WANAFUNZI katika vyuo vikuu vya umma wanaendelea kuathirika kufuatia mgomo wa wahadhiri unaoingia wiki ya tatu, huku wahadhiri wakisisitiza hawatasitisha mgomo hadi matakwa yao yatimizwe.

Wanafunzi wamelalamikia gharama ya maisha bila masomo, huku wakitaka serikali na vyama vya wafanyakazi kutatua mzozo huo.

“Tunatumia pesa tulizopanga kwa muhula hata wakati hakuna masomo. Muhula ukiongezwa, mahitaji yetu ya kifedha yanaongezeka,” alisema Remmy Osoti, mwanafunzi wa mwaka wa nne katika Chuo Kikuu cha Multimedia.

Katibu Mkuu wa Chama cha Wahadhiri wa Vyuo Vikuu (Uasu), Dkt Constantine Wasonga, alisema chama hicho kimekataa pendekezo la serikali la Sh12 bilioni, kikidai kuwa halitoshelezi mahitaji yao.

Wahadhiri wanataka kulipwa Sh7.9 bilioni  malimbikizi ya mishahara, pamoja na kuongezwa kwa mishahara na marupurupu.

Dkt Wasonga alisema vyuo vikuu vina takriban wanafunzi 700,000 lakini wahadhiri 10,000 pekee, ambapo 1,000 wana majukumu ya kiutawala.

Alisema wanataka serikali kuajiri wahadhiri zaidi, kuboresha malipo ya wahadhiri wa muda na kufadhili utafiti badala ya kutarajia wahadhiri kutumia pesa zao.

Pia wanataka marupurupu kuunganishwa na majadiliano kuhusu mzigo wa kazi yafanywe kwa makubaliano.

Wasonga alionya kuwa hawatakubali makubaliano ya kurejea kazini walazimishiwe, akisisitiza kuwa pande zote lazima zijadiliane kuhusu mkataba wa pamoja wa kazi wa 2025–2029.