Gavana wa Kirinyaga Anne Waiguru amejitosa rasmi katika kinyang’anyiro cha kuwania wadhifa wa Naibu Rais unaoshikiliwa kwa sasa na Kithure Kindiki katika uchaguzi mkuu wa 2027, akisema yuko tayari kuwa mgombeaji mwenza wa Rais William Ruto.

Waiguru alisema huu ni mwaka wa tatu akijaribu kuwania nafasi hiyo, baada ya juhudi zake mbili za awali kutofanikiwa. Sasa amewataka washirika wake kuanza kampeni za kumshawishi Rais amchague kuwa naibu wake.

Alisema jamii ya Mlima Kenya inastahili uwakilishi wa kutosha katika uongozi wa kitaifa na kwamba usawa wa kijinsia unapaswa kuzingatiwa katika nafasi za juu serikalini.

“Hii ni mara yangu ya tatu na ninaamini nitafanikiwa. Namuomba Dkt Ruto anizingatie kuwa mgombeaji mwenza wake katika uchaguzi mkuu,” alisema.

Akizungumza na viongozi wa mashinani kutoka eneobunge la Ndia katika eneo la Gacharu Ijumaa jioni, Waiguru alisema ana uzoefu unaomfanya astahili nafasi hiyo.

Alitaja kuhudumu kwake kwa mihula miwili kama gavana na kuwa mwenyekiti wa Baraza la Magavana (CoG) kama baadhi ya sifa zake, akisema rekodi yake ya maendeleo inajieleza.

“Nimejaribiwa na kuthibitishwa. Nimekuwa gavana kwa mihula miwili na mwenyekiti wa Baraza la Magavana. Ninafaa kuwa Naibu Rais, na watu wangu wanapaswa kuwa na ujasiri wa kumwambia Rais hilo atakapozuru eneo hili,” alisema.

Waiguru pia aliwataka wakazi wa Mlima Kenya kutounga mkono upinzani katika uchaguzi wa 2027 kwa sababu ya mzozo kati ya Rais Ruto na aliyekuwa naibu wake Rigathi Gachagua.

Alionya kuwa kujitenga na serikali kunaweza kufanya jamii hiyo kupoteza nafasi katika uongozi wa kitaifa kwa miaka mingi.

Alisema eneo hilo linapaswa kuangalia maslahi yake ya kisiasa na kiuchumi ya muda mrefu badala ya kufanya maamuzi kwa hasira au kutokana na uhasama kati ya viongozi.

“Hatuwezi kusema mtu mmoja alikuwa mbaya na mwingine mzuri. Hatupaswi kuchukua upande kabla ya kusikiliza pande zote mbili. Ikiwa Rigathi ni mzuri na anapendwa sana, kwa nini viongozi wenzake hawamuungi mkono?” aliuliza.

Gavana huyo alisema Ruto bado ana uungwaji mkono katika maeneo mbalimbali nchini na kwamba upinzani una kazi kubwa kushinda urais.

Alisema mgombeaji urais anahitaji kupata zaidi ya asilimia 50 ya kura zote pamoja na angalau asilimia 25 ya kura katika zaidi ya nusu ya kaunti.

Waiguru alitetea uamuzi wake wa kumuunga mkono Ruto, akisema jamii ya Wakikuyu imeenea nchini kote na haiwezi kujitenga na jamii nyingine.

Alitaja Wakikuyu wanaoishi Nyanza, Kisii na Bonde la Ufa, akisema siasa za kujitenga zinaweza kuhatarisha mshikamano wa kitaifa na kufufua migawanyiko ya zamani ya mwaka 1997 na 2007.

Kuhusu kuvunjika kwa uhusiano kati ya Ruto na Gachagua, alisema jamii nzima haipaswi kuadhibiwa kisiasa kutokana na tofauti za viongozi hao.

Alidai Gachagua alishindwa kukabiliana na majukumu ya ofisi ya Naibu Rais, hali iliyosababisha kuondolewa kwake. Hata hivyo, hakueleza zaidi madai hayo.

Waiguru alisema ushirikiano wake na serikali ya kitaifa umemwezesha kutafuta miradi na rasilimali kwa ajili ya Kirinyaga, kaunti  inayoshindana na maeneo mengine kupata mgao wa maendeleo.

Alisema kuwa kuwa kwenye upinzani kunaweza kufanya iwe vigumu kwake kushirikiana na Rais katika kutafuta ufadhili wa miradi ya kaunti.

Kuhusu azma yake ya kuwa naibu rais, alisema wanawake wanapaswa kupewa nafasi katika uongozi wa juu kwa sababu wana mitazamo tofauti na wanaweza kuleta mwelekeo mwingine katika uongozi.

“Nimejitokeza kuzingatiwa kwa nafasi ya Naibu Rais. Wanawake huleta mtazamo tofauti na kuimarisha imani katika uongozi. Ninaamini wakati umefika wa kuwapa wanawake nafasi,” alisema.

Azma yake iliungwa mkono na baadhi ya viongozi waliohudhuria mkutano huo. Mbunge wa Kirinyaga ya Kati Gachoki Gitari aliwataka wakazi kutoruhusu uhasama wa kibinafsi kati ya wanasiasa kuamua mwelekeo wa eneo hilo.

Naye kiongozi wa wengi katika Bunge la Kaunti ya Kirinyaga, Benson Ngahu, alisema serikali jumuishi inatoa nafasi kwa jamii hiyo kuendelea kushiriki katika uongozi wa kitaifa.

Aliwataka wakazi kumuunga mkono Waiguru akisema upinzani hauna cha kuwapa.