Jinsi ya kuandaa sharubati tamu ya tende, maziwa na njugu karanga

Na MARY WANGARI

Utahitaji viungo vifuatavyo

½ kikombe cha tende

1 gilasi ya maziwa freshi

1 kijiko cha njugu karanga zilizosagwa (si lazima)

Unaweza ukaongeza viungo tulivyoorodhesha ili kutengeneza sharubati zaidi kulingana idadi ya unaowaandalia.

Jinsi ya kuandaa

Andaa tende zako kwa kuzitoa kokwa.

Katika sufuria safi, mimina maziwa yako, yabandike jikoni na uyachemshe kabisa ili kuyafanya kuwa salama kwa kuua viini na bakteria.

Chukua tende zako ulizozitoa kokwa na uzitie katika bakuli safi.

Mimina maziwa kwenye tende zako na uziloweke kwa muda wa kati ya dakika 10-15 ili zilainike vyema.

Baada ya hapo mimina mchanganyiko huo wa tende zilizolowekwa kwa maziwa katika mashine ya kusagia, almaarufu blender.

Washa blenda yako na usage mchanganyiko huo hadi ushikamane vizuri na kuwa mzito.

Ongeza njugu karanga zilizosagwa na usage pamoja ili kuongeza ladha na uzito, isiwe nyepesi mno.

Sasa sharubati yako ipo tayari. Unaweza kuihifadhi jokofuni ili ipate baridi kidogo kabla ya kuinywa au kuwaandalia wapendwa na wageni wako.

Aidha, unaweza kuacha ishikamane kidogo na kuila kama ‘ice cream’