USHINDANI wa ugavana wa Mombasa katika uchaguzi wa 2027 unatarajiwa kupima uwezo wa vyama vya upinzani kuungana dhidi ya Rais William Ruto ili kudhibiti nyadhifa muhimu za uongozi katika kaunti hiyo.

Kiongozi wa Jubilee Party, Fred Matiang’i, ametangaza kuwa chama hicho kitawasilisha wagombea katika nyadhifa zote za uchaguzi katika eneo la Pwani 2027, huku vyama vya upinzani vikiendelea na mazungumzo kuhusu uwezekano wa kuwa na mgombea mmoja wa urais.

Hatua hiyo inaiweka Jubilee katika ushindani wa moja kwa moja na Wiper, ambapo Mbunge wa Nyali, Mohamed Ali, anapanga kuwania ugavana wa Mombasa kupitia tiketi ya chama hicho.

Mbunge wa zamani wa Kisauni, Bw Ali Mbogo, pia anawania kiti hicho cha Gavana Abdulswamad Nassir wa ODM kupitia tiketi ya Jubilee.

Awali, kinara wa chama cha Democracy for the Citizens Party (DCP), Bw Rigathi Gachagua, alikuwa ametangaza kumuunga mkono Bw Ali, bila kujali iwapo atawania kiti hicho kwa tiketi ya DCP au Wiper.

Dkt Matiang’i alisema Jubilee tayari kina watu wanaotaka kuwania nyadhifa mbalimbali Pwani, lakini hakutaja baadhi yao kwa sababu bado wanahudumu serikalini akisema huenda wakaandamwa iwapo watatambuliwa kabla ya kujiuzulu.

“Tuna wagombea wengi ambao wanataka kuwania viti vya kisiasa kupitia chama chetu katika eneo hili. Tuna wagombea watatu katika kila kiti cha kisiasa huku Pwani, kwa hivyo tutafanya uteuzi ili kumpata mgombea bora zaidi,” alisema.

Jubilee pia imekuwa ikiandaa mikutano ya mashinani inapojitayarisha kwa Kongamano la Kitaifa la Wajumbe (NDC). Dkt Matiang’i alichukua uongozi wa chama hicho kutoka kwa Rais mstaafu Bw Kenyatta mwezi uliopita.

Alisema Jubilee imewasilisha kanuni zake za uteuzi kwa Tume Huru ya Uchaguzi na Mipaka (IEBC) na inajiandaa kufanya uteuzi wa wagombea kote nchini.

Dkt Matiang’i pia alitetea uamuzi wake wa kuacha kazi katika Benki ya Dunia na kurejea nchini Kenya, akisema vijana wa Kenya, hasa kizazi cha Gen Z, walimtafuta wakitumia mtandao wa kijamii kabla ya kurejea kwake.

“Nilipigiwa simu na vijana wa Gen Z kabla sijarejea hapa kutoka Benki ya Dunia. Jambo hilo lilikuwa kila mahali, kwenye mitandao ya kijamii,” alisema.

Alipuuza madai kwamba kurejea kwake katika siasa kulifadhiliwa na Bw Kenyatta.

“Hapana. Mkitaka kuuliza kuhusu mfadhili, wafadhili wangu ni wananchi wa Kenya,” alisema.

Dkt Matiang’i alijiunga na Benki ya Dunia baada ya kuondoka serikalini 2022 na kurejea Kenya mwaka 2025 na kutangaza azma yake ya kuwania urais. Jubilee imemuidhinisha kuwa mgombea wake wa urais katika uchaguzi wa 2027.

Alisema kampeni yake inaungwa mkono na wakenya wa kawaida, wakiwemo wanaochanga fedha kwa ajili ya shughuli zake.

“Urais unahitaji fedha nyingi, lakini mnajua kuwa azma yangu ya kuwania urais ni tofauti. Niliitwa kuja kuwatumikia Wakenya. Ni wao wanaofadhili kampeni zangu. Wananichangia fedha kwa ajili ya kampeni zangu, huku wengine wakinipatia fedha za mafuta ya gari,” alisema.

Dkt Matiang’i alisema anawania urais kwa sababu anaamini Kenya inahitaji kiongozi mwenye uzoefu katika utumishi wa umma na utaalamu katika kusimamia Idara za serikali.

“Nina uzoefu katika utumishi wa umma baada ya kuhudumu katika wizara mbali mbali. Nimefanya kazi kwa karibu na rais wa zamani na ninaamini mimi ndiye mgombea anayefaa zaidi kuchukua uongozi wa nchi hii,” alisema.

Alisema atakabiliana na ufisadi, ubadhirifu wa rasilimali za umma, ushuru wa juu, ukosefu wa usalama na siasa za kikabila.

Pia alikosoa sera za elimu za utawala wa Kenya Kwanza, hasa mfumo mpya wa ufadhili wa masomo ya vyuo vikuu, akidai kuwa baadhi ya wanafunzi wameshindwa kuendeleza masomo kutokana na changamoto za ufadhili.