UEFA: Fainali ya Man City na Chelsea kuandaliwa jijini Porto na kuhudhuriwa na mashabiki 12,000

Na MASHIRIKA

FAINALI ya Klabu Bingwa Ulaya (UEFA) msimu huu kati ya Chelsea na Manchester City itachezewa mjini Porto, Ureno mnamo Mei 29, 2021 na kuhudhuriwa na jumla ya mashabiki 12,000; yaani 6,000 kutoka kila kikosi.

Mchuano huo ulihamishwa kutoka uga wa Ataturk Olympic, Uturuki kwa sababu ya masharti makali ya kudhibiti janga la corona katika nchi ya Uingereza iliyopiga marufuku ziara za kuingia nchini Uturuki.

Ureno ni miongoni mwa mataifa ambayo hayako katika orodha ya nchi ambazo zimepigwa marufuku na Uingereza na mashabiki wako huru kuhudhuria fainali ya UEFA bila kuhitajika kuingia karantini watakaporejea nyumbani.

“Haikuwa haki kuwanyima mashabiki fursa adimu ya kuhudhuria pambano kali la fainali ya soka ya haiba kubwa zaidi barani Ulaya. Nina furaha kwamba suluhu kwa suitafahamu iliyokuwepo imetatuliwa,” akasema raia wa Shirikisho la Soka la bara Ulaya (Uefa), Aleksander Ceferin.

Awali, kulikuwa na mapendekezo kutoka kwa vinara wa Uefa na Shirikisho la Soka la Uingereza (FA) kwa fainali hiyo kuandaliwa uwanjani Wembley, Uingereza ila mwafaka kati yao na Serikali ya Uingereza ukakosa kupatikana kwa sababu ya kanuni za karatini kwa wadhamini, wageni mashuhuri na wanahabari.

Chelsea na Man-City wamekiri kwamba wanashauriana zaidi na washikadau mbalimbali kuhusu jinsi ya kufanikisha mpango wa kutoa tiketi za mahudhurio kwa mashabiki wao.

Man-City wamefichua kwamba watadhamini usafiri wa mashabiki wao kutoka jijini Manchester, Uingereza hadi Porto, Ureno huku wakishikilia kwamba wataanza kuuza tiketi mnamo Mei 24, 2021.

Hii ni mara ya pili mfululizo kwa fainali ya UEFA kuandaliwa nchini Ureno baada ya fainali ya msimu uliopita wa 2019-20 kati ya Bayern Munich na Paris Saint-Germain (PSG) kufanyika jijini Lisbon. Bayern kutoka Ujerumani walitawazwa washindi baada ya kupiga PSG 1-0.

TAFSIRI NA: CHRIS ADUNGO

UCL: Bayern na PSG kukabana tena

PARIS, Ufaransa

Huku wakikabiliwa na kibarua kigumu cha kubadilisha kichapo cha 3-2 kutoka kwa Paris Saint-Germain (PSG) katika pambano la Klabu Bingwa barani Ulaya, Bayern Munich watakuwa ugenini leo usiku kwa mechi ya marudiano ugani Parc des Princes jijini hapa.

Ushinidi wa ugenini ugani Allianz unawapa PSG matumaini ya kusonga mbele na kufuzu kwa nusu-fainali ya michuano hii ya thamani kubwa.

Mwishoni mwa wiki, vijana hao wa kocha Mauricio Pochettino waliandikisha ushindi mkubwa wa 4-1 dhidi ya Strasborg katika mechi ya Ligi Kuu ya Ufaransa (Ligue 1), wakati Bayern wakiweza tu kupata sare ya 1-1 dhidi ya Union Berlin.

Katika mkondo wa kwanza, Bayern walicheza bila mfungaji wao mkuu Robert Lewandowski, wakati PSG walinufaika pakubwa kupitia kwa Kylian Mbappe aliyefunga mabao mawili. Eric Maxim Coupo-Moting na Thomas Muller walifunga mabao ya Bayern simu hiyo.

PSG hawajawahi kushindwa nyumbani kwao na klabu ya Ujerumani, huenda wakaendeleza rekodi hiyo kwa kubandua mabingwa hao watetezi. Hata hivyo haitakuwa mteremko dhidi ya vijana wa Hansi Flick ambao wataingia uwanjani kuwania mabao ya mapema kwa lengo la kubadilisha mtokeo ya 3-2.

Bayern wameshindwa katika hatua hii mara moja tu katika misimu 10 iliyopita, waliposhindwa katika mkondo wa kwanza wa mechi za maondoano msimu wa 2014-15.

Kikosini, kocha Flick anajivunia wachezaji wa kila aina, wakiwemo Jamal Musiala na Marcus Ingvartsen.

Wataingia uwanjani wakati wakiendelea kufanya vizuri katika ligi kuu ya Bundesliga ambako wanaongoza kwa mwanya wa pointi tano mbele ya RB Leipzig.

UEFA Robo Fainali: Bayern vs PSG, Real Madrid vs Liverpool

Na MASHIRIKA

LIVERPOOL watakutana na Real Madrid kwenye robo-fainali za Klabu Bingwa Ulaya (UEFA) msimu huu.

Manchester City wametiwa katika zizi moja na Borussia Dortmund huku Chelsea wakipangwa pamoja na FC Porto. Mabingwa watetezi Bayern Munich watakutana na Paris Saint-Germain (PSG), timu ambayo waliipiga kwenye fainali ya UEFA mnamo 2019-20 jijini Lisbon, Ureno.

Katika nusu-fainali, mshindi kati ya Real na Liverpool atakutana na mshindi wa gozi kati ya Porto na Chelsea huku Man-City au Dortmund wakikutana na mshindi kati ya Bayern na PSG.

Mechi za mikondo miwili ya robo-fainali itasakatwa kati ya Aprili 6-7 na Aprili 13-14, 2021.

Michuano ya mkondo wa kwanza wa nusu-fainali itatandazwa kati ya Aprili 27-28 huku marudiano yakiandaliwa kati ya Mei 4-5, 2021.

Liverpool na Real waliwahi kukutana kwenye fainali ya UEFA mnamo 2018 na miamba hao wa Uhispania wakashinda 3-1 na hivyo kutia kapuni taji lao la 13 kwenye historia ya kivumbi hicho.

Timu hizo mbili zimewahi kukutana mara sita kwenye soka ya UEFA, kila mmoja akishinda mara tatu, ukiwemo ushindi wa 1-0 uliosajiliwa na Liverpool katika fainali ya 1981.

Mara ya mwisho kwa vikosi hivyo kukutana kwenye hatua ya mwondoano wa UEFA ni 2009 walipovaana katika hatua ya 16-bora. Liverpool waliibuka na ushindi wa jumla ya mabao 5-0 na kudengua Real.

Man-City ambao kwa sasa wanaongoza jedwali la Ligi Kuu ya Uingereza (EPL) wamewahi kukutana na Dortmund mara moja pekee, katika hatua ya makundi ya UEFA mnamo 2012. Wakati huo, Man-City walilazimishiwa sare ya 1-1 katika mkondo wa kwanza uwanjani Etihad kabla ya kupigwa 1-0 kwenye marudiano yaliyoandaliwa ugani Signal Iduna Park, Ujerumani.

Man-City wanaowania kombe la UEFA kwa mara ya kwanza, wanafukuzia jumla ya mataji manne msimu huu. Huenda wakakutana na fowadi chipukizi raia wa Uingereza, Jadon Sancho, aliyeagana nao mnamo 2017 na kuyoyomea Dortmund.

Fowadi matata raia wa Norway, Erling Braut Haaland ambaye ni mtoto wa kiungo wa zamani wa Man-City, Alf-Inge Haaland, pia anachezea Dortmund na amefungia kikosi hicho jumla ya mabao 20 kutokana na mechi 14 zilizopita za UEFA.

Kufikia sasa, Dortmund wanashikilia nafasi ya tano kwenye msimamo wa jedwali la Ligi Kuu ya Ujerumani (Bundesliga). Walimfuta kazi kocha Lucien Favre mnamo Disemba 2020 na kumpa mikoba mkufunzi mshikilizi Edin Terzic.

Chelsea wamewahi kukutana na Porto mara nane, wakashinda mara tano na kupoteza mara mbili. Mabingwa hao wa zamani wa EPL waliwalaza Porto ambao ni miamba wa soka kutoka Ureno kwa jumla ya mabao 3-2 kwenye hatua ya 16-bora ya UEFA mnamo 2007.

Kocha Thomas Tuchel ambaye kwa sasa anadhibiti mikoba ya Chelsea, aliwaongoza PSG kutinga fainali ya UEFA mnamo 2019-20 na wakapokezwa kichapo cha 1-0 kutoka kwa Bayern. Bao hilo la pekee lilifumwa wavuni na kiungo mvamizi raia wa Ufaransa, Kingsley Coman na Bayern wakashinda taji la UEFA kwa mara ya sita.

Tuchel aliagana rasmi na PSG mwishoni mwa Disemba 2020 na akapokezwa mikoba ambayo Chelsea walimpokonya kocha Frank Lampard mnamo Januari 2021.

DROO YA ROBO-FAINALI ZA UEFA 2020-21:

Manchester City na Borussia Dortmund

Porto na Chelsea

Bayern Munich na Paris St Germain

Real Madrid na Liverpool

DROO YA NUSU-FAINALI ZA UEFA 2020-21:

Bayern au PSG na Man-City au Dortmund

Real au Liverpool na Porto au Chelsea

TAFSIRI NA: CHRIS ADUNGO

CORONA: Liverpool hawawezi kusafiri Ujerumani kwa mchuano wa UEFA

Na MASHIRIKA

LIVERPOOL hawataweza kusafiri hadi Ujerumani kwa mchuano wa mkondo wa kwanza wa hatua ya 16-bora ya Klabu Bingwa Ulaya (UEFA) dhidi ya RB Leipzig mnamo Februari 2021.

Ujerumani imepiga marufuku wageni kutoka mataifa mbalimbali, ikiwemo Uingereza, kutokana na kuongezeka kwa maambukizi mapya ya virusi vya corona.

Taarifa kutoka Wizara ya Usalama nchini Uijerumani ilishikilia kwamba Leipzig wanaoshiriki Ligi Kuu ya Ujerumani (Bundesliga) wameelezwa kwamba mchuano huo haujafikia viwango vya kuruhusu kulegezwa kwa kanuni zilizopo kwa sasa za kukabiliana na maambukizi ya janga la corona.

Kwa upande wao, Uefa wamesema kwamba wangali katika mawasiliano ya mara kwa mara na vikosi husika vinavyotarajiwa kunogesha kivumbi hicho.

Liverpool nao watakuwa wakiarifiwa mara kwa mara kuhusu mabadiliko yoyote kuhusiana na mchuano huo.

Vinara wa Uefa wametoa kanuni mpya kuhusu jinsi mechi za hatua ya mwondoano za UEFA na Europa League zitakavyopigwa wakati huu wa janga la corona.

Iwapo kanuni zinazolenga kudhibiti maambukizi katika taifa fulani zitazuia mechi kupigwa, klabu iliyokuwa mwenyeji wa mchuano huo italazimika kupendekeza sehemu nyingine mbadala (nchi tofauti) ya kupigiwa kwa mechi husika.

Hata hivyo, iwapo klabu iliyokuwa ichezee nyumbani itashindwa kufanya hivyo na pasiwe na uwezekano wowote mwingine wa kupigwa kwa mechi husika, basi kikosi cha nyumbani kitachukuliwa kuwa kimeshindwa kwa mabao 3-0.

Kwa kuwa mchuano wa mkondo wa kwanza wa UEFA kati ya Leipzig na Liverpool umepangiwa kupigwa Februari 17, upo uwezekano wa mpangilio wa mechi hiyo kubadilishwa hivi kwamba Liverpool wawe wenyeji wa mkondo wa kwanza kisha Leipzig wawe waandalizi wa mechi ya marudiano mnamo Machi 10, 2021 wakati ambapo baadhi ya kanuni za kudhibiti msambao wa corona nchini Ujerumani zitakuwa zimelegezwa.

Hata hivyo, Uefa huenda ikaamua kivumbi hicho kipigwe kwa kanuni za mikondo miwili (nyumbani na ugenini) katika nchi tofauti au kipute chenyewe kiwe cha mkondo mmoja pekee katika nchi nyingine tofauti.

TAFSIRI NA: CHRIS ADUNGO

Robert Lewandowski anusia rekodi ya Ronaldo ya kufunga mabao kwenye Uefa

Na CHRIS ADUNGO

NYOTA Robert Lewandowski kwa sasa anajivunia kufungia Bayern Munich ya Ujerumani jumla ya mabao 53 kutokana na mechi 44 za mapambano yote ya hadi kufikia sasa msimu huu.

Alifunga bao katika ushindi wa 4-1 dhidi ya Chelsea katika Klabu Bingwa Ulaya (UEFA) mnamo Agosti 8, 2020 na kuwapa waajiri wake tiketi ya kuvaana na Barcelona katika robo-fainali za kivumbi hicho mnamo Ijumaa ya Agosti 14 jijini Lisbon, Ureno.

Lewandowski, 31, kwa sasa amefunga mabao 13 kutokana na mechi saba za UEFA msimu huu na anasalia na magoli manne pekee kuifikia rekodi ya Cristiano Ronaldo aliyewahi kutikisa nyavu za wapinzani wao wa UEFA mara 17 akivalia jezi za Real Madrid mnamo 2013-14.

Iwapo Bayern watatinga fainali ya UEFA msimu huu, ina maana kwamba Lewandowski ambaye pia ni nahodha wa timu ya taifa ya Poland, atakuwa na mechi tatu zaidi za kuivunja rekodi ya Ronaldo ambaye alishuhudia waajiri wake Juventus wakibanduliwa na Olympique Lyon ya Ufaransa kwenye hatua ya 16-bora mnamo Ijumaa iliyopita.

“Sina lengo la kuvunja rekodi ya Ronaldo. Tuna mechi chache muhimu zilizosalia na nia yangu ni kuendelea kuchangia mabao na kufunga nipatapo fursa. Iwapo nitaifikia rekodi ya Ronaldo katika harakati hizo, ieleweke kwamba hayakuwa maazimio yangu ya tangu mwanzo,” akasema Lewandowski.

Ronaldo ambaye ni mzawa wa Ureno, ndiye mfungaji bora wa muda wote katika soka ya UEFA, akijivunia mabao 130.

Lionel Messi wa Barcelona anamfuata kwa mabao 115 huku Lewandowski akishikilia nafasi ya nne kwa magoli 66, moja mbele ya Karim Benzema wa Real.

Aliyekuwa mvamizi matata wa Real, Raul Gonzalez, 43, anashikilia nafasi ya tatu kwa mabao 71.

Ili kumfikia Ronaldo, ina maana kwamba Lewandowski atalazimika kufunga jumla ya mabao 16 kila msimu katika kipindi cha miaka minne ijayo huku uchukulio ukiwa kwamba Ronaldo hatawahi kupachika wavuni goli lolote tena katika UEFA.

Msimu huu pekee, Leandowski amempiku Ronaldo katika ufungaji wa mabao baada ya kutikisa nyavu za wapinzani mara 53 huku Ronaldo akifunga mabao 36 pekee katika mashindano yote ambayo amewawajibikia Juventus.

Rekodi nzuri ya ufungaji wa Lewandowski katika ngazi ya klabu na timu ya taifa msimu huu imechangiwa na mabao manne ya UEFA aliyofunga ugenini dhidi ya Red Star Belgrade mnamo Novemba 26, 2019, kabla ya kujaza kimiani magoli manne katika Ligi Kuu ya Bundesliga dhidi ya Schalke mnamo Agosti 24.

Alifungia Poland mabao matatu katika mechi ya kufuzu kwa fainali za Euro iliyowakutanisha na Latvia ugenini mnamo Oktoba 10.

Katika kipindi cha misimu miwili iliyopita, Lewandowski anajivunia kufungia Bayern jumla ya mabao 67 katika mapambano yote, rekodi yake ikikaribia sasa ile ya Messi ambaye amefungia Barcelona jumla ya magoli 95 kwenye mashindano yote katika misimu miwili iliyopita.

Akida alenga soka ya UEFA

Na CHRIS ADUNGO

LICHA ya kwamba shughuli za michezo bado zimesitishwa katika mataifa mengi duniani kutokana na virusi vya corona, mvamizi Esse Akida wa Harambee Starlets amesisitiza kuwa maazimio yake msimu ujao ni kunogesha soka ya Klabu Bingwa Ulaya (Uefa) akivalia jezi za kikosi cha Besiktas nchini Uturuki.

Akida, 27, aliingia katika mabuku ya kumbukumbu mnamo 2016 baada ya kufungia Starlets bao la kwanza katika historia ya fainali za Kombe la Afrika (AFCON) dhidi ya Ghana. Hata hivyo, walipokezwa kichapo cha 3-1 katika gozi hilo lililosakatwa nchini Cameroon.

Kenya ilipokezwa baadaye vichapo vya 3-1 na 4-0 kutoka kwa Mali na Nigeria mtawalia na ikivuta mkia katika mashindano hayo ya mataifa manane.

Besiktas walimsajili Akida kutoka klabu ya Hapoel Ramat HaSharon FC ya Israel mnamo Februari 2020. Ili kufuzu kwa kivumbi cha Uefa muhula ujao, Besiktas wana ulazima wa kuhifadhi ubingwa wa Ligi Kuu ya Uturuki msimu huu. Ufanisi huo utampa jukwaa la kuweka historia ya kuwa mwanamke wa kwanza mzawa na raia wa Kenya kuwahi kucheza katika soka ya bara Ulaya.

“Kushiriki kipute cha Uefa ndilo jambo kubwa zaidi katika maazimio yangu. Nimejitathmini kwa kina na kutambua kwamba hii ni ndoto ambayo nina uwezo wa kuifikia baada ya corona kudhibitiwa na soka ya Uturuki na Uefa kurejelewa,” akasema Akida katika mahojiano yake na mtandao wa Cafoline.com.

Kufikia jana, Uturuki ilikuwa imeripoti zaidi ya visa 100,500 vya maambukizi ya corona na zaidi ya vifo 2,500 kutokana na janga hilo.

Hadi Ligi Kuu ya Uturuki ilipoahirishwa kwa muda usiojulikana mwanzoni mwa Machi 2020, Akida alikuwa amewajibishwa na Besiktas mara mbili katika kipute hicho ambacho kilikuwa kimefikia raundi ya mechi 15.

Kufikia sasa, Besiktas wanashikilia nafasi ya pili kwa alama 42 kwenye msimamo wa jedwali la Ligi Kuu ya Uturuki (Bayanlar). Ni pengo la pointi moja pekee ndilo linawatenganisha malkia hao wa soka ya Uturuki na viongozi ALG Spor.

Kabla ya kuyoyomea Israel kuchezea FC Ramat, Akisa alikuwa mchezaji wa klabu za Spedag na Thika Queens zinazoshiriki Ligi Kuu ya Kenya (KWPL).

Alipokea malezi yake ya awali kabisa kwenye ulingo wa soka katika klabu ya Moving The Goalposts (MTG) kabla ya kuhemewa na Spedag kisha Thika Queens.

Baada ya kujipatia umaarufu nchini Cameroon mnamo 2016, Akida alipangwa katika kikosi cha kwanza cha Starlets kilichotegemewa na kocha David Ouma kwenye soka ya COTIF jijini Valencia, Uhispania mwaka uo huo. Aliibuka mchezaji bora zaidi (MVP) katika kivumbi hicho.

Akida alivalia jezi za Starlets kwa mara ya mwisho mnamo 2018 katika fainali za Cecafa zilizoandaliwa jijini Kigali, Rwanda.

Mbali na Akida, Kenya inajivunia wanasoka wengine watatu wa kike wanaosakata soka ya kulipwa ughaibuni. Hao ni pamoja ni Annedy Kundu, Ruth Ingosi (Lakatamia, Cyprus) na Vivian Corazon Odhiambo Aquino  wa Atletico Ouriense nchini Ureno.

UEFA: Mipango ipo kukamilisha Champions League na Europa League Agosti 2020

CHRIS ADUNGO na MASHIRIKA

RAIS wa soka ya bara Ulaya (Uefa), Aleksander Cerefin, amesema kwamba shirikisho hilo lina “mipango madhubuti” ya kukamilisha kampeni zote za Klabu Bingwa Ulaya (UEFA) na Europa League kufikia mwisho wa Agosti, 2020.

Robo-fainali na nusu-fainali za vipute hivyo zitahusisha michuano ya mikondo miwili; yaani mechi kuchezwa na kila kikosi nyumbani na ugenini.

“Mambo yalivyo, nina hakika kwamba tutakamilisha kampeni za soka ya Uefa msimu huu,” akasema Cerefin.

Kinara huyo amesisitiza kwamba michuano yote iliyosalia itatandazwa ndani ya viwanja vitupu na ni matumaini yake kwamba ligi kuu nyingi za bara Ulaya zitakamilisha kampeni za muhula huu.

Ligi Kuu ya Uingereza (EPL) inayotazamiwa kuanza upya mnamo Juni 12 imesalia na raundi tisa zaidi muhula huu huku Paris Saint-Germain (PSG) wakitawazwa mabingwa wa Ligi Kuu ya Ufaransa baada ya msimu huu wa 2019-20 kufutiliwa mbali.

Ligi Kuu ya Ujerumani (Bundesliga) ilirejelewa Mei 16, 2020, na ni matumaini kwamba vipute vya Uhispania (La Liga) na Italia (Serie A) vitaanza upya mnamo Juni 13 baada ya wanasoka wote wa klabu za ligi hizo kurejea kambini na kuanza mazoezi.

Kwa mujibu wa Cerefin, klabu zote ambazo ligi zao hazitatamatika rasmi muhula huu zitalazimika kushiriki mchujo ili kufuzu kwa mashindano ya Uefa muhula ujao.

“Hiyo ndiyo itakuwa fomula ya pekee ya kujikatia tiketi za kunogesha vipute vya UEFA na Europa League muhula ujao,” akasema.

Mashindano ya Euro 2020 yaliyokuwa yaandaliwe kuanzia Juni 12 – Julai 12, 2020 sasa yameahirishwa hadi Juni 11 – Julai 11, 2021 baada ya mwafaka wa kuyasogeza mbele kufikiwa mnamo Machi 2020.

Nusu-fainali na fainali ya kipute hicho cha Euro zitapigiwa uwanjani Wembley, London, Uingereza huku michuano ya hatua nyinginezo ikisakatiwa katika miji ya Amsterdam, Baku, Bilbao, Bucharest, Budapest, Copenhagen, Dublin, Glasgow, Munich, Rome na St Petersburg.

Kwa mujibu wa Cerefin, maazimio yao ni kufanikisha maandalizi ya Euro 2021 katika miji mitatu ya awali na Uefa kwa sasa inajadiliana na wasimamizi miji mingine tisa tofauti itakayokuwa wenyeji wa baadhi ya michuano.

“Sioni uwezekano wa kampeni za Euro kufanyika katika miji mitatu pekee. Tunazidi kushauriana na miji mingine tisa ili tuwe na jumla ya 12 japo 10, tisa au hata minane bado itakuwa sawa,” akaongeza.

CITY NDANI: Mambo mazuri kwa Manchester City

Na MASHIRIKA

MANCHESTER, Uingereza

BAADA ya Manchester City kutinga hatua ya 16 Bora ya michuano ya Ligi ya Klabu Bingwa barani Ulaya, kocha wa timu hiyo ameahidi kuelekeza macho yake kwa kinyang’anyiro cha Ligi Kuu ya Uingereza (EPL).

City ambao sasa wanaongoza kundi lao la C wafuzu kwa hatua hiyo licha ya kutoka sare 1-1 na Shakhtar Donestk ya Ukraine kwenye mechi iliyochezewa Itihad, Jumanne usiku.

Ilkay Gundogan alifungia wenyeji bao hilo, huku Donetsk wakipata lao kupitia kwa Manor Solomon.

“Lengo letu lilikuwa kufuzu kwa hatua ya maondoano na sasa tumefanya hivyo,” alisema Guardiola, ambaye aliisaidia Barcelona kutwaa ubingwa wa bara mara mbili.

“Michuano hii itakuwa tofauti kabisa na ngumu kuanzia mwezi Februari, lakini tutasubiri kuona tutakavyofika pale. Ni michuano ambayo inahitaji umakinifu mkubwa zaidi.”

“Michuano ya makundi inachanganya lakini sasa shindano moja limemalizika- tutacheza mechi ya mwisho tukiwa kileleni mwa msimamo- na sasa tunaweza kuelekeza mawazo yetu kwa EPL hadi wakati ratiba ya UEFA itakaporejelewa.”

City, ambao wametwaa ubingwa wa EPL katika misimu miwili iliyopita, kwa sasa wanashikilia nafasi ya tatu jedwalini, kwa mwanya wa pointi tisa nyuma ya Liverpool.

Kutokana na kuwepo kwao katika michuano ya Carabao Cup, kikosi cha Guardiola kikicheza mechi tisa kuanzia Novemba 30 hadi December, ingawa sasa watapata fursa ya kupumzisha wachezaji watakapocheza mechi ya mwisho ya UEFA dhidi ya Dinamo Zagreb ya Croatia mnamo Disemba 11.

Donetsk ambao walikuwa wamefungwa mabao 12-0 na City katika mechi tatu za awali, wakati huu walicheza kwa kiwango cha juu.

City ambao walicheza bila mshambuliaji wao tegemeo Sergio Aguero anayeuguza jeraha la paja, hawakuwa wakali katika safu ya ushambuliaji kama ilivyotarajiwa, licha ya pasi kadhaa kutoka kwa kiungo Kevin de Bruyne.

Hata Jesus aliyepewa nafasi ya Aguero hakuonyesha makali yoyote licha ya kupokea pasi nyingi pamoja na David Silva.

Kwa mashabiki wa City, mchezo wa kikosi chao hakikuwaridhisha hasa wakati huu ligi kuu nchini Uingereza imechacha.

Inakumbukwa kwamba City waliandikisha ushindi mkubwa wa 6-0 dhidi ya Shakhtar miezi 12 iliyopita, lakini walishindwa kuvuma mbele ya mashabiki wao Jumanne.

Shakhtar Donetsk wameshinda mechi moja kati ya tano kwenye kundi hili lakini wanakamata nafasi ya pili na watafuzu iwapo wataishinda Atalanta.

Baada ya matokeo ya Jumanne, Manchester City wanajivunia rekodi ya kutoshindwa katika mechi 10 za makundi katika michuano ya UEFA (wameshinda saba na kutoka sare mara tatu), tangu Septemba 2018 (kikiwemo kichapo cha 2-1 kutoka kwa Shakhtar Donetsk mnamo Decemba 2017).

Shakhtar Donetsk wametoka sare mara tatu mfululizo katika michuano hii kwa mara ya kwanza, kadhalika wameenda mechi nne mfululizo ugenini bila kushindwa baada ya kushinda mara mbili na kutoka sare mara mbili.

Hakuna Matata: Watanzania na Wakenya wazozana baada ya Dortmund kutumia Kiswahili Twitter

Na LEONARD ONYANGO

WAKENYA na Watanzania wanazidi kurushiana cheche za maneno baada ya timu inayocheza ligi ya Bundesliga, Borussia Dortmund, kuandika kwa lugha ya Kiswahili katika akaunti yake ya Twitter.

Timu hiyo ya Ujerumani ambayo iko katika nafasi ya pili kwenye jedwali la Bundesliga baada ya kucheza mechi nne, ilitia picha ya viatu katika mtandao wa Twitter na kisha kuandika: “Hakuna Matata”.

Watanzania na Wakenya waling’ang’ania umiliki wa maneno hayo pamoja na lugha ya Kiswahili.

‘Waafrika bado tuna shida, mbona Wakenya na Watanzania wanagombania Kiswahili? Lugha hii ni yetu sote,” akasema @sn_fahd katika juhudi za kupoza joto.

“Dortmund waje wakite kambi nchini Kenya wakutane na samba. Sinema yenyewe yaonyesha mandhari ya Hells Gate, katika nchi yetu tukufu,” akasema D’von Murimi.

Lakini @FredrickLeria alimjibu kwa haraka kwa kusema: “Hayo ni makosa, wacha waje Tanzania waone samba halisi katika mbuga za Serengeti na Ngorongoro na wapande Mlima Kilimanjaro.”

“Lugha ya Kiswahili ilianzia Mombasa Kenya wakati wa biashara ya watumwa. Someni historia,” akasema @amujkuntakinte.

Lakini Mtanzania @Kamigakikumbise akamjibu bila kupoteza wakati: “Kiswahili kilichoanzia Mombasa hakikuwa Kiswahili halisi, soma historia kwa umakini.”

Mtanzania mwingine @Chaza97_tz akadakia: “Usilete vizungu vingi Kiswahili kimetokea Tanzania.”

“Msidhani Watanzania ni wajinga kiasi hicho, la hasha. Sisi ni wastarabu hatupendi kujivuna kama Wakenya.. sio kwamba tumesinzia na hatuoni mambo mnayotufanyia huwa tunapuuza tu,” akasema @mwangiezeyy aliyoenekana kupandwa na jaziba.

Lakini Alexander Kabelindde alitoa ushauri kwa wapenzi wa Kiswahili:

“Ni jambo la aibu kuanza kukumbushwa juu ya lugha au utamaduni wako na watu wengine. Kama kweli ni lugha yako na unaipenda endelea hivyo hivyo. Kiswahili ni lugha yetu sote. Mnaoendeleza malumbano kuwa chanzo chake ni Tanzania na wengine Kenya, muwe mabalozi wazuri. Msipotoshe.”

Mane kushinda UEFA kwaipa Senegal motisha kufukuzia taji la Afcon

Na GEOFFREY ANENE

WAPINZANI wa Kenya katika mechi za makundi za Kombe la Afrika, Senegal wamepata motisha ya kusema watafukuzia taji nchini Misri baada ya mvamizi wao Sadio Mane kuongoza Liverpool kutwaa taji la Klabu Bingwa Ulaya siku ya Jumamosi.

Mane alikuwa katika kikosi cha Liverpool kilichodhalilisha Tottenham Hotspur 2-0 na kujishindia taji lao la sita la mashindano hayo makubwa barani Ulaya kupitia mabao ya Mmisri Mohamed Salah na Mbelgiji mwenye asili ya Kenya, Divock Origi.

Baada ya ushindi huo, shujaa wa zamani wa Liverpool na Senegal, El Hadji Diouf alinukuliwa na vyombo vya habari akimkumbusha Mane kwamba raia wa nchi hiyo wanatarajia makubwa kutoka kwake katika AFCON.

Aidha, Waziri wa Michezo wa nchi hiyo, Matar Ba alieleza wanahabari nchini humo kwamba anatarajia Mane kuendeleza makali hayo katika mashindano ya Afrika yatakayoanza Juni 21 na kumalizika Julai 19 nchini Misri.

“Kuona Sadio akishinda Klabu Bingwa kunatupa hakikisho na kuongeza matumaini yetu. Najua anafurahia ushindi na Liverpool, lakini tunajua pia anawazia AFCON. Azma yetu ni kushinda Kombe la Afrika.”

Senegal itaanza mechi za Kundi C dhidi ya Tanzania hapo Juni 23 siku ambayo pia Kenya itkabiliana na Algeria. Kenya ya kocha Sebastien Migne inafanyia mazoezi yake nchini Ufaransa ambako mastaa wake wakiwemo Victor Wanyama na Michael Olunga wanatarajiwa kambini juma hili.

Habari kutoka Tanzania zilisema Jumamosi kwamba Taifa Stars imeimarisha mazoezi chini ya Mnigeria Emmanuel Amuneke jijini Dar es Salaam.

UEFA ina heshima kuliko EPL, Klopp amwambia Guardiola

MASHIRIKA NA CECIL ODONGO

MENEJA wa Liverpool Jurgen Klopp amemjibu mwenzake wa Manchester City Pep Guardiola, aliyedai kwamba Ligi Kuu ya Uingereza (EPL) ni ya hadhi kuliko ile ya Klabu Bingwa Barani Ulaya (UEFA).

Guardiola ambaye alishinda EPL kwa mwaka wa pili mfululizo, alijigamba kwamba taji hilo ndilo bora zaidi duniani hasa baada ya kubanduliwa kwenye Uefa na Tottenham Hot Spurs ambao watashiriki fainali dhidi ya Liverpool Jumamosi Julai 1.

Hata hivyo, Klopp ambaye pia anashiriki fainali ya Uefa kwa mwaka wa pili mfululizo, amemjibu mwenzake kwa kumweleza fainali hiyo haisakatwi Uingereza bali uga wa Wanda Metropolitano ambao ni nyumbani kwa Atletico Madrid ya Uhispania.

Kulingana naye hii inaonyesha jinsi fainali hiyo ni ya hadhi mno kuliko EPL anayojivunia Guardiola.

“Pep anajinaki kwamba EPL ni bora kuliko UEFA kwa sababu hajashiriki fainali yake kwa miaka kadhaa sasa. Yeye ni kocha mtajika anayestahili sifa zote anazopewa ila kuhusu hili amenoa kabisa,” akasema Klopp akimjibu Mhispania huyo.

“Ingawa tuliwatoa kijasho chembamba msimu uliokamilika wa 2019/19 katika EPL, walishinda taji hilo kutokana na ubora wa kikosi chao ila wakashindwa kusonga mbele UEFA kwa kutumia kikosi hicho hicho.

“Hii fainali ni ya Bara Ulaya na si Uingereza. Hakuna ubishi kuhusu hilo, hii ni fainali ya mibabe na si Ligi ya Uingereza hata kama ni mara ya tatu tunakutana na Tottenham Hot Spurs,” akaongeza Jurgen Klopp.

Hii ni mara ya tatu kwa Klopp kutinga fainali ya Uefa baada ya kuongoza Borrusia Dortmund kuwakabili mabingwa wa zamani Bayern Munich kwenye fainali ya mwaka wa 2013.

UEFA: Kwa kweli soka haina adabu

NA JOB MOKAYA

WIKI iliyopita, ulimwengu wa soka ulishuhudia maajabu ya nane ya ulimwengu huku maajabu ya saba yakiwa kule kuvuka kwa mamilioni ya kongoni au nyumbu kutoka mbuga ya MaaSai Mara nchini Kenya kuelekea mbuga ya Serengeti, Tanzania.

Timu ya Liverpool kutoka Uingereza iliishinda miamba wa soka ya Uhispania, Barcelona kwa mabao manne bila jibu lolote na hivyo kufuzu kwa fainali ya Kombe la Klabu Bingwa barani Ulaya (UEFA) msimu huu. Mpambano huo ulipigiwa uwanjani Anfield kule Uingereza.

Awali, Barcelona ilikuwa imeishinda Liverpool kwa magoli matatu bila kurejeshewa chochote katika awamu ya kwanza iliyopigwa majuma mawili yaliyopita katika uchanjaa wa Camp Nou, Uhispania.

Mabao mawili ya Messi na jingine moja la Luis Suarez yalitosha kuzamisha Liverpool ndani ya kilindi cha tope mbele ya mashabiki wa Barcelona.

Katika awamu ya marudiano, Liverpool ilihitaji kufunga mabao manne ili kufuzu, jambo ambalo si rahisi haswa unapocheza dhidi ya Barcelona, tena Barcelona inayojivunia huduma za mchezaji bora zaidi duniani, Lionel Messi kutoka Argentina, Amerika ya Kusini.

Kwa Liverpool, hali yao ilizidi kuwa ngumu zaidi pale ambapo wachezaji wawili muhimu ambao wangefunga mabao hayo yaliyohitajika sana walikosa kucheza. Mohamed Salah alipata jeraha baya katika mechi ya Ligi Kuu ya Uingereza (EPL) dhidi ya Newcastle United, naye Robert Firmino raia wa Brazil akawa ameumia mapema kidogo.

Sadio Mane alijipata peke yake pale mbele akiwa na watu asiowafahamu vyema – fowadi wa Ubelgiji mwenye asili ya Kenya, Divock Origi (mwanawe Mike Okoth, yule mshambulizi wa zamani wa Harambee Stars) pamoja na Xhedarn Shaqiri.

Barcelona nao kwa kujua hali ilivyokuwa, walitua Liverpool wakijishaua sana na kutawaliwa na matumaini tele. Matumaini ambayo hayakutimia pale ambapo Origi alicheka na wavu mara mbili naye Mholanzi Georginio Wijnaldum akafunga mabao mawili na kuzamisha kabisa chombo cha Barcelona ugani Anfield.

Wachezaji wa Barcelona hawakuamini kwamba wangefungwa mabao manne bila jawabu hata baada ya wachezaji wa timu hiyo kupata mapumziko ya kutosha. Hata yule mshambuliaji wao hatari anayeitwa Messi alikataa kabisa kupanda basi la timu hiyo na badala yake kuamua kupiga milundi kuelekea hotelini.

Muujiza mwingine wa nane ulifanyika huko Uholanzi wakati Tottenham ilitoka nyuma kwa mabao matatu na kuishinda Ajax Amsterdam kwa mabao matatu kwa mawili na hivyo kutinga fainali. Tottenham ilikuwa imeshindwa katika uwanja wao wa nyumbani wa Wembley kwa bao moja kwa bila jibu.

Baada ya kipenga cha mapumziko kupulizwa, tayari magoli mawili yalikuwa yameingia katika mlango wa Tottenham. Hivyo, timu hii ya kocha Mauricio Pochettino ilihitaji muujiza wa kufunga mabao matatu na kuzuia bao lolote kuingia golini mwao ili ifuzu.

Amini usiamini, muujiza huo ulitendeka. Tottenham ambayo pia haikuwa na mchezaji wake wa kutegemewa, Harry Kane ilileta mchezaji asiyejulikana sana kwa wapinzani – Lucas Moura raia wa Brazil

Ili kujaza pengo lililoachwa wazi na Kane. Na ni huyo Moura aliyefanya mambo kwa kutia tunduni mabao matatu katika kipindi cha lala-salama; na hilo la tatu likaingia katika dakika ya mwisho ya mchezo, la sivyo

Tottenham ingeelekezwa nyumbani na limbukeni Ajax.

Matukio haya mawili yanadhihirisha kwamba soka haina adabu. Soka ya leo si kama soka ya zamani. Zamani kila mmoja alijua kwamba Brasil ingelishinda timu yoyote kwa urahisi katika kipute cha kuwania Kombe la Dunia. Soka haina huruma.

Brazil ilipigwa magoli saba kwa moja na Ujerumani katika fainali za Kombe la dunia kuko huko Brazil mnamo 2014. Hakika, soka haina adabu!

UEFA: Shabiki wa Liverpool afariki akisherehekea bao la Origi

MASHIRIKA NA CHARLES WASONGA

SHABIKI wa Liverpool alifariki juzi alipokuwa akisherehekea bao la nne la timu hiyo dhidi ya timu ya FC Barcelona katika mechi yanusu fainali ya mchuano wa Klabu Bingwa (UEFA) barani Uropa.

Goli hilo lilitiwa kiamiani na mshambulizi matata wa Liverpool Divock Origi baada ya kuunganisha kona iliyochanjwa na beki Trent Alexander-Arnold.

Kulingana na tovuti ya spoti ya Ghanaweb.com, Hebert Dansp Atiko, mwanafunzi wa mwaka wa mwisho anayesomea uhandisi katika Chuo cha Kiufundi cha Akwatia (Akwita Technical School) alianguka vibaya sakafuni bila ufahamu timu hiyo ya Uingereza ilipofunga goli hilo na kuwaacha vijana wa Barcelona hoi.

Goli hilo liliyeyusha kabisa matumaini ya mabingwa hao wa ligi ya kuu ya Uhispania kufika fainali ya mchuano huo.

Msimamizi wa taasisi hiyo, Michael Okyere kwenye mahojiano na wanahabari alisema marafiki wa marehemu walijaribu kummwagia maji baridi kumfufua lakini juhudi zao ziliambulia pakavu.

Hapo ndipo wakamkimbiza katika hospitali ya St Dominic, mjini Akwatia, lakini madaktari wakathibitisha kuwa alikuwa amakata roho.

Mwanafunzi huyo wa mwaka wa nne, ambaye ilisemekana alikuwa akifanya mtihani wake wa mwisho, ana umri wa miaka 29.

Katika mkondo wa kwanza wa nusu fainali hiyo Barcelona ilicharaza Liverpool mabao 3-0.

Lakini juzi waliwashtua miamba hao wa Uhispania kwa kuwazima magoli 4-0 na kujikatia tiketi ya fainali ambapo wakagarazana na timu ya Tottenham Hotspurs.

Mnamo Jumatano usiku Spurs iliandikisha historia kwa kuchapa makinda wa Ajax magoli 3-2 na kufuzu kwa fainali itakayogaragazwa mnamo Juni mosi jijini Madrid, Uhispania.

Katika fainali hiyo Wakenya watajigawa kuwili kushabikia Tottenham ambako Victor Wanyama anasakatia na Liverpool ambapo Divock Origi (mwanawe mchezaji wa zamani wa Harambee Star Mike Okoth) anawajibikia.

Nishabikie Liverpool au Spurs? Sonko ajipata kwa njia panda

Na PETER MBURU

GAVANA wa Nairobi Mike Sonko ni mmoja wa Wakenya wengi wanaoshindwa timu watakayoshabikia katika mechi ya fainali za ya UEFA, baada ya timu za Tottenham na Liverpool kufuzu, zote zikiwa na wachezaji wa kutoka Kenya.

Baada ya Tottenham kucharaza Ajax mabao 3-2 usiku wa Jumatano na Liverpool kunyorosha Barcelona mabao 4-0 Jumanne, timu hizo zilifuzu kwenye fainali ya Jumamosi ya Juni 1, jijini Madrid.

Tottenham iko na Mkenya Victor Wanyama, nayo Liverpool Divock Origi, ambao wanawapa Wakenya wakati mgumu kuamua. Swali ni je, watashabikia timu ipi?

Mashabiki wa soka sasa wamebandika mechi hiyo #AKenyanAffair kutokana na uwepo wa Wakenya wawili katika timu zote, wengine wakiitajakuwa ‘Mashemeji Derby’.

“Kama ilivyotabiriwa, ni suala la Kenya katika fainali za UEFA inayoandaliwa Juni 1, 2019 kati ya Klabu ya Liverpool na Klabu ya Tottenham katika uwana wa Estadio Metropolitano, Madrid, Uhispania. Lakini sasa nimechanganyikiwa kati ya #VictorWanyama na #DivockOrigi nitakuwa upande wa nani,” Sonko akashangaa Alhamisi.

Wakenya wengine wameamua kuzitakia timu zote bahati, na atakayecheza mchezo mwema ashinde.

UEFA: Liverpool waichinja Barcelona na kutinga fainali

NA FAUSTINE NGILA

LIVERPOOL, UINGEREZA

NI HISTORIA! Vijana wa kocha Jurgen Klopp wametinga fainali ya Klabu Bingwa Ulaya Jumanne usiku baada ya kuitia adabu Barcelona 4-0 ugani Anfield katika mechi ya marudiano.

Makeke ya mashabiki yalionekana kuisaidia Liverpool kuizima Barcelona, ambayo iliwapiga 3-0 uwanjani Camp Nou na kuchochea wachanganuzi wengi wa soka kuanza kuipuuza Liverpool, na kusisitiza haikuwa na nafasi ya kufika fainali.

Ni mara ya kwanza tangu mwaka 1986  – wakati Barcelona iliiondoa Gothenburg kwenye pambano hili – ambapo timu imetoka nyuma 3-0 na kushinda mechi ya pili ya nusu fainali.

Straika mzaliwa wa Kenya Divock Origi alikuwa wa kwanza kuonja bao dhidi ya kipa Ter Stegen alipotia kimiani gozi katika dakika ya saba. Lakini kiungo Georginio Wijnaldum alipochukua nafasi ya Robertson, maji yalizidia Barca unga alipowapiga makombora mawili katika muda wa dakika mbili katika kipindi cha pili.

Aidha, matokeo yakiwa 3-3 kijumla, ilibidi beki wa kupanda na kushuka Trent Alexander-Arnold kucheza na akili za madifenda wa Barcelona na kupiga mpira wa kona kwa kasi isiyotarajiwa, ambapo Origi alifunga kazi kwa kucheka na wavu na matokeo ya 4-3 yakawafikisha fainaali ‘miamba wa soka duniani’.

Barcelona waliteswa, wakahangaishwa, wakaduwazwa, wakadhalilishwa kisha wakasagwa na kumumunywa kama pipi huku nahodha wao Lionel Messi akitazama tu, asijue la kufanya ila kujutia kukosa kuilima Liverpool 5-0 ugani Camp Nou.

Kipenga cha mwisho kilililetea jiji zima la Liverpool, majirani Everton, na Uingereza kwa jumla nderemo na vifijo na kuondoa imani ya muda mrefu kuwa timu za Uhispania haziwezi kuzidiwa maarifa na timu za Uingereza kwenye UEFA.

Ikumbukwe Liverpool wanatambulika kwa kutoka nyumba katika mapambano muhimu, hasa kwenye fainali ya 2005 ambapo ilitoka nyumba 3-0 kipindi cha kwanza dhidi ya AC Milan na kushinda taji hilo kwa mara ya tano.

Hii ni mara ya pili kwa Barcelona kuondolewa kwenye kipute hiki ndani ya miaka miwili. Msimu uliopita, timu ya Roma kutoka Italia ilikubali kichapo cha 4-1 uwanjani Camp Nou, lakini ikaipa Barcelona kipigo cha 3-0 katika mechi ya marudiano na kutinga nusu fainali kwa jumla ya mabao 4-4, kutokana na bao la ugenini.

Kwa sasa, mafundi wa soka Liverpool wanatazamia kushinda kombe hili kwa mara ya sita hapo Juni mosi jijini Madrid, Uhispania, watakapomenyana na ama Ajax au Tottenham.

 

Liverpool ina nafasi kutinga fainali UEFA, Daglish asema

NA CECIL ODONGO

NYOTA wa zamani wa Liverpool Kenny Daglish ameeleza matumaini yake kwamba timu hiyo ina uwezo wa kuyafunga mabao matatu na kuibandua Barcelona kwenye kipute cha Klabu Bingwa Barani Ulaya(UEFA) Jumanne Mei 7 ugani Anfield.

“Nafikiri Liverpool bado wana nafasi ya kufika fainali kwenye UEFA ingawa bado wa mlima wa kuukwea dhidi ya Barcelona. Nitakuwa mjinga iwapo nitasema hawana nafasi kabisa ila lazima wamchunge Lionel Messi ambaye anaweza kuzamisha chombo chao zaidi wakilegea,” akasema Daglish ambaye pia aliwahi kuinoa The Reds.

“Ugani Camp Nou, kikosi cha Liverpool kilicheza vizuri na hata kuizidi Barcelona maarifa na iwapo wataendeleza mchezo huo mbele ya mashabiki wa nyumbani, nina hakika watatamba na kuwashangaza wengi,” akaongeza Daglish.

Liverpool wataingia kwenye mchuano huo wakilenga kurejesha kumbukumbu ya mwaka 2005, walipotoka nyuma baada ya kufungwa mabao matatu na AC Milan ya Italia kisha kuyarejesha mabao hayo katika kipindi cha pili na kushinda ubingwa wa UEFA mwaka huo kupitia mikwaju ya penalti.

Hata hivyo, Liverpool wataweza kuyageuza matokeo hayo nyumbani iwapo watawathibiti Messi na Luis Suarez ambao ushirikiano wao umeiwezesha Barcelona kutwaa ubingwa wa Laliga huku wakionyesha ghera ya kutia kapuni taji la UEFA pia.

Messi alifunga mabao mawili katika mkondo wa kwanza na yupo njiani kutwaa taji la mchezaji bora duniani maarufu kama Ballon d’Or hasa baada ya kufikisha idadi ya mabao hadi 600 tangu anze kuchezea Barcelona wiki hii.

Sababu zitakazowavunia Barcelona au City ufalme UEFA

NA MWANDISHI WETU

MECHI za maruadiano ya robo-fainali za kuwania taji la Klabu Bingwa Ulaya (UEFA) msimu huu zitasakatwa wiki hii huku Barcelona na Juventus zikitarajiwa kuwa timu za kwanza kutinga hatua ya nusu-fainali.

Miamba wa soka ya Uingereza, Manchester City watachuana na Tottenham Hotspur uwanjani Etihad mnamo Jumatano, siku ambapo Liverpool nao wanatazamiwa kutua nchini Ureno kurudiana na FC Porto.

Barcelona watakuwa kesho wenyeji wa Manchester United ugani Camp Nou huku Juventus wakialika Ajax ya Uholanzi jijini Turin, Italia.

Chini ya mkufunzi Ernesto Valverde, Barcelona watashuka dimbani wakitawaliwa na hamasa ya kusajili ushindi muhimu wa 1-0 uwanjani Old Trafford katika mchuano wa mkondo wa kwanza wiki jana. Kikosi hicho pia kinapigiwa upatu wa kutawazwa mabingwa wa Ligi Kuu ya Uhispania (La Liga) na Copa del Rey.

Japo kocha Ole Gunnar Solskjaer ana wingi wa imani kwamba vijana wake watatamba ugenini kama walivyofanya dhidi ya PSG katika hatua ya 16-bora, kibarua kichopo mbele yao ni kigumu na kizito zaidi.

Barcelona wanatazamiwa kulipiza kisasi kwa kukizamisha chombo cha Man-United kirahisi na kujikatia tiketi ya kuchuana na Liverpool kwenye hatua ya nne-bora.

Man-United wanajivunia kushinda Barcelona mara moja pekee katika jumla ya mechi nane zilizopita. Walitawazwa mabingwa wa UEFA mara ya mwisho mnamo 2008 baada ya kuwalaza Chelsea nchini Urusi. Mwaka huo, Man-United waliwabandua Barcelona? ambao ni mabingwa mara tano wa UEFA katika hatua ya nusu-fainali.

Liverpool ya kocha Jurgen Klopp watajibwaga uwanjani Estadio do Dragao mnamo Jumatano wakijivunia ushindi wa 2-0 waliousajili dhidi ya Porto ugani Anfield mapema wiki jana.

Liverpool ambao pia ni mabingwa mara tano wa UEFA, hawajapoteza dhidi ya Porto katika jumla ya mechi saba zilizopita.

Baada ya kuwadengua Porto, basi mtihani mgumu zaidi uliopo mbele ya Liverpool ni kuwakung’uta Barcelona ambao iwapo wataponea, basi watajiweka pazuri zaidi kunyanyua ubingwa wa UEFA msimu huu kwa kuwapiku ama Man-City au Juventus.

Historia inawaweka Barcelona katika nafasi nzuri zaidi ya kuwapepeta Liverpool na hivyo kutinga fainali ambayo kwa asilimia kubwa, inatazamiwa kuwakutanisha na Man-City wanaofukuzia mataji manne chini ya kocha Pep Guardiola.

Kikosi hicho kinatarajiwa kuwika zaidi mbele ya mashabiki wa nyumbani na kubatilisha matokeo ya 1-0 yaliyosajiliwa na Tottenham dhidi yao wiki jana.

Ushindi kwa Man-City utawapa hamasa zaidi ya kuwakomoa Juventus katika nusu-fainali. Chini ya mkufunzi Massimiliano Allegri, Juventus wanaojivunia huduma za Cristiano Ronaldo, wanatazamiwa kuwazima Ajax waliowalazimishia sare ya 1-1 katika mchuano wa mkondo wa kwanza.

Ajax ambao ni wafalme mara nne wa UEFA, hawana ushindi katika mechi nne zilizopita dhidi ya Juventus walionyanyua mabingwa mnamo 1985 na 1996.

Chelsea iliyopiga Bayern Munich 4-3 kupitia penalti mnamo 2011-12, ndiyo klabu ya mwisho inayoshiriki Ligi Kuu ya Uingereza (EPL) kuwahi kutia kapuni ufalme wa UEFA.

OTEA MBALI: Manchester City waendea Tottenham Hotspur

 

Na MASHIRIKA

LONDON, UINGEREZA

TOTTENHAM Hotspur watakuwa leo Jumanne wenyeji wa Manchester City katika mchuano wa mkondo wa kwanza wa robo-fainali ya kuwania ufalme wa Klabu Bingwa Ulaya (UEFA).

Kwingineko, Liverpool wanatarajiwa kutamba dhidi ya FC Porto watakaokuwa wageni wao uwanjani Anfield. Liverpool waliwabandua Bayern Munich ya Ujerumani katika hatua ya 16-bora.

Miamba hao wa soka ya Uingereza walipokeza Porto kichapo cha 5-0 kwenye robo-fainali ya UEFA msimu jana.

Porto ambao kwa sasa wananolewa na kocha Sergio Coceicao, walifuzu kwa robo-fainali baada ya kuwabandua AS Roma ya Italia.

Kikosi hicho kinatazamiwa kutegemea pakubwa maarifa ya fowadi Moussa Marega ambaye amefunga mabao sita katika UEFA hadi kufikia sasa.

Mshindi wa mechi hizo za mikondo miwili atajikatia tiketi ya kuvaana ama na Barcelona au Manchester United kwenye nusu-fainali. Itakuwa ni mara ya pili kwa vijana wa kocha Mauricio Pochettino kusakata gozi katika uwanja wao wa nyumbani, Tottenham Hotspur Stadium.

Katika mchuano wao wa kwanza uwanjani humu, Tottenham walichuma nafuu kutokana na wingi wa mashabiki wao wa nyumbani na kuwapepeta Crystal Palace 2-0.

Ushindi huo uliowapaisha hadi nafasi ya tatu kwenye msimamo wa jedwali la Ligi Kuu ya Uingereza (EPL), ulikuwa wao wa kwanza kuvuna nyumbani tangu Februari.

Japo Tottenham wanapigiwa upatu wa kuyazima makali ya Manchester City, huenda hilo likawawia vigumu hasa ikizingatiwa ukatili ambao umedhihirishwa na masogora wa kocha Pep Guardiola katika michuano ya hivi karibuni. Man-City ambao wanapania kutia kapuni jumla ya mataji manne muhula, watajibwaga ugani wakijivunia ushindi wa 1-0 uliowashuhudia wakiwabandua Brighton kwenye nusu-fainali ya Kombe la FA wikendi.

Awali, Man-City walikuwa wamewadhalilisha Schalke ya Ujerumani kwa kichapo cha 10-2 kwenye raundi ya 16-bora ya UEFA.

Borussia Dortmund yapigwa

Spurs kwa upande wao, walifuzu kwa robo-fainali za UEFA baada ya kuwaangusha Borussia Dortmund kutoka Ujerumani.

Pochettino anatarajiwa kumwajibisha mvamizi Fernando Llorente ambaye atashirikiana na Harry Kane kwenye safu ya mbele. Pigo kubwa kwa kikosi hicho ni ulazima wa kukosekana kwa beki Eric Dier, mvamizi Erik Lamela na difenda mzaliwa wa Ivory Coast, Serge Aurier.

Man-City watasubiri zaidi ripoti ya madaktari ili kufahamu hali ya jeraha la Sergio Aguero ambaye aliumia wakati wa mechi iliyowakutanisha na Fulham yapata wiki moja iliyopita.

Aguero hakuwa sehemu ya kikosi cha Man-City kilichowapepeta Brighton kwenye robo-fainali ya Kombe la FA wikendi jana.

Mchezaji mwingine ambaye huenda akakosa kuunga kikosi cha kwanza cha Man-City ni beki Kyle Walker ambaye kwa sasa anauguza jeraha la paja.

Beki Benjamin Mendy anatarajiwa kurejea ugani baada ya kupona jeraha. Hata hivyo, Fabian Delph na Oleksandr Zinchenko watasalia mkekani kwa muda zaidi kutokana na majeraha ya mguu na bega mtawalia.

Man-City wana fursa nyingine hii leo ya kuendeleza ubabe wao dhidi ya Spurs ambao waliwabamiza katika mchuano wa mkondo wa kwanza katika EPL.

Man-City walisajili ushindi wa 1-0 katika mechi hiyo iliyochezewa uwanjani Wembley.

Ratiba ya Uefa (Jumanne, Aprili 9, 2019):

Spurs na Man-City

Liverpool na FC Porto

(Jumatano, Aprili 10, 2019):

Ajax na Juventus
Man-United na Barcelona

Ujerumani yalaza Uholanzi mechi ya kufuzu Euro

Na MASHIRIKA

ARMSTERDAM, UHOLANZI

KOCHA Ronald Koeman wa Uholanzi amesema anajutia kutofanyia kikosi chake mabadiliko muhimu mwishoni mwa kipindi cha pili katika mchuano wa Kundi C wa kufuzu kwa fainali za Euro 2020 uliowakutanisha na Ujerumani jijini Amsterdam wikendi ambayo imeisha.

Bao la dakika za mwisho la Nico Schulz lilihakikisha kwamba vijana wa kocha Joachim Loew wanalipiza kisasi dhidi ya Uholanzi waliowachabanga 2-0 katika mechi ya Nations League mnamo Novemba 2018.

Nico Schulz wa Ujerumani afungia timu yake bao la tatu Ujerumani iliposhinda wenyeji Uholanzi 3-2 Machi 24, 2019, uwanjani Johan Cruyff Arena jijini Amsterdam. Picha/ AFP

“Nilitaka sana kumleta Nathan Ake kujaza nafasi ya QWuincy Promes. Ni mabadiliko ambayo yangetuweka katika nafasi ya kutia kapuni angalau alama moja muhimu,” akasema Koeman katika mahojiano yake na wanahabari mwishoni mwa mechi.

Leroy Sane wa Manchester City aliwafungulia Ujerumani ukurasa wa mabao baada ya kushirikiana vilivyo na Serge Gnabry aliyechuma nafuu kutokana na masihara ya Matthijs de Ligt.

Ingawa mabao ya De Ligt na Memphis Depay yalisawazisha mambo, Schulz alikiyumbisha kabisa chombo cha wenyeji wao sekunde chache kabla ya kipenga cha kuashiria mwisho wa kipindi cha pili kupulizwa.

Matokeo hayo yana maana kuwa Ireland ya Kaskazini kwa sasa wanaselelea kileleni kwa Kundi C baada ya kuwapepeta Belarus 2-1 ugani Windsor Park. Awali, kikosi hicho kilikuwa kimewachabanga Estonia 2-0 katika mchuano wao wa ufunguzi wa kampeni za kufuzu kwa fainali za Euro mwakani.

Uholanzi ambao pia wamecheza michuano miwili, kwa sasa wanashikilia nafasi ya tatu baada ya kuzidiwa maarifa na Ujerumani.

Kujinyanyua

Ujerumani waliokosa huduma za wakongwe Thomas Muller, Jerome Boateng na Mats Hummels ambao kocha Joachim Loew amewatema kabisa, walitumia mchuano dhidi ya Uholanzi kujinyanyua baada ya kubanduliwa kwenye fainali za Kombe la Dunia za 2018 katika hatua ya makundi.

Licha ya kushindwa, Koeman alikiri kuridhishwa na kuimarika kwa kikosi chake kilichokosa kunogesha fainali za Euro 2016 na Kombe la Dunia mnamo 2018.

Kwingineko, fowadi Eden Hazard wa Chelsea alifunga bao katika mchuano wake wa 100 ndani ya jezi za Ubelgiji na kusaidia kikosi hicho kusajili ushindi wa 2-0 dhidi ya Cyprus katika Kundi I.

Hazard aliwaweka Ubelgiji kifua mbele katika dakika ya 10 kabla ya mvamizi Michy Batshuayi kushirikiana vilivyo na Thorgan Hazard ambaye ni kakaye Eden.

Batshuayi ambaye kwa sasa anachezea Crystal Palace amewafungia Ubelgiji jumla ya mabao 13 kutokana na mechi 25 za kimataifa. Scotland walitolewa kijasho kabla ya kuwachabanga San Marino 2-0 huku Urusi wakiwaponda Kazakhstan kwa mabao 4-0.

Ubelgiji ambao walitinga hatua ya nusu-fainali za Kombe la Dunia nchini Urusi mwaka jana, kwa sasa watakuwa wenyeji wa Kazakhstan na Scotland mwezi Juni katika michuano ijayo ya kufuzu kwa fainali za Euro 2020.

Ratiba ya Leo Jumanne

Kundi J

Armenia na Finland
Bosnia-Herzegovina na Ugiriki
Italia na Liechtenstein

Kundi D
Ireland na Georgia
Uswisi na Denmark

Kundi F
Malta na Uhispania
Norway na Uswidi
Romania na Faroe Islands

Mataji ya UEFA na Uropa yatatua Uingereza muhula huu

NA CHRIS ADUNGO

DROO ya robo-fainali za Ligi ya Uropa msimu huu ina maana kwamba Arsenal wanaweza tu kukutana na Chelsea kwenye fainali ya kipute hicho.

Arsenal wana mtihani mgumu wa kuwabandua Napoli katika hatua ya nane-bora ili kujikatia tiketi ya kuvaana na mshindi kati ya Valencia na Villarreal kwenye nusu-fainali.

Kwa upande wao, Chelsea wanapigiwa upatu wa kuwakomoa Slavia Prague ya Jamhuri ya Czech kirahisi kabla ya kukutana na kikosi kitakachotawala mchuano kati ya Benfica na Eintracht Frankfurt.

Chini ya kocha Maurizio Sarri, Chelsea waliwachabanga Arsenal 3-2 katika mchuano wa mkondo wa kwanza wa Ligi Kuu ya Uingereza (EPL) mnamo Agosti 2018.

Hata hivyo, mkufunzi Unai Emery ambaye pia huu ni msimu wake wa kwanza katika soka ya Uingereza, aliwaongoza Arsenal kulipiza kisasi katika mchuano wa mkondo wa pili ligini. Mabao kutoka kwa Alexandre Lacazette na Laurent Koscielny yaliwapa Arsenal ushindi muhimu wa 2-0 dhidi ya Chelsea mnamo Januari 2019.

Kikubwa kitakachofanya mwisho wa kampeni za Ligi ya Uropa kuwa wa kusisimua zaidi msimu huu ni kukutanishwa kwa Chelsea na Arsenal katika fainali iwapo watakosa kumaliza kinyang’anyiro cha Ligi Kuu ya Uingereza (EPL) ndani ya mduara wa nne-bora.

Iwapo Manchester United ambao wanajivunia ufufuo mkubwa chini ya Ole Gunnar Solskjaer watamaliza kampeni za EPL ndani ya nne-bora, basi njia ya pekee kwa Arsenal au Chelsea kufuzu kwa UEFA msimu ujao ni kunyanyua ubingwa wa Ligi ya Uropa.

Fainali ya kivumbi hicho mwaka huu itaandaliwa jijini Baku, Azerbaijan mnamo Mei 29. Arsenal walidumisha uhai wa kutawazwa mabingwa wa Ligi ya Uropa msimu huu baada ya kuwabandua Rennes kutoka Ufaransa kwa jumla ya mabao 4-3. Vijana wa Emery walipepetwa 3-1 katika mkondo wa kwanza ugenini.

Kwa upande wao, Chelsea waliwabandua Dynamo Kiev kwa jumla ya mabao 8-0 baada ya kuwadhalilisha wenyeji wao wao kwa kichapo cha 5-0 katika mchuano wa mkondo wa pili uwanjani Stamford Bridge.

Arsenal wataanza kampeni zao ugani Emirates huku Chelsea wakitua kwanza ugenini kabla ya kumalizia udhia dhidi ya Prague jijini London. Ni mara ya kwanza kwa wawakilishi wote wa soka ya Uingereza kufuzu kwa robo-fainali za Klabu Bingwa Ulaya (UEFA) na Ligi ya Uropa kwa wakati mmoja.

Liverpool, Manchester City, Manchester United au Tottenham Hotspur wanapigiwa upatu wa kunyanyua taji la UEFA msimu huu. Iwapo Arsenal au Chelsea nao watatwaa ufalme wa Ligi ya Uropa, basi ufanisi huo utarejesha kumbukumbu za 2017-18 ambapo mataji haya mawili yaliwaendea miamba wa soka ya Uhispania.

Katika kampeni za msimu huo, Atletico Madrid waliwazidi maarifa Olympique Marseille katika fainali ya Ligi ya Uropa huku Real Madrid wakiwachabanga Liverpool katika UEFA.

Chelsea walitawazwa mabingwa wa Ligi ya Uropa kwa mara ya mwisho mnamo 2013 huku Emery ambaye ana historia nzuri katika kivumbi hicho akiwaongoza Sevilla ya Uhispania kunyanyua ufalme wa taji hilo mnamo 2014, 2015 na 2016 mtawalia.

Emery, 47, alitua Sevilla baada ya kuagana na Spartak Moscow ya Urusi aliyokuwa ameifunza kwa miezi sita kufikia Januari 2013. Katika msimu wake wa kwanza kambini mwa Sevilla, kocha huyo mzawa wa Uhispania alinyakua taji la Europa League baada ya vijana wake kuwapiga Benfica ya Ureno kwenye fainali.

Man City, Barcelona, Liverpool au Juventus pazuri kunyakua UEFA

NA CHRIS ADUNGO

UPO uwezekano mkubwa kwa mshindi wa taji la Klabu Bingwa Ulaya (UEFA) muhula huu kutokea nchini Uingereza. Klabu hiyo ni ama Man-City au Liverpool. Si ajabu iwapo wawili hawa watakutana katika fainali.

Chelsea iliyopiga Bayern Munich 4-3 kupitia penalti mnamo 2011-12, ndiyo klabu ya mwisho inayoshiriki Ligi Kuu ya Uingereza (EPL) kuwahi kutia kapuni ufalme wa UEFA.

Droo ya robo-fainali ya UEFA itakayowakutanisha Manchester City na Tottenham Hotspur, Liverpool na FC Porto, kisha Manchester United na Barcelona msimu huu ni afueni kubwa kwa timu za EPL.

Mshindi kati ya Tottenham na Man-City atamenyana na atakayetamalaki mechi kati ya Ajax na Juventus katika nusu-fainali. Aidha, mshindi kati ya Barcelona na Man-United atavaana ama na Liverpool na au Porto katika nusu-fainali nyingine.

Historia inawaweka Barcelona katika nafasi nzuri zaidi ya kuwapepeta Man-United na kutinga nusu-fainali ambayo kwa asilimia kubwa, huenda iwakutanishe na Liverpool?

Man-United wanajivunia kushinda Barcelona mara moja pekee katika jumla ya mechi nane zilizopita. Vijana hawa wa kocha Ole Gunnar Solskjaer wataanza kampeni yao dhidi ya Barcelona ugani Old Trafford ili wasicheze mchuano wa mkondo wa pili kwa wakati mmoja na majirani zao wa jiji la Manchester.

Man-United walitawazwa mabingwa wa UEFA mara ya mwisho mnamo 2008 baada ya kuwalaza Chelsea nchini Urusi. Mwaka huo, waliwabandua Barcelona ambao ni mabingwa mara tano wa UEFA katika hatua ya nusu-fainali.

Man-City ambao wanafukuzia jumla ya mataji manne msimu huu wanapigiwa upatu wa kuendeleza ubabe wao dhidi ya Tottenham.

Mabingwa hawa watetezi wa taji la EPL tayari wanajivunia rekodi nzuri ambayo imewashuhudia wakiwachabanga Tottenham katika jumla ya mechi tatu zilizopita. Miamba hawa wawili wa EPL wanatafuta taji lao la kwanza la UEFA muhula huu.

Ushindi kwa Man-City utawapa hamasa zaidi ya kuwapepeta Juventus katika nusu-fainali. Juventus wanaojivunia huduma za Cristiano Ronaldo, wanatazamiwa kuwazima Ajax mapema katika robo-fainali.

Ajax ambao ni wafalme mara nne wa UEFA, hawana ushindi katika mechi tatu dhidi ya mabingwa wa zilizopita dhidi ya Juventus waliotawazwa mabingwa mnamo 1985 na 1996.

Liverpool ambao pia ni mabingwa mara tano wa UEFA, hawajapoteza dhidi ya Porto katika jumla ya mechi sita zilizopita. Makali ya Liverpool ambao pia wanatarajiwa kuwapiga kumbo Man-City kileleni mwa jedwali la EPL, yatawapa wakati mwepesi katika robo-fainali.

Hili la kushinda Porto likitimia, basi mtihani mgumu zaidi uliopo mbele ya Liverpool ni kuwapepeta Barcelona ambao iwapo wataponea, basi watajiweka pazuri kunyanyua ubingwa wa UEFA msimu huu kwa kuwapiku ama Man-City au Juventus.

Droo moto Ulaya Manchester United, Arsenal wakipangwa na miamba

Na MASHIRIKA

NYON, Uswizi

MITIHANI mikali inasubiri Manchester United na Arsenal katika Klabu Bingwa Ulaya na Ligi ya Uropa baada ya kukutanishwa na Wahispania Barcelona na Waitaliano Napoli, mtawalia.

Katika droo ya mechi za robo-fainali za Klabu Bingwa iliofanywa Ijumaa na Shirikisho la Soka barani Ulaya (UEFA), Manchester City ya Pep Guardiola itapimwa makali dhidi ya Tottenham ilioajiri Mkenya Victor Wanyama, miamba wa Italia Juventus wakabiliane na Waholanzi Ajax nao Liverpool waliopoteza dhidi ya Real Madrid mwaka 2018, walimane na ‘mswaki’ Porto.

Mechi za robo-fainali za Klabu Bingwa Ulaya zitaandaliwa kati ya Aprili 9 na Aprili 17.

Mshindi wa mechi kati ya Spurs na City atamenyana na mshindi kati ya Ajax na Juventus katika nusu-fainali, huku mshindi wa mechi kati ya Barcelona na United akikibaliana na mshindi kati ya Liverpool na Porto katika nusu-fainali nyingine.

Mechi za nusu-fainali zitasakatwa kati ya Aprili 30 na Mei 8.

United ya Ole Gunnar Solskjaer imeshinda Barca mara moja katika mechi nane zilizopita.

Itaanza kampeni yake ya kutafuta tiketi ya nusu-fainali uwanjani Old Trafford ili isicheze mechi ya mkondo wa pili nyumbani wakati mmoja na majirani City.

‘Mashetani wekundu’ United walishinda taji la tatu na mwisho barani Ulaya mwaka 2008, mwaka ambao pia ndio walichapa Barca 1-0 katika nusu-fainali.

Mabingwa mara tano Barca wataingia mchuano dhidi ya United wakiwa na motisha ya kuwashinda katika mechi mbili zilizopita kwa jumla ya mabao 5-1. City itaanza mechi dhidi ya Tottenham na rekodi nzuri baada ya kubwaga vijana wa Mauricio Pochettino katika mechi tatu zilizopita. Wawili hawa wanatafuta taji lao la kwanza la Klabu Bingwa.

Mabingwa mara tano Liverpool hawajapoteza dhidi ya Porto katika mechi sita zilizopita wakichapa washindi hawa wa mataji matatu mara tatu na kutoka sare mara tatu.

Katika mechi hizo, Liverpool ilimiminia Porto mabao 12 na kufungwa mawili pekee.

Wafalme mara nne Ajax hawana ushindi katika mechi tatu dhidi ya mabingwa wa mwaka 1985 na 1996 Juventus wanaojivunia kuwa na mkali Cristiano Ronaldo.

Mnyonge

Mechi zingine za robo-fainali ya Ligi ya Uropa zitashuhudia Wahispania Villarreal na Valencia wakimenyana, Benfica (Ureno) ikikabiliana na Eintracht (Ujerumani) nayo Chelsea ilimane na mnyonge Slavia Prague (Czech).

Arsenal ilisalia mashindanoni kwa kulipiza kisasi dhidi ya Wafaransa hao 3-0 uwanjani Emirates, Alhamisi.

Pierre-Emerick Aubameyang aliongoza ufufuo huo alipocheka na nyavu mara mbili na kumega pasi ambayo Ainsley Maitland-Niles alifunga.

Rennes, ambayo ilishinda mkondo wa kwanza 3-1, ililalamika kwamba Aubameyang alifunga bao la pili akiwa ameotea. Emery alishinda mataji matatu ya Uropa akiwa Sevilla. Anataka taji hili katika msimu wake wa kwanza uwanjani Emirates.

Nayo Chelsea iliingia robo-fainali ya Uropa kwa kuaibisha Dynamo Kiev (Ukraine) 5-0 kupitia mabao matatu ya Olivier Giroud nao Marcos Alonso na Callum Hudson-Odoi wakafunga moja kila mmoja. Iliingia robo-fainali kwa jumla ya mabao 8-0.

Mabingwa watetezi UEFA wasalimu amri

Na MASHIRIKA

MADRID, Uhispania

MATUMAINI ya Real Madrid kusonga mbele na kutwaa ubingwa wa Klabu Bingwa Ulaya (UEFA) kwa mara ya nne mfululizo yaliangamia baada ya kufungwa 4-1 na Amsterdam Ajax ya Uholanzi na kubanduliwa nje mechi ya kutafuta nafasi ya kufuzu kwa robo-fainali.

Vijana hao wa kocha Santiago Solari waliingia uwanjani mwao Santiago Bernabeu wakijivunia ushindi wa 2-1, huku wakihitaji sare ya aina yoyote na kusonga mbele.

Kichapo cha 4-1 kilikuwa cha kwanza kikubwa kwa Madrid ugani mwao Bernabeu tangu chapwe 3-0 na CSKA Moscow mwezi Desemba.

Kushindwa kwao kadhalika kumekuja siku sita baada ya kubanduliwa nje ya michuano ya Copa del Rey na Barcelona, huku wakiwa na mwana wa pointi 12 nyuma ya wapinzani hao wao wa La Liga.

Kwa mara ya kwanza mfululizo tangu 2015 ambao ni muda wa miezi 42, Real Madrid wamebanduliwa nje ya michuano ya Klabu Bingwa Ulaya.

Waliwekewa matumaini makubwa baada ya kutwaa taji hilo mara tatu mfululizo tangu msimu wa 2015-16.

Real Madrid wametinga hatua ya nusu-fainali ya michuano hiyo kila msimu tangu wabanduliwe nje katika hatua ya 16 bora na Lyon ya Ufaransa mnamo 2010, ambao ulikuwa mwaka wa kwanza Cristiano Ronaldo kuwachezea.

Mwaka 2019 mfungaji wao bora Karim Benzema alifanikiwa kufunga mabao manne pekee katika michuano hiyo, nyuma ya Robert Lewandowski (manane), Lionel Messi wa Barcelona (sita) au Dusan Tadic (pia sita).

Kadi nyekundu

Nahodha wao, Sergio Ramos ambaye aliikosa mechi hiyo kutokana na kadi nyekundu aliyopewa katika mkondo wa kwanza aliitazama mechi hiyo akiketi na mashabiki waliofika uwanjani.

Baada ya kichapo hicho, mashabiki wa Madrid waliondoka uwanjani kimya kimya bila kulalamika, huku wengine wakidhania huenda kuchelewa kwa klabu hiyo kusajili staa wa kujaza nafasi ya Ronaldo kumechangia matokeo mabaya katika mechi zao muhimu.

Gareth Bale aliyedhaniwa kujaza nafasi hiyo, hakuanza baada ya kucheza vibaya mwishoni mwa wiki.

Lakini, hata baada ya kuingia baada ya Lucas Vazquez kuumia, raia huyo wa Wales hakusaidia pakubwa kuokoa jahazi.

Aliyekuwa kocha wa Manchester United na Real Sociedad, David Moyes alisema, baada ya Ronaldo kuondoka, Madrid ilitarajiwa kuwategemea Luka Modric, Toni Kroos na Sergio Ramos, lakini huenda wakaondoka hivi karibuni kutokana na umri wao mkubwa.

Toni Kroos wa Real Madrid aondoka uwanjani Machi 5, 2019, ambapo Real Madrid CF ilipigwa na Ajax mabao 4-1 uwanjani Santiago Bernabeu. Picha/ AFP

Alisema ni jukumu la wakuu wa klabu hiyo kuanza kutafuta mapema wachezaji wa kujaza nafasi za nyota hao.

“Bila Ronaldo, wameshindwa kufunga mabao ya kutosha, mbali na kubanduliwa nje mbele ya mashabiki wao wengi waliomiminika katika uwanjani,” aliongeza.

Katika michuano hii msimu huu, Real Madrid ambao ni mabingwa mara 13, walishinda mechi nne. Ugani Bernabeu, Ajax ilipata mabao kupitia kwa Dusan Tadic (2), Hakim Ziyech na Lasse Schone. marco Asensio waliwafungia wenyeji bao la kufutia machozi, zikibakia dakika 20 mechi kumalizika.

Spurs roho juu ikiwaendea Dortmund kwa gozi kali UEFA

Na MASHIRIKA

LONDON, UINGEREZA

TOTTENHAM HOTSPUR watashuka leo Jumanne dimbani kuvaana na Borussia Dortmund wakiwa na wingi wa matumaini ya kutinga robo-fainali za Klabu Bingwa Ulaya (UEFA).

Hii ni baada ya kusajili ushindi wa 3-0 katika mchuano wa mkondo wa kwanza uliowakutanisha ugani Wembley katika hatua ya 16-bora ya kipute hicho.

Kingine kinachotazamiwa kuwa kiini cha hamasa ya Tottenham ni wingi wa visa vya majeraha ambavyo kwa sasa vinatishia kulemaza pakubwa safu ya nyuma ya Dortmund.

Tangu wazidiwe maarifa uwanjani Wembley, makali ya Dortmund ambao kwa sasa wananolewa na kocha Lucien Favre yameshuka pakubwa.

Miamba hao wa soka ya Ujerumani wamesajili sare moja dhidi ya wanyonge Nurnberg katika mchuano wa Bundesliga, wakavuna ushindi wa 3-2 dhidi ya Bayer Leverkusen mbele ya mashabiki wao wa nyumbani na kupoteza dhidi ya Augsburg waliowapepeta 2-1 mwishoni mwa wiki jana.

Matokeo ya Dortmund dhidi ya Augsburg yaliwaweka vijana hao wa Favre katika hatari ya kupitwa na Bayern Munich ambao kwa upande wao waliwapepeta Borussia Monchengladbach 5-1 ugenini.

Ubora wa mabao

Cha pekee ambacho kwa sasa kinawaweka Dortmund mbele ya Bayern katika jedwali la Bundesliga ni pengo la mabao mawili zaidi yanayojivuniwa na kikosi hicho cha Favre. Dortmund na Bayern wana alama 54 kila mmoja.

Hali haijawa tofauti pia kwa upande wa Tottenham katika soka ya Uingereza. Kikosi hicho cha kocha Mauricio Pochettino kimejizolea alama moja pekee ligini tangu walipowacharaza Dortmund.

Baada ya matumaini ya kunyanyua ufalme wa Ligi Kuu ya EPL kudidimia zaidi, Pochettino amewataka sasa vijana wake kuyaelekeza macho kwa kampeni za UEFA na kupiga hatua zaidi katika kipute hicho.

Kiu ya kuyaendea mabao ya mapema dhidi ya Tottenham ni jambo ambalo litavujisha zaidi safu ya nyuma ya Dortmund na hivyo kuwapa wavamizi Son Hueng-Min, Christian Eriksen na Harry Kane nafasi za kuwafungia waajiri wao mabao zaidi.

Iwapo Tottenham watatanguliwa kuwafunga Dortmund mbele ya mashabiki wao wa nyumbani ugani Signal Iduna Park, basi wenyeji watalazimika kufunga magoli matano zaidi ili kuweka hai tumaini finyu la kufuzu kwa hatua ya nane-bora.

Tottenham hawajasajili ushindi wowote wa ugenini katika UEFA tangu walipowakomoa Dortmund mnamo 2017. Tatu kati ya mechi zao nne zilizopita ugenini zilimalizika kwa sare huku Inter Milan wakiwachabanga katika mchuano wa makundi msimu huu.

Kukutana

Hadi kufikia sasa, Tottenham na Dortmund wamekutana mara tano. Ingawa Dortmund walishinda mechi zote mbili za raundi ya 16-bora katika Ligi ya Uropa mnamo 2016, Tottenham waliibuka na ushindi katika mechi zote tatu katika UEFA.
Baada ya kuwapepeta Dortmund 3-1 mnamo Septemba 2017, Tottenham walisajili ushindi wa 2-1 ugenini mnamo Novemba 2017 kabla ya kuwazidi maarifa wageni wao hao 3-0 katika mkondo wa kwanza msimu huu.

Katika mchuano mwingine wa Jumanne katika UEFA, mabingwa watetezi Real Madrid watakuwa wenyeji wa Ajax kutoka Uholanzi uwanjani Santiago Bernabeu.

Real wanaotiwa makali na kocha Santiago Solari watajibwaga ugani wakijivunia ushindi wa 2-1 katika mkondo wa kwanza.

Jumatano itakuwa zamu ya Porto kualika Roma nchini Ureno huku Man-United wakiwaendea miamba wa soka ya Ligi Kuu ya Ufaransa (Ligue 1), PSG.

Maskini Juventus kona mbaya baada ya kichapo cha Atletico

Na MASHIRIKA

MADRID, Uhispania

KAMPENI ya Cristiano Ronaldo na klabu yake ya Juventus kwenye ngarambe ya Klabu Bingwa Ulaya ilipata pigo Jumatano pale ilipobwagwa 2-0 na Atletico Madrid katika mechi ya mkondo wa kwanza uwanjani Wanda Metropolitano.

Ronaldo alirejea katika jiji hilo la Uhispania alikopata ufanisi mkubwa akisakatia Real Madrid, lakini ni mahasimu wake wa zamani waliokuwa wakisherehekea kipenga cha mwisho kilipopulizwa baada ya kuona lango kupitia kwa Jose Gimenez na Diego Godin.

Fowadi wa Juventus Cristiano Ronaldo audhibiti mpira awamu ya 16-bora Klabu Bingwa Ulaya Juve ilipokaribishwa na Club Atletico de Madrid uwanjani Wanda Metropolitan, Madrid mnamo Februari 20, 2019. Picha/ AFP


“Bado hatujakamilisha kazi,” alisema kocha wa Atletico, Diego Simeone. “Kuna mechi ya mkondo wa pili na tunajua kitakuwa kibarua kigumu.”

“Kwa bahati nzuri, hatukukubali kufungwa bao la tatu,” alisema kocha wa Juventus, Massimiliano Allegri.

“Kwa sababu matokeo ya 2-0 yanaweza kubadilishwa. Bado hatujaaga mashindano.”

Hata hivyo, ushindi huu ndio ambao vijana wa Simeone walistahili kuupata. Antoine Griezmann alikuwa amegonga mwamba, huku teknolojia ya video (VAR) ikinyima Atletico bao mara mbili baada ya uamuzi wake mzuri kufutilia mbali penalti ya Diego Costa na kichwa cha Alvaro Morata kabla ya Gimenez kutikisa nyavu.

Huku Juventus ikijaribu kupigania sare ya kutofungana, Atletico ilionyesha ujasiri. Simeone alimwingiza uwanjani Morata, Thomas Lemar na Angel Correa, wote karibu baada ya dakika ya 60, na ni ujasiri huu uliozalisha matunda.
Juve bila shaka haijabanduliwa kutoka kipute hiki, hasa kwa sababu Costa na Thomas Partey wote watakosa mechi ya marudiano mjini Turin wakitumikia marufuku baada ya kula kadi za njano.

Hata hivyo, kukosa kupata bao la ugenini na kuzidiwa maarifa katika kipindi cha pili si dalili nzuri kwa Juve kupata ufufuo.

“Hawakupi nafasi,” alisema Allegri. “Wanakufanya unacheza vibaya.”

Timu zote zitaingia mechi ya marudiano na presha ya kusonga mbele. Atletico, ambayo uwanja huo wake wa nyumbani utatumika kwa fainali ya Klabu Bingwa mnamo Juni 1 itapata fursa nzuri ya kupokonya Real taji katika mji huu ambapo zinatoka.

Nayo Juventus, ambayo imesubiri taji hili la kifahari kwa miaka 23, imekuwa na matarajio makubwa kuliko wakati mwingine wowote katika historia yake tangu mchana-nyavu matata Ronaldo awasili.

Schalke 04 yaikaribisha Manchester City

BERLIN, Ujerumani

MANCHESTER City watazuru jijini Gelsenkirchen leo Jumatano usiku kupambana na wenyeji Schalke 04 katika mechi ya duru ya kwanza ya gozi la Klabu Bingwa Ulaya (UEFA), hatua ya 16-bora.

Vijana hao wa kocha Pep Guardiola walipoteza mechi moja pekee katika Kundi G na kumaliza katika nafasi ya kwanza.

Klabu hii imekuwa katika kiwango kizuri tangu mwezi Desemba ambapo imeshinda mechi 11 kati ya 12 katika mashindano mbalimbali, huku ikifunga jumla ya mabao 46.

Schalke kwa upande wao, wanajivunia wachezaji kadhaa walio na ujuzi wa mechi kubwa, na pia wamekuwa na rekodi nzuri ugani Veltina Arena ambako ndiko mechi hiyo itachezewa.

Kocha Domenico Tedesco wa Schalke 04 ahutubia wanahabari Februari 19, 2019, mjini Gelsenkirchen, Ujerumani. Picha / AFP

Walimaliza ligi katika nafasi ya pili, nyuma ya Bayern Munich, lakini msimu huu hali imekuwa ngumu kiasi cha kushindwa kuondoka katika eneo la hatari.

Katika kiwango cha Klabu Bingwa Ulaya (UEFA), klabu hiyo maarufu kama Die Konigsblauen ilimaliza ya pili, na pia sawa na City, walimaliza mechi ya makundi kwa kupoteza mechi moja pekee.

City wataingia uwanjani siku chache baada ya kuicharaza Newport County 4-1 wakati ambapo Schalke waliagana 0-0 na Freiburg kwenye Ligi Kuu ya Ujerumani.

Wenyeji chini ya kocha Domenico Tedesco watacheza mechi ya leo bila nyota kadhaa kutokana na majeraha, lakini Kinda Rabbi Matondo atapata fursa ya kucheza dhidi ya klabu yake ya zamani, Manchester City kabla ya kuyoyomea Bundesliga mapema mwaka 2019.

Kadhalika, itakuwa fursa nzuri kwa mlinzi Matija Nasralic kucheza dhidi ya Manchester City, timu yake ya zamani.

Sebastian Rudy ambaye majuzi alihusishwa na mpango wa kujiunga na mabingwa hao wa EPL pia atakuwa kikosini kusaidia Schalke kupata matokeo mema kwenye mechi hii ya mkondo wa kwanza.

Wachezaji wengine wanaotarajiwa kupewa nafasi kikosini ni pamoja na Amine Harit na Weston McKennie.
Suart Serdar aliyeonyeshwa kadi nyekundu mwishoni mwa wiki hatakuwa kikosini, pamoja na Omar Mascarell atakayesubiri hadi mkondo wa pili kutokana na kadi alioonyeshwa katika mechi ya awali.

Benjamin Stambouli na Rudy watakosa kucheza mechi ya marudiano iwapo wataonyeshwa kadi ya pili ya manjaoi katika mechi hiyo.

Kwa upnade mwingine, Nicolas Otamendi, Sergio Aguero na Fermandinho watakosa kucheza mkondo wa pili iwapo wataonyeshwa kadi za njano.

Benjamin Mendy na Vincent Kompany wanasumbuliwa na majeraha na huenda wasijumuishwe kikosini.

Danilo au Oleksandr, mmoja wao ataanza kama beki wa kushoto katika kikosi hiki cha kocha Pep Guardiola.
Huenda Leroy Sane akaanza kama mchezaji wa akiba dhidi ya klabu hiyo yake ya zamani (Schalke).

Droo ya UEFA: Klopp kumenyana na Bayern Munich

NA CECIL ODONGO

KLABU ya Manchester United na Paris Saint Germain zitakutana kwenye hatua ya muondoano katika mechi za kuwania klabu bingwa barani Uropa baada ya droo kali kufanyika Jumatatu Disemba 17 katika makao makuu ya UEFA, Nyon Uswidi.

Mchuano mwingine mkali utawakutanisha Liverpool waliofuzu fainali ya msimu uliopita ambao pia ni mabingwa mara tano wa kombe hilo dhidi ya washindi wa mwaka wa 2012-13 Bayern Munich.

Hii hapa ratiba kamili ya mechi hizo zitakazorejelewa mwezi wa Februari mwaka wa 2019

Schalke vs Manchester City

Atletico Madrid vs Juventus

Manchester United vs Paris Saint Germain

Tottenham Hotspur vs Borussia Dortmund

Olympic Lyon vs Barcelona

AS Roma vs Porto

Ajax vs Real Madrid

Liverpool vs Bayern Munich

Real Madrid mara hii hawaendi popote UEFA, ManCity wana nafasi kubwa

NA CHRIS ADUNGO

KUKAMILIKA kwa kampeni za makundi katika kipute cha Klabu Bingwa Ulaya (UEFA) wiki jana kulipisha droo ya hatua ya 16-bora itakayofanyika leo jijini Nyon, Uswisi.

Timu 16 zilizotinga awamu ya mwondoano zitafahamu wapinzani wazo wa hatua ijayo itakayopigwa kati ya Febaruari 12 na Machi 13, 2019.

Miongoni mwa wawakilishi wa EPL katika kipute hicho, ni Manchester City ndio waliotia fora zaidi kwa kuwapiku Lyon, Shakhtar Donetsk na Hoffenheim na kumaliza kileleni kwa Kundi F. Vikosi vingine vya EPL -Tottenham Hotspur, Liverpool na Manchester United viliambulia nafasi za pili kutoka makundi B, C na H mtawalia.

Ufanisi wa Man-City unatarajiwa kuwapa nafuu ya kukutana na mpinzani mnyonge katika hatua ya 16-bora; ima awe Atletico Madrid, Schalke, Ajax au Roma ambao waliambulia nafasi za pili katika makundi A, D, E na G mtawalia.

Tottenham ambao walimaliza nyuma ya Barcelona katika Kundi A, wanatarajiwa kukutanishwa na mpinzani mkali zaidi katika soka ya bara Ulaya. Hali sawa na hiyo inawasubiri Man-United na Liverpool ambao walizidiwa maarifa na Real Madrid katika fainali ya muhula jana.

Licha ya kusuasua sana hadi kufikia sasa katika kampeni za EPL, Man-United waliambulia nafasi ya pili nyuma ya Juventus katika Kundi H kwenye UEFA.

Man-United, Ajax na Schalke ni miongoni mwa wapinzani walioambulia nafasi za pili ambao kila kikosi kilichomaliza kileleni mwa kundi kingetamani sana kukutana nao.

Kati ya klabu zilizotawala vilele vya makundi yao, ni Porto pekee ndiyo inayoonekana kuwa dhaifu katika tapo linalowajumuisha pia Barcelona, Bayern Munich, Borussia Dortmund, Juventus, Man-City, PSG na mabingwa watetezi wa UEFA, Real Madrid.

Porto kwa sasa wanatazamiwa kukutana ama na Liverpool, Tottenham au Man-United.

Tangu kocha Lucien Favre apokezwe mikoba ya Dortmund, kikosi hicho kilichowapiga kumbo Atletico, Club Brugge na Monaco katika Kundi A kinajivunia ufufuo mkubwa kiasi kwamba hakuna mpinzani yeyote ambaye angetamani kukutana nao.

Kufikia sasa, Dortmund wamepoteza mchuano mmoja pekee katika mapambano yote ya msimu huu na tayari wanaselelea kileleni mwa Bundesliga huku wakidumisha pengo kubwa la alama kati yao na Monchenggladbach ambao ni wa pili jedwalini.

Real wamenyanyua mataji manne ya UEFA katika kipindi cha miaka mitano iliyopita. Matatu kati ya mataji hayo yaliwajia kwa mfululizo wa miaka misimu mitatu iliyopita chini ya kocha Zinedine Zidane ambaye kwa sasa anahusishwa na Man-United na Bayern Munich.

Kwa mtazamo wangu, sioni kabisa uwezekano wa Real kuendeleza ubabe wao huo msimu huu chini ya mkufunzi mpya Santiago Solari. Kwa hakika, Real ambao pia wanasuasua katika La Liga, ni wafalme wa UEFA ambao wanachechemea tu msimu huu.

Kati ya klabu zote zinazonogesha kivumbi cha EPL, ni Man-City ambao wanatarajiwa kukutana sasa na Schalke kutoka Ujerumani, ndio wameonesha ishara na uwezo wa kuyakabili vilivyo mawimbi ya ushindani katika kipute cha UEFA msimu huu.

Si ajabu mabingwa hao watetezi wa EPL wajikakamue vilivyo katika michuano iliyopo mbele yao kiasi cha kutawazwa wafalme wa UEFA hatimaye.

Mbali na Man-City, ninahisi kwamba Barcelona na PSG pia wana fursa nzuri zaidi ya kutawazwa mabingwa wa UEFA msimu huu.