya ushambulizi kwa kumleta Felix Oluoch na kumwondoa uwanjani Tindi Biko hata hivyo zilionekana kuongeza nguvu wenyeji hao.

Juhudi hizo zilizaa matunda katika dakika ya 75 ChemeliL Sugar walipopewa penalti baada ya winga wa AFC Leopards Robinson Kamura kushika mpira katika eneo la hatari.

Hata hivyo, Ingwe walishikilia uongozi wao hadi mwisho wa mechi kwa kuwaingiza madifenda Dennis Shikayi na kumwondoa starika Marcelo Kahez ili kuzima mashambulizi ya Chemelil.

Ushindi huo ulimpa nafuu kocha Marko Vesiljevic ambaye amekuwa akishtumiwa na mashabiki kwa kutoongoza timu vizuri ili kutwaa ushindi.

Mashabiki waitaka Ingwe iwagware Rangers kukomesha matokeo duni

Na GEOFFREY ANENE

MASHABIKI wa AFC Leopards wameiomba imalize ukame wa mechi nane bila ushindi kwenye Ligi Kuu itakapoalikwa na Posta Rangers uwanjani Afraha mjini Nakuru mnamo Januari 2, 2019.

Ingwe imeandikisha sare dhidi ya Vihiga United (0-0), Sofapaka (2-2) na Kariobangi Sharks (1-1) na kupepetwa 3-0 na Kakamega Homeboyz katika mechi zake nne za kwanza za ligi ya msimu 2018-2019.

Mabingwa hawa mara 13 wa Kenya walifunga msimu 2018 kwa kulazwa na Nzoia Sugar 2-0, Ulinzi Stars 2-1, Tusker 4-0 na Sharks 3-1.

Ushindi wa mwisho wa Leopards katika mechi 11 za ligi zilizopita ni dhidi ya Rangers waliyoilemea 2-1 Septemba 15 kupitia mabao ya raia wa Nigeria Alex Orotomal, ambaye aliondoka msimu huo ulipotamatika.

Mara ya mwisho Ingwe ilizuru Rangers iliambulia alama moja baada ya mechi kumalizika 1-1 Februari 3, 2018.

Rangers inashikilia nafasi ya 14 kwa alama tatu ilizopata kwa kubwaga Mount Kenya Rangers 2-1 Desemba 16. Ilipoteza nyumbani dhidi ya Western Stima (0-1) na Mathare United (1-2). Mathare na Stima ziko bega kwa bega juu ya jedwali kwa alama 10 kila mmoja baada ya kuzoa ushindi mara tatu na sare moja katika mechi zao nne za kwanza. Leopards inashikilia nafasi ya 15 kwenye ligi hii ya klabu 18 kwa alama tatu zilizopatikana kwa kutoka sare dhidi ya Sharks, Sofapaka na Vihiga na kupoteza mikononi mwa Homeboyz.

Shabiki wa Ingwe, Aino L Aino amesema, “Hizi ni alama zetu tatu za kwanza.” Naye Antony Mukonyi alikiri si mechi rahisi. “Ni mechi ngumu sana ya Ingwe, lakini wakitumia vizuri nafasi nyingi ambazo wamekuwa wakiunda, ushindi unaweza kupatikana.” Fanto B Eusebio alikumbusha Ingwe, “Mnakodolea macho kutemwa.”

Ratiba (Januari 2, 2019):

Mount Kenya United na Kariobangi Sharks (2.00pm)

Gor Mahia na Chemelil Sugar (3.00pm)\

Mathare United na KCB (3.00pm)

Nzoia Sugar na Ulinzi Stars (3.00pm)

SoNy Sugar na Kakamega Homeboyz (3.00pm)

Tusker na Vihiga United (3.00pm)

Western Stima na Sofapaka (3.00pm)

Zoo Kericho na Bandari (3.00pm)

Posta Rangers na AFC Leopards (4.15pm)

Mashabiki wa Ingwe wakaribisha kocha mpya kwa matusi na vitisho

Na GEOFFREY ANENE

MASHABIKI wamemkaribisha kocha mpya wa AFC Leopards Marko Vasiljevic na mshambuliaji mpya Lawrence Luvanda shingo upande Jumamosi.

Huku mechi ya ufunguzi dhidi ya Kariobangi Sharks ikinukia hapo Jumapili mjini Machakos, mashabiki wameonyesha kutoridhika kwao na kuajiriwa kwa wawili hawa.

“Mpishi amefika…chakula cha jioni kitaandaliwa hivi karibuni,” alisema Mor Ris baada ya Leopards kutangaza kuwasili kwa raia wa Serbia, Vasiljevic. Kutokana na tabia ya Ingwe kufursha makocha kila uchao Pretty Doll aliuliza, “Atarejea lini kwake?”.

Naye Denno Dennice aliuliza kama Leopards ilikuwa ikifanya mzaha kwa kutangaza kuwasili kwa Vasiljevic, huku Jon Zelalem Okoth akimkumbusha kwamba, “Kuajiriwa na kufutwa ni rahisi sana Leopards.” Baadhi ya mashabiki walitarajia awe mtu mzee. Wanasema wamechangiwa kama Vasiljevic ni kocha ama mchezaji pengine kutokana na wembamba wake na sura ya mtu kijana.

Godfrey Livoywa Madekwa alisema neno moja pekee, “Mtalii.” Vasiljevic, ambaye aliwasili na mpenzi wake, Marianne anafaa kuwa naibu wa Nikola Kavazovic, ambaye alikuwa kocha mkuu wa Township Rollers nchini Botswana. Hata hivyo, Kavazovic yuko nchini Serbia, huku ripoti zikienea anaviziwa na klabu moja nchini Afrika Kusini.

Baada tu ya Leopards kutangaza kusajili Luvanda kutoka Shule ya Upili ya Chavakali High katika kaunti ya Vihiga kwa kandarasi ya miaka mitatu, mashabiki wamechangamkia usajili huo kwenye mitandao ya kijamii. “Karibu, nitazungumza mengi nikishakuona uwanjani,” amesema Pretold Boge.

Naye shabiki Ignatius Ashibira Shamala hakuridhishwa hata kidogo. Amesema, Tafadhali sajili wachezaji walio na uzoefu…Kwani AFC imekuwa shule ya kukuza vipaji? Inasikitisha.” Oyiengo Benjamin Oduor, “Mnasajili mtoto wa shule ya sekondari? Bure kabisa.”

Naye Dun WA Namale aliashiria kwamba Leopards inakimbilia wachezaji wasiojulikana kwa sababu haina fedha.

“Klabu inaogopa gharama haiwezi lipa kocha ama mchezaji mwenye uzoefu.” Mkenya Ndie Mimi, “Upuzi mtupu… Mbona (Luvanda) asiende akademia kwanza?” Mashabiki wachache sana waliunga mkono afisi ya Leopards kusajili Luvanda wakisema ni mpango mzuri kwa siku za usoni na pia biashara nzuri.

Mabingwa mara 13 Leopards, ambao wanatafuta kushinda ligi kwa mara ya kwanza tangu mwaka 1998, wataingia mechi ya Sharks wakiwa na rekodi mbaya.

Tangu Sharks iingie katika Ligi Kuu kwa mara ya kwanza mwaka 2017, Leopards haijapata ushindi dhidi ya klabu hii inayojivunia ushindi mbili – ikiwemo mara ya mwisho zilikutana Septemba mwaka 2018 – na sare mbili. Leopards imewahi kuchapa Sharks, lakini katika fainali ya soka ya SportPesa Shield mwaka 2017.

Ratiba ya mechi za raundi ya kwanza za Ligi Kuu ya Kenya:

Desemba 8

Mathare United na Chemelil Sugar (Kasarani, 3.00pm)

Bandari na Gor Mahia (Mbaraki, 3.00pm)

Kakamega Homeboyz na KCB (Bukhungu, 3.00pm)

Posta Rangers na Western Stima (Afraha, 3.00pm)

Desemba 9

Mount Kenya United na Sofapaka (Machakos, 2.00pm), Zoo na Nzoia United (Kericho, 3.00pm), SoNy Sugar na Tusker (Awendo, 3.00pm), Vihiga United na Ulinzi Stars (Bukhungu, 3.00pm), AFC Leopards na Kariobangi Sharks (Machakos, 4.15pm).

Ingwe kujaribu kukata kiu ya ushindi ikikutana na Rangers

Na Geoffrey Anene

AFC Leopards itarejea ulingoni kuzichapa dhidi ya Posta Rangers hapo Septemba 15 ikitafuta kufuta vichapo ilivyopokea kutoka kwa Gor Mahia na Wazito katika mechi mbili zilizopita za Ligi Kuu.

Ingwe ilizabwa 2-0 na mahasimu wa tangu jadi Gor mnamo Agosti 25 na kulemewa 2-1 na wanyonge Wazito hapo Agosti 29.

Vijana wa kocha Rodolfo Zapata wameshinda mechi moja pekee katika mashindano yote katika mechi nne zilizopita.

Baada ya kulimwa na viongozi Gor na nambari mbili kutoka mwisho Wazito ligini, Ingwe ilicharaza Kenya Police 4-1 kwenye Soka ya SportPesa Shield, ambayo ni ya kufuzu kuingia Kombe la Afrika la Mashirikisho. Kisha ililizwa 4-2 katika mechi ya kirafiki dhidi ya Simba SC jijini Dar es Salaam nchini Tanzania mnamo Septemba 8.

Leopards inashikilia nafasi ya tatu kwa alama 48 kutokana na mechi 29 katika ligi ya klabu 18. Iko alama 23 nyuma ya mabingwa watarajiwa Gor na alama sita nyuma ya nambari mbili Bandari.

Rangers inafunga 10-bora kwa alama 37 kutokana na idadi sawa ya mechi. Ingwe na Rangers zimekutana mara saba kwenye ligi. Kila mmoja anajivunia ushindi mmoja, huku mechi zingine zote zikimalizika sare.

Ingwe ilikaribisha Rangers kwenye Ligi Kuu kwa kuipepeta 6-2 Aprili 8 mwaka 2012 kabla ya kuchapwa 2-0 Oktoba 14 mwaka 2017. Rangers itaingia mchuano huu na motisha ya kuchabanga Chemelil Sugar 1-0 Septemba 2.

Ezekiel Odera, Alex Orotomal, Brian Marita, Vincent Oburu na Whyvonne Isuza ni baadhi ya nyota Ingwe itatumai wataiongoza kujirejeshea imani ya kushinda. Rangers ya kocha Sammy Omollo, itategemea Dennis Mukaisi, ambaye amepona jeraha la kifundo, na Gearson Likono.

Gor, ambayo itapokea zawadi yake ya kuwa mabingwa mara 17 mwisho wa msimu huu, italimana na wavuta-mkia Thika United hapo Septemba 16.

Ratiba:

Septemba 15, 2018

AFC Leopards na Posta Rangers (4.00pm, Machakos)

Chemelil Sugar na Mathare United (3.00pm, Chemelil)

Nakumatt na Kariobangi Sharks (3.00pm, Camp Toyoyo)

Septemba 16, 2018

Thika United na Gor Mahia (3.00pm, Thika)

Kakamega Homeboyz na Nzoia Sugar (3.00pm, Bukhungu)

Ulinzi Stars na Wazito (2.00pm, Kericho)

Vihiga United na SoNy Sugar (3.00pm, Mumias)

Zoo na Bandari (4.15pm, Kericho)

Ingwe yang’olewa kucha na Wazito FC

Na Geoffrey Anene

AFC Leopards ilitupa uongozi wa bao moja na kushangazwa 2-1 na Wazito katika mechi za raundi ya 29 za Ligi Kuu iliyoshuhudia Kariobangi Sharks na Ulinzi Stars zikivuna ushindi mkubwa wa 3-0 dhidi ya Thika United na Nakumatt, mtawalia, Jumatano.

Mashabiki wa Leopards walikuwa na matumaini makubwa timu yao itafuta kichapo cha mabao 2-0 ilichopokea kutoka kwa mahasimu wa tangu jadi Gor Mahia kwa kupepeta limbukeni Wazito. Matumaini yaliongezeka ilipochukua uongozi kupitia mshambuliaji wa Nigeria, Alex Orotomal dakika ya 23 na kuenda mapumzikoni na uongozi huo mwembamba.

Hata hivyo, raha ya kuongoza dakika 45 za kwanza iligeuka kuwa kiraha pale Wazito ilisawazisha kupitia Derrick Onyango sekunde chache baada ya kipindi cha pili kuanza kabla ya David Oswe kugonga msumari wa mwisho dakika ya 90.

Ingawa Wazito ilisalia wachezaji 10 uwanjani dakika ya tatu ya majeruhi baada ya Jackson Saleh kuonyeshwa kadi ya pili ya njano, Leopards haikuweza kulazimisha sare angaa kupata alama.

Leopards inasalia katika nafasi ya tatu kwa alama 48, nyuma ya viongozi Gor Mahia (71) na nambari mbili Bandari (51). Wazito ni ya pili kutoka mwisho kwa alama 27. Thika United inavuta mkia kwa alama 20 baada ya kupoteza mechi ya sita mfululizo. Thika imeambulia alama mbili kutoka mechi zake 11 zilizopita.

Matokeo (Agosti 29, 2018):

Kariobangi Sharks 3-0 Thika United (Machakos), Posta Rangers 0-1 Sofapaka (Camp Toyoyo), Tusker 2-0 Chemelil Sugar (Ruaraka), Ulinzi Stars 3-0 Nakumatt (Nakuru), Wazito 2-1 AFC Leopards (Machakos). 

Presha ya mashabiki kwa Ingwe irarue Wazito FC

Na Geoffrey Anene

MASHABIKI wa AFC Leopards wametaka timu yao imalizie hasira yake kwa Wazito FC zitakapokutana katika mechi ya Ligi Kuu ya raundi ya 29 uwanjani Kenyatta mjini Machakos, Jumatano.

Leopards ilipepetwa na timu ya pili ya Gor Mahia kwa mabao 2-0 katika gozi la ‘Mashemeji’ uwanjani Kasarani katika mechi yake iliyopita na mashabiki sasa wameitaka iwaondolee aibu kwa kupata ushindi dhidi ya Wazito inayokodolea macho kutemwa baada ya msimu mmoja kwenye Ligi Kuu.

Shabiki Nick Otwande amesema, “Naenda kushabikia timu yangu ya Ingwe. Hasira itaishia hapa.”

Mashabiki wengi wa Leopards wameonya timu yao dhidi ya kuteleza leo. Raps Vander Villa, “Msituaibishe…” Albert Kachero Oungo, “Natumaini hamtatusikitisha dhidi ya Wazito kwa sababu hata siamini kwamba timu ya pili ya Gor Mahia ilitulima.”

Zilipokutana kwa mara ya kwanza kabisa ligini, Ingwe ilitolewa jasho na Wazito kabla ya kuishinda 3-2 mnamo Machi 14, 2018. Pistone Mutamba, ambaye sasa ni mali ya Sofapaka, alifungia Wazito mabao yote. Whyvonne Isuza alipachika mabao mawili ya mwisho ya Leopards naye Ezekiel Odera akapata bao moja.

Odera, ambaye anaongoza katika kufungia Ingwe mabao baada ya kuona lango mara 11, hatashiriki mchuano huu. Anatumikia marufuku ya mechi mbili baada ya kufikisha kadi tano za njano na moja nyekundu. Alikosa mechi ya Gor na atakamilisha marufuku yake dhidi ya Wazito.

Ratiba (Agosti 29, 2018):

Kariobangi Sharks na Thika United (2.00pm, Machakos), Posta Rangers na Sofapaka (2.00pm, Camp Toyoyo), Tusker na Chemelil Sugar (3.00pm, Ruaraka), Ulinzi Stars na Nakumatt (3.00pm, Nakuru), Wazito na AFC Leopards (4.15pm, Machakos). 

#MashemejiDerby: Ingwe yalenga kuigwara Gor bila kucha za Odera

Na GEOFFREY ANENE

AFC Leopards itakosa mfumaji wake hodari Ezekiel Odera itakapokuwa ugenini dhidi ya mahasimu wa tangu jadi Gor Mahia kwenye Ligi Kuu uwanjani Kasarani hapo Agosti 25, 2018.

Mshambuliaji huyu mwenye umri wa miaka 30 anatumikia marufuku ya mechi mbili, dhidi ya Gor Mahia (Agosti 25) na Wazito (Agosti 29), kutokana na kadi tano za njano na moja nyekundu.

Odera, ambaye alifungia Ingwe mabao mawili katika mechi mbili zilizopita ikipepeta Nakumatt 4-2 Agosti 12 na goli moja iliponyuka Thika United 2-0 Agosti 18, ameona lango mara 11 kwenye ligi hii ya klabu 18 msimu huu.

Yuko mabao manne nyuma ya Elvis Rupia na magoli mawili nyuma raia wa Rwanda, Jacques Tuyisenge.

Ingwe huenda ikakosa huduma za Moses Mburu, Salim Abdalla, Robinson Kamura, Jafari Owiti na Dennis Sikhayi. Wachezaji hawa wanauguza majeraha mbalimbali.

Kiungo mvamizi Whyvonne Isuza ni mmoja wa wachezaji ambao kocha kutoka Argentina, Rodolfo Zapata atategemea kutafuta matokeo mazuri dhidi ya Gor, ambayo itahifadhi taji ikishinda gozi hili maarufu kama ‘Mashemeji Derby’.

Maadui hawa wamekutana mara 83 ligini. Leopards imeshinda Gor mara 27, ikapoteza 25, huku mechi 31 zikitamatika sare. Ingwe itakuwa mawindoni kutafuta ushindi wake wa kwanza dhidi ya Gor katika kipindi cha zaidi ya miaka miwili. Mara ya mwisho Ingwe ililemea Gor ni 1-0 Machi 6 mwaka 2016.

Timu hizi zilikutana ligini msimu huu mnamo Julai 22 Gor ikiibuka mshindi 2-1 kupitia mabao ya Tuyisenge na George ‘Blackberry’ Odhiambo. Isuza alifungia Ingwe bao la kufutia machozi.

Gor inaongoza kwa alama 68 kutokana na mechi 27 nayo Leopards inashikilia nafasi ya tatu kwa pointi 48.

Ratiba:

Agosti 25, 2018

Nakumatt na Posta Rangers (11.00am, Camp Toyoyo), Chemelil Sugar na Ulinzi Stars (3.00pm, Chemelil), Kakamega Homeboyz na Wazito (3.00pm, Bukhungu), Sofapaka na Kaiobangi Sharks (3.00pm, Narok), SoNy Sugar na Tusker (3.00pm, Awendo), Gor Mahia na AFC Leopards (4.00pm, Kasarani);

Agosti 26, 2018

Bandari na Nzoia Sugar (3.00pm, Mombasa), Thika United na Vihiga United (3.00pm, Thika), Zoo na Mathare United (3.00pm, Kericho)

Zapata atasalia kuinoa Ingwe – Mule

NA CECIL ODONGO

MWENYEKITI wa AFC Leopards Dan Mule amemhakikishia kocha Rodolfo Zapata uungwaji mkomo na kusisitiza kwamba klabu hiyo haina mpango wowote wa kutafuta huduma za mkufunzi mpya.

Mule alisikitika kwamba Ingwe wamewabadilisha makocha mara nne ndani ya kipindi cha miezi 17 na akaahidi kwamba mtindo huo lazima ufike kikomo ili kuhakikisha kikosi kinadumisha na kuendeleza udhabiti.

Akizungumza akionekana amehamaki, Mule alipuzilia mbali taarifa zilizochipuka mwisho wa Julai kwamba Ingwe huenda wakaagana na Mwaajentina huyo aliyelalamikia hujuma kutoka kwa benchi yake ya kiufundi anaodai wanatiwa fitina na baadhi ya wanachama wa baraza kuu la Ingwe(NEC) wasiofurahia kazi yake wala uwepo wake klabuni.

Hata hivyo, Mule alisimama kidete na kusema Zapata aliyepokezwa kazi hiyo Mei 2018 haendi popote jinsi walivyong’atuka watangulizi wake Dennis Kitambi, Robert Matano na Steward Hall.

“Swala la kutafuta huduma za kocha mwengine halifai hata kufikiriwa kwa sasa,” akasema Mule.

Kinara wa Ingwe apongeza timu kwa bao moja dhidi ya Vihiga

Na CECIL ODONGO

MWENYEKITI wa AFC Leopards Dan Mule amewapongeza wachezaji wa timu hiyo kufuatia ushindi walioutwaa dhidi ya Vihiga United FC katika uwanja wa Mumias Sports Complex Agosti 29.

Ushindi huo ulipatikana kupitia bao la kiungo Marvin Nabwire katika kipindi cha kwanza na ulijiri baada ya kichapo cha 2-1 mikononi mwa Mabingwa watetezi Gor Mahia kwenye debi ya Mashemeji Agosti 23.

Kando na kutoa pongezi yake kuhusu matokeo hayo dhidi ya timu inayonolewa na kocha msifika Mike Mururi, Mule amewataka wanadimba hao wajikakamue na kushinda nyingi za mechi zilizosalia ili wamalize ligi katika mduara wa tatu bora.

“Ningependa kuwapongeza wachezaji kufuatia ushindi dhidi ya Vihiga United. Walicheza vizuri na nawaomba waendelee kutia bidii ili kushinda nyingi za mechi zilizobaki,”  akasema Bw Mule.

“Tukishinda mechi yetu ijayo tutatinga nafasi ya pili. Tunafaa kupunguza mwanya wa alama kati yetu na mahasimu Gor Mahia ndipo tumalize k ndani ya mduara wa timu tatu bora,” akaongeza Bw Mule.

Ingwe watacheza dhidi ya Simba SC kutoka Tanzania Agosti 8 katika mechi za kuadhimisha siku ya kubuniwa kwa mabingwa hao wa ligi ya Vodacom nchini Tanzania.

“Itakuwa mechi nzuri kwa vijana wetu haswa kwa wale ambao wamekuwa wakisugua benchi,” akasema Mule.

Ingwe watawajibikia ligi Agosti 5 kwa kutesa dhidi ya Mathare United katika uga wa Kenyatta mjini Machakos.

Zapata ajipiga kifua Ingwe itaitafuna Gor Jumapili

Na CECIL ODONGO

Mjadala wa nani jabali wa soka  nchini kati ya Klabu za GorMahia na AFC Leopard umeibuka tena baada ya kocha wa ingwe Rodoflo Zapata kujishaua kwamba wao ndio bora kuliko wapinzani wao huku kivumbi kikali cha ‘debi ya Mashemeji’ ikinukia Jumapili ijayo.

Klabu hizo mbili zenye historia ndefu ya uhasama wa tangu jadi zitavaana katika uwanja wa Kasarani kwenye mechi  kali inayosubiriwa kwa hamu na hamumu na maelfu ya mashabiki wa soka nchini.

Japo ligi ya KPL  mkondo wa pili wa Kpl unaendelea, mechi hiyo itakuwa ya mkondo wa kwanza baada ya kuahirishwa mara mbili tangu mwezi Aprili mwaka 2017..

Ingawa ilipangwa awali kusakatwa katika uwanja wa Bukhungu mjini Kakamega, AFC Leopards walilazimika kuihamisha hadi uwanja wa Kasarani ili iwe rahisi kudhibiti idadi kubwa ya mashabiki watakaojitokeza.

Matamshi ya mkufunzi huyo huenda yakazua hisia kali miongoni mwa mashabiki wa Gor na Ingwe. GorMahia ni mabingwa mara 16 wa KPL huku AFC Leopards  wanaojishaua wakipigwa kumbo na uhalisia wa mambo kwa kuwa walitwaa ubingwa mara ya mwisho mwaka wa 1998.

Kocha huyo raia wa Argentina atakuwa anasimamia debi yake ya kwanza kati ya mibabe hao na ameeleza waziwazi kwamba anapania kuishinda GorMahia ili kuwaongezea shinikizo uongozini mwa ligi.

“Ingwe ndiyo klabu kubwa zaidi nchini. Napenda presha na shinikizo za kujenga timu itakayofanya kweli na kutokemeza mbali ukame wa miaka 20 wa taji ya KPL,”  akasema Zapata

Bw Zapata aliweka wazi kwamba  lengo lake  kuu la  kutinga kati ya nafasi tatu bora za juu ligi ikakimilika.

Pia anatazamia kuweka mpango mahusi wa muda mrefu ili kusaidi Ingwe kufikia ufanisi wa juu.

Ingwe wanashikilia nafasi ya nne katika msimamo wa jedwali la ligi kwa alama 35 huku wapinzani wao GorMahia wakiselelea uongozini kwa alama 49.

Ingwe wawinda Mnigeria anayesakata Uganda

Na JOHN ASHIHUNDU

Baada ya juhudi zao za kumpata straika Elvis Rupia wa Nzoia United kuambulia patupu, huenda AFC Leopards ikamsaini raia wa Nigeria anayesakata nchini from Rwanda.

Ingwe ambayo tayari imewaleta wachezaji watatu klabuni, wanakaribia kumpata Alex Orotomal kutoka klabu ya Sunrise FC.

Nyota huyo anashikilia nafasi ya nne katika orodha ya ufungaji mabao ligini nchini Rwanda, akijivunia mabao 10, matatu tu nyuma ya mzalendo, Ndarusanze Claude.

“Alex anatarajiwa kufika Nairobi wiki hii kufanya mashauriano na wakuu wa Leopards kabla ya mkataba kuandikishwa,” afisa ambaye hakutaka kujulikana alisema.

Mbali na Alex, Leopards wanafanya mazungmzo na Mganda, Abraham Ndungwa kuiongezea nguvu safu yao ya ulinzi.

Mabingwa hao wa GOtv ambao kesho Jumatano watakuwa ugenini kucheza na Zoo wamesema mechi hiyo itakayochezewa Kericho Green Stadium itaanza saa tisa.

Mashabiki watalipa Sh200 kuingia uwanjani humo.

Timu hizo zilitoka sare 2-2 zilipokutana kwa mara ya mwisho uwanjani Kenyatta Stadium, Machakos.

Katika mechi zao za majui, Zoo ilitoka sare 1-1 na  SoNy Sugar wakati Ingwe ikiibwaga Chemelil 2-0 mjini Machakos. Jumapili, vijana hao wa kocha Zapata Rodolfo waliwanyuka Rainforest 4-0 na kufuzu kwa hatua ya 16 bora ya michuano ya Shield Cup.

Ingwe yaahidi kuhifadhi makinda wake wote

Na JOHN ASHIHUNDU

Klabu ya AFC Leopards haitawaruhusu wachezaji wake chipukizi kuondoka klabuni kipindi hiki cha wachezaji kubadilisha timu.

Akizungmza na Taifa Leo jana, Katibu Mkuu wa klabu hiyo, Oscar Igaida alisema klabu yake inaweka mikakati kapambe ya kuhifadhi makinda wake wote kwa ajili ya kuwategemea msimu ujao na miaka itakayofuata.

Miongoni mwa makinda wa Leopards ni Ezekiel Owade, Yusuf Mainge, Moses Mburu, Dennis Sikhayi, Michael Kibwage, Victor Mavisi, Clyde Senaji, Jaffery Odeny, Vincent Oburu na Marvin Nabwire ambao kadri ya umri wao ni miaka 22.

Igaida alisema Leopards inajaribu kuiga mpango wa marehemu, James Siang’a ambaye aliunda kikosi cha sasa cha Gor Mahia ambacho kimevuma mfululizo kwa muda mrefu.

Alipochukua usukani mnamo 2009, Siang’a alisajili wachezaji wengi wa umri mdogo na kuomba afisi impe muda wa miaka mintano.

“Tutawahifadhi makinda wetu klabuni kwa manufaa ya baadaye. Tayari viwango vya baadhi yao vimeanza kupanda,” alisema Igaida.

“Wachezaji wetu wengi wana umri mdogo, lakini huenda wakafanya makubwa iwapo watazidi kuimarika jinsi siku zinavyoendelea,” aliongeza.

Hata hivyo, afisa huyo alisema baada ya kusajili nyota wawili mwezi huu, klabu hiyo inapanga kusajili nyota wengine wawili kabla ya muda wa kusajili wachezaji wapya kumalizika.

“Baada ya kukamilisha usajili wetu mwezi huu, tunatarajia kuwa klabu imara zaidi kwenye ligi kuu ya SportPesa Premier League (SPL),” alisema.

Leopards ambayo kwa muda mrefu haijakuwa na mshambuliaji wa kutegemea imemsajili Eugene Mukangula mwenye umri wa miaka 22 kutoka Thika United.

Mukangula ni mshambuliaji matata ambaye amekuwa akiisaidi Thika katika mechi za ligi kuu kabla ya kuuliza ruhusa ya kuondoka baada ya klabu hiyo kushindwa kumlipa mshahara kwa miezi kadhaa.

Straika huyo aliyekubali mkataba wa miaka mitatu anatarajiwa kuiongezea nguvu safu ya ushambuliaji ambayo imekuwa ikimtegemea Ezekiel Odera ambaye amerejea majuzi baada ya kuuguza jeraha kwa wiki kadhaa.

Habari za kuaminika zimesema Ingwe kadhalika inawania kiungo mmoja, kuongezea kwa Saad Musa ambaye alijiunga na mabingwa hao wa GOtv akitokea Thika United.

Musa ambaye zamani alikuwa na Azam Youth na Nairobi City Stars amekubali mkataba wa mwaka mmoja kusaidiana na Wyvonne Isuza ambaye amekuwa akicheza bila kupumzika.

Kadhalika kuna uvumi kwamba huenda beki wa kimataifa wa Uganda Greens, Isaac Isinde akanaswa na Ingwe.

Lakini juhudi za kumsajili straika Elvis Rupia kutoka Nzoia Unitedzilizidi kuambulia patupu.

Mvutano baina ya Ingwe na FKF kuhusu debi ya Mashemeji

Na CECIL ODONGO

UONGOZI wa Klabu ya AFC Leopards umesisitiza kwamba mchuano mkali wa debi kati yao na mahasimu wao wa tangu jadi Gor Mahia utaendelea Jumapili hii katika uwanja wa Bukhungu mjini Kakamega.

Kwenye taarifa kwa vyombo vya habari iliyotiwa saini na Katibu Mkuu Oscar Igaida alipuuzilia mbali kauli ya Rais wa Shirikisho la soka nchini (FKF) Nick Mwendwa kwamba mechi hiyo iratibishwe upya ili kupisha michuano ya kirafiki wiki kesho kati ya Timu ya Taifa Harambee Stars na mataifa ya Uswazi na Equitorial Guinea.

“Hatutawachilia wachezaji wetu washiriki katika mechi za timu ya taifa kutokana na mechi ya debi na ile ya kombe la supa Tarehe 3 mwezi Juni mwaka 2018,” akasema Bw Igaida.

Aidha katibu huyu alikashifu matamshi yanayodaiwa kutolewa na Bw Mwendwa kwamba debi ya mashemeji haifai kusakatwa kwenye uwanja wa ‘kiajabu’ kama Bukhungu.

“Ni kinaya kikubwa kwa Bw Mwendwa kudai kwamba uwanja wa Bkhungu ni wa kiajabu. Kwani wakati wakiandaa mechi za CECAFA hapo mwaka 2017 hawakujua ni wa kiajabu?” ikasema taarifa ya Bw Igaida.

Bw Igaida alisisitiza kwamba wataendelea na matayarisho kabambe kwa ajili ya mchuano wa debi na hawataruhusu wachezaji wao washiriki mechi za kirafiki ambazo hazipo kwenye kalenda ya Shirikisho la soka duniani (FIFA).

Mapema leo, Bw Mwendwa alisema kwamba debi hiyo ya Tarehe 26 mwezi Mei mwaka 2018 hautachezwa wala uwanja wa Bkhungu hautatumika kuandaa kipute hicho.

Ingwe yawinda mshambuliaji wa Nzoia Sugar

Na JOHN ASHIHUNDU

KLABU ya AFC Leopards inapanga kuvamia ngome ya Nzoia Sugar kumnasa mshambuliaji matata, Elvis Rupia. Ripoti zimesema shughuli hiyo itafanyika mwezi ujao.

Nyota huyo maarufu kama Machapo, amekuwa muhimu katika kikosi hicho cha kocha Bernard Mwalala ambapo kufikia sasa amefunga mabao 11.

Mbali na Leopards, straika huyo vile vile amevutia timu nyingi zikiwemo za ligi kuu nchini Zambia.

Ingwe vile vile imevutiwa na kiwango cha Pistone Mutamba wa Wazito FC.

Rupia alikuwa mshambuliaji wa Nakuru All Stars kabla ya kuagana nayo iliposhuka ngazi miaka miwili iliyopita.

Sare ya 2-2 dhidi ya Nakumatt yatamausha mashabiki wa Ingwe

Na GEOFFREY ANENE

MASHABIKI wa AFC Leopards hawana raha kabisa baada ya timu yao kukabwa 2-2 na Nakumatt na kumaliza mechi ya nane bila ushindi kwenye Ligi Kuu uwanjani Kenyatta mjini Machakos, Jumamosi.

Wakizungumzia matokeo ya mchuano huu ambao Ingwe iliongoza 2-0 kupitia kiungo Whyvonne Isuza kabla ya kuruhusu Nakumatt kusawazisha kupitia Eugene Ambulwa na Brian Nyakan dakika 15 za mwisho, mashabiki wamesema wachezaji hawana ari kabisa.

“Huu ni mzaha. Njia ambayo timu ilitupa uongozi inatuwacha na maswali mengi. Hawa wachezaji wana ari kweli? Wanalenga kutimiza malengo gani kutokana na matokeo?” Nixon Mahasi alichemka.

Kamwaro Kamwaro pia alielekeza lawama kwa wachezaji. “Niliposema kocha hawezi kupata ushindi ikiwa wachezaji hawajitolei, watu walisema nina kiburi. Hadi wale waliofukuza (kocha Robert) Matano waondoke, utovu wa nidhamu bado utasalia. Hapa hakuna timu,” alisema.

Maggy Asiko alitaka mashabiki wenzake kugoma kuhudhuria mechi za Ingwe akisema wachezaji “wanachezea hisia zetu”.

Mashabiki wengi wamesikitishwa na matokeo haya. Baadhi yao wametaja kocha mpya Rodolfo Zapata kama ‘mtalii anayestahili kutimuliwa’, huku sehemu kubwa ikionekana kutaka Matano, ambaye aliachishwa kazi kighafla miezi michache iliyopita, arejeshwe. Hata hivyo, Matano anaendelea kufanya vyema katika klabu yake mpya ya Tusker baada ya kushinda mechi tatu zilizopita kwa kulaza Wazito 1-0, SoNy Sugar 3-2 na Bandari 2-0. Tusker itapiga mechi yake ya 15 hapo Jumapili dhidi ya Kariobangi Sharks.

Mechi kati ya Mathare United na Bandari iliyotanguliwa kusakatwa uwanjani Kenyatta ilimalizika bila mshindi, 0-0.

Sofapaka ilikuwa na siku nzuri mjini Narok baada ya kutoka chini bao moja na kulipua Zoo Kericho 2-1. Mwanasoka bora wa Kenya mwaka 2017, Michael Madoya aliweka Zoo mbele dakika ya 12. Humphrey Okoti alisawazisha dakika tano baadaye kabla ya Stephen Waruru kuongeza bao la ushindi dakika ya 53.

 

Kitambi atajwa kocha bora wa mwezi KPL

Na JOHN ASHIHUNDU

Kocha wa AFC Leopards anayeondoka, Dennis Kitambi ametawazwa Kocha Bora wa Mwezi Aprili KPL.

Katika uteuzi huo uliofanywa na waandishi wa habari za michezo, Kitambi, alijinyakuliwa Sh75,000, bali na kombe kutoka kwa wadhamini wa tuzo hiyo, Fidelity Insurance.

Raia huyo wa Tanzania aliibuka mshindi baada ya kuwaongoza vijana wake kupata ushindi mara nne mwezi Machi, muda mfupi baada ya kuchuua usukani kutoka kwa Robert Matano.

“Nimeifurahia zawadi hii ambayo nimeipata wakati nikijipanga kuondoka. Nawashukuru wachezaji pamoja na wenzange tuliokuwa nao katika idara ya ukufuzni muda wote nimekuwa hapa nchini Kenya. Ufanisi wangu umetokana na msaada wa kila mtu aliyeniunga mkono.

“Naondoka japo kwa roho ngumu, lakini muda wangu wa kuondoka umefika kuambatana na mkataba wangu na Ingwe. Namtakia kocha anayechukua nafasi yangu ufanisi katika majukumu yake,” Kitambi alisema.

Kitambi ametwaa tuzo hiyo baada ya awali mshambuliaji Ezekiel Odera pia wa Ingwe kutwaa tuzo ya Mchezaji Bora wa mwezi Machi.

Kitambi ataondoka nchini kesho kuelekea Bangladesh ambako atajiunga na basi wake wa zamani, Stewart Hall anayeandaa klabu ya Saif Sporting Club.

Ingwe wanashikilia nafasi ya tano jedwalini wakiwa na pointi 21 kutokana na mechi 14 wakati huu wakijiandaa kucheza na Nakumatt juma lijalo.

Gor yaibwaga Ingwe kuchuana na Hull City Mei 13

Na GEOFFREY ANENE

GOR Mahia imeimarisha rekodi yake ya kutoshindwa na AFC Leopards hadi mechi tano baada ya kuichapa kwa njia ya penalti 5-4 Jumanne na kunyakua tiketi ya kumenyana na Hull City hapo Mei 13, 2018.

Mabingwa mara 16 wa Kenya, Gor na mabingwa mara 13 Leopards walimaliza dakika 90 za mchuano huu wa kusisimua bila kufungana uwanjani Afraha mjini Nakuru.

Gozi hili la 85 katika ya klabu hizi kongwe nchini Kenya lilishuhudia Mrwanda Jacques Tuyisenge akipoteza penalti ya kwanza kwa upande wa Gor sawa na mwenzake kutoka Leopards, Whyvonne Isuza.

Gor haikupoteza tena penalti, huku Mrwanda Meddie Kagere, Mganda Godfrey Walusimbi na George ‘Blackberry’ Odhiambo, Joachim Oluoch na Ben Ondiek wakimwaga kipa wa Leopards, Ezekiel Owade. Kipa wa Gor, Shaban Odhoji alipangua penalti ya Isuza, lakini akashindwa kupangua penalti za mchezaji bora wa mwezi Machi, Ezekiel Odera pamoja na Duncan Otieno, Robinson Kamura na Mganda Baker Lukooya. Penalti ya mwisho ya Leopards ilipigwa nje na Vincent Oburu.

Hull, ambayo inashiriki Ligi ya Daraja ya Pili ya Uingereza, itasakata mechi yake ya mwisho ya ligi hiyo Mei 6 dhidi ya Brentford kabla ya kuzuru Kenya.

Itakabiliana na Gor katika uwanja wa kimataifa wa Kasarani jijini Nairobi mnamo Mei 13.

Ni mara ya pili Gor inacheza dhidi ya timu kutoka Uingereza baada ya kulemewa 2-1 na Everton jijini Dar es Salaam, Tanzania, mwaka 2017.

Gor ilinyuka Leopards 3-0 na kunyakua tiketi ya kumenyana na Everton.

Hull pia si timu geni kwa Wakenya. Ilizaba timu ya mstaa kutoka Ligi Kuu ya Kenya (SportPesa All Stars) 2-1 uwanjani K-COM nchini Uingereza mnamo Februari 27, 2017.

Hull, Gor na Leopards zinapata udhamini kutoka kwa kampuni ya bahati nasibu ya SportPesa. Mwaka 2016, SportPesa ilitangazwa wadhamini wakuu wa Hull baada ya kusaini kandarasi ya misimu mitatu (2016/17, 2017/18 na 2018/19).

Leopards na Gor zilisaini kandarasi ya miaka mitatu na SportPesa zaidi ya wiki moja iliyopita ya udhamini wa Sh156.4 milioni na Sh198.6 milioni, mtawalia.