RAIS William Ruto amemshambulia mtangulizi wake Uhuru Kenyatta, akimtaja kama dalali wa kisiasa anayepoteza muda kuwaunganisha viongozi wa upinzani badala ya kushughulikia changamoto zinazowakabili Wakenya.

Ruto alisema Uhuru ameachana wajibu wake kama kiongozi wa kitaifa na sasa anashughulika kutafuta mgombea mmoja wa upinzani kuelekea uchaguzi mkuu wa 2027.

Alikuwa akizungumza jana alipohitimisha ziara yake ya siku nne katika eneo la Gusii, iliyohusisha kaunti za Kisii na Nyamira.

“Nimesikia kuhusu huyo sponza, rafiki yangu. Je, hamumjui? Ameacha kuwa kiongozi wa kitaifa na sasa amekuwa dalali. Anajaribu kuunganisha huyu na yule. Namwambia aharakishe kazi yake ya udalali na atafute mtu anayemtafuta,” alisema Ruto.

Rais alidhihaki juhudi za upinzani kupata mgombea wa pamoja, akisema viongozi hao wamekuwa wakizunguka hoteli, nyumba za watu na mazishi kwa mwaka mmoja na nusu bila kufikia makubaliano.

Alisema ikiwa viongozi hao wanachukua muda mrefu kukubaliana kuhusu mgombea mmoja, itakuwa vigumu kwao kupanga masuala ya nchi yenye watu milioni 60.

“Wamekuwa kwa mwaka mmoja na nusu wakimtaja huyu au yule kuwa mgombea wao. Wanazunguka kutoka hoteli moja hadi nyingine na nyumba moja hadi nyingine. Ikiwa wanachukua muda wote huo kupata mgombea mmoja, watawezaje kupanga mambo ya watu milioni 60?” aliuliza.

Aliongeza kuwa yuko tayari kukabiliana na upinzani bila kujali iwapo utawasilisha mgombea mmoja, kumi au hata 1,000.

Ruto pia alikosoa madai ya Uhuru kwamba amekuwa akizungumza na wananchi wa kawaida anapokwenda kununua uji, akisema Rais mstaafu huyo anapaswa kutafuta maoni kutoka kwa wakulima, wafanyabiashara na walimu badala ya watu anaokutana nao kwenye baa.

Alimshauri Uhuru kutafuta ushauri kutoka kwa watu anaowataja kuwa wenye busara na wanaofanya kazi, akidai kuwa taarifa anazopata kutoka kwa watu wanaokunywa pombe hazionyeshi hali halisi ya nchi.

Uhuru alikuwa amezungumza katika ibada ya kumuaga binamu yake Beatrice Wambui Muturi katika Kanisa la PCEA Nairobi West, Lang’ata.

Aliwataka viongozi wa upinzani kuweka kando tofauti zao na kuungana kuelekea uchaguzi wa 2027.

Ibada hiyo ilihudhuriwa na viongozi wa upinzani akiwemo aliyekuwa Naibu Rais Rigathi Gachagua, kiongozi wa Wiper Kalonzo Musyoka na Eugene Wamalwa wa DAP-K.

Ruto pia alimshambulia Gachagua, akimuonya dhidi ya kile alichokitaja kuwa siasa za uchochezi na ukabila.

Alimtaja kama kiongozi aliyeshindwa katika nyadhifa mbalimbali, ikiwemo kazi ya utumishi wa umma, ubunge na unaibu wa rais.

Alidai kuwa Gachagua hana mamlaka ya kimaadili ya kuwahubiria wengine, huku akimlaumu kwa kuhusika na matumizi mabaya ya chakula cha msaada alipokuwa afisa wa utawala katika miaka ya 1980 na 1990.

“Wakenya hawana muda na watu wanaochochea chuki, ubaguzi na ukabila,” alisema.

Rais aliongeza kuwa hataruhusu Gachagua kusababisha machafuko au kugawanya wananchi kwa misingi ya makabila kabla ya uchaguzi.

Katika ziara hiyo ya Gusii, Ruto alizindua ujenzi wa barabara ya Keroka-Ibacho-Kiamokama, mradi wa kusambaza umeme katika maeneo ya mashambani na chuo cha mafunzo ya matibabu (KMTC)_ 0Ibeno.