Kurejea kwa Jumwa UDA kunavyobadili hali ya siasa Kilifi
SIASA za Kaunti ya Kilifi zinatarajiwa kuchukua mwelekeo mpya baada ya aliyekuwa Waziri wa Baraza la Mawaziri (CS) Aisha Jumwa kurejea katika chama tawala cha United Democratic Alliance (UDA), miezi minne baada ya kukihama kutokana na kutoridhishwa na jinsi chama hicho kilivyoshughulikia azma yake ya kuwania ugavana mwaka 2027.
Kurejea kwa Bi Jumwa kunatarajiwa kumkosesha usingizi Gavana wa sasa wa Kilifi Gideon Mung’aro, ambaye anatafuta kuchaguliwa tena kwa muhula wa pili kupitia chama cha Orange Democratic Movement (ODM).
Hali hiyo inazidi kuchanganya hesabu za kisiasa katika kaunti hiyo, hasa wakati ambapo mipango ya vyama vya UDA na ODM kushirikiana katika kugawana nafasi za kisiasa kupitia mfumo wa ‘zoning’ inaonekana kukabiliwa na changamoto.
Iwapo Bi Jumwa ataendeleza azma yake ya kuwania ugavana na kupata uungwaji mkono wa viongozi na wanachama wa UDA pamoja na Pamoja African Alliance (PAA), huenda Bw Mung’aro akakabiliwa na ushindani mkali katika uchaguzi mkuu wa 2027.
Spika wa Seneti Amason Kingi, ambaye ni kiongozi wa PAA, awali alisema chama chake kitaunga mkono wagombeaji wa UDA katika nafasi zote za uchaguzi mkuu ujao, hatua inayoweza kuimarisha nafasi ya Bi Jumwa iwapo atapewa tiketi ya chama hicho.
Aidha, mmoja wa wanasiasa wenye ushawishi Kilifi, Bw George Kithi, ambaye kwa sasa anaunga mkono UDA, anaweza pia kuwa miongoni mwa viongozi watakaounga mkono azma ya Bi Jumwa.
Katika uchaguzi wa ugavana wa 2022, Bi Jumwa alipata kura 65,893 huku Bw Kithi akipata kura 64,329. Bw Mung’aro aliibuka mshindi kwa kura 143,773, akiwashinda wapinzani wake kwa tofauti kubwa.
Hata hivyo, kurejea kwa Bi Jumwa katika chama tawala kunaweza kubadilisha uwiano huo wa kisiasa, hasa iwapo viongozi waliokuwa na misimamo tofauti wataungana kumuunga mkono.
Rais William Ruto alimpokea rasmi Bi Jumwa katika chama cha UDA katika Ikulu ndogo ya Mombasa Alhamisi, akisema anatarajia kufanya naye kazi katika kuendeleza ajenda ya mabadiliko ya chama hicho katika eneo la Pwani na nchini kwa jumla.
Katika ujumbe aliouchapisha kwenye ukurasa wake rasmi wa Facebook, Rais Ruto alisema UDA imejitolea kuwaunganisha viongozi na Wakenya katika kuendeleza dira ya taifa lenye umoja, ushirikishwaji na ustawi wa kiuchumi.
Ingawa Rais Ruto hakufafanua iwapo Bi Jumwa amepewa nafasi mpya ndani ya chama au serikali, kurejea kwake UDA kunaashiria mwanzo wa hesabu mpya za kisiasa katika Kaunti ya Kilifi.
Kwa sasa, swali kuu ni iwapo kurejea kwake kutakuwa kwa kuimarisha chama pekee au kutafungua tena vita vya kuwania ugavana dhidi ya Bw Mung’aro mwaka 2027.
Kurejea kwake kunakamilisha mabadiliko makubwa ya kisiasa yaliyotokea miezi michache baada ya kutangaza kuondoka UDA Julai 30, akilalamikia kile alichokitaja kuwa kudhalilishwa na kutengwa ndani ya chama na serikali.
Wakati huo huo, Bi Jumwa alisema uamuzi wake ulitokana na kutafakari kwa kina na kushauriana na watu aliokuwa akiwawakilisha.
Alikuwa miongoni mwa wanachama waanzilishi wa UDA na viongozi waliokuwa na jukumu kubwa la kukijengea chama hicho umaarufu katika eneo la Pwani wakati wa kampeni za Rais Ruto kuelekea uchaguzi wa 2022.
Kuondoka kwake kulifungua milango ya mazungumzo na viongozi wa upinzani waliokuwa wakijaribu kumshawishi ajiunge nao kuelekea uchaguzi wa 2027.
Mnamo Julai 31, 2026 vuguvugu la Linda Mwananchi lililoongozwa na Gavana wa Siaya James Orengo lilianza mazungumzo na Bi Jumwa, likimpa nafasi ya uongozi wa juu katika vuguvugu hilo.
Wiki mbili baadaye, kiongozi wa Wiper Kalonzo Musyoka alimkaribisha katika chama chake na kupendekeza apewe nafasi ya naibu kiongozi wa chama.
Hata hivyo, kurejea kwake UDA sasa kunazua maswali kuhusu hatma ya mipango hiyo na iwapo bado ana nia ya kuwania ugavana wa Kilifi.
Changamoto kubwa inayomkabili ni msimamo wa baadhi ya viongozi wa UDA na ODM ambao wamekuwa wakimuunga mkono Bw Mung’aro.
Spika Kingi alikuwa ametangaza kuwa UDA haitamsimamisha mgombeaji dhidi ya Bw Mung’aro katika uchaguzi wa 2027, msimamo uliokuwa kikwazo kwa azma ya Bi Jumwa kupata tiketi ya chama tawala.
Bi Jumwa amekuwa mmoja wa wanasiasa wenye ushawishi mkubwa Pwani. Alihudumu kama mwakilishi wa wanawake wa Kilifi kati ya 2013 na 2017 kabla ya kuchaguliwa kuwa mbunge wa Malindi mwaka 2017 hadi 2022.
Baadaye aliteuliwa kuwa Waziri wa Jinsia, Utamaduni, Sanaa na Urithi katika serikali ya Rais Ruto, nafasi aliyoihudumu hadi Julai 2024 alipoondolewa katika mabadiliko ya Baraza la Mawaziri.