Faida za matunda aina ya pepino melon

NA MARGARET MAINA

PEPINO melon pia wakati mwingine huitwa tunda bora kwa sababu ya faida zake nyingi za kiafya.

Matunda yenye lishe bora pia yana antioxidants, yana pia diuretiki. Aidha, yanasaida katika kujenga mfumo wa kinga.

Nyongeza ya nishati asilia

Tunapata nishati yetu kutoka kwa glukosi iliyohifadhiwa katika mwili wetu, inayotokana na chakula tunachokila.

Pepino melon ina uwezo wa kuvunja glukosi hii kuwa nishati. Seli hizi za sukari huhifadhiwa katika mwili wako kama mafuta. Kwa hivyo wakati ujao unapokuwa dhaifu, chukua Pepino na upate nishati nzuri.

Kutuliza maumivu na machungu

Pepino melon inaweza kusaidia kutuliza maumivu na machungu katika mwili wote. Kwa wengi, hiki ni chakula cha jadi cha kupigana na kuvimba.

Kupunguza lehemu

Kama vile shayiri, nyuzinyuzi nyingi kwenye Pepino hudhibiti viwango vyako vya lehemu. Nyuzi mumunyifu haziathiri lehemu moja kwa moja lakini hufunga kolesteroli mbaya na kuiondoa kutoka kwa mwili.

Nyuzi mumunyifu zinaweza kupunguza ufyonzwaji wa lehemu ya chini- kwenye mkondo wako wa damu na kuruhusu lipoprotini zenye msongamano wa juu kuufanya mwili wako kufanya kazi kwa njia inayotakikana.

Faida za usagaji chakula

Kwa kuwa na nyuzinyuzi nyingi, Pepino inaweza kuwa dawa bora kwa watu ambao wana matumbo yanayowasumbua kwa sababu ya uvimbe. Vitamini C kwenye Pepino huwezesha mwili kunyonya virutubisho kutoka kwa chakula kikamilifu. Inaweza pia kutumika kama dawa bora ya kutuliza vidonda vya tumbo. Matatizo ya utumbo huathiri watu wanaosumbuliwa na magonjwa ya figo. Tunda hili linaweza kuwa na manufaa kwao pia.

Mifupa yenye nguvu

Sote tunajua kuwa kalsiamu ni sehemu muhimu ya mifupa yenye nguvu na yenye afya. Lakini sio wengi wetu tunajua kuwa vitamini K huweka mifupa yetu kuwa na nguvu na afya, kuweka kalsiamu kwenye mifupa na kuizuia kukusanyika kwenye mishipa. Hasa wakati mifupa inapoanza kuwa dhaifu wakati wa kuzeeka, vitamini K bado inaweza kudumisha afya nzuri ya mfupa. Na miongoni mwa vyanzo vya vitamini K, Pepino ni chaguo bora.

Husaidia afya ya ini

Pepino inaweza kusaidia watu ambao wana magonjwa ya ini. Kuimarisha ini ni mojawapo ya njia bora za kuongeza nishati, kusawazisha uzito, na kuimarisha afya kwa ujumla. Nyuzinyuzi katika tunda la Pepino huondoa sumu mwilini, kusafisha ini na kuimarisha afya yake kwa ujumla. Kwa kuwa ini ndio msingi wa kazi nyingi za mwili, ini yenye afya husaidia afya yako kwa ujumla.