Ishara na dalili za upungufu wa vitamini C mwilini

NA MARGARET MAINA

VIASHIRIA vya upungufu wa vitamini C vinaweza kujumuisha uchovu, michubuko rahisi, na ukakamavu wa ngozi.

Unaweza kuwa na uwezekano mkubwa wa kuwa na upungufu huu ikiwa una magonjwa fulani, ikiwa ni pamoja na anoreksia.

Vitamini C ni kirutubisho muhimu ambacho kinapaswa kutumiwa mara kwa mara ili kuzuia upungufu.

Upungufu ni nadra sana katika nchi zilizoendelea kutokana na kuwepo kwa mazao mapya na kuongezwa kwa vitamini C kwa baadhi ya vyakula na virutubisho.

Sababu kuu za hatari ya upungufu wa vitamini C ni lishe duni, ulevi, anoreksia, ugonjwa wa akili, uvutaji sigara na usafishaji damu.

Ingawa dalili za upungufu mkubwa wa vitamini C zinaweza kuchukua miezi kadhaa kusitawi, kuna dalili za hila za kuangalia.

Ngozi mbaya, iliyo kakamavu

Vitamini C ina jukumu muhimu katika utengenezaji wa kolajeni, protini ambayo iko kwa wingi katika tishu zinazounganishwa kama ngozi, nywele, viungo, mifupa na mishipa ya damu.

Viwango vya vitamini C vinapokuwa chini, hali ya ngozi iliyokakamaa inaweza kutokea nyuma ya mikono, mapaja au matkalio kutokana na mkusanyiko wa protini ya keratini ndani ya vinyweleo.

Nywele za mwili zilizokunjamana

Upungufu wa vitamini C pia unaweza kusababisha nywele kukua katika umbo lililopinda au lililokunjamana kutokana na kasoro zinazojitokeza katika muundo wa protini wa nywele zinapokua.

Nywele aina hii ni mojawapo ya ishara mahususi za upungufu wa vitamini C lakini huenda zisiwe dhahiri, kwani nywele hizi zilizoharibika zina uwezekano mkubwa wa kukatika.

Wekundu kwenye vinyweleo

Hali hii husababishwa na mishipa mingi ya damu ambayo hutoa damu na virutubisho kwa eneo hilo.

Mwili unapokuwa na upungufu wa vitamini C, mishipa hii midogo ya damu inakuwa tete na kukatika kwa urahisi, na hivyo kusababisha madoa madogo yenye rangi nyekundu kutokeza karibu na vinyweleo.

Hii ni ishara ya upungufu wa vitamini C.

Kuchubuka kwa urahisi

Michubuko hutokea wakati mishipa ya damu chini ya ngozi hupasuka, na kusababisha damu kuvuja katika maeneo kadhaa.Michubuko rahisi ni ishara ya kawaida ya upungufu wa vitamini C kwani uzalishaji duni wa kolajeni husababisha mishipa dhaifu ya damu.

Michubuko inayohusiana na upungufu inaweza kufunika sehemu kubwa za mwili au kuonekana kama vitone vidogo vya zambarau chini ya ngozi.

Majeraha kupona polepole kupindukia

Kwa kuwa upungufu wa vitamini C hupunguza kasi ya uundwaji wa kolajeni, husababisha majeraha kupona polepole zaidi.

Katika hali mbaya ya upungufu wa vitamini C, majeraha ya zamani yanaweza kufunguka tena, na hivyo kuongeza hatari ya kuambukizwa.

Uponyaji wa jeraha polepole ni mojawapo ya dalili za juu zaidi za upungufu na kwa kawaida hazionekani hadi mtu amepungukiwa kwa miezi mingi.

Viungo vilivyovimba

Kwa kuwa viungo vina tishu nyingi zinazounganishwa zenye kolajeni, vinaweza pia kuathiriwa na upungufu wa vitamini C.

Maumivu ya viungo yanayohusiana na upungufu wa vitamini C, mara nyingi huwa makali ya kutosha kusababisha kuchechemea au ugumu wa kutembea.

Kutokwa na damu ndani ya viungo kunaweza pia kutokea kwa watu ambao hawana vitamini C, na kusababisha uvimbe na maumivu ya ziada.

Kutokwa na damu kwenye fizi na kupoteza meno

Ufizi mwekundu, kuvimba, kutokwa na damu ni ishara nyingine ya kawaida ya upungufu wa vitamini C.

Bila vitamini C ya kutosha, tishu za ufizi hudhoofika na kuvimba na mishipa ya damu huvuja damu kwa urahisi Zaidi.

Katika hatua za juu za upungufu wa vitamini C, ufizi unaweza hata kuonekana zambarau na kuoza.

Hatimaye, meno yanaweza kuanguka kwa sababu ya ufizi usio na afya na dentini dhaifu.

Kinga duni

Vitamini C hujilimbikiza ndani ya aina mbalimbali za seli za kinga ili kuzisaidia kupambana na maambukizi na kuharibu vimelea vinavyosababisha magonjwa.

Upungufu wa vitamini C unahusishwa na kinga duni na hatari kubwa ya kuambukizwa, pamoja na magonjwa hatari kama nimonia.

Anemia ya upungufu wa madini ya chuma unaoendelea

Vitamini C na anemia ya upungufu wa madini mara nyingi hutokea pamoja.

Dalili za upungufu wa madini ya chuma ni pamoja na kupauka, uchovu, kupumua kwa shida wakati wa mazoezi, ngozi kavu na nywele na maumivu ya kichwa.

Viwango vya chini vya vitamini C vinaweza kuchangia upungufu wa anemia ya chuma kwa kupunguza ufyonzwaji wa madini ya chuma kutoka kwa vyakula vinavyotokana na mimea na kuathiri vibaya kimetaboliki ya madini ya chuma.

Upungufu wa vitamini C pia huongeza hatari ya kutokwa na damu nyingi, ambayo inaweza kuchangia anemia.

Ikiwa anemia ya upungufu wa chuma itaendelea kwa muda mrefu bila sababu dhahiri, inaweza kuwa busara kuangalia viwango vyako vya vitamini C. Chungwa kwenye sahani.