Faida za mafuta ya mbarika yaani castor oil

NA MARGARET MAINA

MAFUTA ya mbarika – castor oil – huchukuliwa kuwa mafuta ya mboga ambayo yana rangi ya manjano na hutolewa kwa kuponda mbegu za mmea wa castor.

Faida nyingi zinazopatikana kwa kutumia mafuta ya castor ni matokeo ya muundo wake kikemikali. Mafuta ya castor yamejaa asidi ya mafuta ya Omega-9.

Mafuta ya castor yamekuwa yakitumika kama dawa ya kutibu magonjwa mbalimbali ya ngozi ya maambukizi, kuondoa kuvimbia na kuongeza afya ya nywele. Hata hivyo, mafuta ya castor yanaweza kutumika kusaidia mfumo wa kinga.

Dawa ya asili ya ugonjwa wa yabisi

Mafuta ya castor ni mafuta bora ya masaji kwa viungo kwa wanaosumbuliwa na ugonjwa wa yabisi, misuli inayouma, na wenye uvimbe kwa neva zao.

Kuondoa michirizi

Michirizi mara nyingi husababishwa na ujauzito na kupata uzito haraka, lakini pia inaweza kuwa matokeo ya kuzeeka, homoni, kupoteza uzito ghafla, na uvimbe. Mafuta ya castor yanajulikana kama mojawapo ya tiba bora kwa magonjwa mbalimbali ya ngozi.

Mafuta haya ni moisturizer bora na ni tiba madhubuti ya kuondoa alama za michirizi isiyofaa.

Mafuta ya castor kwa matibabu ya chunusi

Chunusi, ni matokeo ya uchafu unaojilimbikiza kwenye vinyweleo vyako, na kusababisha ngozi kuwasha.

Dawa nyingi za chunusi kwenye soko leo zina peroxide ya benzoyl na asidi ya salicylic, ambayo hukausha ngozi.

Mafuta ya castor huondoa uchafu, seli za ngozi zilizokufa, mafuta mengi na bakteria bila kukausha ngozi yako.

Kuondoa mistari na mikunjo

Mafuta ya castor husaidia kupunguza mistari laini na makunyanzi kwa sababu hupenya ndani ya ngozi ambayo huchochea utengenezaji wa elastin na collagen. Mafuta ya castor hufanya uso kuwa na unyevu na pia ni muhimu katika kupunguza kuonekana kwa mistari myembamba na mikunjo.

Mafuta ya castor kwa ukuaji wa nywele

Mafuta ya castor, na haswa zaidi, mafuta ya Jamaican Black Castor, yamekuwa huzifanya nywele zinawiri. Yanasaidia katika kuimarisha ukuaji wa nywele, kupunguza uharibifu wa nywele kutokana na matumizi ya baadhi ya bidhaa, kufanya nywele kung’aa na kujaa zaidi, kuzuia ngozi kavu ya kichwa, na kuboresha afya ya jumla ya nywele zako.

Kukabili tatizo la tumbo kufura

Matumizi ya mafuta ya castor ni njia maarufu ya kukabili tatizo la kuvimba tumbo.