KUNDI la Wawakilishi wa Bunge la Kaunti (MCAs) ya Kitui na Wanachama wa Wiper wamemtaka kiongozi wao, Kalonzo Musyoka, kujiondoa kwenye Muungano wa Azimio iwapo kiongozi wa Chama cha ODM, Raila Odinga, ataendelea kushinikiza mazungumzo na serikali ya Kenya Kwanza inayoongozwa na Rais William Ruto.

Wawakilishi hao wa wadi wakiongozwa na Kiongozi wa Wengi na Mwakilishi wa Wadi ya Kyuso, Bw Munyoki Mwinzi, walionyesha kutoridhishwa kwao na shambulio la hivi karibuni dhidi ya Bw Musyoka katika Taasisi ya Jaramogi Oginga Odinga Jumatano jioni.

Mwakilishi wa Wadi ya Kyome Thaana, Bw Alphonse Musyimi, alisisitiza kuwa Kenya iko tayari kwa mabadiliko na akamtaka Rais Ruto kushughulikia masuala yaliyoibuka kutokana na mkutano wake na Gen Z kabla ya kuanzisha mazungumzo yoyote ya kitaifa.

“Rais alivunja Baraza la Mawaziri bila mashauriano au mazungumzo yoyote. Ashughulikie yote yaliyoibuka kabla ya kuanzisha mazungumzo,” alisema Bw Musyimi.

Viongozi hao walidai kuwa wanasiasa fulani wa ODM wanatafuta nafasi ndani ya serikali ya Kenya Kwanza.

Bw Musyimi alimhimiza Raila Odinga kujiondoa na kusitisha wito wowote wa mazungumzo na Ruto hadi atakaposhughulikia masuala hayo.

“Usiruhusu maslahi binafsi yazidi yale ya Wakenya. Umekuwa hapo awali, lakini haikuwa kwa manufaa ya Wakenya. Tumeshachoka na mazungumzo; tunahitaji vitendo,” alisema.

Walieleza kuwa wanaunga mkono msimamo wa Kalonzo wa “Vitendo sio Mazungumzo,” wakisisitiza upinzani wao dhidi ya mazungumzo na utawala wa sasa.

Walilaani uvamizi na kuvuruga kwa waandishi wa habari na wahuni, wakidai kuwa shambulio hilo lilipangwa vizuri ili kumdhalilisha Bw Kalonzo na viongozi wengine wa Azimio, na kuwashinikiza kubadilisha msimamo wao na wa Chama cha Wiper katika kukataa juhudi zozote za serikali ya Ruto kupitia ODM kujiunga na Serikali ya Umoja wa Kitaifa.

“Tunasimama na kiongozi wetu wa chama na tamko lililotolewa tarehe Julai 10, 2024 la ‘Vitendo sio Mazungumzo.’

Hatutawaacha Gen Z na Kenya katika wakati huu muhimu sana katika historia kwa sababu ya wahuni waliokodishwa na wasio na adabu wanaofanya kazi chini ya maagizo wazi kutoka kwa washirika wa ODM,” alisema Bw Mwinzi.

Mwakilishi wa Wadi ya Kivou, Bw Sammy Munyithya, pia alilaani shambulio dhidi ya waandishi wa habari, akisema kuwa ni dhihirisho la wazi kwamba ODM imejiunga na watesi wa Kenya.

“Serikali ya Kenya Kwanza hivi karibuni imewashambulia, kuwateka nyara, na hata kuwafyatulia risasi wanahabari.

Hii ni jaribio la kunyamazisha nguvu ya vyombo vya habari na hivyo kuwanyima Wakenya fursa ya kujua kinachoendelea nchini mwao,” alisema Bw Munyithya.

Mwakilishi wa Wadi ya Kwavonza, Bw Mark Nding’o, alisisitiza kuwa Gen Z wanadai uwajibikaji, kutokomeza ufisadi, na uongozi, masuala ambayo Rais anaweza kushughulikia bila kuhusisha Wiper, ODM, au Muungano wa Azimio.

“Azimio iko ukingoni mwa kuporomoka, kwa jinsi mambo yalivyo. Kiongozi wa Chama cha Wiper, Kalonzo Musyoka, Kiongozi wa Chama cha Narc Kenya, Martha Karua, Kiongozi wa DAP-Kenya, Eugene Wamalwa, na Kiongozi wa Jubilee, Jeremiah Kioni, wote wanaonekana kupinga mazungumzo, wakati ODM pekee ndiyo inayosisitiza mazungumzo,” alionya Bw Nding’o.

Viongozi hao walimtaka Raila Odinga kuwaomba radhi viongozi wengine wa Muungano wa Azimio kwa tukio la Jumatano.