Jinsi kutokuwepo kwa Odinga na Kenyatta kwenye debe kunavyofungua kura ya 2027
HUKU kivumbi cha kuelekea Uchaguzi Mkuu wa 2027 kikishika kasi, maeneo mawili muhimu kisiasa nchini Kenya; Luo Nyanza na Mlima Kenya, yameingia katika mabadiliko makubwa ya kisiasa yanayobadili mazingira ya uchaguzi wa kitaifa.
Kwa muda mrefu, maeneo haya yalijulikana kama ngome thabiti za upigaji kura zenye uaminifu wa kisiasa kwa vigogo wao.
Hata hivyo, sasa yako katika hali mpya isiyokuwa na uhakika, ikiwa ni mabadiliko ya uongozi, kubadilisha uaminifu wa kisiasa na mikakati mipya ya vyama vinavyoshindania ushawishi.
Nyanza iliingia kwenye hali tata baada ya kifo cha aliyekuwa Waziri Mkuu Raila Odinga mnamo Oktoba 2025.
Kifo chake kiliacha pengo kubwa la uongozi, na sasa makundi mbalimbali yanapigania kuongoza eneo hilo.
Kwa miaka mingi, Nyanza ilikuwa ngome ya upinzani chini ya ushawishi wa Odinga, lakini sasa kuna ushindani mkali wa kuwania urithi wake wa kisiasa.
Chama cha UDA kinachoongozwa na Rais William Ruto tayari kimeanza kuingia kwa nguvu katika eneo hilo kupitia uchaguzi wa mashinani katika kaunti za Siaya, Kisumu na Migori (ulioanza jana).
Wakati huo huo, ODM imegawanyika katika makundi mawili makuu; Linda Ground na Linda Mwananchi, hali inayoendeleza mivutano ya ndani.
Viongozi kama Gladys Wanga, Opiyo Wandayi na John Mbadi wanajipanga kisiasa katika mfumo mpya wa uongozi baada ya Odinga, huku Kalonzo Musyoka akitazamia kutumia uhusiano wa zamani na eneo hilo kuongeza ushawishi wake.
Mlima Kenya pia unapitia mabadiliko makubwa ya kisiasa. Tofauti na chaguzi zilizopita, sasa hakuna kiongozi mmoja mwenye ushawishi mkubwa unaowaunganisha wapigakura.
Rais Ruto, Uhuru Kenyatta na Rigathi Gachagua wanamenyania ushawishi, huku viongozi vijana kama Ndindi Nyoro wakijitokeza na ajenda zao binafsi.
Eneo hilo ambalo lilimpa Ruto kura karibu milioni tatu mwaka wa 2022 sasa linaonyesha dalili za mabadiliko kutokana na mivutano ya kisiasa na changamoto za kiuchumi.
Wachambuzi wa siasa wanasema kuwa mabadiliko haya yanaweza kuamua matokeo ya uchaguzi wa 2027, kwani maeneo yote mawili kwa pamoja yana mamilioni ya wapigakura na yanaendelea kuwa uwanja mkuu wa mapambano ya kisiasa nchini.