MUSTAKABALI wa kocha wa Manchester United, Michael Carrick, utaamuliwa leo, katika kikao kitakachohudhuriwa na mmiliki wa klabu hiyo Sir Jim Ratcliffe pamoja na viongozi wakuu Omar Berrada na Jason Wilcox mjini Monaco.

Kibarua cha Carrick kiko hatarini baada ya United kushuka hadi nafasi ya 18 kwenye jedwali la Ligi Kuu UIngereza (EPL) kufuatia sare ya 4-4 dhidi ya Aston Villa Jumapili.

Kwa mujibu wa BBC Sport, Berrada, ambaye ni mtendaji mkuu, na Wilcox, mkurugenzi wa soka, wanatarajiwa kumshauri Ratcliffe na familia ya Glazer kumtimua kocha huyo.

Hata hivyo, uamuzi wa mwisho huenda ukafanywa kesho. Kikao hicho kilikuwa kimepangwa awali na hakikuandaliwa mahsusi kujadili hatma ya Carrick, ingawa suala lake linatarajiwa kutawala mazungumzo.

Pia, kutajadiliwa uwezekano wa kuongeza makocha katika benchi yake ya ufundi.

Iwapo uamuzi wa kumtimua utafikiwa, United watamwelezea Carrick ana kwa ana.

United walianza vibaya zaidi msimu wa ligi ya nyumbani katika kipindi cha miaka 40, wakiwa na ushindi mmoja pekee katika mechi 10 za EPL. Wamefungwa mabao 19, huku wakiwa pointi moja pekee juu ya Crystal Palace wanaoshikilia mkia.

Sare dhidi ya Aston Villa ilikuwa mechi ya tatu ya Carrick tangu klabu hiyo iamue kumpa muda zaidi kubasilisha matokeo. Katika mechi hizo, alipata ushindi mmoja, sare moja na kupoteza nyingine.

Uongozi wa United ulifikiria kumfuta kazi baada ya kichapo cha 3-0 dhidi ya Bournemouth, lakini ukaamua kumpa nafasi nyingine pamoja na wachezaji wake kurekebisha hali.

Hata hivyo, majeraha ya wachezaji muhimu yamechangia matatizo ya timu hiyo, huku safu ya ulinzi na mashambulizi ikikosa uthabiti.

United pia wamekuwa wakikosolewa kutokana na kiwango duni cha uchezaji, licha ya kuwa na wachezaji wenye uzoefu mkubwa.

Bruno Fernandes, ambaye alituzwa mchezaji bora wa Professional Footballers’ Association (PFA) msimu wa 2025/26, amefunga bao moja pekee katika ligi tangu ushindi wa 5-2 dhidi ya Ipswich.

Mabingwa hao mara 13 wa EPL pia, wamekumbwa na matatizo ya majeraha kwa wachezaji kama Benjamin Sesko na Luke Shaw.

Wakati huo huo, beki Lisandro Martinez aliikosoa sera ya usajili ya klabu hiyo na kuelekeza lawama kwa mkurugenzi wa soka Wilcox.

Kwa mujibu wa taarifa, United wamekuwa wakichunguza uwezekano wa kuajiri makocha wengine akiwemo Eddie Howe, Julian Nagelsmann, Antonio Conte na Mauricio Pochettino.

Hata hivyo, Pochettino, ambaye kwa sasa ananoa timu ya taifa ya Marekani, ana mkataba mpya uliosainiwa Agosti.

Carrick sasa anakabiliwa na hatma isiyo na uhakika huku United wakiwa katika nafasi ya 18 na wakiwa wameshinda mechi tatu pekee katika mechi 15 za mashindano yote msimu huu.