MAHAKAMA ya Kajiado imeruhusu maafisa wa Idara ya Upelelezi wa Jinai (DCI) kumzuilia mwanaharakati Bob Njagi kwa siku saba huku wakiendelea na uchunguzi kuhusu madai ya kosa la uhaini.

Mahakama pia iliwaruhusu maafisa hao kuendelea kuhifadhi simu mbili za mkononi zilizochukuliwa wakati wa kunyakwa kwake ili zifanyiwe uchunguzi wa kitaalamu na kuchambuliwa data zinazoweza kusaidia uchunguzi.

Njagi alikamatwa na maafisa wa DCI mjini Kitengela Jumatano, siku moja kabla ya maadhimisho ya mwaka wa pili wa maandamano ya Gen Z.

Alizuiliwa kwa saa 24 katika kituo cha polisi ambacho hakikutajwa kabla ya kufikishwa mbele ya Hakimu Mkuu wa Kajiado David Mwangi Alhamisi alasiri.

Hata hivyo, hakimu alikubali ombi hilo kwa sehemu na kuamuru Njagi azuiliwe katika Kituo cha Polisi cha Isinya kwa siku saba pekee.
Njagi anatarajiwa kufikishwa tena mahakamani Julai 2, 2026.

Chini ya sheria za Kenya, kosa la uhaini linaweza kuadhibiwa kwa hukumu ya kifo chini ya Kifungu cha 40 cha Kanuni ya Adhabu, ingawa kwa vitendo hukumu hiyo mara nyingi hubadilishwa kuwa kifungo cha maisha.

Katika kipindi cha miaka miwili iliyopita, Njagi amekumbana mara kadhaa na vyombo vya usalama.

Mnamo Agosti 19, 2024, alidaiwa kutekwa nyara na watu wasiojulikana baada ya kutolewa ndani ya gari la abiria katika eneo la Mlolongo alipokuwa akisafiri kuelekea Kitengela. Alitoweka pamoja na ndugu Aslam na Jamil Longton katika tukio lililojulikana kama “Kitengela Three”.

Aliachiliwa baada ya siku 32 na kudai kuwa aliteswa na kuhojiwa kuhusu shughuli zake za uanaharakati.

Mnamo Oktoba 2025, Njagi na mwanaharakati Nicholas Oyoo walidaiwa kutekwa nchini Uganda baada ya kuhudhuria hafla ya kisiasa inayohusishwa na kiongozi wa upinzani Robert Kyagulanyi. Waliachiliwa baada ya siku 38 na kudai walizuiliwa katika kambi ya kijeshi na kufanyiwa mateso ya kimwili na kisaikolojia.