MAPISHI KIKWETU: Pilau yenye uyoga na njegere

NA MARGARET MAINA

[email protected]

Muda wa kuandaa: Dakika 15

Muda wa mapishi: Dakika 50

Walaji: 3

Vinavyohitajika

vikombe 1 ½ vya mchele wa pishori
vijiko 2 vya pilau masala
punje 5 za kitunguu saumu; hakikisha unasagasaga
kitunguu maji chekundu kilichokatwa vipande vipande
jani 1 la bay
kijiko 1 cha jira
chumvi kwa ladha
kijiko 1 cha nyanya ya kopo
kikombe cha njegere zilizochemshwa
kikombe 1 uyoga

Maelekezo

Katika sufuria, weka kitunguu chekundu, kitunguu saumu na chumvi kidogo. Pika hivi hadi viwe na rangi ya hudhurungi ya dhahabu. Jihadhari visiungue bali viwe na rangi ya kahawia. Hii ni hatua muhimu ya kupata rangi hiyo nzuri ya kahawia ya pilau.

Pilau masala ni mchanganyiko wa viungo unaojumuisha viungo vifuatavyo: pilipili nyeusi, jira, karafuu, mdalasini na iliki.

Unaweza kujitengenezea nyumbani na kubadilisha uwiano wa viungo vilivyotajwa ili kukidhi ladha yako.

Vitunguu vikishakuwa na rangi ya kahawia, weka nyanya ya kopo, pilau masala yako iliyosagwa na acha hii iive hadi ichanganyike kabisa. Watu wengine hawatumii nyanya. Kisha ongeza uyoga.

Ikiwa ungekuwa ukipika pilau ya nyama ya ng’ombe au kuku, ungeongeza pia katika hatua hii. Tofauti tu ni kuwa, utapika kwa muda mrefu zaidi kuliko uyoga.

Ongeza uyoga, changanya na baada ya dakika mbili, ongeza maji na wali wako.

Pika hadi maji yapungue kiasi cha robo tatu kisha ongeza njegere. Zinaongezwa kuelekea mwisho kwa sababu tayari zimepikwa.

Changanya njegere kwenye wali taratibu kwa uma, kisha funika na kifuniko na kuruhusu pilau kumaliza kupika.

Kisha baada ya kuiva, pakua na kachumbari na ufurahie.