Makarios ya kocha, Geoffrey ‘Jombe’ Osoro ilitandika Ping FC mabao 2-0 nao wanasoka wa DN Hotstars waliandika ushindi wa magoli 3-0 mbele ya Ngong 1960 FC.Makario ambayo hushiriki mechi za Nairobi West Regional League ilipoteza dakika kumi za kwanza kabla ya kujipanga na kuanza kushusha soka la kuvutia.

Kikosi hicho kilitesa wapinzani wao na kupata bao la kwanza dakika ya 16 kupitia Javan Mukoya. Pande zote ziliendelea kukabiliana ambapo kabla ya dakika 45 kukatika Peter Njenga alifungia Makarios bao la pili.

”Tunashukuru wachezaji wetu kwa ufanisi huo ambapo tunatarajia kufahamu wapinzani wetu katika robo fainali mnamo Jumatatu kati ya FIFA Best na Soka Talent,” katibu wa Makarios, Josphat Karuri alisema.

Nayo Ngong 1960 ilijikuta kwenye wakati mgumu baada ya kushindwa kutimiza azma ya kusonga mbele mikononi mwa DN Hotstars.  Washindi hao walivuna mabao hayo kupitia Esau Opiyo, Newton Ochieng na Collins Chibole waliotikisa wavu mara moja kila mmoja.