Washirika wa Rais William Ruto katika eneo la Mlima Kenya wameanzisha mkakati mpya wa kisiasa unaolenga kumrejeshea angalau asilimia 40 ya kura za eneo hilo katika Uchaguzi Mkuu wa 2027, licha ya kuongezeka kwa ushawishi wa aliyekuwa Naibu Rais Rigathi Gachagua.

Mpango huo unaoitwa Diehard Movement unaongozwa na Mbunge wa Laikipia Mashariki Mwangi Kiunjuri na mwenzake wa Ndia, George Kariuki. Unalenga kujenga mtandao wa wafuasi wa Ruto katika ngazi za mashinani badala ya kutegemea mikutano mikubwa ya kisiasa.

Kiunjuri alisema lengo lao ni kuthibitisha kuwa bado kuna wakazi wa Mlima Kenya wanaomuunga mkono Rais na walio tayari kufanya kampeni kuhakikisha anapata angalau asilimia 40 ya kura za eneo hilo.

Alisema harakati hizo zitajikita katika kaunti za Meru, Tharaka Nithi, Embu, Nyeri, Murang’a, Kirinyaga, Nyandarua, Laikipia, Nakuru, Nairobi, Kiambu na Lamu.

Mpango huo unajumuisha mikutano ya wananchi, mashindano ya kandanda kwa vijana na kuunda mitandao ya viongozi wa mashinani watakaohamasisha wapiga kura.

Kariuki alisema washirika hao hawana muda wa kukaa kwenye mikutano ya ndani, bali wanataka kuzungumza moja kwa moja na wananchi na kuwaeleza kuhusu miradi ya maendeleo ya serikali, hasa barabara.

Hata hivyo, alikiri kuwa bado hawajafikia kiwango wanachotaka, akisema serikali imekosa kiongozi mwenye ushawishi wa kuwaunganisha viongozi wa eneo hilo tangu Gachagua alipoondolewa mamlakani.

Harakati hizo zinajitokeza huku Gachagua na rais mstaafu Uhuru Kenyatta wakionekana kuwa na ushawishi mkubwa miongoni mwa sehemu ya wakazi wa Mlima Kenya. Gachagua amekuwa akisema eneo hilo lilisalitiwa na Ruto na linapaswa kumwadhibu katika uchaguzi ujao.

Gachagua alitumia ushindi wa chama chake cha DCP katika uchaguzi mdogo wa Ol Kalou kama ishara ya kile anachotarajia kufanikisha mwaka 2027, akisema ushindi huo wa asilimia 85 aliopata Ruto mwaka 2022 utakuwa mdogo ikilinganishwa na atakachomfanyia.

Akijibu, Kiunjuri alisema Diehard haitategemea mikutano mikubwa pekee, bali kujenga mtandao wa watu wanaoweza kushawishi wapiga kura katika kila eneo.

Alisema kila kaunti itakuwa na angalau watu 20 watakaoratibu shughuli za kisiasa, huku wale watakaoshindwa kutimiza malengo wakibadilishwa.

Mchambuzi wa siasa John Okumu alisema Ruto hawezi kukaa kimya akitazama eneo hilo likigeuka dhidi yake.

Alisema kupata asilimia 40 ya kura za Mlima Kenya kunaweza kuwa muhimu kwa ushindi kitaifa, kwani Rais hahitaji tena kupata ushindi mkubwa kama ule wa 2022, bali kubaki na uungwaji mkono wa kutosha.

Mlezi wa baraza la wazee la Kiama Kia Ma, Kung’u Muigai, alisema hasira za kisiasa hazipaswi kuwa msingi wa maamuzi ya eneo hilo. Alionya kuwa kumuondoa Ruto bila kuwa na mbadala kunaweza kuwa hatari kwa mustakabali wa Mlima Kenya.

Naye Naibu Spika wa Seneti Kathuri Murungi alisema washirika wa Ruto hawalengi kurejesha uungwaji mkono wa kila mtu, bali kupata kura za kutosha kumwezesha kushindana.

Mbunge wa Maragua Mary Wamaua alisema mkakati huo unalenga kuunganisha wafuasi wa Ruto katika familia za kisiasa za eneo hilo.

Kiunjuri alisema Mlima Kenya haupaswi kuingia uchaguzi wa 2027 ukiwa na lengo la kulipiza kisasi, bali unahitaji mazungumzo na mpango utakaohakikisha unaendelea kushiriki katika uongozi wa kitaifa.

Hata hivyo, mafanikio ya Diehard yatategemea iwapo washirika wa Ruto wataweza kubadilisha mikakati yao kuwa kura halisi, katika eneo ambalo upinzani unaendelea kuimarisha ushawishi wake.