ABIRIA mmoja amefariki baada ya kupata tatizo la kiafya akiwa ndani ya ndege ya Kenya Airways (KQ) iliyokuwa ikisafiri kutoka Nairobi kuelekea Lagos, Nigeria.

Kwa mujibu wa Kenya Airways, abiria huyo alipoteza fahamu muda mfupi kabla ya ndege kutua katika Uwanja wa Kimataifa wa Murtala Muhammed, Lagos, Jumanne usiku.

Shirika hilo lilisema Jumatano kwamba tukio hilo lilitokea mwendo wa saa tatu usiku kwa saa za Nigeria, takriban dakika 20 kabla ya muda uliopangwa ndege kutua.

“Kenya Airways PLC inathibitisha kwamba mnamo Jumanne, Oktoba 6, 2026, ndege yetu kutoka Nairobi kuelekea Lagos ilikumbwa na hali ya dharura ya kiafya ndani ya ndege ikiwa eneo la Nigeria,” KQ ilisema.

Shirika hilo lilisema abiria huyo alipatikana amepoteza fahamu takriban dakika 20 kabla ya ndege kutua Lagos.

Ndege hiyo ilitua katika uwanja huo mwendo wa saa tatu na dakika arobaini na moja usiku, ambapo wahudumu wa afya waliingia ndani ya ndege kumhudumia abiria huyo.

KQ ilisema hali ya abiria huyo ilizidi kuwa mbaya ndege ikiwa angani, na hivyo wafanyakazi wa ndege wakaanza taratibu za kukabiliana na dharura.

Wahudumu wa ndege walitoa huduma ya kwanza huku wakijiandaa  kutua Lagos, ambako wahudumu wa afya walikuwa wameandaliwa kupokea ndege hiyo.

Kenya Airways iliwasilisha pole kwa familia na marafiki wa marehemu na kuomba radhi kwa usumbufu uliosababishwa na tukio hilo.

“Tunatuma pole zetu za dhati kwa familia na marafiki wa marehemu na tunaomba radhi kwa usumbufu wowote ambao tukio hili huenda limesababisha. Tunaheshimu faragha na utu wa wote waliohusika,” shirika hilo lilisema.

KQ ilisema inashirikiana na familia ya marehemu, mamlaka za eneo hilo na wadhibiti wa sekta ya usafiri wa anga kutoa msaada unaohitajika na kuwezesha taratibu zinazohitajika kufuatia kifo hicho.

Shirika hilo halikufichua jina wala uraia wa abiria huyo.

Hili si tukio la kwanza ambapo abiria wa Kenya Airways anafariki baada ya kupata dharura ya kiafya akiwa safarini.

Aprili 2025, abiria mzee aliyekuwa akisafiri kwa ndege ya KQ kutoka New York kuelekea Nairobi alifariki baada ya kuugua akiwa ndani ya ndege. Ndege hiyo ilielekezwa kutua Entebbe, Uganda, ili abiria huyo apate matibabu ya dharura, lakini alitangazwa kufariki kabla ya ndege kutua.

Mwaka 2022, Kenya Airways pia ilirekodi vifo vitatu vya abiria ndani ya kipindi cha takriban wiki nne katika safari kati ya Nairobi, Mombasa, New York na Casablanca.

Tukio la kwanza lilitokea Agosti 22, 2022, katika ndege ya KQ003 iliyokuwa ikitoka New York kuelekea Nairobi. Abiria mmoja aliugua akiwa ndani ya ndege na safari hiyo ikaelekezwa Casablanca, Morocco. Baada ya kutua, wahudumu wa afya walimhudumia lakini wakathibitisha  alikuwa amefariki.

Siku 10 baadaye, Septemba 1, 2022, abiria mwingine aliyekuwa akisafiri kwa ndege ya KQ002 kutoka Nairobi kwenda New York alipatikana akiwa hajitambui na baadaye kuthibitishwa kuwa amefariki.

Mnamo Septemba 14, 2022, abiria mwingine alipata matatizo makubwa ya kupumua wakati wa kupanda ndege ya KQ612 kutoka Nairobi kwenda Mombasa. Wahudumu wa afya walifika, lakini abiria huyo alifariki katika Uwanja wa Ndege wa Kimataifa wa Jomo Kenyatta (JKIA).

Visa hivyo vinaonyesha changamoto ambazo mashirika ya ndege na wahudumu wa afya hukabiliana nazo pale abiria anapopata dharura kubwa ya kiafya akiwa safarini.