Na THOMAS MATIKO

JORDAN Peele ni kati ya maprodusa wa filamu wanaofanya vizuri sana kwa sasa kule Hollywood.

Hili ni suala ambalo kamwe halina pingamizi kutokana na mazao ya kazi zake.

Ijumaa iliyopita, Jordan mwenye umri wa miaka 40, aliingiza rasmi filamu yake mpya sokoni Us aliyotengeneza kwa bajeti ya dola 20 milioni. Tayari ripoti zinaarifu kwamba filamu hiyo imetengeneza dola 70 milioni sokoni ndani ya siku chache hizo.

Huyu Jordan Peele ni nani?

Ni raia wa Marekani ambaye kwa kujieleza atakwambia ni produsa wa filamu, mchekeshaji, mwigizaji na pia mwelekezi.

Alizaliwa mjini New York na kulelewa na mama pekee kule Manhattan.

Mamake Lucinda Williams ni Mzungu, babake akiwa mwenye asili ya watu weusi.

Akiwa katika chuo cha anuwai, alishindwa kuendelea na masomo yake kisa? Mshawasha wa kuanzisha kundi la komedi na mmoja wa marafiki zake shuleni humo.

Aliendelea kuifukuzia ndoto hiyo ya kuwa mchekeshaji akishiriki kwenye vipindi mbalimbali vya runinga. Hata hivyo alipata umaarufu mkubwa alipojiunga na shoo ya televisheni ya ucheshi Mad TV, 2003 na kudumu nayo hadi 2012.

Alipoondoka, aliendelea kujishugulisha na uzalishaji wa shoo yake Key & Peele aliyokuwa akishirikiana na mshikaji wake wa karibu waliyekuwa naye kwenye Mad TV, Keegan Michael Key.

Shoo yao hiyo walianza kuiandaa 2010 hivyo alipoondoka Mad TV, aliongeza juhudi zaidi. 2014 aliigiza kwenye ‘series’ ya Fargo akivalia uhusika wa jasusi wa FBI.

Miaka miwili baadaye pamoja na Key walitengeneza filamu yao ya kwanza Keanu ambayo haikuwa mbaya wala nzuri sana.

Februari 2017 aliachia filamu yake ya kwanza Get Out kama produsa solo iliyoishia kufanya vizuri sana. Kwa bajeti ya dola 4.5 milioni, filamu hiyo iliishia kutengeneza dola 255 milioni kimauzo.

Filamu hiyo ndiyo iliyomfungulia njia ikiwemo kumshindia tuzo yake ya kwanza ya Oscars katika kitengo cha ‘Best Original Screenplay’.

Mwaka 2018 Peele aliandaa filamu nyingine iliyofanya vizuri BlacKkklansman iliyooongozwa na mwelekezi filamu mkongwe Spike Lee.

Kwa bajeti ya dola 15 milioni, filamu hiyo iliingiza dola 90 milioni sokoni kando na kumshindia Spike Lee tuzo ya Oscars 2019 katika kitengo cha ‘Best Adapted Screenplay’.

Kufuatia matokeo hayo, Jordan ameprodusi filamu yake ya pili ya kuogofya, Us ambayo mauzo tayari yamefunika maradufu bajeti yake ya dola 20 milioni.

Mkwanja

Utajiri wake umekadiriwa kuwa wa dola 12 milioni. Ukwasi huu umetokana na malipo ya kazi zake kwenye tasnia ya uigizaji.
Tayari ameshaangukia dili mpya ya kuwa mzalishaji wa ‘series’ ya kuogofya Lovecraft Country inayomilikiwa na kampuni ya HBO.

Jumba

Pamoja na mkewe wanaishi katika mtaa wa Los Feliz ,waishiko mastaa kibao. Huko wanamiliki mjengo wa nguvu walioununua Julai 2017 kwa dola 2.3 milioni mwezi mmoja tu baada ya kuwekwa kwenye mnada.

Jumba hilo lina vyumba vitatu vikuu vya kulala, bustani ya aina yake na dimbwi la kuogelea, pamoja na uwanja mdogo wa kuchezea.

Usafiri

Kwenye usafiri, anamiliki baadhi ya magari yenye bei mbaya yakiwemo Audi A3 na Mercedez Benz.

Mahusiano

Alianzisha mahusiano yake na mchekeshaji mwenzake Chelsea Peretti 2013. Mwanzoni hakukusudia kumwoa lakini mambo yalikuja kubadilika.

Walichumbiana Novemba 2015 na kufunga harusi yao Aprili 2016. Mwaka mmoja baadaye wakajaliwa kupata mtoto wa kiume Beaumont Gino Peele.