VITUKO: Chicharito hatarini kutemwa kufuatia ukware wake na wa pembeni

IMEKUSANYWA NA CHRIS ADUNGO

NYOTA wa zamani wa Manchester United na West Ham United, Javier ‘Chicharito’ Hernandez, 33, yuko katika hatari ya kutafunwa na baridi ya ukapera baada ya kidosho Nicole McPherson kutishia kumtema.

Sogora huyo raia wa Mexico ambaye pia amewahi kuchezea Real Madrid, ameanza kutupia macho vipusa wapya miezi michache tu baada ya kujinasia penzi la Nicole ambaye ni mwanamitindo maarufu kutoka Ecuador.

Chicharito anayechezea LA Galaxy, alinaswa akiponda raha na mademu watatu wikendi iliyopita katika eneo la Los Angeles, Amerika. Baadhi ya picha alizopigwa zilimkoroga nyongo Nicole ambaye sasa yuko radhi kujiendea zake.

Alianza kumtambalia Nicole kimapenzi mnamo Januari, mwaka mmoja baada ya kutemana na mkewe raia wa Australia, Sarah Kohan. Nicole ana mtoto wa kiume mwenye umri wa miaka mitano kutokana na uhusiano wa awali na dume jingine. Jina la mtoto huyo ni Leo.

Chicharito amekiri kuwa amekuwa akikabiliana na msongo wa mawazo tangu ampoteze babu yake kutemana na Sarah. Hali hiyo ndiyo imemsukuma kwenye anasa.

Sarah ambaye ni msomi wa masuala ya sheria kutoka Chuo Kikuu cha Havard, pia ni mwanamitindo na mwanablogu maarufu aliyekuwa mwepesi wa kujilegeza kwa wanasoka wa haiba na kupakia mitandaoni picha zake za uchi.Alifunga pingu za maisha na Chicharito mnamo 2020 na wakajaliwa mtoto wa kiume, Noah.

Wakati akioolewa, Sarah alikuwa na mtoto mwingine, Nala, kutokana na uhusiano wake wa awali na Diego Drayfus.

Kabla ya kumpata Sarah, Chicharito alikuwa akichovya asali kwenye buyu la mwigizaji mahiri raia wa Uhispania, Andrea Duro, 29. Andrea alikuwa kiini cha kusambaratika kwa penzi la awali kati ya Chicharito na mwanahabari raia wa Uhispania, Lucia Villalon.