Matokeo mseto yalishuhudiwa ya ligi za Kaunti na Kaunti ndogo

Na PATRICK KILAVUKA

Olympic ilifunza soka FC Talents kwa kuirambisha 4-0 katika mojawapo wa matokeo mseto ya ligi ya Kaunti ya Shirikisho la Soka Kenya (FKF), Nairobi West, uwanjani Kihumbuini, wikendi.

Mabao ambayo yaliyonyima umakinifu uwanjani yalipatikana kupitia Dennis Obege dakika ya 24, Kevin Kimutai dakika ya 41, Evans Maosa dakika ya 65 na William Babayaro dakika ya 75. Katika mechi Zingine, Kibagare Sportiff walimegamega na kuwasaga kipande FC 3-2. Mfumaji Ibrahimu Mise ndiye alikuwa nyota wa Sportiff baada ya kucheka na nyavu mara tatu mtawalia kunako dakika ya 13, 45 na 66 na Kipande ilipunguza mwanya wa magoli kupitia Ager Emmanuel dakika ya 24 na Patrick Oluchili dakika ya 53.

Desai walionesha dimba safi katika mchuano wa Ligi ya FKF, Kaunti, Nairobi West, pale ambapo waliwapepeta Kangemi Patriots 2-1. Papai Mark aliwafungulia milango ya magoli Desai kunako dakika ya 15 kabla Fabian Mnavi kuyumbisha chombo cha wapinzani kunako dakika ya 72. Aidha, Patriots walijikasa kisabuni kujibu la kufuta machozi kunako dakika ya 53.

Kipande FC (jezi nyeupe) wakicheza dhidi ya Kibagare Sporiff (jezi ya majano) ambapo waliponyoka na ushindi wa 3-2 uwanjani Kihumbuini…Picha/PATRICK KILAVUKA

Katika mechi ya Ligi ya Kaunti-ndogo, FKF, Nairobi West, True Talents of Africa waliwayeyusha Real Stars 2-1 katika patashika murua uga uo huo. Washindi walipata mabao kupitia Hussein Zomora na Ayii Warral ilhali Stars walitangulia kupitia mfumaji Adrian Indamira.

Kwingineko, katika mechi ya Ligi ya Kaunti-ndogo, FKF, Nairobi West, uwanjani Gachie, FC Talents Youth walipata kichapo cha 3-0 mbele ya Gachie Friends. Walioweka Friends kifua mbele walikuwa Neville Wambulwa kunako dakika ya 54 na Samwel Nyongesa aliyefunga mawili dakika ya 58 na 72.