AFISI ya Umoja wa Mataifa ya Kuratibu Masuala ya Kibinadamu (UNOCHA) imetenga zaidi ya Sh387 milioni kusaidia maelfu ya watu waliokimbia makazi yao kutokana na mapigano nchini Ethiopia.

Naibu Katibu Mkuu wa Umoja wa Mataifa anayeshughulikia masuala ya kibinadamu, Tom Fletcher, alisema fedha hizo zitatumika kutoa chakula, maji, makazi na huduma za afya kwa waathiriwa.

Fedha hizo zimetolewa kupitia Hazina ya Umoja wa Mataifa ya Kukabiliana na Dharura (CERF) na zinalenga kuwafikia zaidi ya watu 50,000 waliovuka mpaka kuingia Kenya.

Ufadhili huo unakuja siku chache baada ya mashirika ya UN kutoa ombi la Sh1.16 bilioni kusaidia waathiriwa wa mapigano hayo.

Ripoti ya UNOCHA inaonyesha kuwa wanawake na watoto ndio wengi miongoni mwa waliowasili, pamoja na wazee na watu wenye ulemavu.

“Wengi walikuwa wamejisitiri katika majengo ya umma, maeneo ya wazi na kando ya barabara, hali iliyoongeza hatari za kiusalama na kiafya. Watu wenye magonjwa sugu pia walikuwa katika hatari ya kukosa dawa muhimu,” inasema ripoti hiyo.

Inaongeza kuwa jamii zinazowazunguka wakimbizi zimeendelea kuwasaidia, lakini ongezeko la idadi yao linaweka shinikizo kwa huduma za kijamii na linaweza kusababisha mivutano kutokana na uhaba wa rasilimali.

Ripoti hiyo inataja maji, vyoo na huduma za usafi kuwa miongoni mwa mahitaji ya dharura katika kambi saba zinazohifadhi wakimbizi.

“Inakadiriwa kuwa vyoo vingine 410 vinahitajika katika maeneo manne, vikiwemo 342 kambini. Mahitaji mengine ni pamoja na kusambaza maji kwa magari, vifaa vya kunawia mikono na matangi ya kuhifadhi maji,” inasema ripoti hiyo.

Katika eneo la Arosa pekee, lita 19,650 za maji zinahitajika kila siku, huku familia 9,768 zikihitaji msaada wa chakula na lishe.

UNOCHA pia imetaja watu 313 waliokimbia makazi yao katika Kaunti ya Mandera kuwa wanahitaji msaada wa kibinadamu.

Nchini Ethiopia, mapigano hayo yamesababisha kufungwa kwa shule 200. Shirika la Msalaba Mwekundu la Ethiopia (ERCS) linasema zaidi ya watu 200,000 wamehama makazi yao katika Moyale na maeneo jirani.

“Limetoa msaada wa makazi ya dharura na vifaa visivyo vya chakula vyenye thamani ya takriban Sh24 milioni kwa familia 1,000 zilizoathiriwa na mapigano ya hivi majuzi katika mji wa Moyale na maeneo yanayouzunguka.” Ikasema shirika hilo kwenye taarifa yake.

Hapa nchini, Shirika la Msalaba Mwekundu na mashirika mengine yamewafikia zaidi ya watu 13,000 kwa kuwapa chakula na huduma za afya katika siku 18 zilizopita.

Wakati huohuo, Ubalozi wa Uingereza Ijumaa ulitoa tahadhari kwa raia wake dhidi ya kufanya safari zisizo za lazima kuenda Moyale kutokana na mapigano kati ya vikosi vya maeneo ya Oromia na Somali.