KIONGOZI wa Kanisa Katoliki duniani, Papa Leo Novemba 29, 2025, alitembelea Msikiti wa Blue Mosque jijini Istanbul, akivua viatu vyake kama ishara ya heshima lakini hakuonekana kusali katika ziara yake ya kwanza katika sehemu ya ibada ya Kiislamu tangu achaguliwe kuwa Papa.

Papa Leo yuko katika ziara ya siku nne nchini Uturuki.Papa huyo, ambaye ni Mmarekani wa kwanza kuongoza Kanisa Katoliki, aliinama kidogo kabla ya kuingia ndani ya msikiti huo na kisha akatembezwa katika jengo hilo kubwa linalobeba waumini 10,000, akiwa pamoja na imamu wa msikiti na mufti wa Istanbul.

Akivalia soksi nyeupe, Papa Leo alionekana mchangamfu, akitabasamu mara kwa mara katika ziara hiyo ya dakika 20.

Alijibizana kwa mzaha na mmoja wa waelekezi wake.

Hata hivyo, kulikuwa na utata kutoka Vatican baada ya ziara hiyo, kwani Papa hakuonekana akisali, na pia hakupewa mapokezi rasmi ndani ya msikiti na mkuu wa taasisi ya masuala ya dini ya serikali ya Uturuki, Diyanet, kama ilivyokuwa imetangazwa awali.

Takriban saa tatu baada ya tukio, Vatican ilitoa taarifa kwa vyombo vya habari ikidai kwamba maombi na mapokezi rasmi yalifanyika, jambo ambalo halikutokea.

Baadaye ilifafanuliwa kuwa taarifa hiyo ilitumwa kimakosa na ofisi ya habari ya Vatican.

Askin Musa Tunca, mwadhini wa msikiti, aliwaambia waandishi wa habari kwamba alimuuliza Papa wakati wa ziara iwapo angependa kusali kwa muda, lakini Papa akasema alipendelea “kutembelea msikiti tu.”

Baada ya ziara, Vatican ilitoa taarifa ikisema kuwa Papa Leo “alitembelea msikiti huo kwa moyo wa kutafakari na kusikiliza, na kwa heshima ya kina kwa mahali hapo na imani ya waumini wanaokusanyika humo kusali.”

Ingawa hakusali, Papa alionekana kufurahia mazungumzo na Tunca.

Alipotoka nje kupitia mlango ambao kwa kawaida hutumiwa kuingia, akiona kibao kilichoandikwa ‘No Exit’, Papa Leo alisema kwa tabasamu:
 “Imeandikwa hakuna kutoka.” Tunca akamjibu: “Hautaki kutoka, unaweza kubaki hapa.”

Papa yuko nchini Uturuki hadi leo katika safari yake ya kwanza nje ya nchi kama kiongozi wa Kanisa Katoliki, ziara ambayo pia itamfikisha Lebanon.

Kabla ya kuchaguliwa kuwa Papa mwezi Mei, Leo hakuwa anafahamika sana kimataifa, hivyo mitazamo yote imeelekezwa katika hotuba zake za kwanza nje ya Italia.Msikiti huo, unaojulikana rasmi kwa jina la Sultan Ahmed I, ulijengwa na mtawala wa Milki ya Ottoman kati ya 1603 na 1617.

Umepewa jina maarufu la Blue Mosque kutokana na maelfu ya vigae vya samawati vinavyopamba kuta zake.

Upo mkabala na Hagia Sophia, kanisa kuu la kale la Byzantium ambalo Papa Leo hakutembelea — jambo lililotafsiriwa kuwa tofauti na ziara za mapapa waliomtangulia.