Man-Utd wakataa ofa kutoka kwa Sevilla ya kumtwaa Martial kwa mkopo Januari 2022

Na MASHIRIKA

MANCHESTER United wamekataa ofa kutoka kwa Sevilla ya kumsajili nyota Anthony Martial kwa mkopo mnamo Januari 2022.

Mnamo Disemba 22, fowadi huyo raia wa Ufaransa mwenye umri wa miaka 26 aliambia kocha mshikilizi wa Man-United, Ralf Rangnick, kwamba anataka kutafuta hifadhi mpya kwingineko haraka iwezekanavyo.

Hata hivyo, Rangnick alisisitiza kwamba hilo lingefanyika iwapo tu kikosi ambacho kingetoa ofa ya kuridhisha usimamizi wa Man-United kingejitokeza.

Sevilla walidhani wangenijasia huduma za Martial wakati wa muhula mfupi wa uhamisho wa wachezaji mnamo Januari 2022. Hata hivyo, inaripotiwa kwamba miamba hao wa Uhispania wako radhi kugharimia nusu ya mshahara ambao Martial kwa sasa anadumishwa nao ugani Old Trafford. Man-United humlipa mshambuliaji huyo wa zamani wa AS Monaco ya Ufaransa kima cha Sh23.4 milioni kwa wiki.

Man-United bado hawajaamua iwapo watamwachilia Martial ahamie kwingineko kwa mkopo. Iwapo wamefanya hivyo, basi watakumbatia ofa kutoka kwa kikosi kitakachowaletea ada ya mkopo pamoja na kulipia mshahara wote wa sogora huyo ambaye alijiunga nao mnamo 2015.

Martial alisajiliwa na Man-United kutoka Monaco kwa Sh5.6 bilioni, ada hiyo ikimfanya chipukizi ghali zaidi katika ulingo wa soka duniani kwa wakati huo.

Kufikia sasa, amefungia Man-United mabao 79 kutokana na mechi 268. Alipoteza uhakika wa kuunga kikosi cha kwanza cha Man-United baada ya mabingwa hao mara 20 wa EPL kujinasia huduma za Cristiano Ronaldo, Edinson Cavani na Jadon Sancho.

Martial hajachezea Man-United katika mechi yoyote tangu Rangnick apokezwe mikoba ya kusimamia kikosi hicho na amewajibishwa mara 10 pekee kutokana na mashindano yote ya kikosi hicho msimu huu.

TAFSIRI NA: CHRIS ADUNGO