Liverpool vs Spurs patachimbika leo!

NA MASHIRIKA

LONDON, UINGEREZA

LIVERPOOL na Tottenham Hotspur watakutana ugani Anfield leo Jumamosi kila mmoja akitumai kuharibia mwenzake ili ajiweke pazuri kushinda Ligi Kuu (EPL) au kuingia Klabu Bingwa Ulaya (UEFA), mtawalia.

Vijana wa kocha Jurgen Klopp watapata pigo katika kampeni ya kuvua Manchester City ubingwa, ikiwa watajikwaa dhidi ya Tottenham Hotspur.

Spurs nao watajiweka pabaya kuingia UEFA wasipovuna ushindi.

City imekaa juu ya jedwali kwa alama 83 ikifuatiwa na Liverpool (82), Chelsea (66), Arsenal (63) na Tottenham (61) katika usanjari huo.

Liverpool, ambayo imeshinda taji la Carabao Cup na iko katika fainali ya UEFA na Kombe la FA, ina rekodi nzuri dhidi ya Tottenham.

Katika takwimu za ana kwa ana za mechi 10 zilizopita, Liverpool imetawala saba, kupiga sare mbili na kupoteza mara moja. Kichapo hicho kilikuwa 4-1 Oktoba 2017.

Inamaanisha Liverpool haijapoteza dhidi ya wapinzani hao mara tisa mfululizo. Luis Diaz, Sadio Mane, Mohamed Salah na Diogo Jota ni baadhi ya washambulizi Tottenham italazimika kuwanyamazisha ili kupata kitu cha mchuano huo.

Kocha Antonio Conte anajivunia silaha kali Harry Kane, Dejan Kulusevski na Son Heung-min zinazoweza kudhuru Liverpool.

Jumla ya michuano sita inasakatwa leo Jumamosi ikiwemo Watford kuzuru Crystal Palace katika mechi ya kufa-kupona.

Watford inahitaji zaidi ya miujiza kukwepa kushushwa ngazi itakapozuru uga wa Selhurst Park.

Vijana hao wa kocha Roy Hodgson, ambao wako katika nafasi ya 18 kwa alama 22, wana nafasi finyu ya kusalia juu.

Mbali na kuhitajika kushinda michuano yao yote nne iliyobaki, Watford pia wanaomba nambari 16 Burnley na nambari 17 Leeds zipoteze mechi zao zote dhidi ya Aston Villa na Arsenal mtawalia, wikendi hii.

Norwich tayari imeaga Ligi Kuu ilipochapwa 2-0 na Aston Villa wikendi iliyopita.