HALI ya wasiwasi ilizuka nje ya Kanisa la Redeemed Gospel, Buruburu jijini Nairobi, Jumapili baada ya mamia ya vijana kuandamana wakitaka haki itendeke kwa mwanamke aliyenaswa kwenye video akidhulumiwa na wenzake.

Katika video ambayo imesambaa sana kwenye mitandao ya kijamii, mwanamke huyo anaonekana akishambuliwa na kuzuiwa kutoka kwenye chumba na wasichana wanne. Tukio hilo liliwakasirisha Wakenya wengi, huku baadhi ya watumiaji wa mitandao ya kijamii wakidai mmoja wa wasichana wanaodaiwa kumshambulia mwanamke huyo ni mshirika wa kawaida wa kanisa la Burubuviru.

Hata hivyo, mchungaji wa kanisa hilo, Felix Kavoli, alipuuzilia mbali madai kwamba yeye ni baba wa mmoja wa wasichana hao.

“Waambieni watu wa mitandao ya kijamii kwamba wamekosea, wameelewa vibaya na wanakuja mahali pasipofaa. Sina binti anayesoma katika Chuo Kikuu cha Riara. Binti zangu ni watu wazima na wanafanya kazi, na majina yao yanajulikana. Sina mtoto anayesoma katika Chuo Kikuu cha Riara,” akasema Mchungaji Kavoli.

Mchungaji huyo pia aliwaambia waandamanaji wa Gen-Z kwamba tukio hilo la madai ya unyanyasaji halikutokea kanisani na hivyo hawakupaswa kusababisha vurugu huko.

“Halimhusu Mchungaji Kavoli na lilifanyika huko nje. Kwa nini shetani analipinga kanisa?” akauliza.

Polisi walizunguka kanisa hilo baada ya maandamano, huku maafisa wa kukabiliana na ghasia wakitumwa eneo hilo wakati waandamanaji wakitaka haki kwa mwathiriwa.

“Tuko hapa kudai haki kwa Jahenda (anayedaiwa kuwa mwathiriwa). Kwa nini kanisa linaunga mkono hili?” akasema mmoja. Wengine waliitaka kanisa lichukue hatua dhidi ya wasichana wanaodaiwa kuhusika katika tukio hilo. “Haki kwa Jahenda. Haki daima. Amani, amani, amani,” kijana mwengine alisema.

Jumamosi, Chuo Kikuu cha Riara kilithibitisha kuwa baadhi ya watu wanaoonekana kwenye video hiyo ni wanafunzi wake na kulaani tukio hilo, kikisema hatua zitachukuliwa.

“Tumeona video ambayo imesambazwa mtandaoni ikionyesha wasichana kadhaa wakimtishia na kumshambulia mwanamke mwengine katika eneo linaloonekana kuwa choo cha umma. Chuo Kikuu cha Riara kinalaani vikali vitendo vya unyanyasaji, vitisho, maonevu, au utovu wa nidhamu,” akasema Makamu Mkuu wa Chuo hicho katika taarifa.

Chuo hicho kiliongeza kuwa ingawa tukio hilo linalodaiwa lilitokea nje ya chuo, tabia hiyo ilikiuka moja kwa moja maadili ya taasisi hiyo na kanuni za maadili ya wanafunzi.

“Uongozi wa chuo umeanza uchunguzi wa ndani kuhusu suala hilo kwa mujibu wa Kanuni za Maadili ya Wanafunzi na sera za taasisi, na tumejitolea kushirikiana na kitengo cha uchunguzi,

“Chuo Kikuu cha Riara kinaendelea kujitolea kudumisha elimu iliyo salama, yenye heshima na inayowajibika, kama ambavyo tumekuwa tukifanya,” ikasema taarifa hiyo.