Vizingiti vinavyokabili azma ya useneta ya Winnie Odinga
TANGAZO la Mbunge wa Bunge la Jumuiya ya Afrika Mashariki (EALA) Winnie Odinga kuwa atawania useneta wa Nairobi unatarajiwa kuvuruga muungano wa Linda Mwananchi na upinzani siasa za 2027 zikishika kasi.
Seneta wa sasa wa Nairobi, Edwin Sifuna, ametangaza kuwa hatatetea kiti chake na analenga uongozi wa nchi ili kumwondoa Rais William Ruto.
Akiongea wakati wa maadhimisho ya mwaka mmoja tangu kifo cha babake Raila Odinga, Winnie alisema kuwa sasa analenga kiti cha useneta wa Nairobi lakini hakuweka wazi iwapo atafanya hivyo kupitia ODM.
“Najua watu wengi wamekuwa wakiuliza mahali nipo na mahali naenda. Leo nataka kuwajibu ili isiwe uvumi tena,” akasema mbunge huyo wa EALA, Alhamisi.
“Ifahamike kuwa Edwin Sifuna akisaka afisi nyingine, kuna nafasi katika kiti cha useneta Nairobi na ndiyo maana nimeamua kuwania useneta wa Nairobi. Siendi peke yangu bali naenda na vijana,” akaongeza.
Kambi ya Linda Mwananchi ambako Winnie anaegemea, pamoja na viongozi wa upinzani kwa jumla wamekuwa wakisukuma wito wa umoja ambapo wanalenga ushirikiano katika kugawa viti kwenye baadhi ya maeneo hasa Nairobi na Mombasa.
Iwapo kutakuwa na muafaka kati ya Linda Mwananchi na upinzani kuhusu kugawana viti Nairobi basi huenda Winnie akajipata pagumu kwa sababu tayari Linda Mwananchi imetangaza kuunga mkono Babu Owino kuwania ugavana.
Kizingiti cha pili kinachomchongea Winnie zaidi ni kwamba ni vigumu sana kwa viti vya ugavana, ubunge, uwakilishi wa kike na useneta kushikiliwa na jamii moja Nairobi. Tangu uchaguzi wa 2013 viti hivyo vimeshikiliwa na viongozi kutoka jamii tofauti.
Tatu, iwapo Linda Mwananchi itashirikiana na upinzani kugawana viti Nairobi basi itakuwa vigumu kuachiwa ugavana na useneta au mbunge mwakilishi wa kike.
Katika mrengo wa upinzani tayari Mbunge wa Embakasi Kaskazini James Gakuya ametangaza kulenga ugavana kupitia DCP. Aliyekuwa Naibu Rais Rigathi Gachagua na kinara wa Wiper Kalonzo Musyoka mnamo Novemba 2025 walisema vyama hivyo vitagawana nyadhifa za ugavana, useneta na mbunge mwakilishi wa kike wa Nairobi.
Nne, tangazo la Winnie linajiri wakati nduguye, Raila Junior, tayari alikuwa amemuidhinisha Mbunge wa Lang’ata Phelix Odiwuor maarufu Jalang’o, kugombea useneta wa Nairobi. Jalang’o amekuwa akiandamana na Rais William Ruto katika ziara mbalimbali jijini Nairobi ambapo amekuwa akirejelewa kama seneta.
Baada ya Winnie kutangaza azma yake ya useneta Jalang’o aliandika kwenye mitandao ya kijamii kwamba “Niko tayari’.
“Ningependa kumwambia mheshimiwa Jalas hongera sana kwa kusimama. Sisi tuko nyuma yako kama ODM,” akasema Raila Junior katika hafla moja ya viongozi wa ODM jijini mapema mwezi huu.
Tano, kwa kuwa Winnie anaonekana kuegemea mrengo wa Linda Mwananchi ambao unapinga kuchaguliwa tena kwa Rais Ruto, binti huyo wa mwendazake Raila Odinga atakuwa na kibarua kikali kushawishi wanachama wa ODM wamuunge mkono katika azma yake ya 2027.