Ibrahimovic ajifunga kabla ya kuongoza AC Milan kuzamisha Bologna kwenye Serie A

Na MASHIRIKA

ZLATAN Ibrahimovic alifungia AC Milan bao la mwisho baada ya kujifunga mwanzoni mwa kipindi cha pili katika mchuano wa Ligi Kuu ya Italia (Serie A) uliowakutanisha na Bologna mnamo Jumamosi usiku.

AC Milan walisajili ushindi wa 4-2 katika mechi hiyo na kupaa hadi kileleni mwa jedwali la Serie A kwa alama 25, moja zaidi kuliko nambari mbili Napoli.

Rafael Leao aliwafungulia Milan ukurasa wa mabao kutokana na krosi ya Ibrahimovic katika dakika ya 16 kabla ya Adama Soumaoro wa Bologna kuonyeshwa kadi nyekundu.

Tukio hilo liliwafanya Milan kuwateremkia wenyeji wao na wakafunga bao la pili kupitia Davide Calabria katika dakika ya 35. Baada ya Ibrahimovic kujifunga katika dakika ya 49, Bologna walisawazisha mambo kupitia Musa Barrow dakika tatu baadaye.

Hata hivyo, Roberto Soriano wa Bologna alionyeshwa pia kadi nyekundu kwa utovu wa nidhamu na hilo likachochea Milan kupata mabao zaidi kupitia Ismael Bennacer na Ibrahimovic.

Chini ya kocha Stefano Pioli, Milan kwa sasa wameshinda mechi zao tano zilizopita ligini.

Ibrahimovic aliyekuwa akiwajibishwa kwa mara ya kwanza msimu huu, ndiye mwanasoka wa nne wa Serie A kuwahi kufunga bao baada ya kutimu umri wa miaka 40. Wengine ni Alessandro Costacurta, 41, pamoja na Silvio Piola na Pietro Vierchowod wenye umri wa miaka 40 kila mmoja.

Isitoshe, Ibrahimovic ndiye mwanasoka wa mwenye umri wa miaka 40 kuwahi kuchangia bao katika Serie A baada ya Francesco Totti aliyefanya hivyo mnamo Februari 2017.

Ilikuwa mara ya pili kwa Ibrahimovic kujifunga katika taaluma yake ya usogora kwenye ngazi ya klabu. Aliwahi pia kujifunga katika ushindi wa 3-1 uliosajiliwa na Milan dhidi ya Chievo mnamo 2010.

TAFSIRI NA: CHRIS ADUNGO